Ɩzɩrayɛl dʋ́ŋdʋ́ʋ̃́ nɩdɩɩsɛ Sinayi gɩrbétéke ni
1
1 Ɩzɩrayɛl nɩɛ Ezipiti lɩɩ har mɛ́, bɩŋsɛ bɛllɛ nyúú mí, ʋ bʋ́llɛ cana dʋ́ŋdʋ́ʋ̃́ tapʋl nɛ́, Nyuutɩna Wɩɩsɛ bʋ́l Moyizi rɩ́, Ceme táŋtɛjaa sɩɛrʋ a bʋlɛ́: 2 «Ɩ rɩ́ Aarɔŋ, ɩ́ dɩɩsɛ Ɩzɩrayɛl nɩɛ nɩɛ wuu, a tɩŋ duowa arɩ́ jaáwa, a pʋ́ŋsɛ báála wuu yɩra, balá baláwa. 3 Ɩ́ tɩŋ Ɩzɩrayɛl sóójipúlli dɩtɩllɛ a dɩɩsɛ báála ná wuu há kéŋ bɩŋsɛ mɛrɛ́, arɩ́wɔ́ ná bɩŋsɛ há dɔ́wɛ́ mɛrɛ́ mɛ́, a wolli lal aá yo. 4 Jɩmʋ́l wuu sɩɛrʋ, jɩtɩ́na balá sɩ́ pɛ́ɩ́wá mɛ́. 5 Ná ɛ́ nɩɛ yɩra nɛ́ nyɛ́: Ribaŋ jɩmʋ́l nɛrɔ: Elisuri há ká Sedehuri bio; 6 Sɩmɩyɔŋ jɩmʋ́l nɛrɔ: Selumiyel há ká Surisadayi bio; 7 Zida jɩmʋ́l nɛrɔ: Nasɔŋ há ká Amɩnɩdabɛ bio; 8 Ɩsakarɛ jɩmʋ́l nɛrɔ: Netanayel há ká Sʋɔrɛ bio; 9 Zabɩlɔŋ jɩmʋ́l nɛrɔ: Ɩlɩyabɛ há ká Hɩlɔŋ bio; 10 Ɩfɩrayɩŋ há ká Zɔzɛfɛ bio jɩmʋ́l nɛrɔ: Elisama há ká Amihudi bio; Manase má há ká Zɔzɛfɛ bio jɩmʋ́l nɛrɔ: Gamalɩɛlɛ há ká Pedasuri bio; 11 Bɛŋzamɛ jɩmʋ́l nɛrɔ: Abidaŋ há ká Gidoni bio; 12 Daŋ jɩmʋ́l nɛrɔ: Ahɩzɛrɛ há ká Amisadayi bio; 13 Azɛrɛ jɩmʋ́l nɛrɔ: Pagɩɛl há ká Ɔkɩraŋ bio; 14 Gadɛ jɩmʋ́l nɛrɔ: Ɩlɩyazafɛ há ká Dehuyɛl bio; 15 Nɛfɩtalɩ jɩmʋ́l nɛrɔ: Ahɩra há ká Ɩnaŋ bio. 16 Jɩtɩnawa nyáŋ ɓá há tʋ́ɔ́sɛ jamáŋ ná sɩɛrʋ, ɓa nɛ́ fá ká Ɩzɩrayɛl pulli nɩhɩɛ̄́sɛ má. 17 Moyizi rɩ́ Aarɔŋ kɛsɛ ɛ́ nɩtuosɛ fí rɩ́ bɛllɛ a súúríwó tɩɩ mɛ́. 18 Ɓa a jamáŋ ná wuu hé náŋa mɛ́, bʋ́llɛ cana dʋ́ŋdʋ́ʋ̃́ tápʋl. Ɩzɩrayɛl duo nɩɛ ná wuu há kéŋ bɩŋsɛ mɛ́rɛ arɩ́ mɛrɛ́ rɩ́ dɔwɛ, ɓa pʋ́ŋsɩ́wɔ́ yɩra duówa arɩ́ jaáwa, balá baláwa. 19 Moyizi dɩ́ɩ́sɩ́wɔ́ Sinayi gɩrbétéke ná sɩɛrʋ, anɛ ɛ́ Nyuutɩna Wɩɩsɛ fá há mákɛ́ pɔ́ʋ́.20-43 Ɩzɩrayɛl jɩmʋ́l wuu sɩɛrʋ, duo wuu sɩɛrʋ, ɓa tɩŋ jaáwa a dɩɩsɛ balá baláwa, báála ná wuu, há kéŋ bɩŋsɛ mɛrɛ́ arɩ́ mɛrɛ́ rɩ́ dɔwɛ, a wólli lal aa yo. Ɓa púl Zakɔbɛ bihɔ̃́ Ribaŋ mɛ́ nɛ́. Ná ɛ baala nʋɔ jɩmʋ́l wuu sɩɛrʋ: Ribaŋ jɩmʋ́l nɩɛ: Bʋ́ɩ́ mɛɛ́sɛllɛ rɩ́ bálgo arɩ́ zɔmmʋ́ɔ́. Sɩmɩyɔŋ jɩmʋ́l nɩɛ: Bʋ́ɩ́ mɛɛ́sɛllɛ rɩ́ fí rɩ́ nɛ́mɛ́ arɩ́ zɔtoro. Gadɛ jɩmʋ́l nɩɛ: Bʋ́ɩ́ mɛɛ́sɛllɛ rɩ́ bɔmmʋ́ɔ́ arɩ́ zɔwalgo rɩ́ mɛɛ́sɛllɛ rɩ́ fí. Zɩɩda jɩmʋ́l nɩɛ: Bʋ́ɩ́ mɛɛ́sɩ́botoro rí fí rɩ́ baná arɩ́ zɔwalgo. Ɩsakarɛ jɩmʋ́l nɩɛ: Bʋ́ɩ́ mɛɛ́sɛllɛ rɩ́ fí rɩ́ bana arɩ́ zɔwana. Zabɩlɔŋ jɩmʋ́l nɩɛ: Bʋ́ɩ́ mɛɛ́sɛ́llɛ rɩ́ fí rɩ́ bálpɛ arɩ́ zɔwaná. Ɩfɩrayɩŋ há ká Zɔzɛfɛ bio jɩmʋ́l nɩɛ: Bʋ́ɩ́ mɛɛ́sɛllɛ arɩ́ zɔmmʋ́ɔ́. Manase há ká zɔzɛfɛ bio jɩmʋ́l nɩɛ: Bʋ́ɩ́ mɛ́rɛ rɩ́ fi rɩ́ bɛllɛ arɩ́ zɔwɛllɛ. Bɛŋzamɛ jɩmʋ́l nɩɛ: Bʋ́ɩ́ mɛrɛ́ rɩ́ fí rɩ́ bɔmmʋ́ɔ́ arɩ́ zɔwaná. Daŋ jɩmʋ́l nɩɛ: Bʋ́ɩ́ mɛɛ́sɩbotoro rɩ́ bɛllɛ arɩ́ zɔwalpɛ. Azɛrɛ jɩmʋ́l nɩɛ: Bʋ́ɩ́ mɛɛ́sɛllɛ rɩ́ oro arɩ́ zɔmmʋ́ɔ́. Nɛfɩtalɩ jɩmʋ́l nɩɛ: Bʋ́ɩ́ mɛɛ́sɛllɛ rɩ́ fí rɩ́ botoro arɩ́ zɔwaná. 44 Moyizi rɩ́ Aarɔŋ arɩ́ jɩtɩ́náwa ná fí rɩ́ bɛllɛ há lɛ jɩmʋl wuu sɩɛrʋ, súúríwó mí, Ɩzɩrayɛl jɩmʋ́ʋ́la ná fí rɩ́ bɛllɛ yɩr mɛ́, ɓa dɩɩsɛ nɩɛ ná nʋɔ nɛ́ ɛ́. 45 Ɩzɩrayɛl duo nɩɛ ná wuu ɓa há dɩ́ɩ́sɛ́ a tɩŋ jaáwa, ɓa ná há kéŋ bɩŋsɛ mɛrɛ́ arɩ́ bɩŋsɛ mɛrɛ́ rɩ́ dɔwɛ, a wólli lal aa yo, 46 ɓá wuu nʋɔ ká: Bʋ́ɩ́zɔwalgo rɩ́ botoro rɩ́ zɔmmʋ́ɔ́ arɩ́ mɛɛ́sɛllɛ rɩ́ fí. 47 Levi jɩmʋ́l nɩɛ fa to nɩdɩɩsɛ́ nyáŋ sɩɛrʋ. 48 Nyuutɩna Wɩɩsɛ fa bʋ́l Moyizi rɩ́ a bʋlɛ́: 49 «Sɩ́ Levi jɩmʋ́l nɩɛ rɩ́ Ɩzɩrayɛl jɩmʋ́ʋ́la nɩɛ dɩ́ɩ́sɩ́ hé náŋá mɛ́. 50 Pi nʋtʋmɛ dɔ́wʋ́pɛ́rsɛ dɩbilí ná, belé pá Levitiwa, ʋ tʋtʋmɛ́, ʋ gbaŋsɛ arɩ́rʋ́ cɩksɛ wuu. Rɩ́wɔ́ tɩ́llʋ́ rɩ́rʋ́ cɩksɛ wuu cɩ́ɩ́nɛ, a tɩ́llʋ́ sɩɛrʋ tʋtʋmɛ́, ká rɩ ɓa kúó rɩ́wɔ́ ké wuu, rɩ́wɔ́ ké kílú. 51 Rɩɩ́wa kúó isi rɩ́ɩ́wa va, Levitiwa nɛ́ mɔhɛ̃́ rɩ́wɔ́ cúnni táŋtɛjaa ná, rɩɩ́wa kúó rɩ́ɩ́wa ké, ɓa nɛ́ báá mɔhɛ̃́ rɩ́wɔ́ cíkú. Rɩ nɩyɔ́ɔ́ pérú laka, ɓaá ɓʋ́ nɛ́. 52 Ɩzɩrayɛl duo nɩɛ mɔhɔ̃́ rɩ́wɔ́ ké púlwa nɛ́, nɛrɔ wuu kénu dirapo mʋ́l, u púl sɩɛrʋ. 53 Levi jɩmʋ́l nɩɛ dʋ́ŋɔ́ nɛ́ mɔhɛ̃́ rɩ́wɔ́ ké cémé nʋtʋmɛ dɔ́wɩ́pɛ́rsɛ dɩbilí ná laka, ɓa nɛ́ sɩ́ bibélú mí; rɩ́ Ɩzɩrayɛl nɩɛ sɩ́ŋ cɔ́ɛ́ púsí héwó tɩɩ mɛ́.» 54 Ɩzɩrayɛl nɩɛ ɓɩɛ́na tʋŋ ɛ́ ná Nyuutɩna Wɩɩsɛ há mákɛ́ pá Moyizi.