Vʋk' ɔɔsa kɛnɔ 1

Vʋk' ɔɔsa kɛnɔ

Vʋka ɔsɛ́ naasɛ

Vʋkfíse wɩ́ɛ́

1 Nyuutɩna Wɩɩsɛ cɛ́ céme táŋtɛjaa sɩɛrʋ ká yɩ́rɛ Moyizi a bʋ́lʋ́ rɩ́ bʋlɛ́: 2 «Bʋl pá Ɩzɩrayɛl nɩɛ a bʋlɛ́:

Rɩɩ́wa sɩɛrʋ nɛ́ŋ já rʋ́ʋ́ ɔsɛ vʋk pá Nyuutɩna Wɩɩsɛ, ʋ wóú pʋzeŋsi, ɛ́rá má ʋ pʋwɩɛla nɔ́ŋɔ aá ka.

3 Rʋʋ́ já rʋ́ʋ́ ɔsɛ vʋkfísi ní, a ká pʋzeno, ɛ́ pʋna mɔhɔ̄́ rʋ́ʋ́ a pʋwal ná há wɩ kɔsɔ kené ní. Ʋ sɩ́ kánʋ́ mʋ́ Céme táŋtɛjaa dáŋnʋɔ a cáánɛ Nyuutɩna Wɩɩsɛ, rʋ́ʋ́ cóllú kɛ́rɛ́; 4 Ʋ sɩ́ púú nɛ́sɛ sakɛ Nyuutɩna Wɩɩsɛ pʋcólli ná nyúú mí, a sʋ́lʋ́ suúri. 5 Ʋ sɩ́ ɓʋ́ pʋna ná Nyuutɩna Wɩɩsɛ sɩ́ɛ́; rɩ́ Aarɔŋ bɛlɛ ná há ká vʋk'ɔɔsa cakɛ cɛ́l, a kaa cáánɛ Nyuutɩna Wɩɩsɛ, ká ɔ́ŋsɛ waasɛ vʋk'ɔ́ɔ́sɩ́koro ná há mɩŋ céme táŋtɛ jaa dánnʋɔ mɛ́, ʋ lʋ́lɔ́ŋsɛ a kílú wuu. 6 Rʋ́ puri pʋna ná, a bɩ́ɛ́sʋ́ wuu naŋdáwa. 7 Vʋk'ɔɔsɔ Aarɔŋ bɛlɛ sɩ́ marɛ níŋ vʋk'ɔ́ɔ́sɩ́koro ná daha, a pa dagúlli hé. 8 Aarɔŋ bɛlɛ, vʋk'ɔɔsa ná sɩ́ pa naŋkʋsɛ́ ná, a rɩ́ nyúú rɩ́ nʋʋ wuu, a sakɛ dagúlli níŋ ná mɛ́, koro ná daha. 9 Ká rɩ́ tɩ́na pa sɩerʋ ɓɩɛ rɩ́ naasɛ, a sɛsɛ; rɩ́ vʋk'ɔɔsa ná nɔ́ŋɔ lawɔ wuu a wasɛ rɩ́wɔ́ físí vʋk koro daha. Ʋ nɛ́ ká vʋk físí ná sɔ́ŋ há wéró a pá Nyuutɩna Wɩɩsɛ.

10 Rʋʋ vʋkfisi ká pʋwíé ní rʋ́ ka, rɩ peɓala nɛ́, rɩ bʋŋgboko ní, ʋ mɔhɔ̄́ rʋ́ʋ́ a pʋna ná há wɩ kɔsɔ kené ní. 11 Ʋ sɩ́ kánʋ́ báárɛ vʋk'ɔ́ɔ́sɛ́ koro lʋ́lɔ́ŋɛ nɔ́ŋɔ, néduu cɔɔ rɩ́, a kɔ́rkʋ́ Nyuutɩna Wɩɩsɛ sɩ́ɛ́. Rɩ́ Aarɔŋ bɛlɛ ná há ká vʋk'ɔɔsá, rɩ́wɔ́ cakɛ cɛ́l a hé vʋk'ɔ́ɔ́sɛ́ koro ná kílo wuu mí. 12 Ʋ sɩ́ bɩ́ɛ́sɛ ɛ́ pʋna naŋdáwa, a pi nyúú rí nʋʋ wuu súúri, rɩ́ vʋk'ɔɔsa ná nɔ́ŋɔ pɔ́wɔ́ wuu, a sakɛ dagúlli níŋ ná ɓa há márɛ́ vʋk koro daha. 13 Ká rʋ́ʋ́ pa naasɛ rɩ́ sɩɛrʋ ɓɩɛ a sɛsɛ nyii mí. Rɩ́ vʋk'ɔɔsɔ láwɔ́ wuu a cáánɛ Wɩɩsɛ ká pii wasɛ rɩ́wɔ́ físi. Ʋ nɛ́ ká vʋkfísi ná sɔ́ŋ há wéró a pá Nyuutɩna Wɩɩsɛ.

14 Rɩ diíwie vʋkfísi ní rɩ́ nɛrɔ jɩ́ja rʋ́ʋ́ ɔsɛ pá Nyuutɩna Wɩɩsɛ, ʋ sɩ́ ka baka kʋ́ma, ɛ́rá má kʋ́dɔɔlɩ́ ko. 15 Vʋk'ɔɔsɔ sɩ́ la ɛ́ kʋ́ma, a kaa mʋ́ koro laka, a coki nyúú wasɛ rʋ́ʋ́ físi, ká rʋ́ʋ́ ka cɛ́l gaarɛ vʋk'ɔ́ɔ́sɛ́ koro kíŋkere. 16 Ʋ sɩ́ lɩ́sɛ pʋʋsɛ́ rɩ́rʋ́ sɩɛrʋ ɓɩɛ wuu, a pii yoota vʋk koro tɔ́ɔ́ mʋ́l cɔɔ rɩ́, ráŋ ná ɓa háá tá vʋka tapʋmma. 17 Ʋ́ʋ́ cɔ́ kiŋkeru mí ká kaa yɛ́l bɛllɛ, ká sɩ́ ló rɩ́wɔ́ cɔ́nnɛ náŋa mɛ́, rɩ́ vʋk'ɔɔsɔ laa wasɛ vʋk koro dagúlli níŋ ná mɛ́. Ʋ nɛ́ ká vʋkfísi ná sɔ́ŋ há wéró a pá Nyuutɩna Wɩɩsɛ.»