Oŋparɛ́ pálɔ wɩ́ɛ́
2
1 Rɩ nɛrɔ kéŋ oŋparɛ ko rʋ́ʋ́ dí zilé pá Nyuutɩna Wɩɩsɛ, ʋ́ʋ́ gieri míŋ, a pi nʋʋ ŋmʋsɛ ɛ́ míŋ a hé áŋsáŋsɛ, 2 a kaa ko pá Aarɔŋ bɛlɛ vʋk'ɔɔsa ná; rɩ́wɔ́ lɔkɛ míŋ ná ɓa há ŋmʋ́sɛ́ rɩ́ nʋʋ arɩ́ áŋsáŋsɛ, a dúŋsi sú nɛ́sɛ, a pii wasɛ rʋ́ʋ́ físi vʋk'ɔ́ɔ́sɩ́koro níŋ ná daha, rʋ́ʋ́ a líísé. Ʋ má ká oŋfísi ná sɔ́ŋ há wéró a pá Nyuutɩna Wɩɩssɛ nɛ́. 3 Ɛ́ pálɔ omo ná wuu há káánɛ́, Nyuutɩna Wɩɩsɛ ker ní, rɩ́ Aarɔŋ rɩ́rʋ́ bɛlɛ pii dí.4 Rɩ omo ná ɓa há wásɛ́ má nɛ́, rɩ́ nɛrɔ kaa ko rʋ́ʋ́ dí zilé pá Nyuutɩna Wɩɩsɛ, ʋ́ lo rʋ́ʋ́ a míŋ ná ɓa há ŋmʋ́sɛ́ rɩ́ nʋʋ, ká wɩ sɩbʋ́r hé; rɩ́wɔ́ hé ŋmɔmʋ́wa. 5 Rɩ zilé ná ká oŋpʋʋrɛ́ nɛ́ rʋ́ʋ́ kaa ko rʋ́ʋ́ pá Nyuutɩna Wɩɩsɛ, lo rʋ́ʋ́ a míŋ ná ɓa há ŋmʋ́sɛ́ rɩ́ nʋʋ ká wɩ́ sɩbʋ́r hé. 6 Rɩ́ɩ́ kaa conni, a bɩ́sɛ nʋʋ waasɛ; ʋ ká pálɔ nɛ́. 7 Rɩ zilé ná ká míŋcɔ́ɔ́lɛ má nɛ́ rɩ́ɩ́ kaa ko rɩ́ɩ́ pá Nyuutɩna Wɩɩsɛ, ɩ la sɩ́ɛ́ a pi nʋʋ ŋmʋsɛ ɛ́ míŋ. 8 Rɩ́ɩ́ bɩrmɛ wérí a kaa ko pá Nyuutɩna Wɩɩsɛ; Vʋk'ɔɔsɔ sɩ́ la, a kaa tuu peri koro. 9 A lɩ́sɛ míŋ ná hé vʋk koro níŋ daha rɩ́wɔ́ dí físi, rʋ́ʋ́ a líísé. Ʋ ká vʋkfísi ná sɔ́ŋ há wéró a pá Nyuutɩna Wɩɩsɛ nɛ́. 10 Ɛ́ pálɔ káánɛ ná wuu, Nyuutɩna Wɩɩsɛ nɛ́ tʋ́ʋ̃́, rɩ́ Aarɔŋ rɩ́rʋ́ bɛlɛ pii dí.
11 Pálɔ ná wuu ɩ́ há kené ko rɩ́ɩ́wa pá Nyuutɩna Wɩɩsɛ, ɩ́ sɩ́ lo rí sɩbʋ́r mɩŋ ráŋ. Pálɔ ná é wuu há mɔhɛ̃́ rɩ́wɔ́ físi pá Nyuutina Wɩɩsɛ, ɩ́ sɩ́ sɩbʋ́r rɩ́ tʋʋ hé. 12 Ɩ́ wo oŋparɛ́ má bídʋʋnɛ pálɔ́ lɩ́sɛ aá pá Nyuutɩna Wɩɩsɛ rɛ́; amá ɓa wʋ́ɔ́ é píé aá físi vʋk'koro daha.
13 Pálɔ ná wuu ɩ há lɩ́sɛ́, ɩ hé yɛsɛ ɓa mɛ́. Ɩ pálɔ wuu mí, sɩ́ɩ́ rɩ́ Wɩɩsɛ nʋtʋmɛ yɛsɛ ná wɩ́ɛ́ sʋ́llʋ́. Rɩɩ kéŋ pálɔ wuu ko rɩ́ɩ́ pá Wɩɩsɛ, ɩ súúri yɛsɛ kaa ko.
14 Pálɔ ná há ká oŋparɛ́ bídʋʋnɛ, ɩ pi náŋa wasɛ, ká gieri náŋa, a sɩɛ́ kaa ko pá Nyuutɩna Wɩɩsɛ. 15 Ɔ́ŋsɛ nʋʋ waasɛ, a hé áŋsáŋsɛ; pálɔ nɛ́. 16 Vʋk'ɔɔsɔ sɩ́ a míŋ giéré ná, a hé nʋʋ rɩ́ áŋsáŋsɛ, a pii wasɛ rɩ́wɔ́ físi, rʋ́ʋ́ a líísé. Nyuutɩna Wɩɩsɛ ker ní ɛ́ ɓa físi aá pɔ́ʋ́.