LƖƖ
2 (EXODE)
Wɩɩla ná Ɩzɩrayɛl duo nɩɛ há díé Ezipiti mí
1
1 Ná Ɩzɩrayɛl nɩɛ ná rɩ́rʋ́ há kó Ezipiti, oro wuu rɩ́rʋ́ jaa nɩɛ. Ɓa yɩra nɛ́ ká: 2 Rubaŋ, Sɩmɩɔŋ, Levi, Zida, 3 Ɩsakarɛ, Zabɩlɔŋ, Bɛŋzamɛ, 4 Daŋ, Nɛfɩtalɩ, Gaadɛ rɩ́ Asɛrɛ. 5 Zakɔbɛ duo nɩɛ wuu ní fa mɛɛ́sɩbotoro rí fí. Zɔzɛfɛ é fa mɩŋ Ezipiti mí fól.6 Zɔzɛfɛ ko sʋwɛ, ʋ mááláwa rɩ́rʋ́ maábio ná má wuu sʋsɛ, ɓa bɛlɛ ná ɓa rɩ́wɔ́ há mʋ́ ráŋ, ɓa má wuu sʋsɛ. 7 Ɛ́ har mɛ́, Ɩzɩrayɛl duo nɩɛ lʋ́llɛ́ bɛlɛ a pul kɩ́ŋkáŋ a ɔsɛ aá ná dóé. Tɔ́ɔ́ wuu de sú.
8 Ezipiti kuófɛlɔ oro há kúé la ɓasa, ʋ fa wɩ Zɔzɛfɛ ɛ̃. 9 Ʋ bʋ́lʋ́ tɔ́ɔ́ nɩɛ rɩ́ bʋlɛ́: <<Ná, Ɩzɩrayɛl duo nɩɛ ná káŋ kɩ́rá, ɓa dóé má kɩ́rá. 10 Ɛ́ wɩ́ɛ́ á ja lɩ́ŋ a kɛ́rɩ́wɔ́ mɛ́ rɩ́wɔ́ sɩ́ púlú. Rɩ ɛ́ rá ká rɩ́ lal isi, ɓa sɩ́ pɛ́rá dɩŋdɔma mɛ́ a yórá ká lɩ́rá tɔ́ɔ́ mɛ́.>> 11 Ɛ́ nɛ́ ɓa bil tʋtʋmɛ́ sɩ́dííre rɩ́wɔ́ ja tʋtʋ́ŋduoru nyáŋwɔ́ rɩ́wɔ́ sɩ́ dóé ná. Ɓa á ɛ́ nɛ́ ɓa sɔ tɔ́nɛ pá Faarɔŋ rʋ́ʋ́ bíbílú ɓɩɛ. Ɛ́ tɔ́nɛ nɛ́ ká: Pitoŋ rɩ́ Ramɩsɛsɛ. 12 Amá ɓaá ɔsɛ bɛŋsɛ Ɩzɩrayɛl duo nɩɛ, ɓa ɔsɛ pul aá la dɩhɩ̃́, Ezipiti tɩ́náwa bɔl ká fɩ́fɔ́wɔ́. 13 Ɛ́ nɛ́ Ezipiti tɩ́náwa de ɔsɛ súkíwó hé a héwó yomí ɓɩduo sɩɛrʋ. 14 Ɓa pɔ́wɔ́ tʋtʋmɛ́ a duki nɛ́sɛ; ɓa nʋɔsɛ vɩcɔɔ aá ŋmɔwɛ wárɛ́wa, baksɛ tʋtʋmɛ́ wuu, ɓa nɩ́ɩ́ tʋmɛ́. Tʋtʋ́ŋduo rɩ́rʋ́ duo wuu, ɓa nɩ́ɩ́ tʋmɛ́.
15 Hácakra nɩhɩɛ̃́sɛ bɛllɛ fa mɩŋ Ebirewa dɩhɩ̃́, nɔ́ŋɔ yɩr Siifra, nɔ́ŋɔ má yɩr Puwa. Ezipiti kuóro sɩɛ́ bʋ́lwɔ́ rɩ́ 16 bʋlɛ́: <<Rɩɩ́wa kúó aá cakɛ Ebirewa háála, ɩ́ bel bio wérí, rʋʋ nɛ́ ká heŋbólé, ɩ́ ɓʋ́; rʋʋ ká toló ɩ́ sɩ́ ɓʋ́.>> 17 Amá hácakra ná faá fá Wɩɩsɛ hébíŋ; ɓa wɩ kuóro nʋɔ ná tɩ́ŋɛ́: ɓa wɩ heŋbólli ná ɓʋ́ʋ́sɛ́. 18 Ɛ́ nɛ́ Ezipiti kuóro yɩ́rɛ hácakra ná a bɔsɛ bʋlɛ́: <<Beé rí ɩ́ a nyɛ? Beé rí ɩ́ wɩ heŋbólli ná ɓʋ́ʋ́sɛ́?>> 19 Ɓa sɛ́: <<Ebirewa háála rɩ́ Ezipiti tɩ́náwa háála to balá; Ebirewa háála kéŋ dóé wérí ɓa lʋ́ŋ má, ɓaá lʋl rɩ hácakrɔ ha wɩ péré.>> 20 Ɛ́ nɛ́ Ɩzɩrayɛl duo nɩɛ ɔsɛ pul kɩ́ŋkáŋ a ka dóé má kɩ́ŋkáŋ. Ká Wɩɩsɛ a wérí a pá ɛ́ hácakra. 21 Ɓa há fá Wɩɩsɛ hébíŋ, Wɩɩsɛ pɔ́wɔ́ duo.
22 Ɛ́ nɛ́ Faarɔŋ pá ŋmɛ́nɔ bʋlɛ́: <<Rɩ Ebirewa lʋ́l heŋbóle ɩ́ pii yoo hé Nili sɩɛrʋ, ká rʋʋ ká toló, ɩ́ lóú.>>