PÚLE
Onni wuu púle rɩ́ nɩbííno mɛ́ɛ́
1
1 Wɩɩsɛ púló a bána arɩ́ tíé.2 Tíé fa wɩ nɩɩsɔ́ wuu kené, ká a wúólí má; bíno ní fa dé tɔ́ butuoluŋo mí, ká Wɩɩsɛ Sabɩɩna* lilaari nyii nyúú anɛ diíwie*.
3 Ɛ́ nɛ́ Wɩɩsɛ sɛ́: «Rɩ́ pʋmmɔ mɩŋ» Pʋmmɔ ɓɩɛ́na mɩŋ. 4 Wɩɩsɛ ná rɩ pʋmmɔ wéró. Ʋ caksɛ pʋmmɔ rɩ́ bíno náŋá mɛ́. 5 Wɩɩsɛ hé pʋmmɔ yɩr: wɔhɔ; ká hé bíno má yɩr: tɩ́taŋ. Gbaŋ gbaanɛ, tɔ́ɔ́ pʋl; dʋ́ŋdʋ́ʋ̃́ tápʋl nɛ́ ɛ́.
6 Wɩɩsɛ sɛ́: «Rɩ́ zaaró mɩŋ nyiiri ná pɛ́ksɛ a cáksɩ́wɔ́ náŋá mɛ́.» 7 Ɛ́ ɓɩɛ́na tʋŋ. Wɩɩsɛ cáksɛ nyiiri ná náŋá mɛ́ ká zaaró ná mɩŋ; nyii náŋa mɩŋ zaaró ná mʋ́l ká náŋa mɩŋ daha. 8 Wɩɩsɛ pá zaaró ná yɩr: bána. Gbaŋ gbaanɛ, tɔ́ɔ́ pʋl; tápʋlɛ bɛllɛ kal nɛ́ ɛ́.
9 Wɩɩsɛ báá sɛ́: «Rɩ́ nyii ná há mɩŋ bána mʋ́l mʋ́ hé náŋá mɛ́ dɩbalá, ká rɩ́ dɩkaasɩ́ nyɩɩsɛ.» Ɛ́ ɓɩɛ́na tʋŋ. 10 Wɩɩsɛ pá dɩkaasɩ́ ná yɩr: tíé; ká yɩ́rɛ nyikana ná há pɩ́nɛ́: mʋʋ. Wɩɩsɛ nóó rɩ ɛ́ wéró. 11 Ɛ́ nɛ́ Wɩɩsɛ báá sɛ́: «Rɩ́ onni nyʋ́ tíé: nyɔ́ɔ́ rɩ́wɔ́ oŋduo arɩ́ tuuni ná háá nɔŋ nɔna tíé nyúú, tuu wuu rɩ́rʋ́ nɔŋ, a má káŋwɔ́ oŋduo.» Ɛ́ ɓɩɛ́na tʋŋ. 12 Onni nyʋ́ tíé: nyɔ́ɔ́ rɩ́wɔ́ oŋduo arɩ́wɔ́ duó wuu arɩ́ tuuni ná háá nɔŋ nɔna, tuu wuu rɩ́rʋ́ nɔŋ, a má káŋwɔ́ oŋduo. Wɩɩsɛ nóó rɩ́ ɛ́ wéró. 13 Gbaŋ gbaanɛ, tɔ́ɔ́ pʋl; tápʋlɛ botoro kal nɛ́ ɛ́.
14 Wɩɩsɛ báá sɛ́: «Rɩ́ pʋmmɔ onni mɩŋ bána nyúú a caksɛ wɔhɔ rɩ́ tɩ́taŋ náŋá mɛ́, ká a cɛ́rsɛ rɩ́ tápʋlɛ arɩ́ bɩŋsɛ malla. 15 Rɩ́wɔ́ a pʋmmɔ onni ná há sɩ́ cɩ́ bána nyúú ká caanɛ tíé.» Ɛ́ ɓɩɛ́na tʋŋ. 16 Wɩɩsɛ á pʋmmɔ oŋzeŋsi bɛllɛ: wɩpomí ní ká ɓɩzeno, rɩ tɔ́ɔ́ pʋ́lɔ́, ʋ nɩ́ɩ́ caanɛ dɩhɩ̃́, ká cana nɛ́ a ɓɩwie, rɩ tɔ́ɔ́ bíró ʋ má nɩ́ɩ́ caanɛ tɩ́taŋ, ká Wɩɩsɛ a caŋwʋllɛ má. 17 Wɩɩsɛ ɔ́ɔ́ ɛ́ onni cɩ́ bána nyúú a makɛ rɩ́wɔ́ caanɛ tíé, 18 ká nɛ́ ka pʋmmɔ wɔhɔ rɩ́ tɩ́taŋ nyúú, a caksɛ pʋmmɔ rɩ́ bíno náŋá mɛ́. Wɩɩsɛ nóó rɩ ɛ́ wéró. 19 Gbaŋ gbaanɛ, tɔ́ɔ́ pʋl; tápʋlɛ baná kal nɛ́ ɛ́.
20 Wɩɩsɛ báá sɛ́: «Rɩ́ oŋwómme sú nyii, ká rɩ́ diíwiisi fífil bána nyúú.» 21 Wɩɩsɛ a nyii oŋzeŋsi ná há ká oŋbérmé rɩ́wɔ́ duo wuu, arɩ́ oŋwómme ná wuu háá hɛkɛ́, a sú nyii wuu. Ʋ a kiŋkeru tɩ́náwa má rɩ́wɔ́ duo wuu. Wɩɩsɛ nóó rɩ ɛ́ wéró. 22 Wɩɩsɛ hé bárka pɔ́wɔ́ a bʋ́lɛ́: «Ɩ́ ka lʋla a pul a sú mʋʋ nyii; rɩ́ diíwiisi má pul tíé nyúú.» 23 Gbaŋ gbaanɛ, tɔ́ɔ́ pʋl; tápʋlɛ bɔmmʋ́ɔ́ kal nɛ́ ɛ́.
24 Wɩɩsɛ báá sɛ́: «Rɩ́ oŋwómme rɩ́wɔ́ duo wuu mɩŋ tíé nyúú: zʋ́ɔ́ pʋsɛ, tíé tútuure arɩ́ balla, oro wuu rɩ́rʋ́ duo.» Ɛ́ ɓɩɛ́na tʋŋ. 25 Wɩɩsɛ á balla íriŋwa wuu, zʋ́ɔ́ pʋsɛ íriŋwa wuu, arɩ́ tíé tútuure má íriŋwa wuu. Wɩɩsɛ nóó rɩ ɛ́ wéró.
26 Wɩɩsɛ báá sɛ́: «Á a nɩbííno rʋ́ʋ́ nɩ́ɛ́sɩ́rá, anɛ á há nɩhɩ̃́ nyɛ, a makɛ rʋ́ʋ́ dí dóé mʋʋ náŋwʋlɛ́ nyúú, diíwiisi ná háá fil bána rɩ́ má nyúú, zʋ́ɔ́ pʋsɛ nyúú, tíé wuu nyúú, arɩ́ tíé tútuure wuu nyúú.» 27 Wɩɩsɛ má nɩbííno ʋ nɩ́ɛ́sʋ́ tɩɩ; ʋ ɔ́ɔ́ ʋ nʋ́ʋ́ Wɩɩsɛ tɩɩ nɛ́. Wɩɩsɛ má báálɔ rɩ́ háálɔ nɛ́. 28 Wɩɩsɛ sɩɛ́ hé bárka pɔ́wɔ́ a bʋ́lɛ́: «Ɩ́ ka lʋla, ɩ́ pul a sú tíé nyúú, a dí dóé tíé nyúú. Ɩ́ dí dóé mʋʋ náŋwʋlɛ́ nyúú, diíwiisi ná háá fil bána rɩ́ má nyúú, arɩ́ tíé tútuure wuu nyúú.» 29 Wɩɩsɛ baa súúri bʋ́lɛ́: «Ná, nyɔ́ɔ́ duo é wuu há kéŋ bíé a mɩŋ tíé nyúú wuu, arɩ́ tuuni ná wuu háá nɔnɛ́, a ka oŋduo, ŋ píwó pɛ́ɩ́wa, rɩ́wɔ́ nɛ́ ɛ́ɩ́wa ɓɩdííli. 30 Tíé nyúú pʋsɛ rɩ́ balla wuu rɩ́ diíwiisi ná wuu háá fil bána rɩ́, arɩ́ tíé tútuure wuu, oŋhiẽsé é wuu, ŋ pí nyɔ́lɔɔ rɩ́wɔ́ duo wuu pɔ́wɔ́, rɩ́wɔ́ ɔ́wɔ́ ɓɩdííli.» Ɛ́ nɛ́ ɓɩɛ́na tʋ́mɛ́. 31 Wɩɩsɛ nóó rʋʋ wɩ́'állɛ ná wuu wéró kɩ́ŋkáŋ. Gbaŋ gbaanɛ, tɔ́ɔ́ pʋl; tápʋlɛ balgo kal nɛ́ ɛ́.