2
1 Bána rɩ́ tíé arɩ́wɔ́ sɩɛrʋ onni wuu aa tenné ní ɛ́. 2 Wɩɩsɛ há ténnú wɩ́'állɛ wuu, ʋ fɩ́ɛ́lɔ́ tápʋlɛ balpɛ nyúú mí. 3 Wɩɩsɛ hé bárka tápʋlɛ balpɛ kal ná nyúú mí, ká lɩ́sʋ́ ʋ ɔ́ʋ́ dʋŋɔ. Ɛ́ tápʋl nɛ́ Wɩɩsɛ fɩ́ɛ́lʋ́ wɩ́'állɛ wuu mí.Báálɔ rɩ́ háálɔ Ɛdɛŋ mɛ́ mɩnɛ́
4 Ná bána rɩ́ tíé ɛɛ há vá ɛ́wa: Wɩɩsɛ há á bána rɩ́ tíé, 5 tuú oro wuu fa to tíé nyúú, nyɔ́ɔ́ oro wuu má fa ha wɩ nyʋ́ɛ́, bee wɩ́ɛ́ Nyuutɩna Wɩɩsɛ fa ha wɩ ɛ́ɛ́ duóŋ ko tíé nyúú, nɩbíŋ má toó rʋ́ʋ́ parɛ tíé. 6 Amá nyii fa dé bul ní aá fɩɛlɛ tíé.
7 Nyuutɩna Wɩɩsɛ lɔ́kɛ́ tíé kuŋkulo má báálɔ, a pʋʋsɛ hiẽsó poo hóú mɩŋgbewíé mí, ʋ bɩrmɛ nɩwómmi. 8 Ʋ har rɩ́ mɛ́, Nyuutɩna Wɩɩsɛ á dɩhɩ̃́, Ɛdɛŋ mɛ́, tɔ́ɔ́ mʋ́bʋɔ rɩ́, a pi báálɔ ná ʋ há mɛ́ɛ́ a hé ráŋ. 9 Nyuutɩna Wɩɩsɛ a tuuni rɩ́wɔ́ duo wuu nyʋ́ tíé; ɓa belé wér, ɓa nɔna má ŋmɔ́ŋ rɩ́ díí. Hiẽsó tuu mɩŋ sɩ́sɩ́ɛ́nʋ́wa arɩ́ wérí rí bɔ́ŋbɔ́ŋ zɩmɛ́ tuu. 10 Mʋʋ oro nyii sɩɛ́ lɛ Ɛdɛŋ aá fɩɛlɛ dɩhɩ̃́ ná. Ɛ́ mʋʋ pɔ́ ráŋ nɛ́ ká caksɛ naasɛ baná. 11 Dʋ́ŋdʋ́ʋ̃́ mʋnaa yɩr nɛ́, Pɩsɔŋ; ʋ nɛ́ cáŋ Havila tɔ́ɔ́ wuu lɛ; ɛ́ tɔ́ɔ́ mɛ́, salmɛ mɩ́nɔ́. 12 Ɛ́ salmɛ duo wér. Bɩdɩlɩɔmɛ tulaalé rɩ́ oniksi dɔ́wɩ́ má mɩŋ ráŋ. 13 Bʋllɛ nyúú mí mʋnaa yɩr nɛ́, Gɩhɔŋ; ʋ nɛ́ cáŋ Kusi tɔ́ɔ́ wuu lɛ. 14 Botoro nyúú mí mʋnaa yɩr nɛ́, Hɩdɛkɛl; ʋ nyii níí pal Asuuri tɔ́ɔ́ mʋ́bʋɔ rɩ́. Baná nyúú mí mʋnaa yɩr nɛ́, Ɩfratɛ.
15 Nyuutɩna Wɩɩsɛ sɩɛ́ pi báálɔ hé Ɛdɛŋ dɩhɩ̃́ ná ʋ há bɩ́rmɛ́ mɛ́, rʋ́ʋ́ pɩ́párʋ́ ká bíbélú mí. 16 Nyuutɩna Wɩɩsɛ bil wáda pá báálɔ a bʋ́lɛ́: «Ɩ wo záádɛ́ tuuni ná wuu nɔnɔ aá dí; 17 amá wérí rí bɔ́ŋbɔ́ŋ zɩmɛ́ tuu ná nɔŋ, sʋ́ dí. Kal ná ɩ há sɩ́ dúú, ɩɩ́ sʋ́wʋ́ nɛ́.»
18 Nyuutɩna Wɩɩsɛ sɛ́: «Ʋ wɩ cɛ́rɛ́ rɩ́ báálɔ ɔ́ɔ́ dʋŋɔ; ŋ sɩ́ ɔ́ʋ́ nɩ́ɛ́sɩ́nɔ́ŋɔ pɔ́ʋ́ rʋ́ʋ́ ɔ́ʋ́ sáŋɛ.» 19 Nyuutɩna Wɩɩsɛ fa lɔ́kɛ́ tɛ́ŋ a má pʋsɛ diíwiisi ná háá fil bána nyúú arɩ́ balla wuu. Ʋ a ɓa ko báálɔ rɩ́, rʋ́ʋ́ ná yɩra ná ʋ háá á rʋ́ʋ́ pɔ́wɔ́, a makɛ rɩ́ oŋwómmi wuu ka yɩr ná báálɔ há héé pɔ́ʋ́. 20 Báálɔ pá zʋ́ɔ́ pʋsɛ yɩra, a pá balla yɩra, a pá diíwiisi ná háá fil bána nyúú yɩra. Amá ʋ wʋ́ʋ́ nɩ́ɛ́sɩ́nɔ́ŋɔ né rʋ́ʋ́ ɔ́ʋ́ sáŋɛ. 21 Ɛ́ nɛ́ Nyuutɩna Wɩɩsɛ a báálɔ pɛ́ dóluŋo, kɔ́ʋ́ cakɛ a lɩ́sʋ́ sáŋbídol balá, ká bɩrɛ ka namɩɛ ná tɔ́ʋ́ tɔ́ɛ́. 22 Nyuutɩna Wɩɩsɛ ka sáŋbídol ná ʋ há lɩ́sɛ báálɔ mɛ́, a má háálɔ, a kánʋ́ mʋ́ pá báálɔ. 23 Ɛ́ nɛ́ báálɔ sɛ́: «Ahaã! Sɩ́sɛ́nyɛ, heŋgbele heŋgbel ní nyɛ, ŋ namɩɛ má namɩɛ nɛ́ nyɛ. ɓa sɩ́ yɩ́yɩ́rʋ́ háálɔ, bee wɩ́ɛ́ ʋ lɛ́ báálɔ nɛ́.»
24 Ɛ́ wɩ́ɛ́, báálɔ rɩ́ háálɔ sɩ́ lɩ́sɩ́wɔ́ tɩɩ ɓa ánáwa rɩ́wɔ́ maáwa mɛ́, a má píwó wɩ́ɛ́ hé balá, a mɩŋ náŋá mɛ́, a makɛ rɩ́wɔ́ bɛllɛ ná a nɩbíŋ balá.
25 Báálɔ rɩ́rʋ́ háálɔ wuu bɛllɛ fa kéŋ tɛŋbíí ní, ká hɩɩ̃sɛ wʋ́ɔ́ kené.