3
1 Dʋŋ lɩ́ŋ nɛ́ fa kɛ balla ná wuu Nyuutɩna Wɩɩsɛ fa há ɛ́ɛ́. Dʋŋ sɩɛ́ bɔsɛ háálɔ a bʋ́lɛ́: «Taŋá Wɩɩsɛ sɛ́ rɩ́ɩ́wa sɩ́ dɩhɩ̃́ ná ʋ há bɩ́rmɛ́ tuuni nyáŋ oro wuu nɔnɔ dí rí?» 2 Háálɔ bʋ́l dʋŋ rɩ́ bʋ́lɛ́: «Áá dí dɩhɩ̃́ ná tuuni nɔnɔ rɛ́. 3 Amá dɩhɩ̃́ ná sɩ́sɩ́ɛ́nʋ́wa tuu ná é nɔŋ, Wɩɩsɛ sɛ́ ráá sʋ́ dí, ráá sʋ́ mɛ́ tɩ́kʋ́ má; a makɛ ráá sɩ́ sʋ́sʋ́.» 4 Ɛ́ nɛ́ dʋŋ bʋ́l háálɔ rɩ́ bʋ́lɛ́: «Ɩ́ waá sʋsɛ ábádá. 5 Amá Wɩɩsɛ ɩ́ɔ̃́ rɩ́ kal ná ɩ́ há sɩ́ dúú, ɩ́ sɩ́sɛ sɩ́ wúri, rɩ́ɩ́wa de nɛ Wɩɩsɛ a zɩŋ wérí rɩ́ bɔ́ŋbɔ́ŋ.»6 Háálɔ béló rɩ tuu ná nɔnɔ díí ŋmɔ́mɔ́, ɓa belé ka hɩɛŋ, ká wólli wɩ́zɩmɛ má aá pá. Ɛ́ nɛ́ ʋ ɓɔ́rɛ tuu ná nɔŋ a dí, ká pɔ́ʋ́ bálá má há mɩ́nʋ́ laka, ʋ má dí. 7 Ɓa wuu bɛllɛ sɩ́sɛ de puri; ɓa kɩ́ɛ́lɛ zɩŋ rɩ́ ɓa kéŋ tɛŋbíé ní. a sɩɛ́ ja paarʋ a pál a héwó tɩŋsɛ. 8 Gbaanɛ, poo háá fɩɛsɛ́, báálɔ rɩ́rʋ́ háálɔ nɛ́ Nyuutɩna Wɩɩsɛ dɔ́mɛ rʋʋ gʋɔrɛ dɩhɩ̃́ ná ʋ há bɩ́rmɛ́ sɩɛrʋ. Ɛ́ nɛ́ ɓa féŋsi Nyuutɩna Wɩɩsɛ sɩ́ɛ́ mɛ́, tuuni pɛ́ksɛ. 9 Nyuutɩna Wɩɩsɛ yɩ́rɛ báálɔ a bɔ́sʋ́ bʋ́lɛ́: «Ɩ mɩŋ nɛɛ́?» 10 Ʋ sɛ́: «Ŋ nɩ́ɩ́ liŋó dɩhɩ̃́ ná sɩɛrʋ, héwíŋ kánɩ́ŋ, bee wɩ́ɛ́ ŋ kéŋ tɛŋbíí ní; ɛ́ nɛ́ ŋ féŋsi.» 11 Nyuutɩna Wɩɩsɛ bɔ́sʋ́ bʋ́lɛ́: «Aŋ rɛ́ mákɛ́ pɛ́ɩ́ rɩ́ɩ́ kéŋ tɛŋbíí? Ɩ dí tuu ná nɔŋ ŋ há sɛ́ rɩ́ɩ́ sɩ́ dí rí ɓóó?» 12 Báálɔ sɛ́: «Háálɔ ná ɩ há páŋ ʋ mɩ́nɩ́ŋ laka, ʋ nɛ́ páŋ tuu ná nɔŋ, ŋ dí.» 13 Ɛ́ nɛ́ Nyuutɩna Wɩɩsɛ bʋ́l háálɔ rɩ́ bʋ́lɛ́: «Beé rí tɛ ɩ tʋŋ nyɛ?» Háálɔ sɛ́: «Dʋŋ nɛ́ nyɩ́sɩ́ŋ ŋ dí.» 14 Ɛ́ nɛ́ Nyuutɩna Wɩɩsɛ bʋ́l pá dʋŋ bʋ́lɛ́: «Ɩ há tʋ́ŋ nyɛ, ŋ sɩ́ ɓʋ́sɩ́ pʋ́sɛ balla rɩ́ pʋsɛ wuu sɩɛrʋ; ɩ sɩ́ tútúí file mí ká mʋ́mʋsɛ kuŋkulo ɩ hiẽsó wuu mí. 15 Ŋ sɩ́ hé dɩŋdɔmɩ́ ɩ rɩ́ háálɔ pɛ́kɛ, arɩ́rɩ́ duo rɩ́ háálɔ duo pɛ́kɛ. Háálɔ duo sɩ́ céŋŋí nyúú, ká rɩ́ɩ́ má dʋ́mʋ́ nalime mí.» 16 Nyuutɩna Wɩɩsɛ bʋ́l háálɔ rɩ́ bʋ́lɛ́: «Ŋ sɩ́ a rɩ́ɩ́ kúó ka puo wuu rʋ́ʋ́ wɛ kɩ́ŋkáŋ, rɩ́ɩ́ ná wɩɩla ká lʋl. Ɩ bála hɩɛŋ sɩ́ mɩ́nɩ́ mɛ́, amá ʋ sɩ́ dí dóé ɩ nyúú.» 17 Ká sɩɛ́ bʋ́l báálɔ má rɩ́ bʋ́lɛ́: «Ɩ há zésí háálɔ nʋɔ, a dí tuu ná nɔŋ ŋ há sɛ́ rɩ́ɩ́ sɩ́ dí, ŋ sɩ́ a rɩ́ tíé zɔkɛ ɩ wɩ́ɛ́. Ɩ sɩ́ tʋ́mʋ́ ná wɩɩla ká néí ɓɩdííli, ɩ hiẽsó wuu mí. 18 Sɔɔ rɩ́ nyɔ́bɔma sɩ́ nyʋ́ tíé. Ɩ sɩ́ dí baka oŋparɛ́. 19 Ɩɩ́ á rɩ́ɩ́ kɩ́ɩ́nɩ́ tule suolé ní ká néí nʋɔ ɓɩdííli, a kaá ja kal ná ɩ háá á rɩ́ɩ́ bɩrzʋ tíé ná ɩ há lɩ́ɛ́. Ɩ ká kuŋkulo ní, ɩɩ́ á rɩ́ɩ́ bɩrzʋ kuŋkulo ní.» 20 Báálɔ, Adaŋ pɔ́ʋ́ háálɔ yɩr Ɛɛvɛ, ʋ mʋ́l nɛ́ ká: mɩɩsɛ, bee wɩ́ɛ́ ʋ nɛ́ ká nɩwómme wuu maá. 21 Nyuutɩna Wɩɩsɛ a pʋsɛ kɛnnɛ jɔrʋ a laalɛ Adaŋ rɩ́rʋ́ háálɔ.
22 Nyuutɩna Wɩɩsɛ sɩɛ́ sɛ́: «Mʋ́l né mí nɩbííno má há kárá nɩ́ɛ́sɩ́nɔ́ŋɔ, a zɩŋ wérí rɩ́ bɔ́ŋbɔ́ŋ, ʋ báá wɩ mɔhɛ̃́ rʋ́ʋ́ ɓɔ́rɛ hiẽsó tuu nɔŋ má dí, a báá sɩ́ sʋ́wʋ́.» 23 Ɛ́ nɛ́ Nyuutɩna Wɩɩsɛ lɩ́sʋ́ Ɛdɛŋ dɩhɩ̃́ ná ʋ há bɩ́rmɛ́ sɩɛrʋ, rʋ́ʋ́ pɩ́parɛ tíé ná ɓa há lɔ́kɛ́ mɔ́ʋ́. 24 Ʋ há kírí nɩbííno, ʋ hé malɩ́kawa Ɛdɛŋ dɩhɩ̃́ ná ʋ há bɩ́rmɛ́ tɔ́ɔ́ mʋ́bʋɔ rɩ́, ɓa cɛ́ pɔ́ ká tókowí háá lɛ níŋváá, de bɩ́bɩ́rʋ́ tɩɩ mɛ́, a kɛ́rɛ hiẽsó tuu ŋmɛ́nɔ.