Kayɛŋ rɩ́ Abɛl wɩ́ɛ́
4
1 Adaŋ há kúé pɩ́nʋ́ háálɔ Ɛɛvɛ, ʋ kéŋ puo a lʋl Kayɛŋ. Ɛɛvɛ sɛ́: «Ŋ lʋ́l báálɔ Wɩɩsɛ sáŋɛ mɛ́.» 2 Ʋ baa lʋ́lʋ́ maábio Abɛl. Abɛl a pʋdɔɔrɔ, ká Kayɛŋ a paarɔ.3 Tɛ́ŋ oro ko cɛ́rɛ, Kayɛŋ isi ka tíé oŋparɛ́ ko pá Wɩɩsɛ. 4 Abɛl má isi kɛ́sʋ́ pieŋse dʋ́ŋdʋ́ʋ̃́ bɛlɛ a ɓʋ́ʋ́sɛ a píwó rɩ́wɔ́ nʋnnɛ pá Wɩɩsɛ. Wɩɩsɛ sɩɛrʋ tɔrɛ Abɛl rɩ́rʋ́ pálɔ ná; 5 amá ʋ sɩɛrʋ wɩ Kayɛŋ rɩ́rʋ́ pálɔ tɔ́rɛ́. Kayɛŋ dí cɔ́ɛ́ kɩ́ŋkáŋ a kánʋ́ sɩ́ɛ́ vásɛ cú. 6 Wɩɩsɛ bʋ́l Kayɛŋ rɩ́ bʋ́lɛ́: «Beé rí tɛ ɩ dídí cɔ́ɛ́ a vásɩ́ sɩ́ɛ́ cú? 7 Rɩɩ nɩ́ɩ́ a wérí ɩ sɩ́ kánɩ́ nyúú ɓɔ́, amá rɩɩ nɛ́ wɩ wérí a, bɔ́ŋbɔ́ŋ dé pɩ́nɩ́ jaa dánnʋɔ nɛ́ a jɩ́ja rʋ́ʋ́ dí dóé ɩ nyúú; taŋa ɩ nɛ́ mɔhɛ̃́ rɩ́ɩ́ wóllú.» 8 Ɛ́ nɛ́ Kayɛŋ bʋ́lʋ́ maábio Abɛl rɩ́ bʋ́lɛ́: «Á mʋ́ baka» Ɓa sɩɛ́ há mʋ́ɛ́ mɩŋ baka mɛ́, Kayɛŋ de isi ŋmɔwɛ Abɛl ɓʋ́.
9 Wɩɩsɛ bɔsɛ Kayɛŋ bʋ́lɛ́:«Ɩ maábio Abɛl mɩŋ nɛɛ́?» Ʋ sɛ́:«Ŋ wɩ ɛ̃. Ŋ nɩ́ɩ́ pɔ́ŋ maábio mí ɓóó?» 10 Ɛ́ nɛ́ Wɩɩsɛ sɛ́: «Beé rí ɩ tʋŋ nyɛ? Ɩ maábio cɛ́l wɩ́ɛ́ de lɛ tíé ní a zɛ́ yákɩ́ŋ mɛ́. 11 Ɛ́ wɩ́ɛ́, ŋ sɩ́ ɓʋ́sɩ́ pʋ́sɛ; ɩ nɛ́sɛ há lɩ́sɩ́ maábio cɛ́l tá tíé ná ʋ nyɔ, ɩ sɩ́ kɛkɛ ɛ́ tíé mí. 12 Rɩɩ párɛ́ ɛ́ tíé, ʋ ɓɩɛ báá waá ɔ́sɩ́ pɛ́ɩ́. Ɩ sɩ́ a nɩzáálí a gʋɔrɛ aá yéŋŋi tíé nyúú.» 13 Kayɛŋ bʋ́l Wɩɩsɛ rɩ́ bʋ́lɛ́: «Ŋ wɩɩla ná zénó, ŋ wʋ́ʋ́ wuó cɩ́ɩ́nɛ. 14 Ɩ zaa kíríŋ, ŋ kɛkɛ tíé kɔrɔ dɩhɩ̃́; ʋ mɔhɔ̃́ rɩ́ŋ kánɩ́ŋ tɩɩ féŋsí sɩ́ɛ́ mɛ́ a kɛ́kɩ́ mɛ́ kɩ́ŋkáŋ. Ŋ sɩ́ a nɩzáálí a gʋɔrɛ aá yéŋŋi tíé nyúú, rɩ nɛ́ŋ néŋ ʋ sɩ́ ɓʋ́ŋ.» 15 Wɩɩsɛ bʋ́lʋ́ rɩ́ bʋ́lɛ́: «Rɩ nɛ́ŋ ɓʋ́ɩ́, ɩ wɩ́ɛ́ tɛŋbuoró sɩ́ dí tɩ́na naasɩ́ balpɛ.» Ká Wɩɩsɛ ja malla hé Kayɛŋ mɛ́, a makɛ rɩ nɩɛ nóú rɩ́wɔ́ sʋ́ ɓʋ́. 16 Ɛ́ har mɛ́ nɛ́ Kayɛŋ lɛ Wɩɩsɛ laka, a mʋ́ ké Nɔɔdɛ tíé, Ɛdɛŋ tɔ́ɔ́ mʋ́bʋɔ rɩ́.
Kayɛŋ duo nɩɛ
17 Kayɛŋ há kúé zɩ́mʋ́ háálɔ wɩ́ɛ́ ʋ kéŋ puo, a lʋl Ɩnɔkɛ. Kayɛŋ isi má tɔ́pírmi a púú bio Ɩnɔkɛ yɩr pá ɛ́ tɔ́ɔ́. 18 Ɩnɔkɛ lʋl Ɩradɛ; Ɩradɛ lʋl Mehuyahel; Mehuyahel lʋl Mɩtʋkahɛl; Mɩtʋkahɛl lʋl Lɩmɛkɛ.
19 Lɩmɛkɛ ja háála bɛllɛ: ʋ dʋ́ŋdʋ́ʋ̃́ háálɔ yɩr nɛ́ Ada, bʋ́llɛ háálɔ yɩr a Tisila. 20 Ada lʋl Yabal: ʋ nɛ́ ká nɩɛ ná háá dɩ́ɛ́sɛ pʋsɛ aá zʋ táŋtɛwa, ɓa naabál. 21 Yabal maábio ní ká Yubal: ʋ nɛ́ ká nɩɛ ná háá dú kɔnɛ́wa arɩ́ nɩɛ ná háá mu mulli, ɓa naabál. 22 Tisila ná má lʋl Tubalkayɛŋ: ʋ nɛ́ faá luki hɔɔ arɩ́ kɔmɔ́ onni. Tubalkayɛŋ nátoló ní fa ká Naama. 23 Lɩmɛkɛ bʋ́lʋ́ háála rɩ́ bʋ́lɛ́: «Ada rɩ́ Tisila, ɩ́ zésíŋ liŋó! Lɩmɛkɛ háála, ɩ́ ɓíl dɩlla a nɩ́ŋ há á rɩ́ŋ bʋ́lʋ́ ná! Rɩ ɓa ŋmɔ́wɩ́ŋ, ŋŋ́ ɓʋ́ báálɔ nɛ́ ɛ́ wɩ́ɛ́, rɩ ɓa pɩ́rɩ́ŋ ŋŋ́ ɓʋ́ heŋbie ní ɛ́ wɩ́ɛ́. 24 Rɩ Kayɛŋ sʋʋ tɛŋbuoró nɩ́ɩ́ dí naasɩ́ balpɛ, ká ná ŋ é Lɩmɛkɛ sʋʋ tɛŋbuoró dí naasɩ́ mɛɛ́sɩbotoro rɩ́ fí rɩ́ balpɛ nɛ́.»