2
1 Levi jɩmʋ́l báálɔ oro rí sɩɛ́ já Levi jɩmʋ́l toló nɔ́ŋɔ. 2 Ɛ́ háálɔ ko ka puo a lʋl heŋbóle. Ʋ nó rʋʋ bio ná wéró, ɛ́ nɛ́ ʋ féŋsú caŋsɛ botoro. 3 Ʋ há né rʋʋ báá wʋ́ʋ́ wuó féŋsi, ɛ́ nɛ́ ʋ ja fʋ́yaakɔ́ a pi gʋdrɔ́ŋ rɩ́ cʋ́ʋ́ a mʋ́ɔ́lʋ́ wuu rɩ́ nyii sɩ́ zʋ́; a sɩɛ́ pi bio ná bílú sɩɛrʋ a kaa mʋ́ bil fuo nyɔ́ɔ́ pɛ́kɛ Nili nʋɔ. 4 Bio ná nátoló sɩɛ́ mʋ́ tɩ́ɛ́nɛ cɛ́ káá bel rʋ́ʋ́ ná wɩ́ɩ́ ná há sɩ́ pérú.5 Faarɔŋ toló túwí Nili rʋ́ʋ́ fó nyii, kɔ́ʋ́ hatɩŋna gʋ́gʋɔrɛ Nili nʋɔ. Ʋ ɔ́ɔ́ rʋ́ʋ́ bel rɩ fʋ́yaakɔ́ nɛ́ pɛ́ fuo nyɔ́ɔ́ sɩɛrʋ, ʋ tʋ́mʋ́ tʋtʋnnɩtoló ʋ mʋ́ pii ko. 6 Ʋ wúri a ná heŋbóle rʋʋ́ wí. Bio ná susu kánʋ́, rʋʋ sɛ́: <<Ebirewa bɛlɛ nɔ́ŋɔ nɛ́.>> 7 Ɛ́ nɛ́ bio ná nátoló ná sɛ́: <<Ŋ́ mʋ́ yɩ́rɛ Ebirewa háála nɔ́ŋɔ rʋ́ʋ́ ko la bio ná dɩ́ɛ́sɛ pɛ́ɩ́?>> 8 Faarɔŋ toló ná sɛ́ rʋ́ʋ́ mʋ́ yɩ́rɛ. Tolwie ná mʋ́ yɩ́rɛ bio maá tɩɩ. 9 Faarɔŋ toló bʋl háálɔ ná rɩ́ bʋlɛ́: <<La bio né mʋ́ dɩ́ɛ́sɛ páŋ, ŋ sɩ́ túmí.>> Háálɔ ná la bio ná a dɩ́dɩ́ɛ́sɛ.
10 Bio ná ko wa, ʋ kaa ko pá Faarɔŋ toló, ʋ la a púú mákʋ́ bio. Ʋ pɔ́ʋ́ yɩr Moyizi*, bee wɩ́ɛ́ ʋ sɛ́ rʋ́ʋ́ lɩ́sʋ́ nyii mí ní.
Moyizi fɔ́ɔ́ mʋ́ Madɩaŋ tíé
11 Cɛ́rɛ oro mí, Moyizi há kúé pʋɔsɛ, ʋ mʋ́ʋ́ maábináŋa dɩhɩ̃́ rʋ́ʋ́ nówó. Ʋ ná tʋtʋ́ŋduoru ná ɓa há fɩ́kwɔ́ ɓa tʋ́tʋŋ. Ʋ ná Ezipiti tɩ́náwa báálɔ nɔ́ŋɔ rʋʋ́ fɩ́rɛ Ebire, ʋ maábináŋa ná nɔ́ŋɔ. 12 Moyizi dɛ́llʋ́ kɩ́ŋkere ʋ wɩ nɛ́ŋ wuu né; ɛ́ nɛ́ ʋ ŋmɔwɛ Ezipiti tɩ́náwa báálɔ ná ɓʋ́ a pii féŋsi hɩɛla sɩɛrʋ. 13 Tɔ́ɔ́ pʋl ʋ baa ko; ʋ ɔ́ɔ́ rʋ́ʋ́ cɛ́ rɩ́ Ebirewa bɛllɛ nɩ́ɩ́ ŋmɔwɛ náŋá. Ʋ sɩɛ́ bɔ́sʋ́ ná ɓɩɛ há wɩ weri a bʋlɛ́: <<Beé rí tɛ ɩ ŋmʋ́ŋmɔ́wɩ́ nɔ́ŋɔ?>> 14 Báálɔ ná sɛ́: <<Áŋ rɛ́ bílí rɩ́ɩ́ árá kuóro rɩ́rá sarɩ́yadííro? Ɩɩ́ bɩ́ɩ́nʋ́ rɩ́ɩ́ ɓʋ́ŋ má anɛ Ezipiti tɩ́náwa báálɔ ná ɩ há ɓʋ́ɛ́ nɛ́?>> Moyizi há né rɩ nɩɛ ɛ̃ wɩ́ɩ́ ná mɛ́, hébíŋ kenú. 15 Faarɔŋ nɛ ɛ́ wɩ́ɩ́ a jɩ́ja Moyizi ɓʋ́ɩ́. Ɛ́ nɛ́ Moyizi fá kɛkɛ Faarɔŋ mɛ́ a mʋ́ mɩŋ Madɩaŋ tíé a ké vil oro nʋɔ.
16 Madɩaŋ vʋk'ɔɔsɔ fa kéŋ tolé balpɛ. Ɓa sɩɛ́ ko vil ná a tɔwɛ nyii aá hé pʋsɛ dɩnyɔ́ɛ́ rɩ́wɔ́ pɔ́wɔ́ áná pʋsɛ. 17 Pʋnʋɔla ko kíríwó. Ɛ́ nɛ́ Moyizi isi láwɔ́ tá ká a ɓa pʋsɛ nyɔ. 18 Ɓa bɩrkówó áná Rɩhʋɛl rɩ́ ʋ bɔ́sɩ́wɔ́: <<Ʋ ká ɛrɛ́ ɩ́ zaa bɩrko fól nyɛ?>> 19 Ɓa sɛ́: <<Ezipiti tɩ́náwa báálɔ oro rí lárá tá pʋnʋɔla nɛ́sɛ mɛ́; ʋ tɔ́wɛ́ nyii má tɩɩ párá pʋsɛ ɓa nyɔ.>> 20 Ɓa áná ná sɛ́: <<Ʋ sɩɛ́ mɩŋ nɛɛ́? Beé rí tɛ ɩ́ wʋ́ʋ́ kené ko rɛɛ́? Ɩ́ yɩ́rʋ́ rʋ́ʋ́ ko dí ɓɩɛ.>> 21 Moyizi saŋ a ké ɛ́ báálɔ jaa mɛ́, ʋ púú toló Sefora pɔ́ʋ́ ʋ ja. 22 Háálɔ ná ko lʋl heŋbóle, Moyizi hóú yɩr Gɛrsɔŋ, ʋ mʋ́l nɛ́ ká <<zʋ́zʋʋlɛ́>>, bee wɩ́ɛ́ ʋ sɛ́ rʋ́ʋ́ ká zʋ́zʋʋlɛ́ rɛ́ a mɩŋ tɔ́hʋɔrɔ mɛ́.
Wɩɩsɛ líísí Ɩzɩrayɛl duo nɩɛ wɩ́ɛ́
23 Ʋ dáánɛ wérí ká Ezipiti kuóro ná sʋwɛ. Ɩzɩrayɛl duo nɩɛ hiini a cáási ɓa yomí ná sɩɛrʋ. Ɓa yomí sɩɛrʋ búŋse ná zɛ́ peri Wɩɩsɛ. 24 Wɩɩsɛ nɩ́wɔ́ ŋmaame. Ɛ́ nɛ́ Wɩɩsɛ líísú tɩɩ nʋtʋmɛ ná há mɩ́nʋ́ rɩ́ Abɩrahaŋ rɩ́ Ɩzakɛ arɩ́ Zakɔbɛ pɛ́kɛ. 25 Wɩɩsɛ bel Ɩzɩrayɛl duo nɩɛ kéne ná, a ná rɩ ɓa ɓɩɛ́na mɩŋ wɩɩla mɛ́.