3
1 Moyizi faá nʋ́ɔ́lʋ́ hɩ́ɩ́lá Zeturo há ká Madɩaŋ vʋk'ɔɔsɔ pʋsɛ nɛ́. Ʋ sɩɛ́ ka pʋsɛ ná zʋ gɩrbétéke a mʋ́ lɛ Wɩɩsɛ paalɔ Ɔrɛbɛ mɛ́. 2 Nyuutɩna Wɩɩsɛ malɩ́ka ko lʋ́ʋ́ mɛ́ níŋváá sɩɛrʋ túí sɩ́sɩ́ɛ́nʋ́wa. Moyizi bel ná rɩ túí ná wuu ká níŋváá, ká níŋ ná wɩ óŋ wuu dí. 3 Ɛ́ nɛ́ Moyizi sɛ́: <<Ŋ sɩ́ mʋ́ ná wɩ́bermi né há gɩ́rɩ́ŋ, wɩ́ɩ́ ná há tɛ túí ná wɩ níŋ dí.>> 4 Nyuutɩna Wɩɩsɛ nóú rʋʋ́ mʋ́ rʋ́ʋ́ ná, ɛ́ nɛ́ ʋ cɛ́ túí ná sɩɛrʋ ká yɩ́rʋ́: <<Moyizi! Moyizi!>> Ʋ saŋ: <<Néŋ ní!>> 5 Wɩɩsɛ sɛ́: <<Sɩ́ rɛɛ́ pérú, lɩ́sɩ́ natɔɔsɛ ɩ naasɛ mɛ́, bee wɩ́ɛ́ ɩ dɩcɩ́nɛ ná ká dɩkísi rí. 6 Ŋ nɛ́ ká ɩ áná Wɩɩsɛ, ŋ nɛ́ ká Abɩrahaŋ Wɩɩsɛ, ŋ nɛ́ ká Ɩzakɛ Wɩɩsɛ, ŋ nɛ́ ká Zakɔbɛ Wɩɩsɛ.>> Moyizi kɛ́rʋ́ sɩ́ɛ́ mɛ́, bee wɩ́ɛ́ ʋ faá fá Wɩɩsɛ belé.7 Nyuutɩna Wɩɩsɛ sɛ́: <<Ŋ náŋ nɩɛ háá dí susu ɛ́ Ezipiti mí rí; ɓa tʋtʋmɛ́ sɩ́dííre háá bɛ́ŋsɩ́wɔ́ ɓaá búŋsi ɛ́, ŋŋ́ nɩ́wɔ́ búŋse. Ŋ ɛ̃ wɩɩla ná ɓa háá díé. 8 Ŋ sɩɛ́ túwó rɩ́ŋ láwɔ́ nɛ́ tá Ezipiti tɩ́náwa nɛ́sɛ mɛ́, a lɩ́sɩ́wɔ́ Ezipiti mí, a káŋwɔ́ mʋ́ tɔ́wero oro nɛ'ɩ́l rɩ́ tʋʋ há mɩŋ ráŋ wérí; Kananɩɛŋwa rɩ́ Hititiwa rɩ́ Amoritiwa rɩ́ Ferezɩɛŋwa rɩ́ Hɛvɩɛŋwa arɩ́ Yebusɩɛŋwa tíé ní. 9 Mʋ́l né mí, ná, Ɩzɩrayɛl duo nɩɛ búŋse zɩ́nɔ́ péríŋ; ŋ ná wɩɩla ná Ezipiti tɩ́náwa há ɛ́ɛ́ ɓaá dí. 10 Ɛ́ wɩ́ɛ́, ŋ nɛ́ tʋ́mɩ́ Faarɔŋ dɩhɩ̃́, mʋ́ a a rɩ́ŋ nɩɛ Ɩzɩrayɛl duo ná, rɩ́wɔ́ lɛ Ezipiti mí.>>
11 Ɛ́ nɛ́ Moyizi bʋl Wɩɩsɛ rɩ́ bʋlɛ́: << Ŋ nɛ́ ká áŋ, aá mʋ́ Faarɔŋ dɩhɩ̃́ rɩ́ŋ a rɩ́ Ɩzɩrayɛl duo nɩɛ lɛ Ezipiti mí?>> 12 Wɩɩsɛ sɛ́: << Ŋ mɩ́nɔ́ arɩ́rɩ́; ná nyɩnɛ ná mɛ́ ɩ há sɩ́ tɩŋ zɩŋ rɩ́ŋ nɛ́ tʋ́mɩ́: rɩɩ nɛ́ kúé a rɩ́ Ɩzɩrayɛl duo nɩɛ ná lɛ Ezipiti mí, ɩ́ ɓaarɛ Wɩɩsɛ paalɔ né nyúú.>>
13 Moyizi sɛ́: <<Rɩŋ nɛ́ mʋ́ Ɩzɩrayɛl duo nɩɛ rɩ́ a bʋlɛ́: ɩ́ ánáwa Wɩɩsɛ nɛ́ tʋ́mɩ́ŋ ɩ́ rɩ́. Rɩ ɓa nɛ́ bɔ́sɩ́ŋ bʋlɛ́ rʋ́ʋ́ yɩr nɛ́ beé, ŋŋ́ bʋ́lɛ́ beé rí?>> 14 Wɩɩsɛ bʋl Moyizi rɩ́ bʋlɛ́: <<Ŋ yɩr nɛ́: Ŋnɛka. Rɩ Ɩzɩrayɛl nɩɛ bɔ́sɩ́ ɩ bʋlɛ́: Ŋnɛka nɛ́ tʋ́mɩ́ŋ ɩ́ rɩ́.>> 15 Wɩɩsɛ baa bʋl Moyizi rɩ́ bʋlɛ́: <<Bʋl pá Ɩzɩrayɛl nɩɛ bʋlɛ́: Nyuutɩna Wɩɩsɛ, ɩ́ naabálwa Wɩɩsɛ, Abɩrahaŋ rɩ́ Ɩzakɛ rɩ́ Zakɔbɛ Wɩɩsɛ nɛ́ tʋ́mɩ́ŋ ɩ́ rɩ́. Ŋ yɩr nɛ́ ɛ́ a kaá mʋ́ wuu tokó toó. Ŋŋ́ já rɩ́ nɩbííne woó woówa wuu yɩ́yɩ́rɩ́ŋ ɛ́ nɛ́. 16 Mʋ́ yɩ́rɛ Ɩzɩrayɛl duo nɩɛ nɩhɩɛ̃́sɛ hé náŋá mɛ́ a bʋ́lwɔ́ rɩ́ bʋ́lɛ́: <Nyuutɩna Wɩɩsɛ, ɩ́ ánáwa Wɩɩsɛ, Abɩrahaŋ rɩ́ Ɩzakɛ rɩ́ Zakɔbɛ Wɩɩsɛ kenú tɩɩ ko nyɩ́ɩ́sɩ́ŋ mɛ́, a bʋlɛ́ rʋ́ʋ́ ná ɛ́ ɓa háá ɛ́ɩ́wa Ezipiti mí, rʋ́ʋ́ sɩɛ́ sɩ́ a wɩ́ɩ́. 17 Ʋ sɛ́ rʋ́ʋ́ sɩ́ a rɩ́ɩ́wa lɛ wɩɩla mɛ́ Ezipiti mí, a mʋ́ Kananɩɛŋwa rɩ́ Hititiwa rɩ́ Amoritiwa rɩ́ Ferezɩɛŋwa rɩ́ Hɛvɩɛŋwa arɩ́ Yebusɩɛŋwa tíé, tɔ́wero ná nɛ'ɩ́l rɩ́ tʋʋ há mɩŋ ráŋ wérí.> 18 Ɓa sɩ́ zésí liŋó, ɩ́ɩ́ rɩ́ Ɩzɩrayɛl nɩhɩɛ̃́sɛ ná sɩɛ́ mʋ́ Ezipiti kuóro rɩ́ a bʋl pɔ́ʋ́ bʋlɛ́: <Nyuutɩna Wɩɩsɛ, Ebirewa Wɩɩsɛ, ʋ kenú tɩɩ nyɩ́ɩ́sɩ́rá mɛ́. Ɛ́ wɩ́ɛ́, párá ŋmɛ́nɔ ráá lɛ a va tápʋl pírme botoro gɩrbétéke sɩɛrʋ, ká ɓʋ́ʋ́sɛ pʋsɛ pá Nyuutɩna Wɩɩsɛ, á Wɩɩsɛ.> 19 Amá ŋ ɩ́ɔ̃́ rɩ́ Ezipiti kuóro wɩ́ɩ́wa tá rɩ́ɩ́wa col, rɩ vadóé rá wʋ́ʋ́ fɩ́kɛ́. 20 Ŋ sɩɛ́ sɩ́ tɛ́rɩ́ŋ nɛ́sɛ a a wɩ́nyáŋsɛ rɩ́wɔ́ duó wuu Ezipiti mí a mɩ́lmɩ́wɔ́ dɩlla. Ɛ́ har mɛ́, ʋ sɩ́ tɛ́ɩ́wa rɩ́ɩ́wa col. 21 Ŋ sɩ́ a rɩ́ Ezipiti tɩ́náwa cóllíwa wɩ́ɛ́, a makɛ rɩɩ́wa kúó aá col, rɩ́ɩ́wa sɩ́ náwuole kánʋ́. 22 Ɩzɩrayɛl duo nɩɛ háálɔ é wuu sɩ́ sʋl ɓɩɛ Ezipiti tɩ́náwa háála ná há káwɔ́ kénnináŋa rɩ́wɔ́ ná há mɩ́ŋwɔ́ jɩɩsɛ mɛ́ rɩ́: wárɛ onni, salmɛ onni arɩ́ gɛnnɛ. Ɩ́ láwɔ́ cɩ́ɩ́nɩ́wa bɛlɛ rɩ́rɩ́wa tolé, a tɩŋ ɛ́ mɛ́ a fóri Ezipiti tɩ́náwa.>>