PÚLE 50

Ɓa hú Zakɔbɛ

1 Ɛ́ nɛ́ Zɔzɛfɛ mʋ́ ɓálʋ́ áná daha, a kánʋ́ kormi, ká wi. 2 Zɔzɛfɛ bʋ́l dɔ́ktawa ná há mɩ́nʋ́ dɩhɩ̃́ rɩ́, rɩ́wɔ́ mɩ́sʋ́ áná arɩ́ luri ná háá ɓaŋ sʋʋ; ɛ́ nɛ́ dɔ́ktawa a Zakɔbɛ ɓaŋ. 3 Tápʋlɛ mɛɛ́sɛllɛ nɛ́ ɓa pii a, ká sʋʋ ná zɩŋ wólli ɓaŋ, bee wɩ́ɛ́ tápʋlɛ ná há mɔhɛ̃́ rɩ́wɔ́ pi, ká rɩ́ sʋʋ zɩŋ wólli ɓaŋ nɛ́ ɛ́. Ká Ezipisɩɛ̃wa sɩɛ́ wúú yúó, a dáánɛ peri tápʋlɛ mɛɛ́sɩbotoro rɩ́ fí. 4 Yúó tápʋlɛ há kúé daarɛ, Zɔzɛfɛ bʋ́lɔ́ pá Faarɔŋ jaa nɩɛ, a bʋlɛ́: <<Rɩɩ́wa nɛ́ sáŋɛ́ páŋ, rɩ́ŋ zʋ́ɩ́wa lahárma, ŋŋ́ sʋlɩ́wa, rɩ́ɩ́wa bʋl wɩ́ɛ́ nyáŋ pá Faarɔŋ: 5 <Ŋ áná fa ɔ́ɔ́ ŋ tá nʋɔ bʋlɛ́ rʋʋ nɛ́ sʋ́wɛ́, rɩ́ŋ húú bʋɔ ná ʋ há ɛ́ɛ́ ɓa lú Kanaŋ mɛ́.> Ŋ sɩɛ́ fa có rɩ́ŋ mʋ́ a húŋ áná ká bɩrko.>>> 6 Ɛ́ nɛ́ Faarɔŋ sɛ́: <<Mʋ́, a húi áná, anɛ ɛ́ ʋ há ɛ́ɛ́ ɩ tá nʋtálɔ ná.>> 7 Zɔzɛfɛ lɩ́ɔ́ aá mʋ́ rʋ́ʋ́ húú áná. Ʋ rɩ́ Faarɔŋ tʋtʋnna ná wuu, arɩ́rʋ́ wuolo nɩhɩɛ̃́sɛ, rɩ Ezipiti tɔ́ɔ́ nɩhɩɛ̃́sɛ wuu. 8 Zɔzɛfɛ jaa nɩɛ wuu, rɩ́rʋ́ maábináŋa, arɩ́rʋ́ áná jaa nɩɛ wuu ní kenú mʋ́. Ɓa heŋbiisi rɩ́wɔ́ pʋwɩɛla rɩ́ pʋzeŋsi dʋŋɔ nɛ́ káánɛ Gosaŋ tɔ́ɔ́ mɛ́. 9 Zɔzɛfɛ há lɛ́ ŋmɛ́nɔ, tórkowa rɩ́ záksɛ rɩ́wɔ́ tɩ́náwa lɩ́ɔ́, a pɔ́ʋ́ mɛ́, ʋ ka hɩɛŋ, ɓa kánʋ́ mʋ́. 10 Ɓa há mʋ́ɛ́ peri Atadɛ tíŋtéle, Zʋrdɛŋ fuo daarɛ́, ɓa á yúó ɓɩzeno ráŋ, a wi kɩ́ŋkáŋ. Zɔzɛfɛ wíú áná tápʋ́lwa balpɛ. 11 Kananɩɛ̃wa ná há mɩŋ ráŋ, a nɛ wííle ná Atadɛ tíŋtéle mí, ɓa sɛ́: <<Yúó né ká yúzéní rí, a pá Ezipisɩɛ̃wa. Ɛ́ nɛ́ tɛ, ɓa pá dɩhɩ̃́ ná há mɩŋ Zʋrdɛŋ fuo daarɛ́ yɩr: Abɛl'misirayiŋ. 12 Zakɔbɛ bɛlɛ tʋ́ŋ ɛ́ ná, ɓa áná há sɛ́ rɩ́wɔ́ tʋŋ. 13 Ɓa púú kaa mʋ́ Kanaŋ, a hú bʋɔ ná há mɩŋ Makpela baka mɛ́, Abɩrahaŋ fa há yɔ́wɛ́ Hititiwa báálɔ Ɩfɩrɔŋ rɩ́, rʋ́ʋ́ ɔ́ʋ́ sʋsɛ dɩhúí, Mamire laka. 14 Zɔzɛfɛ há kúé húú áná tenni, ʋ rɩ́rʋ́ maábináŋa, arɩ́ nɩɛ ná wuu há kenú ɓa mʋ́ yúó, ɓa bɩ́rɔ́ ko Ezipiti.

Zɔzɛfɛ hóú máálawa suúri

15 Zɔzɛfɛ mááláwa há néí rɩ́ ɓa áná sʋ́wɔ́, ɓa sɛ́: <<Mʋ́l né mí, á áná há sʋ́wɛ́, Zɔzɛfɛ wúóló rʋ́ʋ́ bɛ́rɩ́rá, a pi bɔ́ŋbɔ́ŋ ná wuu á há píé ɔ́ʋ́ mɛ́, a árá mɛ́.>> 16 Ɛ́ nɛ́ ɓa tʋŋ nɛ́ŋ, rʋ́ʋ́ mʋ́ a bʋl pɔ́ʋ́ bʋlɛ́: <<Ká rɩ́ɩ́ áná zɩŋ sʋwɛ, ʋ sɩ́ rá bʋlɛ́ wɩ́ɛ́ nyáŋ pɛ́ɩ́: 17 <Rʋ́ʋ́ sʋlɩ́, rɩ́ɩ́ héí mááláwa suúri, ɓa aa zɔkɛ́, rɩ́ bɔ́ŋbɔ́ŋ ná ɓa há ɛ́ɛ́, bee wɩ́ɛ́ ɓa ɛ́ɩ́ bɔ́ŋbɔ́ŋ kɩ́ŋkáŋ.> Ɛ́ wɩ́ɛ́, ŋŋ́ sʋlɩ́ mʋ́l né mí, rɩ́ɩ́ héí áná ná Wɩɩsɛ tʋtʋnna suúri, ɓa wɩ́bɔma yɩr mɛ́› » Wɩ́ɛ́ ná ɓa há bʋlɛ́ pá Zɔzɛfɛ, ʋ wíó. 18 Ʋ mááláwa ná tɩɩ ko, a ɓálʋ́ naasɛ mɛ́ bʋlɛ́: <<Néí tʋtʋnna nɛ́.>> 19 Zɔzɛfɛ bʋ́lwɔ́ rɩ́ bʋlɛ́: <<Ɩ́ sɩ́ ló rɩ́ héwíŋ kɛ́sɩ́wa; bee wɩ́ɛ́ ŋ nɛ́ ká Wɩɩsɛ? 20 Ɩ́ fa hé nʋɔ balá rɩ́ɩ́wa áŋ bɔ́ŋbɔ́ŋ, Wɩɩsɛ kánʋ́ bɩrmɛ wérí; a makɛ rɩ́ wɩ́ɩ́ ná há kúé zaa, nʋɔ sú, ká la jamáŋ ɓɩkana tá. 21 Mʋ́l né mí ɩ́ sɩ́ ló rɩ́ héwíŋ kɛ́sɩ́wa; ɩ́ rɩ́rɩ́wa bɛlɛ háá jɔ́ʋ́ ná wuu, ŋ sɩ́ aa pɛ́ɩ́wa.>> Ʋ bʋ́ɔ́lɩ́wɔ́, a ɓáŋwɔ́ beŋtunni.

Zɔzɛfɛ sʋʋ

22 Zɔzɛfɛ rɩ́rʋ́ áná jaa nɩɛ ké Ezipiti mí. Zɔzɛfɛ dí tɔ́ɔ́ bɩŋsɛ zɔlɔ rɩ́ fí. 23 Zɔzɛfɛ ná Efirayiŋ bɛlɛ má bɛlɛ, a ná Manase bio Makiri má bɛlɛ, ɓa há lʋ́lɛ́, ʋ laa hóú naasɛ mɛ́. 24 Zɔzɛfɛ mɩɩsɛ tenné mí, ʋ bʋ́lɔ́ pɔ́ʋ́ maábináŋa ná bʋlɛ́: <<Ŋŋ́ á rɩ́ŋ sʋwɛ nɛ́, amá Wɩɩsɛ sɩ́ fɛ́ɩ́wa búŋse, a lɩ́sɩ́wa tɔ́ɔ́ né mí, a kánɩ́wa mʋ́ tɔ́ɔ́ ná, ʋ há tá nʋɔ pá Abɩrahaŋ rɩ́ Ɩzakɛ rɩ́ Zakɔbɛ.>> 25 Ɛ́ nɛ́ Zɔzɛfɛ a, ʋ maábináŋa ŋmɩ́ɛ́sɛ a bʋlɛ́: <<Rɩ Wɩɩsɛ nɛ́ fɛ́ɩ́wa búŋse, ɩ́ pɛ́ páŋ heŋgbele rɛɛ́wa, a kaa col.>> 26 Zɔzɛfɛ dí tɔ́ɔ́ bɩŋsɛ zɔlɔ rɩ́ fí, ká sʋwɛ. Ɓa mɩ́sʋ́ luri, ʋ ɓaŋ, ɓa pii hé sʋsɛ dáka mɛ́, Ezipiti mí.