LƖƖ 40

Táŋtɛjaa ná ciké

1 Nyuutɩna Wɩɩsɛ bʋl Moyizi rɩ́ bʋlɛ́: 2 <<Dʋ́ŋdʋ́ʋ̃́ cana dʋ́ŋdʋ́ʋ̃́ tápʋl, ɩ sɩ́ ciki táŋtɛjaa ná há ká Wɩɩsɛ dɩmɩnɩ́. 3 Ɩ sɩ́ pi nʋtʋmɛ dáka ná kaa zʋʋ bil, a ka patɩ́ɩ́sazeno ná kɛ́rɛ rɩ́ nɩɛ sʋ́ ná. 4 Ɩ sɩ́ pi dɩpɛ́ŋwa táábɩl ná bil a pɩɛrɛ dɩpɛ́ŋwa ʋ daha. Ɩ sɩ́ pi cáŋdaa ná bil a bɩrmɛ cáŋsɛ ná a nyɩkɛ. 5 Ɩ sɩ́ pi salmɛ tulaalékoro ná bil nʋtʋmɛ dáka ná sɩ́ɛ́, ká hé táŋtɛjaa ná dánnʋɔ patɩ́ɩ́sazeno ná. 6 Ɩ sɩ́ bil vʋk'ɔ́ɔ́sɩ́koro ná táŋta jaa dánnʋɔ. 7 Ɩ sɩ́ bil tɩɩ sɛsɛ́ naŋtáŋŋa ná táŋtɛjaa rɩ́ vʋk'ɔ́ɔ́sɩ́koro pɛ́kɛ, a hé nyii ráŋ. 8 Ɩ sɩ́ hé wuolo kɛ́rɛ ná a kíl táŋtɛjaa ná wuu, a hé wuolo dánnʋɔ patɩ́ɩ́sazeno ná.

9 <<Ɩ sɩ́ pi nyúcúúrínʋʋ ná a ɔ́ŋsɩ́wɔ́ hé táŋtɛjaa ná rɩ́rʋ́ sɩɛrʋ onni wuu mí; ɩ sɩ́ lɩ́sʋ́ rɩ́rʋ́ cɩksɛ wuu rɩ́wɔ́ ɔ́wɔ́ dʋŋɔ, ŋ tʋtʋmɛ́ yɩr mɛ́. A kaa pɔ́ ɛ́ mɛ́, ŋ nɛ́ tʋ́ʋ̃́. 10 Ɩ sɩ́ ɔ́ŋsɛ nʋʋ ná hé vʋk'ɔ́ɔ́sɩ́koro ná rɩ́rʋ́ cɩksɛ wuu mí; ɩ sɩ́ lɩ́sʋ́ rʋ́ʋ́ ɔ́ʋ́ dʋŋɔ ŋ dʋŋɔ tʋtʋmɛ́ yɩr mɛ́, wɩ́ɩ́ nɔ́ŋ wɩ ráŋ a. 11 Ɩ sɩ́ ɔ́ŋsɛ ɛ́ nʋʋ a hé naŋtáŋŋa ná rɩ́rʋ́ dɩsakɩ́, a lɩ́sʋ́ ŋ tʋtʋmɛ́ yɩr mɛ́.

12 Ɩ sɩ́ a rɩ́ Aarɔŋ rɩ́rʋ́ bɛlɛ tuuperi céme táŋtɛ ná dánnʋɔ, rɩ́ɩ́ fówó arɩ́ nyii. 13 Ɩ sɩ́ pi Aarɔŋ tʋtʋmɛ́ gɛnnɛ súú, a ɔ́ŋsɛ nʋʋ hóú mí a bílú rʋ́ʋ́ a vʋk'ɔɔsɔ a tʋŋ aá páŋ. 14 Ɩ sɩ́ a rʋ́ʋ́ bɛlɛ má peri, rɩ́ɩ́ píwó gɛwiisi súwó, 15 ká rɩ́ɩ́ ɔ́ŋsɛ nyúcúúrínʋʋ héwó mí anɛ ɛ́ ɩ há ɔ́ŋsɛ́ héwó áná mɛ́, rɩ́wɔ́ a vʋk'ɔɔsa a tʋŋ aá páŋ. Ɛ́ nʋʋ héé níí ɛɛ́ rɩ́wɔ́ tɩɩ rɩ́wɔ́ duo nɩɛ woó woówa wuu tʋ́tʋŋ vʋk'ɔsɔ́ tʋtʋmɛ́.>>

16 Moyizi á wɩ́ɛ́ ná wuu Nyuutɩna Wɩɩsɛ há máŋsɛ́ pɔ́ʋ́. 17 Bɩŋsɛ bɛllɛ nyúú mí, dʋ́ŋdʋ́ʋ̃́ cana, dʋ́ŋdʋ́ʋ̃́ tápʋl, táŋtɛjaa ná ɓɩɛ́na cíkó. 18 Moyizi cíkí táŋtɛjaa ná, a hé naasɛ ná, a hé dapɛ́rsɛ ná, a hé dapʋɔla ná, a cɔ́ŋsɛ dacɔ́ŋsɛ. 19 Ʋ tɩ́ɛ́nɛ táŋtɛ pɛ́ŋbíé ná a tɔ́ jaa ná mɛ́, ká ka nyútɔ́lɔ ná tɔ́ daha, anɛ ɛ́ Nyuutɩna Wɩɩsɛ fa há máŋsɛ́ pɔ́ʋ́.

20 Moyizi pi kíŋse dɔ́wɩ́pɛ́rsɛ táábɩlwa ná hé dáka ná sɩɛrʋ, a pa dáka dapʋɔllɛ ná tʋ, ká pi dáka nyútɔ́lɔ ná cú. 21 Ʋ pi dáka ná zʋ táŋtɛjaa ná sɩɛrʋ a bil, a ka patɩ́ɩ́sazeno ná kɛ́rʋ́ mɛ́, anɛ ɛ́ Nyuutɩna Wɩɩsɛ fa há máŋsɛ́ pɔ́ʋ́.

22 Ʋ pi táábɩl ná kaa zʋʋ bil patɩ́ɩ́sazeno ná sɩ́ɛ́, táŋtɛjaa ná lʋ́lɔ́ŋɛ nɔ́ŋɔ rɩ́ cɔɔ, 23 a pɩɛrɛ dɩpɛ́ŋwa ʋ daha a pá Nyuutɩna Wɩɩsɛ, anɛ ɛ́ Nyuutɩna Wɩɩsɛ fa há máŋsɛ́ pɔ́ʋ́.

24 Ʋ pi cáŋdaa rɩ́rʋ́ cáŋsɛ ná kaa zʋʋ bil táŋtɛjaa ná sɩɛrʋ a caasɛ táábɩl ná, táŋtɛjaa ná lʋ́lɔ́ŋɛ nɔ́ŋɔ má rɩ́ cɔɔ, 25 a nyɩkɛ cáŋsɛ ná Nyuutɩna Wɩɩsɛ sɩ́ɛ́, anɛ ɛ́ Nyuutɩna Wɩɩsɛ fa há máŋsɛ́ pɔ́ʋ́.

26 Ʋ pi salmɛ koro ná kaa zʋʋ bil táŋtɛjaa ná sɩɛrʋ patɩ́ɩ́sazeno ná sɩ́ɛ́, 27 a a ɓa nyɩkɛ tulaalé ʋ daha, anɛ ɛ́ Nyuutɩna Wɩɩsɛ fa há máŋsɛ́ pɔ́ʋ́.

28 Ʋ pi táŋtɛjaa dánnʋɔ patɩ́ɩ́sazeno ná hé. 29 Ʋ pi vʋk'ɔ́ɔ́sɩ́koro ná bil táŋtɛjaa dánnʋɔ, a ɔsɛ vʋk a físú, a pá pálɔ anɛ ɛ́ Nyuutɩna Wɩɩsɛ fa há máŋsɛ́ pɔ́ʋ́. 30 Ʋ pi naŋtáŋŋa ná bil táŋtɛjaa ná rɩ́ vʋk'ɔ́ɔ́sɩ́koro ná pɛ́kɛ, a hé nyii rɩ́wɔ́ kaá sɛ́sɩ́wɔ́ tɩɩ. 31 Moyizi rɩ́ Aarɔŋ arɩ́ Aarɔŋ bɛlɛ á ɛ́ nyii ní aá sɛ́sɩ́wɔ́ nɛ́ŋsa rɩ́wɔ́ naasɛ; 32 rɩ ɓa nɩ́ɩ́ zʋ táŋtɛjaa ná, rɩ ɓa nɩ́ɩ́ mʋ́ koro sɩ́ɛ́, ɓaá aa sɛ́sɩ́wɔ́ tɩɩ, anɛ ɛ́ Nyuutɩna Wɩɩsɛ fa há máŋsɛ́ pá Moyizi.

33 Moyizi hé wuolo ná a kíl táŋtɛjaa ná rɩ́ vʋk'ɔ́ɔ́sɩ́koro ná, a hé wuolo dánnʋɔ patɩ́ɩ́sazeno ná. Moyizi tʋtʋmɛ́ ná wuu tʋŋ ɓɩnnɛ́ nɛ́ ɛ́.

Nyuutɩna Wɩɩsɛ píŋ sú táŋtɛjaa ná

34 Ɛ́ nɛ́ duóbána de ko tɔ́ táŋtɛjaa ná mɛ́, ká Nyuutɩna Wɩɩsɛ píŋ de súú wuu, 35 a tɩŋ ɛ́ wɩ́ɛ́, Moyizi wɩ táŋtɛjaa ná sɩɛrʋ wuó zʋ.

36 Ɩzɩrayɛl nɩɛ valɛ́ wuu sɩɛrʋ, rɩ duóbána ná nɛ́ kúé isi táŋtɛjaa ná nyúú wuu, ɓa máá isi ní aá col. 37 Ká rɩ duóbána ná nɛ́ wɩ ísé, ɓa waá col, a kaá ja kal ná ʋ há ísé. 38 Nyuutɩna Wɩɩsɛ duóbána ná fa mɩŋ táŋtɛjaa ná nyúú wɔhɔ, ká tɩ́taŋ, ʋ a níŋ; Ɩzɩrayɛl jaa wuu níí nóú. Ʋ ká ɛ́ nɛ́ ɓa valɛ́ wuu mí.