Vʋk'ɔɔsa gɛnnɛ bɩrmɛ́
39
1 Ɓa pí pɛ́ŋbímʋ́ɔ́llɛ rɩ́ pɛ́ŋbífɩɛŋsɛ rɩ́ ɓɩkɔklɛ́ a bɩrmɛ Wɩɩsɛ sɩ́ɛ́ tʋtʋmɛ́ gɛnnɛ ná arɩ́ Aarɔŋ gɛnnɛ ná há kɔ́wɔ́ dʋŋɔ́, anɛ ɛ́ Nyuutɩna Wɩɩsɛ há máŋsɛ́ pá Moyizi.2 Ɓa pí salmɛ rɩ́ gepúŋ mʋɔlɩ́ rɩ́ ɓɩfɩɛmɔ rɩ́ ɓɩkɔklɩ́ arɩ́ gepúŋmɛɛlɩ́ a bɩrmɛ vʋk'ɔɔsɔ nɔhɔ̃́ gɛrɔ ná. 3 Ɓa lúkí salmɛ a pɛ́rsɛ a kɩɛrɛ mɩ́nɛ́nɛ́wa anɛ gepunni, ɓa pii lɩrmɛ pɛ́ŋbímʋ́ɔ́llɛ rɩ́ pɛ́ŋbífɩɛŋsɛ rɩ́ ɓɩkɔklɛ́ arɩ́ gepúwɩɛlɩ́wie pɛ́ŋbíé ná mɛ́. 4 Ɓa hé vapar ɓɩɛ bɛllɛ ɓa cɔ́ʋ́ nʋʋsɛ ná bɛllɛ mɛ́, a kánʋ́ cɛ́. 5 Vʋk'ɔɔsɔ nɔhɔ̃́ gɛluŋo ná rɩ́rʋ́ vɔɔ́sɛ fa ká óŋ balá, salmɛ rɩ́rʋ́ gepunni ná tɩɩ nɛ́ ɓa pii ɔ́wɔ́, anɛ ɛ́ Nyuutɩna Wɩɩsɛ há máŋsɛ́ pá Moyizi. 6 Ɓa bɩ́rmɛ́ óníkísi dɔ́wʋ́ɔ́ a ja salmɛ oŋtʋʋlɛ́ tʋ́wɔ́ mɛ́. Ɓa ja omo a lɛsɛ Ɩzɩrayɛl nɩɛ yɩra dɔ́wʋ́ɔ́ ná daha, anɛ ɛ́ ɓa háá lɛsɛ táŋpɔ́ŋ. 7 Ɓa pi ɛ́ dɔ́wʋ́ɔ́ a hé vʋk'ɔɔsɔ nɔhɔ̃́ gɛluŋo vapara ɓɩɛ ná mɛ́, rɩ́wɔ́ a Ɩzɩrayɛl nɩɛ liise dɔ́wʋ́ɔ́, anɛ ɛ́ Nyuutɩna Wɩɩsɛ há máŋsɛ́ pá Moyizi.
Baŋcɩtɔ́lɔ bɩrmɛ́
8 Ɓa a baŋcɩtɔ́lɔ ná arɩ́ salmɛ rɩ́ gepúŋ mʋɔlɩ́ rɩ́ ɓɩfɩɛmɔ rɩ́ ɓɩkɔklɩ́ arɩ́ gepúŋmɛɛlɩ́, ʋ a nɛ́sɛ tʋtʋmɩ́ ná há wéró anɛ vʋk'ɔɔsɔ nɔhɔ̃́ gɛrɔ ná. 9 Ʋ jɛ́l rɩ́rʋ́ gbési wuu mɔ náŋá, ɓa kaa ɓʋ́ bʋllɛ; gbési fa ká nɛ́sɛ ciké sɩ́ɩ́, jɛ́l má ɛ́ tɩɩ. 10 Ɓa ja dɔ́wɩ́were ɓɩ́ɛ́rʋ́, a fʋ́ kólli baná: dʋ́ŋdʋ́ʋ̃́ kóle mí ɓa hé saadʋanɛ rɩ́ tɔpazɛ arɩ́ emerodi; 11 bʋllɛ kóle mí ɓa hé ɛsɩkarbʋkɩl rɩ́ safiir arɩ́ dɩamaŋ; 12 botoro kóle mí ɓa hé yasɩŋtɛ rɩ́ agatɛ arɩ́ ametiisi; 13 baná kóle mí ɓa hé kirizoliti rɩ́ oniksi arɩ́ zaspɛ. Ɛ́ dɔ́wʋ́ɔ́ oro wuu fa kenú salmɛ oŋtʋʋlɩ́ ɓa pii tʋ. 14 Ɓa ja omo a lɛsɛ Ɩzɩrayɛl nɩɛ fí rí bɛllɛ ná oro wuu yɩr dɔ́wɩ́ wuu daha anɛ ɛ́ ɓa háá lɛsɛ táŋpɔ́ŋ; dɔ́wɩ́ wuu daha, Ɩzɩrayɛl jɩmʋ́ʋ́la fí rí bɛllɛ ná oro wuu yɩr nɛ́ ráŋ. 15 Ɓa pi salmɛ cʋɔrɩ́ a bɩrmɛ bɛŋzɛlwɩɛla bɛllɛ a kaa ŋmɛ a hé baŋcɩtɔ́lɔ ná mɛ́. 16 Ɓa bɩrmɛ salmɛ oŋtʋʋlɛ́ bɛllɛ rɩ́ salmɛ gúóréwa má bɛllɛ, a hé baŋcɩtɔ́lɔ ná nʋʋsɛ mɛ́. 17 Ɓa ka salmɛ bɛŋzɛlwɩɛla ná bɛllɛ nʋʋsɛ náŋa tʋ gúóréwa ná bɛllɛ há mɩŋ baŋcɩtɔ́lɔ nʋʋsɛ ná mɛ́; 18 ká káŋwɔ́ nʋʋsɛ náŋa má tʋ vʋk'ɔɔsɔ nɔhɔ̃́ gɛluŋo sɩ́ɛ́ vapara oŋtʋʋlɛ́ ná mɛ́. 19 Ɓa baa bɩrmɛ salmɛ gúóréwa bɛllɛ, a hé baŋcɩtɔ́lɔ ná tíé rí nʋʋsɛ ná bɛllɛ háá tɩkɛ vʋk'ɔɔsɔ nɔhɔ̃́ gɛluŋo ná mɛ́. 20 Ɓa baa a salmɛ gúóréwa bɛllɛ náŋa má, a hé vʋk'ɔɔsɔ nɔhɔ̃́ gɛluŋo vapara onni ná mʋ́l rɩ́, a caasɛ sɩ́ɛ́ rɩ́, náŋá dɩcɔ́ɔ́lɛ laka, gɛrɔ ná vɔwɛ́ nyúú. 21 Ɓaŋcɩtɔ́lɔ gúóréwa ná nɛ́ ɓa kaa hé vʋk'ɔɔsɔ nɔhɔ̃́ gɛrɔ gúóréwa ná mɛ́ a pi gepúŋ ŋmɛ́ŋ'mʋɔlɩ́ a vɔwɛ, a makɛ rɩ́ baŋcɩtɔ́lɔ ná sakɛ gɛrɔ ná vɔwɛ́ ná mɛ́, a sɩ́ lɛ́kʋ́ káá tá gɛrɔ ná, anɛ ɛ́ Nyuutɩna Wɩɩsɛ há máŋsɛ́ pá Moyizi.
Vʋk'ɔɔsɔ nɔhɔ̃́ gɛnnɛ náŋa bɩrmɛ́
22 Ɓa nyɛrɛ vʋk'ɔɔsɔ nɔhɔ̃́ gɛrɔ sɩɛrʋ yɛ́wɛ ná, ʋ wuu a gɛmʋɔlɩ́. 23 Ɓa lúrú baŋ sɩ́sɩ́ɛ́nʋ́wa, a sɔ nʋɔ a gi ʋ ka dóé anɛ kɛnɔ gɛrɔ baŋ, a makɛ rʋ́ʋ́ sɩ́ cɔ́rʋ́. 24 Ɓa pi gepúŋ mʋɔlɩ́, ɓɩkɔklɩ́ rɩ́ ɓɩfɩɛmɔ a ŋmɛ a bɩrmɛ grenadie nɔnɔ, 25 a bɩrmɛ salmɛ cʋɔrɩ́ bɩ́ŋbɩ́lwiisi a hé girenadie nɔɔnɔ ná pɛ́ksɛ, a hé yɛ́wɛ ná nʋɔ, tíé rí a kíl. 26 Ɓa há girenadie nɔnɔ ná rɩ́ bɩ́ŋbɩ́lwiisi ná léŋsí léŋsi náŋá mɛ́ a kíl yɛ́wɛ ná nʋɔ wuu, anɛ ɛ́ Nyuutɩna Wɩɩsɛ há máŋsɛ́ pá Moyizi.
27 Ɓa sɔ gɛwiisi arɩ́ gepúwɩɛlɩ́wie a pá Aarɔŋ rɩ́rʋ́ bɛlɛ; 28 a sɔ nyúbálɔ rɩ́ gepúwɩɛlɩ́wie, arɩ́ nyúbállɛ náŋa háá píŋsíwó, arɩ́ tɩ́ŋtɔ́lɔ́wa, 29 rɩ́ vɔɔ́sɛ ɓa há sɔ́ɛ́ arɩ́ gepúŋmɛɛlɩ́ ná há dúókó a fʋ́ rɩ́ gepúmʋɔlɩ́ rɩ́ ɓɩfɩɛmɔ arɩ́ ɓɩkɔklɩ́, anɛ ɛ́ Nyuutɩna Wɩɩsɛ há máŋsɛ́ pá Moyizi.
30 Ɓa pi salmɛ cʋɔrɩ́ a ʋ nɛ sii, a a mállá, ɓa lɛ́sʋ́ daha anɛ táŋpɔ́ŋ a pʋ́ŋɛ: <Nyuutɩna Wɩɩsɛ nɛ́ tʋ́ʋ̃́.> 31 Ɓa ja ŋmɛ́mʋɔlɩ́ a púú vɔwɛ maanɛ nyúbálɔ ná sɩ́ɛ́, anɛ ɛ́ Nyuutɩna Wɩɩsɛ há máŋsɛ́ pá Moyizi.
Ɓa ténní táŋtɛjaa bɩrmɛ́
32 táŋtɛjaa ná há ká Wɩɩsɛ dɩmɩnɩ́, ʋ tʋtʋmɛ́ tʋŋ tenné ní ɛ́. Ɩzɩrayɛl nɩɛ á wɩ́ɛ́ ná wuu Nyuutɩna Wɩɩsɛ fa há máŋsɛ́ pá Moyizi; ɓa á ɛ́ tɩɩ nɛ́. 33 Ɓa sɩɛ́ pi táŋtɛ ná kaa ko Moyizi rɩ́:
táŋtɛ ná rɩ́rʋ́ cɩksɛ wuu, ʋ káŋsɛ, ʋ dapɛ́rsɛ, ʋ dapʋɔllɛ, ʋ dalíŋe rɩ́rʋ́ naasɛ;
34 peɓallɛ kɛnnɛ ná ɓa há nʋ́ɔ́sɛ́ a fɛ́l, dɔ́fɛ́ŋ kɛnnɛ rɩ́ patɩ́ɩ́sazeno ná há ká kɛ́rɛ́;
35 nʋtʋmɛ dáka ná rɩ́rʋ́ dapʋɔllɛ rɩ́rʋ́ nyútɔ́lɔ;
36 táábɩl rɩ́rʋ́ cɩkwɩɛla wuu rɩ́ dɩpɛ́ŋwa ná ɓa há píé pá Wɩɩsɛ;
37 salmɛ cʋɔrɩ́ cáŋdaa rɩ́rʋ́ cáŋsɛ rɩ́rʋ́ cɩkwɩɛla rɩ́ nʋʋ ná háá hé cáŋsɛ ná mɛ́ rɩ́wɔ́ kɩ́ka;
38 salmɛ koro rɩ́ nyúcúúrínʋʋ, rɩ́ tulaalé míŋ ná ɓa háá físé;
táŋtɛjaa dánnʋɔ patɩ́ɩ́sa ná háá kɛ́rɛ́;
39 kɔmɔ́ koro rɩ́rʋ́ kɔmɔ́ gɩ́rɩ́yáázɛ rɩ́rʋ́ dapʋɔllɛ rɩ́rʋ́ oŋkaatʋmɛ́ wuu; tɩɩ sɛsɛ́ naŋtáŋŋa rɩ́rʋ́ dɩsakɩ́;
40 wuolo kɛ́rɛ pɛ́ŋbíé rɩ́rʋ́ dacɔ́ŋsɛ rɩ́wɔ́ naasɛ rɩ́ wuolo dánnʋɔ patɩ́sa rɩ́rʋ́ ŋmɛ́sɛ rɩ́rʋ́ dapési;
onni ná wuu há ká táŋtɛjaa ná rɩ́ Wɩɩsɛ dɩmɩnɩ́ oŋkaatʋmɛ́;
41 gɛnnɛ ná há kɔ́wɔ́ dʋŋɔ rɩ́wɔ́ kaá tʋŋ Wɩɩsɛ sɩ́ɛ́;
vʋk'ɔɔsɔ nɔhɔ̃́ Aarɔŋ tʋtʋmɛ́ gɛnnɛ arɩ́rʋ́ bɛlɛ tʋtʋmɛ́ gɛnnɛ.