LƖƖ 38

Vʋk'ɔ́ɔ́sɩ́koro rɩ́ tɩɩ sɛsɛ́ naŋtáŋŋa bɩrmɛ́

1 Ʋ já ákásɩ́á daasɛ a bɩrmɛ vʋk'ɔ́ɔ́sɩ́koro; ʋ gbési fa ká nágʋtókó sɩ́ɩ́ bɔmmʋ́ʋ́, ʋ jɛ́l má a nágʋtókó sɩ́ɩ́ bɔmmʋ́ɔ́, ʋ wuu mɔ náŋá, ká ʋ isé a nágʋtókó sɩ́ɩ́ botoro. 2 Ʋ hé nyɩ́sɛ baná ʋ lʋ́lɔ́ŋsɛ ná baná mɛ́, ɓa rɩ́ koro ná wuu cɔ́ náŋá mɛ́ a a óŋ balá. Ʋ cʋɔrɛ kɔmɔ́ a tɔ́ɔ́ wuu mí. 3 Ʋ pí kɔmɔ́ a bɩrmɛ koro ná oŋkaatʋmɛ́ wuu: tapʋmmɔ oŋkaapaalɛ́, pɛ́lwa, cɛ́l gbaŋsɛ, naŋhɛmɛ arɩ́ níŋtɔ́kɩ́rɛ́ɓɩɛ. 4 Ʋ á kɔmɔ́ gɩ́rɩ́yázɛ ɓɩzeno, a pi gɩ́rɩ́yázɛ ná su koro ná, ʋ tuwi cɛ́rɛ koro ná isé fá. 5 Ʋ á kɔmɔ́ gúóréwa baná, a hé gɩ́rɩ́yázɛ ná lʋ́lɔ́ŋsɛ ná baná mɛ́, rɩ́wɔ́ tʋ́tʋ dole ráŋ. 6 Ʋ cɔ́ ákásíá dole bɛllɛ, a cʋɔrɛ kɔmɔ́ tɔ́. 7 Ʋ pi ɛ́ dole a tʋ gúóréwa ná mɛ́, koro ná lokure bɛllɛ mɛ́, rɩ́wɔ́ kaa púú aá va. Ʋ pí dacɔrʋ a a koro ná ʋ sɩɛrʋ wuu a bʋɔ.

8 Ʋ bɩ́rmɛ́ kɔmɔ́ naŋtáŋŋa ná, ʋ dɩsakɩ́ má a kɔmɔ́; ʋ pí háála ná háá tʋŋ táŋtɛjaa ná dánnʋɔ kɔmɔ́ nyílli ní a bɩrmɛ.

Táŋtɛjaa wuolo kɛ́rɛ

9 Ɛ́ har mɛ́, ʋ á táŋtɛjaa ná wuolo oŋkɛ́rɛ. Tɔ́ɔ́ lʋ́lɔ́ŋɛ rɩ́, gepúyoolí ná há dúókó pɛ́ŋbíé ní ʋ nyɛrɛ, gbési a nágʋtókó sɩ́ɩ́ zɔlɔ. 10 Ʋ bɩ́rmɩ́wɔ́ kɔmɔ́ dacɔ́ŋsɛ mɛrɛ́ rɩ́wɔ́ naasɛ mɛrɛ́, a hé wárɛ káŋsɛ rɩ́ wárɛ oŋtʋʋlɛ́ ɓa mɛ́. 11 Tɔ́ɔ́ lʋ́lɔ́ŋɛ nɔ́ŋɔ rɩ́, ʋ má pɛ́ŋbíé́ gbési nágʋtókó sɩ́ɩ́ zɔlɔ; a hóú má kɔmɔ́ dacɔ́ŋsɛ mɛrɛ́ rɩ́wɔ́ naasɛ mɛrɛ́, rɩ́wɔ́ wárɛ káŋsɛ rɩ́ wárɛ oŋtʋʋlɛ́. 12 Tɔ́ɔ́ nyúú rí má pɛ́ŋbíé nágʋtókó sɩ́ɩ́ mɛɛ́sɛllɛ rɩ́ fí; kɔmɔ́ dacɔ́ŋsɛ fí rɩ́wɔ́ naasɛ má fí, rɩ́wɔ́ wárɛ káŋsɛ rɩ́ wárɛ oŋtʋʋlɛ́. 13 Tɔ́ɔ́ mʋ́bʋɔ rɩ́ má pɛ́ŋbíé nágʋtókó sɩ́ɩ́ mɛɛ́sɛllɛ rɩ́ fí. 14 Cɔɔ nɔ́ŋɔ pɛ́ŋbíé nágʋtókó sɩ́ɩ́ fí rɩ́ bɔmmʋ́ɔ́, kɔmɔ́ dacɔ́ŋsɛ botoro rɩ́wɔ́ naasɛ botoro; 15 cɔɔ ná nɔ́ŋɔ má há cɩ́nɛ́ cɛ́rɛ wuolo ná dánnʋɔ cɔɔ nɔ́ŋɔ, ʋ má pɛ́ŋbíé nágʋtókó sɩ́ɩ́ fí rɩ́ bɔmmʋ́ɔ́, kɔmɔ́ dacɔ́ŋsɛ botoro rɩ́wɔ́ naasɛ botoro. 16 Pɛ́ŋbíé ná wuu há kɛ́rɛ wuolo ná, ɓa fa ká gepúyoolí ná há dúókó pɛ́ŋbíé ní. 17 Dacɔ́ŋsɛ ná naasɛ fa ká kɔmɔ́ nɛ́; káŋsɛ rɩ́ oŋtʋʋlɛ́ má a wárɛ; dacɔ́ŋsɛ ná nyunni tɔ́llɛ má ká wárɛ nɛ́ ɓa pii tɔ́. Wárɛ oŋtʋʋlɛ́ nɛ́ fa láásɛ dacɔ́ŋsɛ ná wuu. 18 Nɩɛ ná há ɛ̃ fʋ́ɩ́, ɓa nɛ́ bɩ́rmɛ́ wuolo ná dánnʋɔ patɩ́ɩ́sazeno; ɓa kéŋ gepúwɩɛlɩ́wie ɓa há yóé, ɓa mʋɔlɩ́ rɩ́ ɓɩfɩɛŋsɛ mukuku, arɩ́ ɓɩkɔklɛ́ nɛ́ a sɔ pɛ́ŋbíé a fʋ́. Ʋ gbési fa ká nágʋtókó sɩ́ɩ́ mɛrɛ́, ʋ isé nágʋtókó sɩ́ɩ́ bɔmmʋ́ɔ́ anɛ wuolo ná pɛ́ŋbíé jɛ́l. 19 Patɩ́ɩ́sazeno ná fa hé kɔmɔ́ dacɔ́ŋsɛ baná mɛ́ nɛ́, rɩ́wɔ́ naasɛ má baná, rɩ́wɔ́ wárɛ káŋsɛ rɩ́ wárɛ oŋtʋʋlɛ́; dacɔ́ŋsɛ ná nyunni tɔ́llɛ má ká wárɛ nɛ́ ɓa pii tɔ́. 20 Kɔmɔ́ nɛ́ ɓa kaa bɩrmɛ táŋtɛjaa ná dapési rɩ́ wuolo dapési wuu.

Salmɛ rɩ́ wárɛ arɩ́ kɔmɔ́ ɛ́ ɓa há píé tʋŋ

21 Ná onni ná há sɔ́ táŋtɛjaa ná, nʋtʋmɛ dáka dɩbilí ná kʋ́ŋtá. Moyizi ní sɛ́ rɩ́wɔ́ a kʋ́ŋtá; Levi jɩmʋ́l nɩɛ nɛ́ á ɛ́ kʋ́ŋtá. Aarɔŋ bio Ɩtamarɛ nɛ́ dí sɩ́ɛ́ ɛ́ tʋtʋmɩ́ tʋŋ. 22 Uuri bio Bɛtɩsalɩɛl há ká Huur nihĩ, a lɛ Ziida jɩmʋ́l nɩɛ sɩɛrʋ, ʋ nɛ́ á wɩ́ɛ́ ná wuu Nyuutɩna Wɩɩsɛ há máŋsɛ́ pá Moyizi. 23 Ʋ rɩ́ Ahisamak bio Ɔhɔlɩabɛ, a lɛ Daŋ jɩmʋl nɩɛ sɩɛrʋ, ɓa nɛ́ tʋ́mɛ́. Ʋ fa ɛ̃ cɔ́ɛ́ a zɩŋ tʋtʋmɩ́ rɩ́rʋ́ dúó wuu, a zɩŋ pɛ́ŋ'mʋ́ɔ́llɛ rɩ́ pɛ́ŋfɩɛŋsɛ arɩ́ pɛ́ŋkɔklɛ́ fʋ́ɩ́, a fʋ́fʋ́ gepúwɩɛlɩ́wie pɛ́ŋsɛ má.

24 Salmɛ ná wuu Ɩzɩrayɛl nɩɛ há tɛ́ɛ́ ɓa kaa tʋŋ táŋtɛjaa tʋtʋmɛ́ ná wuu, ɓa fa ká salmɛ kííló zɔlɔ córí rɩ́ mɛɛ́sɩbotoro rɩ́ fí rí balpɛ arɩ́ gɩ́ráŋ zotoro, táŋtɛjaa kérse mí. 25 Jamáŋ ná sɩɛrʋ nɩdɩɩsɛ́ wárɛ fa ká kííló bʋ́ɩ́toro rɩ́ fí rí balpɛ arɩ́ gɩ́ráŋ zɔwalpɛ mɛɛ́sɛllɛ rɩ́ fí, táŋtɛjaa kérse mí. 26 Nɩdɩɩsɛ́ ná nɛ́ŋ wuu fá ká wárɛ gɩ́ráŋ bɔmmʋ́ɔ́ nɛ́; ɓa báála bʋ́ɩ́zɔwalgo rɩ́ botoro zɔɔmmʋ́ɔ́ mɛɛ́sɛllɛ rɩ́ fí, a pɔ́ bɩŋsɛ mɛrɛ́ ká zɩ́zɛ́. 27 Ɓa pí wárɛ kííló bʋ́ɩ́toro ní, a cʋɔrɛ táŋtɛjaa rɩ́ sɩɛrʋ patɩ́ɩ́sazeno dalíŋsi naasɛ ná zɔlɔ, náá balá wuu wárɛ kííló mɛrɛ́ rɩ́ fí. 28 Ká pi wárɛ káánɛ, kííló fí rí balpɛ arɩ́ gɩ́ráŋ zɔlɔ mɛɛ́sɛllɛ rɩ́ fí ná, a bɩrmɛ dalíŋsi káŋsɛ rɩ́ oŋtʋʋlɛ́ ná há lɛ́rmɛ́ dalíŋsi ná, a bɩrmɛ dalíŋsi nyúú tɔ́llɛ má. 29 Kɔmɔ́ ná wuu Ɩzɩrayɛl nɩɛ há tɛ́ɛ́, ɓa fa ká kííló bʋ́ɩ́wʋllɛ rɩ́ zɔlɔ rɩ́ mɛrɛ́ rɩ́ baná. 30 Ɓa píwó ní a bɩrmɛ táŋtɛjaa dánnʋɔ naasɛ, rɩ́ kɔmɔ́ vʋk'ɔ́ɔ́sɩ́koro rɩ́rʋ́ kɔmɔ́ gɩ́rɩ́yázɛ, rɩ́ koro ná tʋtʋmɛ́ cɩksɛ wuu; 31 a bɩrmɛ wuolo kɛ́rɛ rɩ́ wuolo dánnʋɔ naasɛ, a bɩrmɛ táŋtɛjaa ná rɩ́ wuolo dapési wuu.