LƖƖ 37

Nʋtʋmɛ dáka ná bɩrmɛ́

1 Bɛtɩsalɩɛl ɓásɛ dáka ná arɩ́ ákásɩ́á daasɛ; ʋ gbési fa ká nágʋtókó sɩ́ɩ́ bɛllɛ rɩ́ fá, ʋ jɛ́l a nágʋtókó sɩ́ɩ́ rɩ́ fá, ʋ isé má a nágʋtókó sɩ́ɩ́ rɩ́ fá. 2 Bɛtɩsalɩɛl pí salmɛ cʋɔrɩ́ a táárʋ́ sɩɛrʋ rɩ́rʋ́ har wuu, ká gi nʋɔ wuu a kíl. 3 Ʋ cʋ́ɔ́rɛ́ salmɛ a a gúóréwa baná a hóú lʋ́lɔ́ŋsɛ ná baná, cɔɔ nɔ́ŋɔ bɛllɛ, cɔɔ nɔ́ŋɔ má bɛllɛ. 4 Ʋ bɩ́rmɛ́ ákásɩ́á dapʋɔllɛ bɛllɛ, a pi salmɛ tɔ́wɔ́ mɛ́. 5 Ʋ pí dapʋɔllɛ ná tʋ gúóréwa ná mɛ́, cɔɔ́ wuu, rɩ́wɔ́ káŋwɔ́ mɛ́ nɛ́ aá pi dáka ná.

6 Ʋ pí salmɛ cʋɔrɩ́ a bɩrmɛ dáka ná nyúú tɔ́lɔ. Tɔ́lɔ ná gbési fa ká nágʋtókó sɩ́ɩ́ bɛllɛ rɩ́ fá, jɛ́l nágʋtókó sɩ́ɩ́ rɩ́ fá. 7 Ʋ má malɩ́kawa bɛllɛ arɩ́ salmɛ; ʋ lúkwó cɔ́ dáka cúl ná kíŋkersi bɛllɛ. 8 Malɩ́ka nɔ́ŋɔ cɛ́ cɔɔ nɔ́ŋɔ, ká nɔ́ŋɔ má cɛ́ cɔɔ nɔ́ŋɔ. Ʋ ɔ́ɔ́ malɩ́kawa ná bɛllɛ rɩ́ dáka nʋʋsɛ ná bɛllɛ cɔ́ náŋá mɛ́ a a óŋ balá. 9 Malɩ́kawa ná cɛ́, ká ɓa sɩ́ɛ́ caasɛ náŋá aá bel dáka cúl ná, ká ɓa kiŋkeru jɛrɛ zɛ́ nyúú rí a cú dáka cúl ná mɛ́.

Dɩpɛ́ŋwa táábɩl ná bɩrmɛ́

10 Ʋ bɩ́rmɛ́ ákásɩ́á daasɛ táábɩl ná; ʋ gbési fa ká nágʋtókó sɩ́ɩ́ bɛllɛ, ʋ jɛ́l nágʋtókó sɩ́ɩ́, ʋ isé nágʋtókó sɩ́ɩ́ rɩ́ fá. 11 Ʋ pí salmɛ cʋɔrɩ́ a tɔ́ʋ́ daha wuu, ká gi nʋɔ wuu a kíl. 12 Ʋ á mʋ́l giró ʋ jɛ́l peri sáŋtɩmɛ́tɩr córí, táábɩl ná sákʋ́ daha; ká pi salmɛ gi giró ná nʋɔ wuu. 13 Ʋ cʋ́ɔ́rɛ́ salmɛ a a gúóréwa baná, a píwó baná ná hé lʋ́lɔ́ŋsɛ ná baná, a cɛ́rɛ naasɛ ná baná. 14 Ʋ hé gúóréwa ná ɓa peri giró ná, ɓa tʋ́tʋ daasɛ ráŋ, táábɩl ná pii wɩ́ɛ́. 15 Ʋ já ákásɩ́á dapʋɔllɛ, a pi salmɛ tɔ́wɔ́ mɛ́, ɓa káŋwɔ́ mɛ́ nɛ́ aá pi táábɩl ná. 16 Ʋ cʋ́ɔ́rɛ́ salmɛ a bɩrmɛ gbaŋsɛ ná háá sakɛ táábɩl ná daha: gbaŋwiisi, nyíŋgbaŋsɛ arɩ́ loŋwiisi ná ɓa há sɩ́ híhé dɩvɛ́ŋ pállɛ ráŋ a kaá tʋŋ.

Cáŋdaa rɩ́rʋ́ keŋe ná bɩrmɛ́

17 Ʋ pí salmɛ cʋɔrɩ́ a luki cáŋdaa ʋ a oŋpírmí; ʋ naa, ʋ daa, ʋ keŋe, ʋ lukme rɩ́rʋ́ onni ná há nɛhɩ̃́ fɩɩla, ɓa wuu fa ká oŋpírmí ní. 18 Keŋe balgo ní hóú lʋ́lɔ́ŋsɛ, botoro cɔɔ nɔ́ŋɔ, botoro cɔɔ nɔ́ŋɔ má. 19 Keŋe ná balgo, oro wuu mí, ʋ hé fɩl kóksi botoro anɛ ámáŋdíé nɔnɔ, arɩ́ lukme rɩ́ fɩɩla ná há cɛ́rɛ́. 20 cáŋdaa ná mɛ́, ʋ hé fɩl kóksi baná anɛ ámáŋdíé nɔnɔ, rɩ́wɔ́ lukme rɩ́wɔ́ fɩɩla. 21 Keŋe ná botoro há lɛ́ cáŋdaa ná mɛ́ cɔɔ́ wuu, oro wuu mʋ́l, ʋ hé lukme. 22 Lukme ná rɩ́ keŋe ná wuu fa ká óŋpírmí ʋ pi salmɛ cʋɔrɩ́ a luki. 23 Ʋ bɩ́rmɛ́ cáŋsɛ ná balpɛ, rɩ́rʋ́ cɩkwɩɛla, cɛwɩwɩɛla, tapʋmmɔ dɩtuwí, ɓa má wuu, salmɛ cʋɔrɩ́ nɛ́ ʋ pii bɩrmɛ. 24 Salmɛ cʋɔrɩ́ kííló mɛrɛ́ rɩ́ fí ní ʋ pii bɩrmɛ cáŋdaa ná rɩ́rʋ́ cɩkwɩɛla wuu.

Tulaalékoro ná bɩrmɛ́

25 Bɛtɩsalɩɛl bɩ́rmɛ́ ákásɩ́a daasɛ koro ná, rɩ́wɔ́ nyɩ́nyɩkɛ tulaaléwa ʋ nyúú; ʋ gbési fa ká nágʋtóó sɩ́ɩ́ balá, ʋ jɛ́l má nágʋtókó sɩ́ɩ́ balá, kɔ́ʋ́ isé a nágʋtókó sɩ́ɩ́ bɛllɛ. Ʋ lʋ́lɔ́ŋsɛ caŋ lɛ a a nyɩ́sɛ a cɔ́ʋ́ mɛ́. 26 Ʋ cʋ́ɔ́rɛ́ salmɛ a tɔ́ʋ́ daha, ʋ sɩɛrʋ rɩ́rʋ́ har, a tɔ́ʋ́ nyɩ́sɛ má mɛ́, ká pi salmɛ a gi nʋɔ kíl. 27 Ʋ hé salmɛ gúóréwa bɛllɛ nʋgiiló ná mʋ́l, lʋ́lɔ́ŋsɛ bɛllɛ mɛ́; ʋ hé náŋa má dɩhɛ̃́ náŋa, rɩ́wɔ́ tʋ dapʋɔllɛ ráŋ a kaá pi. 28 Ʋ bɩ́rmɛ́ ákásɩ́á dapʋɔllɛ a pi salmɛ tɔ́wɔ́ mɛ́.

29 Nɛrɔ ná háá tʋŋ tulaalé bɩ́rmɛ́ tulaalé míŋ arɩ́ nyúcúúrínʋʋ ná ɓa há sɩ́ ɔ́ŋsɛ hé nɩɛ rɩ́ onni mí, a lɩ́sɩ́wɔ́ bílwó dʋŋɔ Wɩɩsɛ tʋtʋmɛ́ yɩr mɛ́.