36
1 <<Bɛtɩsalɩɛl rɩ́ Ɔhɔlɩabɛ arɩ́ nɩɛ ná wuu há kéŋ dɩllɛ, Nyuutɩna Wɩɩsɛ pɔ́wɔ́ zɩmɛ́ rɩ́ wɩ́zɩmɛ rɩ́wɔ́ tʋŋ táŋtɛjaa ná há ká Wɩɩsɛ dɩcémi tʋtʋmɛ́ ná wuu, ɓa sɩ́ bɩrmɛ onni ná wuu Nyuutɩna Wɩɩsɛ há máŋsɛ́.>>2 Moyizi sɩɛ́ yɩ́rɛ Bɛtɩsalɩɛl rɩ́ Ɔhɔlɩabɛ arɩ́ nɩɛ ná wuu há kéŋ dɩllɛ, Nyuutɩna Wɩɩsɛ pɔ́wɔ́ wɩ́zɩmɛ, ɓa wuu sɩɛrʋ cólli tʋtʋmɛ́ ná tʋmɛ́, ɓa kóú rí. 3 Moyizi pi Ɩzɩrayɛl nɩɛ kɩɛsɔ́ ná ɓa há kɩ́ɛ́sɛ́ rɩ́wɔ́ sɔ táŋtɛjaa ná há ká Wɩɩsɛ dɩcémi. Ká kál wuu cɩ́cʋɔ, nɩɛ ha ka satɔrɔ́ pállɛ ko aá pá Moyizi. 4 Ɛ́ nɛ́ nɩɛ ná wuu há kéŋ dɩllɛ, ɓa tá táŋtɛjaa ná tʋtʋmɛ́, 5 ká ko bʋl Moyizi rɩ́ bʋlɛ́: <<Ɓɩɛ ná jamáŋ ná há kéné aá ko, ɓa kánɔ́ daarɛ, ɓa gʋ́sɛ́ tʋtʋmɩ́ ná Nyuutɩna Wɩɩsɛ há mákɛ́.>> 6 Moyizi a ɓa búóli púl ná wuu mí a bʋlɛ́: <<Nɛrɔ wuu, rʋʋ ká bál, rʋʋ ká hál, rɩ́wɔ́ báá sɩ́ ɓɩɛ jáá ko rɩ́wɔ́ sɔ Wɩɩsɛ dɩcémi ná.>> Ɛ́ nɛ́ ɛ́ɛ́ nɩɛ báá wɩ ɓɩɛ kené aá ko. 7 Kɩɛsɔ́ ná fa pérí tʋtʋmɩ́ ná wuu tʋmɛ́, ká káánɛ.
táŋtɛjaa ná sɔɛ
8 Nɩɛ ná wuu há kéŋ dɩllɛ, ɓa cíkí táŋtɛjaa ná arɩ́ gepúwɩɛlɩ́wie ɓa há yóé, ɓa mʋɔlɩ́ rɩ́ ɓɩfɩɛŋsɛ mukuku, arɩ́ ɓɩkɔklɛ́, a sɔ pɛ́ŋbíé fí, a fʋ́ malɩ́kawa fótowa ráŋ. 9 Pɛ́ŋbíí wuu gbési fa ká nágʋtókó sɩ́ɩ́ mɛrɛ́ rɩ́ córí, jɛ́l nágʋtókó sɩ́ɩ́ baná. Pɛ́ŋbíé ná oro wuu mɔɛ nɛ́ ɛ́. 10 Ɓa nyɛrɛ pɛ́ŋbíé bɔmmʋ́ɔ́ a cɔ́ náŋá mɛ́, a nyɛrɛ bɔmmʋ́ɔ́ má cɔ́ náŋá mɛ́. 11 Ɓa hé mʋɔlɩ́ vɔɔ́sɛ ɓa ná bɔmmʋ́ɔ́ ɓa há lá sɩ́ɛ́ nyɛrɛ cɔ́ hatɩ́ŋnɛ́ pɛ́ŋbíí mí, a hé vɔɔ́sɛ náŋá ná má bɔmmʋ́ɔ́ dʋ́ŋdʋ́ʋ̃́ pɛ́ŋbíí mí. 12 Ɓa hé vɔɔ́sɛ mɛɛ́sɛllɛ rɩ́ fí pɛ́ŋbíé ná ɓa há nyɛ́rɛ́ cɔ́ dʋ́ŋdʋ́ʋ̃́ pɛ́ŋbíí mí, a hé vɔɔ́sɛ mɛɛ́sɛllɛ rɩ́ fí hatɩ́ŋnɛ pɛ́ŋbíí mí; nʋʋsɛ ná bɛllɛ vɔɔ́sɛ ná cɛ́rɛ náŋá. 13 Ɓa a salmɛ káŋsɛ mɛɛ́sɛllɛ rɩ́ fí, a píwó ka pɛ́ŋbíé ná hé náŋá mɛ́, táŋtɛ ná a óŋpírmí.
14 Ɓa bɩrmɛ bʋʋnɔ pʋ́sɛ táŋtɛwa, rɩ́wɔ́ a táŋtɛjaa ná nyútɔ́lɔ. Ɓa bɩ́rmɩ́wɔ́ fí rí oro. 15 Ɓa balá wuu gbési fa ká nágʋtókó sɩ́ɩ́ mɛrɛ́ rɩ́ fí, jɛ́l nágʋtókó sɩ́ɩ́ baná. 16 Ɓa nyɛrɛ bɔmmʋ́ɔ́ cɔ́ náŋá mɛ́, a nyɛrɛ balgo má cɔ́ náŋá mɛ́. 17 Ɓa hé vɔɔ́sɛ ɓa ná bɔmmʋ́ɔ́ ɓa há lá sɩ́ɛ́ nyɛrɛ cɔ́ hatɩ́ŋnɛ́ táŋtɛ nʋɔ mɛ́, a hé vɔɔ́sɛ náŋá ná má balgo dʋ́ŋdʋ́ʋ̃́ táŋtɛ nʋɔ mɛ́. 18 Ɓa a kɔmɔ́ káŋsɛ mɛɛ́sɛllɛ rɩ́ fí, a píwó tʋ vɔɔ́sɛ ná mɛ́, a ka táŋtɛ ná hé náŋá mɛ́, ʋ a oŋpírmí. 19 Ɓa nʋɔsɛ peɓallɛ kɛnnɛ a fɛ́l, a pii tɔ́ nyúú, a sɩɛ́ pi kɛnnɛ ná há kéŋ dóé a tɔ́wɔ́ daha.
20 Ɓa pɛ́rsɛ ákásɩ́á daasɛ a cɔ́ŋsɛ, rɩ́wɔ́ ka táŋtɛjaa ná cɛ́. 21 Dapɛ́rsɛ wuu gbési fa ká nágʋtókó sɩ́ɩ́ fí, ʋ jɛ́l má nágʋtókó sɩ́ɩ́ rɩ́ fá. 22 táŋtɛjaa ná dapɛ́rsɛ wuu fa kéŋ káŋsɛ bɛllɛ a cɛ́ cɛ́rɛ náŋá. 23 Ɓa pɛ́rsɛ daasɛ mɛrɛ́ a hé táŋtɛjaa ná cɔɔ nɔ́ŋɔ, tɔ́ɔ́ lʋ́lɔ́ŋɛ rɩ́. 24 Ɓa hé wárɛ naasɛ mɛɛ́sɛllɛ dapɛ́rsɛ ná mɛrɛ́ mʋ́l rɩ́; dáá wuu naasɛ bɛllɛ, káŋsɛ ná cɛ́rsɛ. 25 táŋtɛjaa ná cɔɔ nɔ́ŋɔ, tɔ́ɔ́ lʋ́lɔ́ŋɛ nɔ́ŋɔ rɩ́, ɓa hé dapɛ́rsɛ mɛrɛ́, 26 a héwó má wárɛ naasɛ mɛɛ́sɛllɛ; dáá wuu mʋ́l naasɛ bɛllɛ. 27 Ɓa pɛ́rsɛ daasɛ balgo a hé táŋtɛjaa ná nyúú rí, tɔ́ɔ́ nyúú rí cɔɔ. 28 Ɓa pɛ́rsɛ daasɛ bɛllɛ a hé nyúú rí nagbáŋjɛ́wa. 29 Ɛ́ daasɛ bɛllɛ cíksi a cɛ́rɛ náŋá mʋ́l rɩ́, ká zɛ́ nyúú rí a hé náŋá mɛ́, ɓa pi giró a ka. Ɓa wuu bɛllɛ nɛ náŋá, a mɩŋ nagbáŋjɛ́wa ná bɛllɛ mɛ́. 30 Ɓa wuu hé náŋá mɛ́, dapɛ́rsɛ córí ní, arɩ́wɔ́ naasɛ fí rí balgo; dáá wuu naasɛ bɛllɛ, mʋ́l rɩ́. 31 Ɓa cɔ́ ákásɩ́á dapʋɔllɛ bɔmmʋ́ɔ́ a lɛrmɛ táŋtɛjaa ná cɔɔ nɔ́ŋɔ dapɛ́rsɛ ná, 32 dapʋɔllɛ bɔmmʋ́ɔ́ má lɛrmɛ cɔɔ nɔ́ŋɔ dapɛ́rsɛ, ká bɔmmʋ́ɔ́ má lɛrmɛ nyúú rí dapɛ́rsɛ ná, tɔ́ɔ́ nyúú rí. 33 Daa nɔ́ŋɔ lɛrmɛ sɩ́sɩ́ɛ́nʋ́wa, dapɛ́rsɛ ná gbési ɓaamɔnáŋáwa mɛ́, a pɔ́ nʋɔ nɔ́ŋɔ ká mʋ́ lɛ nʋɔ nɔ́ŋɔ mɛ́. 34 Ɓa pi salmɛ a tɔ́ dapɛ́rsɛ ná rɩ́ dapʋɔllɛ ná mɛ́, a pi salmɛ a bɩrmɛ gúóréwa ná dapʋɔllɛ háá tʋ́wɔ́ mɛ́.
35 Ɓa pi gepúwɩɛlɩ́wie ɓa há yóé, a sɔ pɛ́nɛ a nyɛrɛ patɩ́ɩ́sazeno, a ŋméŋsi mʋɔlɩ́ rɩ́ ɓɩfɩɛŋsɛ rɩ́ ɓɩkɔklɛ́, a fʋ́ malɩ́kawa fótowa ráŋ. 36 Ɓa hé salmɛ oŋlɔkɛ́ ɛ́ patɩ́ɩ́sazeno mí, a cɔ́ ákásɩ́á dalíŋe baná, a pi salmɛ tɔ́wɔ́ mɛ́, a pi patɩ́ɩ́sazeno ná ɓélwó mí, a cʋɔrɛ wárɛ naasɛ baná, ɓa cíksíwó nyúú. 37 Ɓa pi gepúwɩɛlɩ́wie ɓa há ŋmɛ́ɛ́, a sɔ pɛ́nɛ a nyɛrɛ patɩ́ɩ́sa, a ŋméŋsi mʋɔlɩ́ rɩ́ ɓɩfɩɛŋsɛ ʋ a mʋlʋlʋ, a fʋ́, rɩ́wɔ́ hé dánnʋɔ. 38 Ɓa cɔ́ ákásɩ́á dalíŋsi bɔmmʋ́ɔ́ a pi salmɛ tɔ́wɔ́ mɛ́, a hé salmɛ oŋlɔkɛ́, a pi patɩ́ɩ́sa ná hé; a cʋɔrɛ hɔfɩɛmɔ a hé naasɛ bɔmmʋ́ɔ́ dalíŋsi ná mɛ́.