Fɩɛlɛ́ tápʋl wɩ́ɛ́
35
1 Moyizi yɩ́rɛ Ɩzɩrayɛl nɩɛ wuu ciki a bʋ́lwɔ́ rɩ́ bʋlɛ́: <<Ná wɩ́ɛ́ ná Nyuutɩna Wɩɩsɛ há mákɛ́ rɩ́wɔ́ tɩŋ: 2 Tápʋlɛ balgo ní ká tʋmɛ́; amá tápʋlɛ balpɛ kal ká tápʋl fɩɛlɩ́ nɛ́ Nyuutɩna Wɩɩsɛ yɩr mɛ́. Nɛrɔ ná wuu há sɩ́ tʋŋ tʋtʋmɩ́ ɛ́ kal, ɓaá ɓʋ́ tɩ́na nɛ́. 3 Ɩ́ wɩ níŋ marɛ fɩɛlɛ́ tápʋl, ɩ́ dɩmɩnɛ́ wuu mí.>>Ɩzɩrayɛl nɩɛ kɩɛsɔ́
4 Moyizi baa bʋl Ɩzɩrayɛl nɩɛ wuu rɩ́ bʋlɛ́: <<Ná Nyuutɩna Wɩɩsɛ há sɩ́ɩ́wa ɔ́ʋ́ ná: 5 Ɩ́ kánɩ́wa satɔ́ɔ́rɩ́pállɛ onni a ko pá Nyuutɩna Wɩɩsɛ. Nɛrɔ ná wuu sɩɛrʋ há wéró, ʋ sɩ́ kɩɛsɛ óŋ rɩ́rʋ́ dúó wuu kaa ko pá Nyuutɩna Wɩɩsɛ: salmɛ, wárɛ, kɔmɔ; 6 pɛ́ŋ'mʋ́ɔ́llɛ, pɛ́ŋfɩɛŋsɛ, gepúwɩɛlɩ́wie pɛ́ŋsɛ, bʋʋnɔ pʋ́sɛ pɛ́ŋsɛ; 7 peɓallɛ kɛŋnʋɔsɛ́ ɓɩfɩɛŋsɛ, kɛŋnʋɔsɛ́ ná há kéŋ dóé, ákásɩ́á daasɛ; 8 caanɔ́ nʋʋ, tulaaléwa, rɩ́wɔ́ hé náŋa nyúcúúrínʋʋ mɛ́, káá nyɩkɛ náŋa má; 9 óníkísi dɔ́wʋ́ɔ́ arɩ́ dɔ́wʋ́were náŋa, rɩ́wɔ́ pii fʋ́ gɛluŋo rɩ́ baŋcɩtɔ́lɔ. 10 Ɩ́ sɩɛrʋ nɛ́sɛ tʋtʋnna ná wuu há kéŋ dɩllɛ, rɩ́wɔ́ ko tʋŋ tʋtʋmɛ́ ná Nyuutɩna Wɩɩsɛ há máŋsɛ́; ɓa nɛ́ ká: 11 cémejaa ná rɩ́rʋ́ táŋtɛwa rɩ́rʋ́ tɔ́lɔ, ʋ oŋlɔsɛ́, ʋ dapɛ́rsɛ, ʋ dapʋɔllɛ, ʋ dalíŋsi rɩ́rʋ́ naasɛ; 12 nʋtʋmɛ dáka rɩ́rʋ́ dapʋɔllɛ, rɩ́rʋ́ cúl ná rɩ́ patɩ́ɩ́sazeno ná; 13 táábɩl ná rɩ́rʋ́ dapʋɔllɛ, rɩ́rʋ́ cɩksɛ wuu, arɩ́ dɩpɛ́ŋwa ná háá pá Wɩɩsɛ; 14 cáŋdaa rɩ́rʋ́ cɩksɛ, ʋ cáŋsɛ rɩ́rʋ́ nʋnnɛ; 15 tulaalékoro rɩ́rʋ́ dapʋɔllɛ, nyúcúúrínʋʋ, arɩ́ tulaalé míŋ, arɩ́ táŋtɛjaa ná dánnʋɔ patɩ́ɩ́sa; 16 vʋk'ɔ́ɔ́sɩ́koro rɩ́rʋ́ kɔmɔ́ gɩ́rɩ́yázɛ ɓɩzeno ná, ʋ dapʋɔllɛ rɩ́rʋ́ oŋkaatʋmɛ́ wuu; 17 táŋtɛjaa wuolo ná pɛ́ŋbíé rɩ́rʋ́ dalíŋsi rɩ́rʋ́ naasɛ, arɩ́ wuolo dánnʋɔ patɩ́ɩ́sazeno; 18 táŋtɛjaa ná dacɔ́ŋsɛ rɩ́ wuolo dacɔ́ŋsɛ rɩ́wɔ́ ŋmɛ́sɛ; 19 gɛnnɛ ná há kɔ́wɔ́ dʋŋɔ Wɩɩsɛ dɩmɩnɩ́ tʋtʋmɛ́ yɩr mɛ́ rɩ́ vʋk'ɔɔsɔ Aarɔŋ gɛnnɛ arɩ́rʋ́ bɛlɛ gɛnnɛ ná ɓa há sɩ́ kaá tʋŋ vʋk'ɔsɔ́ tʋtʋmɛ́.>>
20 Ɩzɩrayɛl nɩɛ ná wuu isi Moyizi rɩ́ a col. 21 Ɛ́ nɛ́ nɩɛ ná wuu há có a ka sabɩɩna ná há wéró, ɓa káŋwɔ́ kɩɛsɔ́ ko pá Nyuutɩna Wɩɩsɛ, céme táŋtɛjaa ná sɔɛ yɩr mɛ́, ʋ tʋtʋmɛ́ yɩr mɛ́ arɩ́ tʋtʋmɛ́ gɛnnɛ ná nyɛrɛ́ wɩ́ɛ́. 22 Báála rɩ́ háála, nɛrɔ ná wuu sɩɛrʋ há wéró, ɓa tɛ́ dɩmmɛ́ŋsɛ, hɔgúóréwa, nénípɩra, bɛŋzɛllɛ arɩ́ salmɛ onni rɩ́wɔ́ dúó wuu; a súúri salmɛwa ná báálɔ é wuu há píé yɩ́rɛ Nyuutɩna Wɩɩsɛ yɩr ká pɔ́ʋ́. 23 Nɩɛ ná wuu fa há kéŋ pɛ́ŋ'mʋ́ɔ́llɛ, pɛ́ŋfɩɛŋsɛ, pɛ́ŋkɔklɛ́, gepúwɩɛlɩ́wie pɛ́ŋsɛ, bʋʋnɔ pʋ́sɛ pɛ́ŋsɛ, peɓallɛ kɛŋnʋɔsɛ́ ɓɩfɩɛŋsɛ arɩ́ kɛŋnʋɔsɛ́ ná há kéŋ dóé, ɓa kéŋwó ko. 24 Nɩɛ ná wuu fa há kɩ́ɛ́sɛ́ wárɛ rɩ́ kɔmɔ́, ɓa ka ɛ́ kɩɛsɔ́ ko pá Nyuutɩna Wɩɩsɛ. Nɩɛ ná wuu fa há kéŋ ákásɩ́á daasɛ, ɓa káŋwó ko tʋtʋmɛ́ ná wuu yɩr mɛ́. 25 Háála ná wuu há ɛ̃ gɛpúŋ yoe, ɓa tɩɩ yó gɛpunni rɩ́wɔ́ nɛ́ŋsa a sɔ a kaa ko: pɛ́ŋ'mʋ́ɔ́llɛ pɛ́ŋfɩɛŋsɛ, pɛ́ŋkɔklɛ́ arɩ́ gepúwɩɛlɩ́wie pɛ́ŋsɛ. 26 Háála ná wuu há ɛ̃ gepúŋ yoe, a cólli rɩ́ satɔrɔ́, ɓa yó bʋʋnɔ pʋ́sɛ a sɔ pɛ́ŋsɛ. 27 Jamáŋ ná kuówɩɛla ka óníkísi dɔ́wʋ́ɔ́ ko, arɩ́ dɔ́wɩ́were náŋa rɩ́wɔ́ pii fʋ́ vʋk'ɔɔsɔ nɔhɔ̃́ gɛluŋo rɩ́ baŋcɩtɔ́lɔ; 28 arɩ́ tulaaléwa rɩ́ caanɔ́ nʋʋ, rɩ́ nyúcúúrínʋʋ, arɩ́ tulaalé ná ɓa háá nyɩkɛ́. 29 Ɩzɩrayɛl nɩɛ wuu, báála rɩ́ háála ná sɩɛnnɛ há wéró, ɓa kéŋwó satɔ́ɔ́rɩ́'onni ko pá Nyuutɩna Wɩɩsɛ, a makɛ rɩ́wɔ́ pɛ́ rɩ́ tʋtʋmɩ́ ná Nyuutɩna Wɩɩsɛ há tɩ́ŋ Moyizi mí a bʋl rɩ́wɔ́ a, rɩ́ ɛ́ tʋtʋmɩ́ tʋŋ.
30 Moyizi bʋl Ɩzɩrayɛl nɩɛ rɩ́ bʋlɛ́: <<Ɩ́ ná, Nyuutɩna Wɩɩsɛ lɩ́sɛ Uuri bio Bɛtɩsalɩɛl há ká Huur nihĩ, Ziida jɩmʋ́l nɩɛ sɩɛrʋ, 31 a a ʋ Sabɩɩna súú, ʋ ka zɩmɛ́ rɩ́ wɩ́zɩmɛ, a ka dɩllɛ a zɩŋ tʋtʋmɩ́ rɩ́rʋ́ dúó wuu tʋmɛ́. 32 Ʋ ɛ̃ nɛ́sɛ tʋtʋmɛ́, ʋ ɛ̃ salmɛ, wárɛ rɩ́ kɔmɔ́ tʋtʋmɛ́, 33 ʋ ɛ̃ dɔ́wɩ́were cɔ́ɛ́ rɩ́wɔ́ fʋ́ɩ́, ʋ ɛ̃ daasɛ cɔ́ɛ́, tʋtʋmɩ́ rɩ́rʋ́ dúó wuu ní ʋ zɩŋ. 34 Nyuutɩna Wɩɩsɛ pɔ́ʋ́ pálɔ, ʋ zɩŋ nɩɛ gʋnnɛ́, a a Ahisamak bio Ɔhɔlɩabɛ, há lɛ́ Daŋ jɩmʋl nɩɛ sɩɛrʋ, ʋ má ka ɛ́ pálɔ. 35 Nyuutɩna Wɩɩsɛ ɔ́ɔ́ ɓa ka dɩllɛ wérí, a zɩŋ dɔ́wɩ́cɔ́ɔ́rɔ tʋtʋmɛ́ wuu, rɩ́ dɔ́wʋ́ɔ́ fʋ́ɩ́, rɩ́ pɛ́ŋ'mʋ́ɔ́llɛ rɩ́ pɛ́ŋfɩɛŋsɛ rɩ́ pɛ́ŋkɔklɛ́ arɩ́ gɛpúmɛ́sɛ́sɛ́ pɛ́ŋsɛ sɔɛ rɩ́wɔ́ fʋ́ɩ́ wuu, a zɩŋ tʋtʋmɩ́ rɩ́rʋ́ dúó wuu tʋmɛ́ arɩ́ nɛ́sɛ tʋtʋmɛ́.