Jɩmʋ́ʋ́la púlli sɩɛrʋ kéne wƖƐ
2
1 Nyuutɩna Wɩɩsɛ bʋ́l Moyizi rɩ́ Aarɔŋ rɩ́ a bʋlɛ́: 2 «Ɩzɩrayɛl nɩɛ sɩ́ kéŋwó púlli mí, ɓa dirapówa rɩwɔ jɩɩsɛ malla mʋ́ʋ́la, a ké kíl céme táŋtɛjaa ná ká sʋʋ́ pérú.3 Ziida pul nɛ́ sɩ́ la sɩ́ɛ́ ké a caasɛ wɩɩsɛ dɩpomí, ɓa dirapó mʋ́l. Ziida bɛlɛ nyúútɩna nɛ́ ká Nasɔŋ, há ká Amɩnadabɛ bio. 4 Ʋ baala na ha wo lal aa yo nʋɔ ká: bʋ́ɩ́mɛɛ́sɩbotoro rɩ́ fí rɩ́ baná arɩ́ zɔwalgo. 5 Ɩzakarɛ jɩmʋ́l nɩɛ sɩ́ kéŋwó laka. Nitaneyel há ká Sʋɔrɛ bio ní ká Ɩzakaarɛ bɛlɛ nyúútɩ́na. 6 Ʋ baala na ha wo lal aa yo nʋɔ ká: bʋ́ɩ́mɛɛ́sɛ́llɛ rɩ́ fí rɩ́ baná arɩ́ zɔwana. 7 Rɩ Zabɩlɔŋ jɩmʋ́l tʋkɛ. Ʋ bɛlɛ nyúútɩ́na nɛ́ sɩ́ a Ɩlɩyabɛ há ká Hɩlɔŋ bio. 8 Ʋ baaala na ha wo lal aa yo nʋɔ sɩ́ a: bʋ́ɩ́mɛɛ́sɛllɛ rɩ́ fí rɩ́ bálpɛ arɩ́ zɔwaná. 9 Ziida baala na ha wo lal aa yo ɓa nʋɔ ká: bʋ́ɩ́zɔlɔ mɛɛ́sɩbaná rɩ́ bálgo arɩ́ zɔwaná. Ɓa nɛ́ sɩ́ la sɩ́ɛ́ a ka Ɩzɩrayɛl nɩɛ va.
10 Ribaŋ púl nɛ́ sɩ́ míŋ wɩɩsɛ dɩpomí néduu. Ribaŋ bɛlɛ nyúútɩna nɛ́ sɩ́ a Elisuri há ká Sedehuri bio. 11 Ʋ baala na ha wo lal aa yo nʋɔ ká: bʋ́ɩ́mɛɛ́sɛllɛ rɩ́ bálgo arɩ́ zɔmmʋ́ɔ́. 12 Sɩmɩyɔŋ jɩmʋ́l nɩɛ nɛ́ sɩ́ kénu laka. Ʋ bɛlɛ nyúútɩ́na nɛ́ ká Sɛlʋmɩyɛl há ká Surisadayi bio. 13 Ʋ báála na ha wo lal aa yo nʋɔ ká: bʋ́ɩ́mɛɛ́sɛllɛ rɩ́ fí rɩ́ nɛ́mɛ arɩ́ zɔtoro. 14 Gadɛ jɩmʋ́l nɛ́ tʋkɛ́. Ʋ bɛlɛ nyúútɩ́na nɛ́ ká Ɩlɩyazafɛ há ká Rɩhʋyɛl bio. 15 Ʋ báála na ha wo lal aa yo nʋɔ ká: bʋ́ɩ́mɛɛ́sɛllɛ rɩ́ bɔmmʋ́ɔ́ arɩ́ zɔwalgo rɩ́ mɛɛ́sɛllɛ rɩ́ fí. 16 Ribaŋ baala na ha wo lal aa yo ɓá wuu há hé náŋá mɛ́ nʋɔ ká: Bʋ́ɩ́zɔlɔ mɛɛ́sɛllɛ rɩ́ fí rí oro arɩ́ zɔwana mɛɛ́sɛllɛ rɩ́ fí. Ɓá nɛ́ sɩ́ a bʋ́llɛ goo a tʋkɛ.
17 Ka ri Levitiwa nɛ́ pi céme táŋtɛjaa ná a tʋkɩwɔ mɛ, Leewa ná rɩ pulli ni rɩ́wɔ́ tɩŋ aá va, anɛ ɛ́ ɓa háá kéne, nɛrɔ wuu ʋ púl mí, ʋ dirapó mʋ́l.
18 Ɩfɩrayɩŋ má púl nɛ́ sɩ́ mɩ́ŋ wɩɩsɛ dɩzʋʋlɩ́. Ʋ bɛlɛ nyúútɩna nɛ́ sɩ́ a Elisama há ká Amihudi bio. 19 Ʋ pul báála na ha wo lal aa yo nʋɔ ká: bʋ́ɩ́mɛɛ́sɛllɛ arɩ́ zɔmmʋ́ɔ́. 20 Manase jɩmʋ́l nɛ́ sɩ́ kénu laka. Ʋ bɛlɛ nyúútɩna nɛ́ ká Gamalɩyɛl há ká Pedasuri bio. 21 Ʋ pul báála na ha wo lalaaa yo nʋɔ ká bʋ́ɩ́mɛrɛ́ rɩ́ fí rí bɛllɛ arɩ́ zɔwɛllɛ. 22 Bɛŋzamɛ jɩmʋ́l nɛ́ tʋ́kwɔ́ mɛ́. Ʋ bɛlɛ nyúútɩ́na nɛ́ ká Abidaŋ há ká Gideyoni bio. 23 Ʋ púl baala na ha wo lal aa yo, ɓa nɩɛ ká bʋ́ɩ́mɛrɛ́ rɩ́ fí rɩ́ bɔmmʋ́ɔ́ arɩ́ zɔwaná. 24 Ɩfɩrayɩŋ pulli ná báála na ha wo lal aa yo, ɓa wuu nʋɔ ka: bʋ́ɩ́zɔlɔ rɩ́ córɩ́ arɩ́ zɔlɔ. Ɓa nɩ́ ká botoro nyúú mí goo, a tʋkɛ.
25 Wɩɩsɛ dɩpomí nágʋɔ, Daŋ púl nɛ́ sɩ́ mɩ́ŋ ráŋ, ʋ dirapo mʋ́l. Ʋ bɛlɛ nyúútɩ́na nɛ́ ka Ahɩzɛrɛ há ká Amisadayi bio. 26 Ʋ báála na ha wo lal aa yo, ɓa nʋɔ ká: bʋ́ɩ́mɛɛ́sɩbotoro rɩ́ bɛllɛ arɩ́ zɔwalpɛ. 27 Ʋ laka nɛ́, rɩ́ Azɛrɛ jɩmʋ́l nɩɛ ké. Azɛrɛ bɛlɛ nyúútɩ́na nɛ́ ka a Pagɩyɛl há ká Ɔkɩraŋ bio. 28 Ʋ báála na ha wo lal aa yo, ɓa nʋɔ ka: bʋ́ɩ́mɛɛ́sɛllɛ rɩ́ oro arɩ́ zɔmmʋ́ɔ́. 29 Nɛfɩtalɩ jɩmʋ́l nɛ́ tʋ́kɛ́. Ʋ bɛlɛ nyúútɩ́na nɛ́ ká Ahɩra há ká Ɩnaŋ bio. 30 Ʋ báála NA HA WO lal aa yo, ɓa nʋɔ ka: bʋ́ɩ́mɛɛ́sɛllɛ rɩ́ fí rí botoro arɩ́ zɔwaná. 31 Daŋ púlli wuu báála na ha wo lal aa yo, ɓa wuu nʋɔ ka : bʋ́ɩ́zɔlɔ mɛɛ́sɛllɛ rɩ́ fí rɩ́ bálpɛ arɩ́ zɔwalgo. Ɓa nɛ́ sɩ́ tɩŋ har arɩ́wɔ́ yóórídirapó. 32 Ná Ɩzɩrayɛl nɩɛ ná wuu ɓa há dɩ́ɩ́sɛ́ a tɩŋ jɩmʋ́lwa púlli mí. Púlli ná ɓa há kené hé gúlíwa a dɩɩsɛ, ɓa baala na ha wo lal aa yo, ɓa wuu nʋɔ ká bʋ́ɩ́zɔwalgo rɩ́ botoro arɩ́ zɔmmʋ́ɔ́ arɩ́ mɛɛ́sɛllɛ rɩ́ fí. 33 Ɓa wɩ Levitiwa é dɩ́ɩ́sɛ́ hé Ɩzɩrayɛl duo nɩɛ sɩɛrʋ, anɛ ɛ́ Nyuutɩna Wɩɩsɛ fa há mákɛ́ pá Moyizi.
34 Ɩzɩrayɛl duo nɩɛ sáŋɔ́ tɩŋ wɩ́ɛ́ ná wuu Nyuutɩna Wɩɩsɛ fa há mákɛ́ pá Moyizi. Ɛ́ nɛ́ tɛ ɓa wuu saŋ kéŋwó dirapówa mʋ́ʋ́la, a saŋ hé náŋá mɛ́ duówa, jaáwa a tʋkɛ aá va.