Zozie lá Moyizi nyúú mí
31
1 Ɛ́ nɛ́ Moyizi baa bʋl wɩ́ɛ́ nyáŋ a pá Ɩzɩrayɛl jamáŋ, a bʋlɛ́: 2 «Mʋ́l né mí ŋ dí bɩŋsɛ zɔlɔ arɩ́ mɛrɛ́ nɛ́, ŋ báá wɩ́ɩ́wa sɩɛ wuó la. Nyuutɩna Wɩɩsɛ bʋ́lɔ́ páŋ, rɩ́ŋ wɩ Zʋrdɛŋ fuo ná daarɛ. 3 Nyuutɩna Wɩɩsɛ, ɩ́ Wɩɩsɛ tɩɩ nɛ́ sɩ́ lɛ́ɩ́wa sɩ́ɛ́ a kánɩ́wa daarɛ. Ʋ sɩ́ zɔkɛ duowa ná wuu há mɩ́nɩ́wa sɩ́ɛ́, ká rɩ́ɩ́wa láwɔ́ tíé a tɩ́llʋ́. Zozie ní sɩ́ ɛ́ɩ́wa sɩdííro, anɛ ɛ́ Nyuutɩna Wɩɩsɛ há bʋlɛ́. 4 Nyuutɩna Wɩɩsɛ sɩ́ zɔ́kwɔ́ anɛ ɛ́ ʋ fa há zɔ́kɛ́ kuóro Sɩhɔŋ arɩ́ kuóro Ɔgɛ. Ɓa fa ká Amoritiwa kuóre ní. Ʋ zɔ́kwɔ́ arɩ́wɔ́ tíé wuu ní. 5 Nyuutɩna Wɩɩsɛ sɩ́ pi duowa ná a héíwa nɛ́sɛ mɛ́, rɩ́ɩ́wa pi kíŋse nyáŋ wuu ŋ há mákɩ́wa a ɔ́wɔ́ mɛ́. 6 Ɩ́ tɔ́ɩ́wa mʋ́ʋ́la mɛ́ a ka baŋcɩpɩrɩ́. Ɩ́ sɩ́ ló rɩ́wɔ́ héwíŋ kánɩ́wa rɩ́ɩ́wa cícel, Nyuutɩna Wɩɩsɛ, ɩ́ Wɩɩsɛ sɩ́ lɛ́ɩ́wa sɩ́ɛ́ a kánɩ́wa mʋ́. Ʋ wɩ́ɩ́wá vɛ́ɛ́ tá, ʋ wɩ́ɩ́wa har lɛ ábádá». 7 Ɛ́ nɛ́ Moyizi yɩ́rɛ Zozie Ɩzɩrayɛl jamáŋ wuu sɩ́ɛ́, a bʋl pɔ́ʋ́ bʋlɛ́: «Tɔ́ɩ́ mʋ́l mɛ́ a ka baŋcɩpɩrɩ́! Ɩ nɛ́ sɩ́ ka nɩɛ nyáŋ a mʋ́ tɔ́ɔ́ ná Nyuutɩna Wɩɩsɛ há tá nʋɔ pɔ́wɔ́ naabálwa rʋ́ʋ́ sɩ́ pii pɔ́wɔ́, a ka tíé ná ɓaa pɔ́wɔ́ rʋ́ʋ́ ɔ́wɔ́ óŋ. 8 Nyuutɩna Wɩɩsɛ tɩɩ sɩ́ mɩ́nɩ́ har, a lɛ́ɩ́ sɩ́ɛ́. Ʋ wɩ́ɩ́ vɛ́ɛ́ tá, ʋ wɩ́ɩ́ har lɛ. Sɩ́ ló rí héwíŋ kánɩ́, sɩ́ ló rɩ́ɩ́ naasɛ yʋɔrɛ.»Wɩɩsɛ wɩ́bilé kɛnɔ karmɛ́ wɩ́ɛ́
9 Ɛ́ nɛ́ Moyizi pʋ́ŋsɛ Wɩɩsɛ wɩ́bilé ná a pii pá Wɩɩsɛ vʋk'ɔɔsa ná há ká Levi bɛlɛ, aá cɩ́ɩ́nɛ Nyuutɩna Wɩɩsɛ nʋtʋmɛ dáka ná, arɩ́ Ɩzɩrayɛl jamáŋ sɩ́dííre wuu. 10 Ɛ́ nɛ́ Moyizi bʋl pɔ́wɔ́ a bʋlɛ́: «Bɩŋsɛ balpɛ é nʋɔ mɛ́ wuu, ní há ká bɩna ná ɩ́ há sɩ́ giri kɩma tá, tɛ́ŋ ná mɛ́ ɩ́ háá dí lɔkɔ cana, 11 rɩ́ Ɩzɩrayɛl jamáŋ wuu ní kúé hé náŋá mɛ́, Nyuutɩna Wɩɩsɛ, ɩ́ Wɩɩsɛ sɩ́ɛ́, dɩhɩ̃́ ná ʋ há sɩ́ makɛ mɛ́, ɩ́ sɩ́ kármʋ́ wɩ́bile nyáŋ ɓa sɩ́ɛ́, rɩ́wɔ́ nɛ. 12 Ɩ́ yɩ́rɛ báála arɩ́ háála, heŋbiisi arɩ́ zʋzʋ́llɛ ná wuu há mɩ́nɩ́wa tɔ́nɛ mɛ́ ko hé náŋá mɛ́, rɩ́wɔ́ nɛ wɩ́ɛ́ ná, a zɩŋ ɛ́ ɓa há sɩ́ zízílíwa Nyuutɩna Wɩɩsɛ, a pɔ́rɩ́wa tɩɩ mɛ́ a tɩŋ wɩ́bile ná wuu. 13 Ɓa bɛlɛ ná há wɩ wɩ́bilé nyáŋ ɛ̃, sɩ́ nɩ́wɔ́ rɛ́, a zɩŋ ɛ́ ɓa há sɩ́ fɩ́fá Nyuutɩna Wɩɩsɛ, ɩ́ Wɩɩsɛ ɓa mɩɩsɛ wuu mí, tɔ́ɔ́ ná ɩ́ há sɩ́ daarɛ Zʋrdɛŋ fuo ná a la, a tɩ́llɛ mɛ́.»
Ɩzɩrayɛl nɩɛ sɩ́ vɛ Wɩɩsɛ nʋɔ
14 Ɛ́ nɛ́ Nyuutɩna Wɩɩsɛ bʋl pá Moyizi a bʋlɛ́: « Ɩ sʋʋ tɛ́ŋ péró rí, ɛ́ wɩ́ɛ́ yɩ́rɛ Zozie rɩ́ɩ́wa ko céme táŋtɛjaa ná sɩɛrʋ, rɩ́ŋ ko máŋsɛ wɩ́ɛ́ a pɔ́ʋ́.» Ɛ́ nɛ́ Moyizi arɩ́ Zozie ko céme táŋtɛjaa ná dɩhɩ̃́. 15 Ɛ́ nɛ́ Nyuutɩna Wɩɩsɛ tɩŋ duóbáŋcʋɔrɩ́ mɛ́ a ko tuwi cɛ́ táŋtɛjaa ná dánnʋɔ mɛ́, 16 ká baa bʋl pá Moyizi bʋlɛ́: «Ɩ sɩ́ sʋwɛ a mʋ́ɩ́ ánáwa rɩ́. Ɩ sʋʋ har mɛ́, nɩɛ nyáŋ sɩ́ vɛ́ŋ ká púl ɩ́'a nɩlɩ́ɩ́lɩ́wɩ́ɛ́, aá ɓaarɛ veŋgúlli tɔ́ɔ́ ná ɓa háá mʋ́ɛ́ mɛ́, rɩ́ɩ́ zɔkɛ nʋtʋmɛ ná ŋ há bílé ŋ rɩ́wɔ́ pɛ́kɛ. 17 Rɩ ɛ́ nɛ́ kúé á, ŋ cɔ́ɛ́ sɩ́ ísíwó nyúú rɩ́ŋ vɛ́wɔ́, a píŋ har tɛ́wɔ́ rɩ́wɔ́ zɔkɛ. Wɩɩlawa rɩ́ sazɔkɔ́ sɩ́ zʋ́wɔ́. Ɛ́ tɛ́ŋ mɛ́ ɓa sɩ́ bʋlɛ́: «Á Wɩɩsɛ há tórá har, ɛ́ nɛ́ tɛ wɩɩlawa nyáŋ wuu pérírá. 18 Ŋ sɩ́ píŋ har tɛ́wɔ́, a tɩ́ŋwɔ́ há vɛ́ŋ, ká a wɩ́bɔma ná wuu, a ɓɩ́ɓaarɛ veŋgúlli wɩ́ɛ́. 19 Mʋ́l né mí, pʋ́ŋsɛ yɩl né bil, a máŋsʋ́ pá Ɩzɩrayɛl jamáŋ, a a rɩ́wɔ́ yɩ́yɛ, rʋ́ʋ́ áŋ dáŋsɩ́ɛ́ ŋ rɩ́wɔ́ pɛ́kɛ. 20 Rɩŋ nɛ́ kéŋwó mʋ́ tíé ná nɛ'ɩ́l rɩ́ tʋʋ háá pal ráŋ mɛ́, ŋ há tá nʋɔ pɔ́wɔ́ naabálwa rɩ́ŋ pii pɔ́wɔ́, ɓa sɩ́ ná ɓɩdííle a mɔ ɛ́ wuu ɓa háá jɛɛ́ aá díwó satɔrɔ́, amá ɓa sɩ́ vɛ́ŋ nʋɔ ká ɓɩ́ɓaarɛ veŋgúlli a zɔkɛ nʋtʋmɛ ná ŋ há bílé ŋ rɩ́wɔ́ pɛ́kɛ. 21 Rɩ wɩɩlawa arɩ́ sazɔkɔ nɛ́ zʋ́wɔ́, yɩl né ní sɩ́ a dáŋsɩ́ɛ́ ŋ rɩ́wɔ́ pɛ́kɛ, bee wɩ́ɛ́ ɓa rɩ́wɔ́ duo nɩɛ wuu wɩ ɛ́ yɩl mɩ́ɩ́ sʋllɛ. Ŋ dé zɩ́ŋwɔ́ sabɩɩna ná wuu ɓa zaa há kéné, ká zɩŋ káŋwɔ́ kaa ko tíé ná ŋ há tá nʋɔ rɩ́ŋ pii pɔ́wɔ́.» 22 Ɛ́ tápʋl tɩɩ, Moyizi pʋ́ŋsɛ yɩl ná bil, ká máŋsʋ́ pá Ɩzɩrayɛl jamáŋ. 23 Ɛ́ nɛ́ sɩɛ́ ká Nyuutɩna Wɩɩsɛ bʋl pá Nuŋ bio Zozie a bʋlɛ́: «Tɔ́ɩ́ mʋ́l mɛ́ a ɓáŋɩ́ baŋcɩla, bee wɩ́ɛ́ ɩ nɛ́ sɩ́ ka Ɩzɩrayɛl jamáŋ kaa mʋ́ tíé ná ŋ há tá nʋɔ rɩ́ŋ pii pɔ́wɔ́. Ŋ é tɩɩ sɩ́ mɩ́nɩ́ har.» 24 Moyizi há pʋ́ŋsɛ Wɩɩsɛ wɩ́bilé ná wuu a hé kɛnɔ mɛ́ a tenni, 25 ʋ bʋ́lɔ́ pá Levi duo ná háá cɩ́ɩ́nɛ Nyuutɩna Wɩɩsɛ nʋtʋmɛ dáka ná a bʋlɛ́: 26 «Ɩ́ la Wɩɩsɛ wɩ́bilé kɛnɔ né, a pii bílíwa Nyuutɩna Wɩɩsɛ, ɩ́ nʋtʋmɛ dáka ná laka, rʋ́ʋ́ mɩŋ ráŋ a áŋ rɩ́rɩ́ɩ́wa pɛ́kɛ dáŋsɩ́ɛ́. 27 Ŋ ɩ́ɔ̃́ rɩ́ɩ́wa ká nyúdotɩ́ɩ́ná rɛ́ a wɩ makɛ́ nɛ mʋ́ɔ́ má. Ŋ ha há wómmó ká ɩ́ vɛ Nyuutɩna Wɩɩsɛ nʋɔ nyɛ, rɩŋ nɛ́ sɩɛ́ sʋwɛ́, ʋʋ́ nɛ́ ɛ́ rɛ́ɛ́ rɛ́>> 28 Ɩ́ yɩ́rɩ́wa jɩmʋ́ʋ́la nɩhɩɛ̃́sɛ arɩ́rɩ́ɩ́wa tʋtʋnnɩhɩɛ̃́sɛ wuu rɩ́wɔ́ kóŋ sɩ́ɛ́, rɩ́ŋ bʋl wɩ́ɛ́ nyáŋ a pɔ́wɔ́, ká rɩ́ bána rɩ́ tíé árá dáŋsɩ́ɛ́. 29 Ŋ ɩ́ɔ̃́, ŋ sʋʋ har mɛ́, ɩ́ wɩ́bɔmɔ sɩ́ yɔ́wɩ́wa, ká rɩ́ɩ́wa vɛ ŋmɛ́nɔ ná ŋ há mákɩ́wa. Tɛ́ŋ nɔ́ŋɔ sɩ́ ko, rɩ́ wɩɩlawa péríwa a tɩŋ wɩ́bɔma ná ɩ́ há sɩ́ a Nyuutɩna Wɩɩsɛ sɩ́ɛ́ mɛ́, rʋ́ʋ́ dí cɔ́ɛ́ ɩ́ nyúú.»
30 Ɛ́ nɛ́ Moyizi karmɛ yɩl ná a pá Ɩzɩrayɛl jamáŋ wuu, ká ɓa zízesi. Ʋ sɛ́: