Nyuutɩna Wɩɩsɛ rɩ́ bɩrkóé kéŋ bárka
30
1 Rɩ́ Nyuutɩna Wɩɩsɛ, ɩ́ Wɩɩsɛ há máŋsɛ wɩ́ɛ́ ná wuu nɛ́ péríwa, ʋ sɩ́ pɛ́ɩ́wa mɛ́. Rɩ́ɩ́wa nɛ́ vɔ́ʋ́ nʋɔ, ʋ sɩ́ bʋr héíwa mí, a kánɩ́wa pɩsɛ hé duhʋɔra sɩɛrʋ. Ráŋ, ɩ́ sɩ́ bɩbɩ́ɩ́nɛ ɛ́ wɩ́ɛ́ mɛ́. 2 Rɩ́ɩ́wa rɩ́rɩ́ɩ́wa bɛlɛ nɛ́ bɩrɛ kó Nyuutɩna Wɩɩsɛ, ɩ́ Wɩɩsɛ rɩ́, a tɩ́ŋʋ́ arɩ́rʋ́ sɩɛrʋ wuu wuu, arɩ́rɩ́ɩ́wa dʋma wuu, a tɩ́ŋ wɩ́ɛ́ nyaŋ wuu ŋ há píé makɩ́ zaa, 3 Nyuutɩna Wɩɩsɛ, ɩ́ Wɩɩsɛ sɩ́ fɛ́ɩ́wa susu. Ʋ sɩ́ lɩ́sɩ́wa duowa ná mɛ́, ʋ há ŋmaŋsɩ́wa pɩsɛ hé, a kánɩ́wa ko hé náŋá mɛ́, ká a rɩ́ɩ́wa bɩrɛ dí wér. 4 Rɩɩ́wa nɛ́ cáásɛ́ pɩsɛ a mʋ́ mɩŋ dúníé lóŋgbóŋ dɩbólí wuu mí má, Nyuutɩna Wɩɩsɛ, ɩ́ Wɩɩsɛ ha sɩ́ kánɩ́wa bɩrɛ ko hé náŋá mɛ́. 5 Ʋ sɩ́ kánɩ́wa ko tíé ná há kɛ́ɩ́wa ánáwa tɩ́llɛ́, rɩ́ɩ́wa baa tɩ́llʋ́. Ʋ sɩ́ a rɩ́ɩ́wa dɔ́ ɓɩɛ wérí, ká pul kɩ́ŋkáŋ, a kɩ́llɩ́wa ánáwa. 6 Nyuutɩna Wɩɩsɛ, ɩ́ Wɩɩsɛ sɩ́ wúríwa sɩɛrnɛ, ɩ́ rɩ́rɩ́ɩ́wa duo nɩɛ wuu, rɩ́ ɛ́ a rɩ́ɩ́wa cóllú arɩ́rɩ́ɩ́wa sɩɛrʋ arɩ́rɩ́ɩ́wa dʋma wuu a wólli ka mɩɩsɛ. 7 Nyuutɩna Wɩɩsɛ, ɩ́ Wɩɩsɛ sɩ́ bɩrɛ pi bʋrbɔma nyáŋ wuu a héíwa dɩŋdɔma ná há bɛ́rɩ́wa aá bɛ́ŋsɩ́wa mɛ́. 8 Ɩ́ sɩ́ bɩrɛ saŋ Nyuutɩna Wɩɩsɛ nʋɔ a tɩ́tɩ́ŋʋ́ kíŋse nyáŋ wuu ŋ há píé mákɩ́wa zaa. 9 Ɛ́ nɛ́ rɩ́ Nyuutɩna Wɩɩsɛ, ɩ́ Wɩɩsɛ a rɩ́ɩ́wa jiki wérí, ɩ́ kéne wuu mí. Ʋ sɩ́ lo rɩ́ɩ́wa pul, rɩ́ɩ́wa pʋsɛ má pul kɩ́ŋkáŋ, rɩ́ ɓɩdííle má pʋrkɩ́wa tɔ́ɔ́ mɛ́. Nyuutɩna Wɩɩsɛ, ɩ́ Wɩɩsɛ sɩɛrʋ báá sɩ́ tɔ́rɩ́wa nyúú wérí, rʋ́ʋ́ lo rɩ́ɩ́wa kuori anɛ ɛ́, ʋ fa há ɛ́ɛ́ ɩ́ ánáwa mɛ́. 10 Amá ʋ mɔhɔ̃́ rɩ́ɩ́wa tɩ́ŋ Nyuutɩna Wɩɩsɛ, ɩ́ Wɩɩsɛ kíŋse ná rɩ́rʋ́ wɩ́máŋsɛ ná ɓa há pʋ́ŋsɛ́ hóú wɩ́bile kɛnɔ sɩɛrʋ. Ʋ mɔhɔ̃́ rɩ́ɩ́wa bɩrkóú rɩ́ arɩ́rɩ́ɩ́wa sɩɛrʋ wuu arɩ́rɩ́wa dʋma wuu.Mɩɩsɛ rɩ́ sʋʋ pɛ́kɛ bɛ́llɛ lɩ́sɛ
11 Kíŋse nyáŋ wuu ŋ há píé mɩ́mákɩ́wa zaa, ɓa mʋ́ʋ́la nɩ́ɩ́ wɩ haakɛ, ɓa báá wɩ duoki kɩ́llɩ́wa tɩŋɛ́ má. 12 Ɓa báá to bána nyúú má nɛ́, rɩ́ɩ́wa bʋlɛ́: «Áŋ rɛ́ sɩ́ zɩ́ pii ko tuwi, a bʋl ráá nɛ, a kaá tʋŋ>>» 13 Ɓa to mʋʋ daarɛ́ má nɛ́, rɩ́ɩ́wa bʋlɛ́: «Áŋ rɛ́ sɩ́ daarɛ ɛ́ dɩhɩ̃́, a káŋwɔ́ kaa ko bʋl ráá nɛ, a kaá tʋŋ>>» 14 Amá, wɩ́ɛ́ nyáŋ ɓárɩ́wa nɛ́ kɩ́ŋkáŋ. Ɩ́ ɩ̃́wɔ́ wérí, ɓa mɩ́nɩ́wa nʋʋsɛ mɛ́ a mɩ́nɩ́wa sɩɛnnʋ má, ká ɩ́ wóllíwó aá tɩ́ŋ má.
15 Ɩ́ ná, zaa, ŋ pí mɩɩsɛ arɩ́ wér, a pi sʋʋ arɩ́ wɩɩla bílíwa sɩ́ɛ́. 16 Zaa, ŋ bʋ́lɔ́ aá pɛ́ɩ́wa, ɩ́ cólli Nyuutɩna Wɩɩsɛ, ɩ́ Wɩɩsɛ, a tɩŋʋ́ ŋmɛ́ŋsɛ, a tɩŋʋ́ kíŋse ná rɩ́rʋ́ wɩ́bilé arɩ́rʋ́ wɩ́makɛ́. Ɛ́ nɛ́ rɩ́ɩ́wa ka mɩɩsɛ, ká rɩ́ Nyuutɩna Wɩɩsɛ, ɩ́ Wɩɩsɛ hé bárka pɛ́ɩ́wa, rɩ́ɩ́wa pul wérí tíé ná ɩ́ háá mʋ́ɛ́ rɩ́ɩ́wa tɩ́llɛ mɛ́. 17 Amá rɩɩ́wa nɛ́ vɛ́ɩ́wa Nyuutɩna Wɩɩsɛ a pi har tɔ́ʋ́, ká lo rɩ́ veŋgúlli kílíwa rɩ́ɩ́wa mʋ́ ɓɩ́ɓáárɩ́wɔ́, 18 ŋ caasɔ́ bʋl aá pɛ́ɩ́wa zaa, ʋ sɩ́ zɔ́kɩ́wa. Ɩ́ wɩ tíé ná ɩ́ há zʋ Zʋrdɛŋ fuo lɛ a tɩ́llɛ mɩ́ kéé dáánɛ. 19 Zaa, tíé rɩ́ bána wuu ká dáŋsɩ́ɛ́wa, rɩŋ pí mɩɩsɛ arɩ́ sʋʋ a bílíwa sɩ́ɛ́, a baa pi wɩ́ɛ́ ná ɩ́ há sɩ́ a rɩ́ Nyuutɩna Wɩɩsɛ hé barka pɛ́ɩ́wa arɩ́ wɩ́ɛ́ ná ɩ́ há sɩ́ a rʋ́ʋ́ bʋrɛ héíwa mɛ́, a bílíwa sɩ́ɛ́. Ɛ́ wɩ́ɛ́ ɩ́ bɛllɛ lɩ́sɛ mɩɩsɛ rɩ́ɩ́wa rɩ́rɩ́wa bɛlɛ wuu ná waana, 20 a cólli Nyuutɩna Wɩɩsɛ, ɩ́ Wɩɩsɛ, a tɩ́tɩ́ŋʋ́ nʋɔ a kánɩ́wa tɩɩ cɔ́ʋ́ mɛ́. Ʋ nɛ́ kɛ́ɩ́wa mɩɩsɛ. Ʋ sɩ́ lo rɩ́ɩ́wa ké tíé ná mɛ́ ʋ há tá nʋɔ pɛ́ɩ́wa ánáwa Abɩrahaŋ, Ɩzakɛ, arɩ́ Zakɔbɛ a dáánɛ.