Kíŋse 28

Nyuutɩna Wɩɩsɛ nʋɔ saŋɛ́ kéŋ barka

1 *Rɩɩ́wa saŋɔ tɩŋ Nyuutɩna Wɩɩsɛ, ɩ́ Wɩɩsɛ nʋɔ rɩ́rʋ́ kíŋse ná wuu ŋ há mákɩ́wa zaa, Nyuutɩna Wɩɩsɛ, ɩ́ Wɩɩsɛ sɩ́ lo rɩ́ɩ́wa kɩ́llɛ duó wuu há mɩŋ tíé nyúú. 2 Rɩɩ́wa nɛ́ sáŋ Nyuutɩna Wɩɩsɛ, ɩ́ Wɩɩsɛ nʋɔ, ná barkawa ná wuu há sɩ́ péríwa: 3 Ʋ sɩ́ hé barka pɛ́ɩ́wa ɩ́ tɔ́ɔ́ mɛ́ arɩ́rɩ́wa baksɛ mɛ́. 4 Ʋ sɩ́ pɛ́ɩ́wa mɛ́ rɩ́ɩ́wa lʋl bɛlɛ a pul, a lo rí ɓɩdííle pʋ́rkɩ́wa tíé mí, rɩ́ɩ́wa nɛsɛ, pieŋse arɩ́ bʋnnɛ má pul. 5 Ɓɩdííle sɩ́ súíwa vʋ́ʋ́ra, ká rɩ́ɩ́wa míŋvííní má sú. 6 Ɩ́ lɩ́ɩ́ colé mí barka nɛ́, ɩ́ bɩrkóé má mɛ́ ɩ́ sɩ́ ná barka. 7 Rɩ́ɩ́wa dɩŋdɔma ní kúé rɩwɔ́ yóíwa, Nyuutɩna Wɩɩsɛ sɩ́ pɛ́ɩ́wa mɛ́ rɩ́ɩ́wa yoo dííwo. Ɓa sɩ́ tɩŋ ŋmɛ́ŋbala a ko, ká bɩrɛ tɩŋ ŋmɛ́ŋsɛ balpɛ fá pɩsɛ. 8 Nyuutɩna Wɩɩsɛ sɩ́ pɛ́ɩ́wa mɛ́ a lo rɩ́ɩ́wa vʋ́ʋ́ra sú arɩ́ ɓɩdííle, a lo rɩ́ɩ́wa tʋtʋmɛ́ wuu ɔsɛ. Nyuutɩna Wɩɩsɛ, ɩ́ Wɩɩsɛ sɩ́ pɛ́ɩ́wa mɛ́ tíé ná ʋ há sɩ́ pii pɛ́ɩ́wa mɛ́. 9 Rɩɩ́wa nɛ́ tɩ́ŋ Nyuutɩna Wɩɩsɛ, ɩ́ Wɩɩsɛ kíŋse ná, a a wɩ́ɛ́ ná wuu ʋ há mákɛ́, ʋ sɩ́ a rɩ́ɩ́wa ɔ́ʋ́ nɩɛ rʋ́ʋ́ tɩ́llɩ́wa, anɛ ɛ́ ʋ há tá nʋɔ pɛ́ɩ́wa. 10 Dúníé nɩɛ wuu sɩ́ ná Nyuutɩna Wɩɩsɛ há lɩ́sɩ́wa ɩ́ ɔ́ʋ́ nɩɛ ɛ́, rɩ́wɔ́ fɩ́fɛ́ɩ́wa. 11 Nyuutɩna Wɩɩsɛ sɩ́ pɛ́ɩ́wa mɛ́, a a rɩ́ tíé ná ʋ há tá nʋɔ a pɛ́ɩ́wa naabálwa, rʋ́ʋ́ sɩ́ pii pɛ́ɩ́wa, rʋ́ʋ́ ɓɩɛ pul, rɩ́ɩ́wa bɛlɛ pul, rɩ́ɩ́wa nɛsɛ arɩ́rɩ́ɩ́wa ɓɩdííle má pul. 12 Nyuutɩna Wɩɩsɛ sɩ́ wuri nyii (dɩmɩnɩ́) ŋmɛnɔ baná nyúú, ká lo rɩ́ dúóŋ kóíwa tíé, ʋ tɛ́ŋ mɛ́, ká pɛ́ɩ́wa mɛ́, ɩ́ tʋtʋmɛ́ wuu mí. Duówa ɓɩkana sɩ́ ko kɩŋ ɓɩɛ ɩ́ dɩhɩ̃́, amá ɩ́ é wɩ nɛ́ŋ wuu kɩ́ŋ dí. 13 Rɩɩ́wa nɛ́ zésé aa nɛ Nyuutɩna Wɩɩsɛ, ɩ́ Wɩɩsɛ kíŋse ná ŋ há píé mákɩ́wa zaa, a tɩ́ŋwɔ́ wéri, ʋ sɩ́ a rɩ́ɩ́wa a nyunni ká sɩ múdunni a, a a sɩ́láára ka sɩ́ hatɩŋŋa a. 14 Ɩ́ pɔ́ rɩ́ɩ́wa sɩ́ har píí tɛ wɩ́ɛ́ ná oro wuu ŋ há píé mákɩ́wa zaa, a sɩ́ bíkí mʋ́ nédu ɛ́ raá má nágʋɔ, rɩ́ɩ́ mʋ́ʋ́ tɩ́tɩŋ veŋgúlli rɩ́ɩ́ ɓɩ́ɓáárɩ́wɔ́.

Bʋra sɩ́ dí nɩɛ ná há wɩ Nyuutɩna Wɩɩsɛ nʋɔ ná tɩŋ

15 Rɩɩ́wa nɛ́ wɩ saŋɛ zésí Nyuutɩna Wɩɩsɛ, ɩ́ Wɩɩsɛ, rɩ́ɩ́ tɩŋʋ́ kíŋse, rɩ́rʋ́ wɩ́bilé ná ŋ há píé mákɩ́wa zaa, bʋra nyáŋ wuu nɛ́ sɩ́ dííwa:

16 Nyuutɩna Wɩɩsɛ sɩ́ bʋrɛ héíwa tɔ́nɛ arɩ́rɩ́wa baksɛ mɛ́. 17 Ʋ sɩ́ bʋrɛ héíwa vʋ́ʋ́ra ɓɩdííle mí arɩ́rɩ́ɩ́wa vííni míŋ mí. 18 Ʋ bʋra sɩ́ dííwa, ʋ waá lo rɩ́ɩ́wa lʋl bɛlɛ ɓɩkana, ʋ sɩ́ lo rí ɓɩdííle muriwa ɩ́ tíé mí, ɩ́ nɛsɛ, ɩ́ pieŋse arɩ́ bʋnnɛ má waá pul. 19 Nyuutɩna Wɩɩsɛ sɩ́ bʋrɛ héíwa colé arɩ́rɩ́ɩ́wa bɩrkóé mí.

20 Rɩɩ́wa nɛ́ vɛ́ Nyuutɩna Wɩɩsɛ, ʋ bʋra sɩ́ dííwa, ʋ sɩ́ a rɩ́ɩ́wa wɩ́ɛ́ wuu vúgúmi, rɩ́ wɩhála zʋ́ɩ́wa, rɩ́ɩ́wa tɩŋ ɛ́ mɛ́ a wuu de zɔkɛ naasɩ́ balá, a tɩŋ wɩ́bɔmɔ ná ɩ́ há ɛ́ɛ́ mɛ́. 21 Nyuutɩna Wɩɩsɛ sɩ́ pi pʋɔlɩ́bɔmɔ a héíwa mɛ́ rɩ́ɩ́wa wuu sʋsɛ tenni tíé ná ɩ́ háá zʋɛ́ rɩ́ɩ́wa tɩ́llɛ mɛ́. 22 Nyuutɩna Wɩɩsɛ sɩ́ pi pʋɔlɩ́ ná há sɩ́ a rɩ́ɩ́wa mɩ́ɛ́rɛ a héíwa mɛ́, ʋ sɩ́ pi zɔ́fɩɩrʋ héíwa mɛ́ a a rɩ́ɩ́wa tɛŋ buori ká a rɩ́ dɩhɩ́ ɔsɛ lʋŋ, rɩ́ hɩlɔ cɛ́ rɩ́ɩ́wa baksɛ ɓɩɛ hɩl tenni. Wɩ́bɔmɔ ná sɩ́ ɛ́ɩ́wa mɛ́ ɛ́ kɩ́ŋkáŋ rɩ́ɩ́wa sʋsɛ tenni. 23 Ɩ́ tɔ́ɔ́ mɛ́, bána há mɩnɩ́wa nyúúrí sɩ́ fɛ́l anɛ kɔmɔ há lɛ́ níŋ mí, ká rɩ́ɩ́wa tíé wuu duóri anɛ hɔɔ. 24 Nyuutɩna Wɩɩsɛ fa há sɩ́ a rɩ́ dúóŋ ko, ʋ sɩ́ a rɩ́ kuŋkulo arɩ́ hɩɛla nɛ́ lɛ bána nyúú a ko tɔ́ɩ́wa mɛ́ rɩ́ɩ́wa sʋsɛ. 25 Nyuutɩna Wɩɩsɛ sɩ́ pɛ́ɩ́wa dɩŋdɔma mɛ́, rɩ́wɔ́ yoo dííwa. Ɩ́ sɩ́ tɩŋ ŋmɛ́bala a mʋ́ rɩ́ɩ́wa yówó, amá ɓa sɩ́ kíríwa rɩ́ɩ́wa fá pɩsɛ a tɩŋ ŋmɛ́ŋsɛ balpɛ col. Duó wuu nɩɛ sɩ́ ná wɩ́ɩ́ ná há ɛ́ɩ́wa mɛ́ rɩ́ héwíŋ ɔsɛ káŋwɔ́. 26 Ɩ́ sɩ́ sʋsɛ, rɩ́ fíŋfille arɩ́ baka ɓɩɛ dííwa ɓɩsʋsɛ, ká nɛ́ŋ tóó aá kírwó.

27 Nyuutɩna Wɩɩsɛ sɩ́ pí zɔ́ŋmɛrɛ ná duo ʋ fa há píé hé Ezipiti tɩ́náwa mɛ́ a héíwa mɛ́, rɩ́ɩ́wa sakmɛ, rɩ́ɩ́wa tɛŋ wuu cúnni fʋbɔma, a tʋ́tʋsɛ. Dalúrí wuu toó há sɩ́ wóllíwa váárɛ. 28 Nyuutɩna Wɩɩsɛ sɩ́ pi gɩŋgárʋ arɩ́ nyʋ́mmʋ a héíwa mɛ́, rɩ́ɩ́wa sɩɛrʋ wuu vúgúmi. 29 Ɩ́ sɩ́ gʋɔrɛ baarɛ wɔhɔ anɛ nyʋmma háá laarɛ ká wɩ pʋmmɔ ná. Ɩ́ wɩ́ɩ́ wuu waá ɔsɛ. Tápʋ́l wuu nɩɛ sɩ́ bɩ́bɛ́ŋsɩ́wa, a kánɩ́wa ɓɩɛ lɩ́la, ká nɛ́ŋ toó rʋ́ʋ́ lɛ́ɩ́wa tá.

30 Ɩ́ oro sɩ́ cɔ́ háálɔ rʋ́ʋ́ ja, ká rɩ́ nɔ́ŋɔ ka háálɔ ná pɛ́. Ɩ́ sɩ́ sɔ jɩɩsɛ ká sɩ́ zʋ́. Ɩ́ sɩ́ cɔ́ŋsɛ tunɔnɛ́ baksɛ ká sɩ́wɔ́ nɔnɔ dí. 31 Ɓa sɩ́ kɛ́sɩ́wa nɛsɛ ɓʋ́ɩ́wa sɩ́ɛ́ mɛ́, ká rɩ́ɩ́wa sɩ́wɔ́ namɩŋsɛ dí. Ɓa sɩ́ kɛ́sɩ́wa kokúsi ɩ́ sɩ́ɛ́ mɛ́, a kaa col, ká nɛ́ŋ toó a lɔ́wɔ́ aá pɛ́ɩ́wa. Ɓa sɩ́ lɛ́ɩ́wa pieŋse a pɛ́ɩ́wa dɩŋdɔma, ká nɛ́ŋ toó a lɔ́wɔ́ aá pɛ́ɩ́wa. 32 Ɓa sɩ́ kɛ́sɩ́wa bɛlɛ a pá duo nɔ́ŋɔ nɩɛ. Tápʋ́l é wuu, ɩ́ sɩ́ dɛllɩ́wɔ́ bɩrkóé bɔl, amá ɩ́ wɩ wɩ́ɩ́ wuu wúó a makɛ rɩ́wɔ́ bɩrko. 33 Duhʋɔra ná ɩ́ há dé wʋ́ɔ́ ɛ̃ nɛ́, sɩ́ dííwa baksɛ ɓɩɛ ná wuu ɩ́ há súólé ká ná, ká rɩ́wɔ́ bɛ́ŋsɩ́wa ɛ́ ɩ́ mɩɩsɛ wuu mí. 34 Ɩ́ wɩ́náálɛ sɩ́ a rɩ́ɩ́wa gáásɛ.

35 Nyuutɩna Wɩɩsɛ sɩ́ a rɩ́ zɔ́ŋmɛrɛ háá wɩɛ́ kɩ́ŋkáŋ lɩ́ɩ́wa neɓííne arɩ́rɩ́wa naasɛ mɛ́, rɩ́ɩ́wa sɩ́ wóllí váárɛ. Ɓa sɩ́ pɔ́ɩ́wa nacɛ́sɛ mɛ́ ká lɩ́ɩ́ zɛ́ yákɩ́ɩ́wa nyúnni mí.

36 Nyuutɩna Wɩɩsɛ sɩ́ kíríwa rɩ́rɩ́ɩ́wa kuóro ná wuu ɩ́ há sɩ́ lɩ́sɛ́ pɛ́ɩ́wa tɩɩ, a mʋ́ hé duhʋɔrɔ ná ɩ́ rɩ́rɩ́ɩ́wa ánáwa há wʋ́ʋ́ ɛ̃ sɩɛrʋ. Ráŋ nɛ́ rɩ́ɩ́wa ɓaarɛ venni ná ɓa há kéŋ daasɛ arɩ́ dɔ́wʋ́ɔ́ a a. 37 Duowa ná mɛ́ Nyuutɩna Wɩɩsɛ há sɩ́ kíríwa mʋ́ hé, ʋ sɩ́ a wɩ́gɩrɩ́ a pá ɛ́ nɩɛ, rɩ́wɔ́ mʋ́mɔ́mɩ́wa a cícérmíwa mɛ́.

38 Ɩ́ sɩ́ du ɓɩɛ kɩ́ŋkáŋ ɩ́ baksɛ mɛ́, amá ɩ́ oŋkʋ́sɛ́ sɩ́ a mʋ́ɔ́, bee wɩ́ɛ́ hʋɔ̃́sɛ sɩ́ díwó wuu. 39 Ɩ́ sɩ́ cɔ́ŋsɛ vínyi tuuni baksɛ ɓɩkana, a bɩrmɛ hé, amá ɩ́ wʋ́ɔ́ nɔnɔ ɓɔ́rɛ, a wʋ́ɔ́ sɩ́ŋ má nyɔ, bee wɩ́ɛ́ deŋdule sɩ́ díwó wuu. 40 Ólivi tuuni sɩ́ pulíwa tíé mí, amá ɩ́ wʋ́ɔ́ nʋʋ ná rɩ́ɩ́ tíísíwa tɩɩ, bee wɩ́ɛ́ ɓa nɔnɔ wuu sɩ́ yuori tá. 41 Ɩ́ sɩ́ ka heŋbólli arɩ́ tolé amá ɩ́ wʋ́ɔ́ tɩ́llɛ́, bee wɩ́ɛ́ ɓa sɩ́ kɛ́sɩ́wɔ́ rɩ́wɔ́ a yósi. 42 Hʋɔ̃́yórówa sɩ́ dííwa tíé tuuni wuu arɩ́rɩ́ɩ́wa baksɛ ɓɩɛ.

43 Zʋzʋ́llɛ ná há mɩ́nɩ́wa sɩɛrʋ sɩ́ mɩnɩ́wa nyúú, ká rɩ́ɩ́wa nɛ́ bɩrɛ mɩŋ tíé rí. 44 Ɓa nɛ́ sɩ́ bɩrɛ pi ɓɩɛ a kɩ́kɩ́mɩ́wa, ɩ́ é waá wólli pi óŋ wuu rɩ́ɩ́ kɩ́ŋwɔ́. Ɓa nɛ́ sɩ́ bɩrɛ ɛ́ɩ́wa sɩ́dííre, ká rɩ́ɩ́wa tɩ́ŋwɔ́ har.

45 Bʋra nyáŋ wuu sɩ́ dííwa. Ɓa sɩ́ kiri tɩ́ŋɩ́wa mɛ́ a dííwa, bee wɩ́ɛ́ ɩ́ vɔ́ɔ́ rɩ́ɩ́wa saŋ Nyuutɩna Wɩɩsɛ, ɩ́ Wɩɩsɛ, a vɛ́ rɩ́ɩ́wa tɩŋʋ́ kíŋse arɩ́rʋ́ wɩ́bile ná ʋ há mákɩ́wa nɛ́. 46 Wɩ́ɛ́ nyáŋ sɩ́ a nyɩ́nɛ́ arɩ́ wɩ́nyáŋsɛ ɩ́ rɩ́rɩ́ɩ́wa duo nɩɛ wuu rɩ́, a kaá mʋ́ wuu.

47 Nyuutɩna Wɩɩsɛ, ɩ́ Wɩɩsɛ pí ɓɩɛ ná wuu a pɛ́ɩ́wa ɓa pʋ́rkɩ́wa, ká ɩ́ vɛ rɩ́ɩ́wa tɩ́tɩ́ŋʋ́ arɩ́rɩ́ɩ́wa sɩɛrʋ wuu arɩ́ satɔrɔ́. 48 Ɛ́ wɩ́ɛ́, ɩ́ sɩ́ ka losu, nyinyʋɔ́sɛ, tɛŋɓɩla a a súmmu, ká ha tʋŋ a pɩ́pɛ́ɩ́wa dɩŋdɔma ná Nyuutɩna Wɩɩsɛ há pííwa héwó nɛ́sɛ mɛ́. Ʋ sɩ́ a rɩ́ɩ́wa caasɛ ná wɩɩla ɛ́ a mʋ́ sʋsɛ. 49 Nyuutɩna Wɩɩsɛ sɩ́ ka duo ná liŋó ɩ́ há waá nɛ, a lɛ dúníé dɩhɩ̃́ ná há bolé, a ko héíwa mɛ́ rɩ́wɔ́ yóíwa, anɛ kiesí háá ko tuwi zíme mí ɛ́. 50 Ɓa ká duo ná nɩɛ sɩ́belé há kéŋ héwíŋ ní, ɓa sɩ́ɛ́ to nɩhɩ́ɛ̃́sɛ mɛ́, ɓa wɩ heŋbíísi susú fá. 51 Ɓa sɩ́ ɓʋ́ʋ́sɩ́wa pʋsɛ, a zɔ́kɩ́wa tíé oŋparɛ́ wuu, ká rɩ́ losu ɓʋ́ɩ́wa tenni. Ɓa waá lo rɩ́ɩ́wa ka mɩ́ɛ́, dɩvɛ́ŋfɛlɛ arɩ́ nʋʋ. Ɓa waá lo rɩ́ɩ́wa nɛsɛ rɩ́ pieŋse, rɩ́ bʋnnɛ oro wuu ka bíí, a kaá jɛ́ɩ́wa wuu sʋsɛ tenné. 52 Ɓa sɩ́ ko lɛ́rɩ́wa tɔ́nɛ ná wuu Nyuutɩna Wɩɩsɛ, ɩ́ há píé pɛ́ɩ́wa, a yoo dí tɔ́nɛ ná ɩ́ há sɔ́ zekúduoru há ísé a kíl, a fa pííwa yɩɛla héwó mí, rɩ́wɔ́ wuu ɓallɛ. 53 Ɩ́ dɩŋdɔma sɩ́ caasɛ hé wɩɩla a pɛ́ɩ́wa, tɛ́ŋ ná mɛ́ ɓa há sɩ́ lɛ́rɩ́wa tɔ́nɛ. Ɛ́ sɩ́ a rɩ́ɩ́wa gɩrɛ kɛ́sɩ́wa bɛlɛ ná Nyuutɩna Wɩɩsɛ, ɩ́ Wɩɩsɛ há píé pɛ́ɩ́wa, heŋbolli rɩ́ tole a didi. 54 Báálɔ ná há sɩ́ mɩ́nɩ́wa sɩɛrʋ a ka sɩ́pʋmmɩ́ a wɩ nɩɛ kené aá gbési, ʋ sɩ́ bɩrka sɩ́nyúmmo, aá gɩ́ɛ́nʋ́ maábinɔ́ŋɔ rɩrʋ́ hácólli, arɩ́rʋ́ bɛlɛ ná há káánɛ. 55 Rʋʋ nɛ́ dúú bɛlɛ ná oro namɩ́ɛ́, ʋ waá coki pa ɛ́ nɩɛ oro wuu ɔ́ʋ́ hácólli ná ɛ́ raá má ʋ maábinɔ́ŋɔ, bee wɩ́ɛ́ ɓa dɩŋdɔma há kúé kílwó, rɩ́wɔ́ yoo díwó ɛ́, ɓɩdííle ná wuu fá há kaanʋ́ rɩ́ nɛ́ ɛ́. 56 Ɩ́ sɩɛrʋ háálɔ ná sɩ́ɛ́ há pʋ́mmɔ́, a fɩ́fá hɩ́ɩ̃́sɛ kɩ́ŋkáŋ, a wʋ́ʋ́ bála kené aá gbési, a waá ja rʋ́ʋ́ zʋ nɛrɔ wɩ́ɩ́ sɩɛrʋ, ʋ sɩ́ bɩrka sɩ́nyúmmo, aá gɩɛ́nʋ́ bála tɩɩ rɩ́rʋ́ tɩɩ bilʋllɛ́, a sɩ́wɔ́ wɩ́ɛ́ cóllú, 57 a tɩ́ŋwɔ́ dɩŋdɔma há kílé cúwó tɔ́nɛ, wɩɩla ná zʋ́wɔ́ wɩ́ɛ́. Ʋ sɩ́ wólli lʋɔrɛ dúú bilʋlɩ́ arɩ́ bir wuu.

58 Rɩ́ɩ́wa nɛ́ wɩ́ɩ́wa tɩɩ mɛ́ pɔ́rɛ́, rɩ́ɩ́ tɩ́ŋ wɩ́ɛ́ ná Wɩɩsɛ wɩ́bile há máŋsɛ́, ɓa pʋ́ŋsɩ́wɔ́ wuu a hé kɛnɔ né mí, ká fɩ́fá“Nyuutɩna Wɩɩsɛ, ɩ́ Wɩɩsɛ” yɩr ná há zeno, a ká píŋ má, 59 Nyuutɩna Wɩɩsɛ tɩɩ nɛ́ sɩ́ pi dɩwɩlbɔmɔ arɩ́ wɩ́lɔrɛ́ a héíwa rɩ́rɩ́ɩ́wa duo nɩɛ mɛ́, rɩ́ɩ́wa ná wɩɩla a dáánɛ kɩ́ŋkáŋ. Dɩwɩɩla ná wɩ sɩ́ ka dalúrí wuu. 60 Ʋ sɩ́ pi dɩwɩɩla ná wuu ʋ fa há píé hé Ezipiti tɩ́náwa mɛ́, ɩ́ fɩ́fáwɔ́ a héíwa mɛ́. 61 Nyuutɩna Wɩɩsɛ báá sɩ́ pi dɩwɩɩla ná arɩ́ wɩ́lɔrɛ́ ná duowa ɓa há wɩ pʋ́ŋsɛ́ hé Wɩɩsɛ wɩ́bilé kɛnɔ né sɩɛrʋ, a héíwa mɛ́ rɩ́ɩ́wa wuu sʋsɛ tenni. 62 Ɩ́ fa kánɔ́ rɛ́ wérí anɛ caŋwʋllɛ há mɩŋ bána nyúú, amá ɩ́ wuu sɩ́ tenni ká káánɛ́ nɩɛ mʋ́ɔ yɔ́ɔ́, a tɩ́ŋɩ́wa há vɛ́ Nyuutɩna Wɩɩsɛ, ɩ́ Wɩɩsɛ nʋɔ tɩŋɛ́. 63 Nyuutɩna Wɩɩsɛ sɩɛrʋ há tɔ́rɛ́ ʋ a ɩ́ pul a ka ɓɩɛ ɛ́, ɛ́ tɩɩ nɛ́, rʋ́ʋ́ sɩɛrʋ tɔrɛ rʋ́ʋ́ zɔ́kɩ́ɩ́wa. Ʋ sɩ́ kíríwa tíé ná ɩ́ háá zʋɛ́ rɩ́ɩ́wa tɩ́llɛ mɛ́. 64 Nyuutɩna Wɩɩsɛ sɩ́ kánɩ́wa pɩsɛ hé dúníé kɩ́ŋkere duowa ná wuu sɩɛrʋ. Ráŋ nɛ́ ɩ́ sɩ́ ɓaarɛ venni ná ɓa há kéŋ daa arɩ́ dɔ́wɩ́ a a. Ɩ́ rɩ́rɩ́ɩ́wa naabálwa oro wuu fá há wʋ́ɔ́ ɛ̃. 65 Duowa ná sɩɛrʋ, ɩ́ wɩ fɩɛla ná, ɩ́ wɩ dɩkení ká. Nyuutɩna Wɩɩsɛ waá lo rɩ́ɩ́wa sɩɛrʋ pɛ́ dɩbalá, rɩ́ɩ́wa sɩ́ɛ́ tʋ́tʋ́l, rɩ́ɩ́wa naasɛ duóri. 66 Ɩ́ wɩ́ɩ́ wuu sɩ́ a síkesíke rɩ́ héwíŋ zʋ́ɩ́wa tɩ́taŋ arɩ́ wɔhɔ wuu, rɩ́ɩ́wa yéŋŋi ɩ́ mɩɩsɛ wɩ́ɛ́. 67 Cɩ́cʋɔ ɩ́ sɩ́ bʋlɛ́: «Rɩ gbaanɛ nɛ́ fa.» Gbaanɛ má, ɩ́ báá sɩ́ bʋlɛ́: «Rɩ cɩ́cʋɔ nɛ́ fa», a tɩŋ wɩ́ɛ́ ná ɩ́ háá néé arɩ́ héwíŋ ná há zʋ́ɩ́wa wɩ́ɛ́. 68 Nyuutɩna Wɩɩsɛ sɩ́ a rí nyiidaborsi pɛ́ɩ́wa bɩrɛ mʋ́ Ezipiti tíé, dɩhɩ̃́ ná ŋ há sɛ́ rɩ́ɩ́wa sɩ́ɩ́ báá waá bɩrnóú ná. Ráŋ ɩ́ sɩ́ jɩ́ja rɩ́ɩ́wa pííwa tɩɩ a yɛ́llɛ pɛ́ɩ́wa dɩŋdɔma anɛ yósi, ká nɛ́ŋ má toó aá yɔ́wɩ́ɩ́wa.»

Moyizi hatɩ́ŋnɩ́wɩ́bʋlɛ́

69 Nʋtʋmɛ ná Nyuutɩna Wɩɩsɛ há bílé Moyizi makɛ pá Ɩzɩrayɛl nɩɛ Mɔabɛ tíé mí ní nyɛ, a súúri nʋtʋmɛ ná ʋ há bílé a pɔ́wɔ́ Sinayi paalɔ ná mɛ́.