Oŋbʋʋrɛ wɩ́ɛ́
26
1 Rɩɩ́wa nɛ́ zʋ́ tíé ná Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa rʋ́ʋ́ ɛ́ɩ́wa óŋ a ké ráŋ, 2 ɩ́ oro wuu sɩ́ lɩ́sʋ́ oŋbʋʋrɛwa ʋ há párɛ́ tíé ná mɛ́, a hé kúre sɩɛrʋ, a kaa mʋ́ dɩhɩ̃́ ná Nyuutɩna Wɩɩsɛ, ɩ́ Wɩɩsɛ há sɩ́ makɛ rɩ́ɩ́wa cʋ́cʋ́ɔ́lʋ́ ráŋ. 3 A bʋl pá Wɩɩsɛ vʋk'ɔɔsɔ ná há mɩŋ ráŋ, aá tʋŋ tʋtʋmɛ́ ɛ́ tɛ́ŋ mɛ́, a bʋlɛ́: «Zaa ŋ já rɩ́ŋ makɛ pa Nyuutɩna Wɩɩsɛ, ɩ Wɩɩsɛ, rɩ́ŋ zʋ́ tíé ná ʋ fa há tá nʋɔ párá naabálwa rʋ́ʋ́ sɩ́ pii párá nɛ́.» 4 Wɩɩsɛ vʋk'ɔɔsɔ sɩ́ la kúre ná arɩ́ ɓɩdííle ná ɩ nɛ́sɛ mɛ́, a pii bil Nyuutɩna Wɩɩsɛ, ɩ Wɩɩsɛ koro ná sɩ́ɛ́. 5 Nyuutɩna Wɩɩsɛ, ɩ Wɩɩsɛ sɩ́ɛ́, ɩ sɩ́ bɩrɛ bʋl wɩ́ɛ́ nyáŋ, a bʋlɛ́: «Ŋ áná fa ká nɛgʋ́ɔ́rɩ́ rɛ́, a lɛ́ Aaramɛ. Ʋ mʋ́ɔ́ ké Ezipiti rʋʋ nɩɛ fa wɩ kaŋ, ráŋ nɛ́ ɓa pul kɩ́ŋkáŋ a a dúzéní, a ka dóé. 6 Amá Ezipiti tɩ́náwa bɛ́ŋsɩ́rá wérí, a a á tʋŋ tʋtʋ́ŋduoru, a ná wɩɩla. 7 Ɛ́ nɛ́ á ŋmɔwɛ búŋse pá Nyuutɩna Wɩɩsɛ, á ánáwa Wɩɩsɛ, ʋ nɩ́rá búŋse, a ná rá bɛŋsɛ́, arɩ́rá wɩɩla wuu. 8 Ɛ́ nɛ́ Nyuutɩna Wɩɩsɛ kánʋ́ vadóé ná a wɩ́nyɩnɛ arɩ́ wɩ́nyáŋsɛ arɩ́ wɩ́ɛ́ ná há kéŋ héwíŋ, a káŋrá lɛ Ezipiti tíé mí. 9 Ʋ kéŋrá ko rɛɛ́ nɛ́, a pi tíé né há wéró a ka ɓɩɛ má wérí, a nɛ nɛ'ɩ́l rɩ́ tʋʋ, a párá. 10 Ɛ́ wɩ́ɛ́, mʋ́l né mí ŋ kéŋ tíé ná Nyuutɩna Wɩɩsɛ há píé páŋ oŋbʋʋrɛwa ŋ há párɛ́ nɛ́, a ko rɩ́ŋ pɔ́ʋ́.»Ɩ há bʋ́l ɛ́ tenni, pi kúre ná bil Nyuutɩna Wɩɩsɛ, ɩ Wɩɩsɛ sɩ́ɛ́, ká ɓírmú sɩ́ɛ́ a síílú. 11 Ɩ rɩ́ Levi dunɩɛ arɩ́ zʋ́zʋ́llɛ ná wuu há mɩ́nɩ́ɩ́wa sɩɛrʋ mɔhɔ̃́ rɩ́ɩ́wa dí cana Nyuutɩna Wɩɩsɛ, ɩ Wɩɩsɛ sɩ́ɛ́ nɛ́, a tɩŋ wér ná wuu ʋ há píé pɛ́ɩ́ rɩ́rɩ́ jaa nɩɛ wɩ́ɛ́.
Fí nyúú ker wɩ́ɛ́
12 Bɩŋsɛ botoro nyúú mí wuu, rɩɩ́wa kúó kánɩ́wa ɓɩɛ a ɓa kere fí, balá na há ká Nyuutɩna Wɩɩsɛ ker, ɩ́ pii pá Levi tɩ́náwa, nɩhʋɔra, bisíŋsi arɩ́ yúháála ná há mɩ́nɩ́wa tɔ́nɛ mɛ́, rɩ́wɔ́ dí vɔksɛ. 13 Ɩ sɩ́ bʋl Nyuutɩna Wɩɩsɛ, ɩ Wɩɩsɛ rɩ́ bʋlɛ́: «Ŋ jaa mɛ́, ŋ lɩ́sɛ ɛ́ ɓaalɛ wuu há kɛ́ɩ́ ker, a pii pá Levi tɩ́náwa, nɩhʋɔra, bisíŋsi arɩ́ yúháála, anɛ ɛ́ ɩ há mákɛ́. Ŋ wɩ́ɩ́ kíŋse oro wuu vɛ́ɛ́, ŋ wʋ́ɔ́ óŋ balá má mɛ́ sʋllɛ́. 14 Ŋ wɩ́ɩ́ ɓaalɛ ná mʋɔ́ má díé, ŋ háá wi yúó tɛ́ŋ ná mɛ́, ŋ wɩ mʋɔ́ má lɩ́sɛ́ tɛ́ŋ ná mɛ́ ŋ há kéŋ busunnu, ŋ báá wʋ́ɔ́ mʋɔ́ má píé a pá sʋʋ. Nyuutɩna Wɩɩsɛ, ŋ Wɩɩsɛ, ɩ nʋɔ nɛ́ ŋ tɩŋ, a a wɩ́ɛ́ ná wuu ɩ há mákɩ́ŋ. 15 Ɩ há mɩŋ bána nyúú, ɩ dɩwero mí, bel ná ɩ nɩɛ Ɩzɩrayɛl nɩɛ, ká pɛ́rá mɛ́ a ɔsɛ tíé ná há wéró a ka ɓɩɛ wérí, a nɛ nɛ'ɩ́l rɩ́ tʋʋ, anɛ ɛ́ ɩ há tá nʋɔ, a párá naabálwa.»
Ɩ́ tɩŋ Nyuutɩna Wɩɩsɛ há sʋ́ʋ́ ná
16 Zaa, Nyuutɩna Wɩɩsɛ, ɩ́ Wɩɩsɛ bʋ́lɔ́ aá pɛ́ɩ́wa rɩ́ɩ́wa tɩ́tɩ́ŋʋ́ kíŋse rɩ́rʋ́ wɩ́bilé ní, ɛ́ wɩ́ɛ́, ɩ́ sɩɛ́ kánɩ́wa sɩɛrʋ arɩ́rɩ́wa taŋá (dʋma) wuu a tɩ́ŋwɔ́. 17 Zaa, ɩ́ mákɔ́ rɩ Nyuutɩna Wɩɩsɛ nɛ́ kɛ́ɩ́wa Wɩɩsɛ, ɩ́ sɩ́ sáŋʋ́, a tɩ́ŋʋ́ wɩbile, wɩ́makɛ́ arɩ́rʋ́ kíŋse. 18 Zaa, ʋ ɔ́ɔ́ ɩ́ saŋ rɩɩ́wa kɔ́ʋ́ nɩɛ nɛ́, ʋ nɩcólle; anɛ ɛ́ ʋ há tá nʋɔ pɛ́ɩ́wa, ʋ sɩɛ́ sʋ́ʋ́ mɔhɔ̃́ rɩ́ɩ́wa tɩŋ wɩ́ɛ́ ná wuu ʋ há mákɛ́. 19 Ʋ sʋ́ʋ́ sɩ́ a rɩ́ɩ́wa kɩ́llɛ duó wuu ʋ há ɛ́ɛ́, a ka yɩr, rɩ́ nɩɛ bɩ́bɩ́wa mɛ́. Ʋ sɩ́ a rɩ́ɩ́wa ɔ́ʋ́ é Nyuutɩna Wɩɩsɛ, ɩ́ Wɩɩsɛ dʋŋɔ tɩ́llɛ, anɛ ɛ́ ʋ há tá nʋɔ pɛ́ɩ́wa.