Taŋá bʋlɛ́ sarɩ́ya díí wɩ́ɛ́
25
1 Rɩ nɩɛ bɛllɛ nɛ́ kéŋ kapɔsɛ, a ka wɩ́ɩ́ ná mʋ́ sarɩ́ya dɩdíí, sarɩ́yadííre mɔhɔ̃́ rɩ́wɔ́ dí sarɩ́ya ná a pi zɔ́krʋ a pá nɛrɔ ná ɓɩɛ há wɩ weri, ká bʋl pɛ́ nɛrɔ ná ɓɩɛ há wéró mí. 2 Rɩ nɛrɔ ná há lá zɔ́krʋ nɛ́ mɔhɛ̃́ rɩ́wɔ́ fɩ́rʋ́, sarɩ́yadííro ná mɔhɔ̃́ rʋ́ʋ́ a rɩ́ tɩ́na pɛ́ tie ʋ sɩ́ɛ́, ká rɩ́wɔ́ fɩ́rʋ́ a cɛ́rʋ́ wɩ́ɩ́ mʋɔsɔ. 3 Vɩla naasɩ́ mɛɛ́sɛllɛ nɛ́ mɔhɛ̃́ rʋ́ʋ́ la, ʋ wɩ mɔhɛ̃́ rʋ́ʋ́ daarɛ ɛ́ mɛ́. Rɩɩ ɓa nɛ́ fɩ́rʋ́ kɩ́llɛ ɛ́, ʋ tɛŋ sɩ́ ɔsɛ foki, rʋ́ʋ́ nɛ́ anɛ ʋ ká nɩtɔ́k. 4 Rɩɩ nɛ́ kéŋ nɔɔ nʋ́nʋɔsɛ mɩ́ɛ́, ɩ baa sʋ́ʋ́ nʋɔ é vɔ́wɩ́ tɔ́.Yúháálɔ pii jɛɛ wɩ́ɛ́
5 Rɩ lɩkápáwa nɛ́ mɩŋ ráŋ, rɩ́ máála sʋwɛ ká wɩ bíí lʋ́lɛ́, ʋ háálɔ wɩ mɔhɛ̃́ rʋ́ʋ́ lɛ jaa ná mɛ́ a mʋ́ ja bál nɔ́ŋ. Ʋ bála maábio ná nɛ sɩ́ cɩ́nʋ́ maaltóó nyúú mí.(a puu ja) 6 Rɩ ɓa nɛ́ lʋ́lwɔ́ dʋ́ŋdʋ̃́ʋ́ heŋbole, ʋ nɛ́ sɩ́ cɩ́nʋ́ máálitó ná nyúú mí rʋ́ʋ́ yɩr sɩ́ Ɩzɩrayɛl tíé mí yʋ́ksʋ́. 7 Rʋʋ maábio ní waá ja rʋ́ʋ́ pi yúháálɔ ná ja, háálɔ ná mɔhɔ̃́ rʋ́ʋ́ mʋ́wɔ́ tɔ́ɔ́ dánnʋɔ, ɓa nɩhɩɛ̃́sɛ sɩ́ɛ́ a bʋl pɔ́wɔ́ bʋlɛ́: «Ŋ bála maábio já rʋ́ʋ́ mááltó ná yɩr yʋ́ksɛ nɛ́ Ɩzɩrayɛl tíé mí. Ʋ waá ja rʋ́ʋ́ píŋ ja ráá lʋl bɛlɛ rɩ́wɔ́ cɩ́nʋ́ mááltó nyúú mí». 8 Ʋ tɔ́ɔ́ nɩhɩɛ̃́sɛ sɩ́ yɩ́rʋ́ a bʋl wɩ́ɛ́ pɔ́ʋ́. Rʋʋ nɛ́ ha vɛ́ɛ́ ká bʋlɛ́: «Ŋ wɩ háálɔ ná ja», 9 yúháálɔ ná sɩ́ mʋ́ʋ́ bála maábio rɩ́ nɩhɩɛ̃́sɛ ná sɩ́ɛ́, a ka báálɔ́ ná natɔwɔ nɔ́ŋɔ lɩ́sɛ ká pʋ́sɛ mɩŋtʋɔrʋ hóú sɩ́ɛ́ mɛ́ ká bʋlɛ́: «Nyɛ nɛ́ mɔhɛ̃́ rɩ́wɔ́ pii a báálɔ ná há vɛ́ɛ́ rʋ́ʋ́ púú máálá yúháálɔ ja, rɩ́wɔ́ lʋl bɛlɛ, rɩ́wɔ́ cɩ́nʋ́ máálá nyúú mí. 10 Ɩzɩrayɛl tíé wuu mí, báálɔ ná bɛlɛ nɛ́ ɓa sɩ́ yɩ́yɩ́rɛ natɔbála duo nɩɛ.
Háálɔ wɩ́kísi
11 Rɩ báála bɛllɛ nɩ́ɩ́ lowé, rɩ́ nɔ́ŋɔ háálɔ ko rʋ́ʋ́ sáŋʋ́ bála mɛ́, a ka báálɔ ná nɔ́ŋɔ lure mí, 12 ɩ́ ka ɛ́ háálɔ, a ɓɔ́ʋ́ nɛ́sɛ coki, ɩ́ sʋ́ʋ́ susu fá.
Ɩ́ tɩŋ taŋá yɛlɩ́ mɛ́
13 Ɩ́ sɩ́ oŋkaakérse bɛllɛ kánʋ́ bɔtɔ mɛ́, rɩ́ nɔ́ŋɔ zíŋ kɩ́llɛ nɔ́ŋɔ. 14 Ɩ́ sɩ́ gbaŋ'máŋsɛ bɛllɛ kánʋ́ ɩ́ jaa mɛ́, rɩ́ nɔ́ŋɔ zeŋ kɩ́llɛ nɔ́ŋɔ. 15 Ʋ mɔhɔ̃́ rɩ́ɩ́wa ka oŋkakérse ná há mɔhɛ̃́ nɛ́(arɩ gbán'mansɛ)aá máŋsɛ ɓɩɛ, rɩ́ ɛ́ a rɩ́ɩ́wa wólli ké tíé ná Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa mɛ́ a dáánɛ. 16 Nyuutɩna Wɩɩsɛ, ɩ́ Wɩɩsɛ bɛ́rɛ nɩɛ ná háá tʋ́ŋ ɛ́ wɩ́ɛ́ duó mí, aá vɩrɛ nɩɛ.
Amalesitiwa wɩ́ɛ́
17 Ɩ́ líísíwa tɩɩ rɩ́ wɩ́ɩ́ ná Amalesitiwa há ɛ́ɩ́wa mɛ́, ɩ́ há lɛ́ Ezipiti tíé kúko. 18 Ɛ́ tɛ́ŋ mɛ́, ɩ́ wuu fa há bɔ́lɛ́, ɩ́ dóé tenni, ɓa wɩ Wɩɩsɛ fɛ́ɛ́ ká ko lɩɩ kɛ́rɩ́wa ŋmɛ́nɔ mɛ́, a ɓʋ́ʋ́sɛ nɩɛ ná fa há tɩ́ŋɩ́wa har. 19 Rɩ Nyuutɩna Wɩɩsɛ, ɩ́ Wɩɩsɛ nɛ́ ɛ́ɛ́ rɩ́ɩ́wa ná fɩɛla ɩ́ dɩŋdɔma ná wuu há kílíwa nɛ́sɛ mɛ́, tíé ná ʋ há sɩ́ pii pɛ́ɩ́wa rʋ́ʋ́ ɛ́ɩ́wa óŋ mí, ɩ́ ɓʋ́ Amalesitiwa duo wuu rɩ́wɔ́ yɩr yʋ́ksɛ dúníé mí. Ɩ́ sɩ́ wɩ́ɩ́ né mí sʋllʋ́.