Hákiritáálɛ wɩ́ɛ́
24
1 Rɩ báálɔ nɛ́ já háálɔ, ká báá wʋ́ʋ́ có, a tɩ́ŋʋ́ háá a wɩ́ɛ́ ná há kéŋ hɩ̃́ɩ̃́sɛ, rɩ́ báálɔ ná jɩ́ja rʋ́ʋ́ kírútá, a pʋ́ŋsɛ kɛnɔ pɔ́ʋ́, ká kírú ʋ lʋ́ʋ́ jaa mɛ́, 2 rɩɩ háálɔ ná nɛ́ lɩ́ɛ́, rɩ́ɩ́ mʋ́ʋ́ ja báálɔ nɔ́ŋɔ, 3 rɩ́ ɛ́ báálɔ má nɛ́ báá wʋ́ʋ́ có ká pʋ́ŋsɛ kɛnɔ pɔ́ʋ rʋ́ʋ́ lɛ, ɛ́ raa má rɩ báálɔ́ ná nɛ́ sʋ́wɛ́, 4 ʋ balbɩnɛ́ ná baa wɩ mɔhɛ rʋʋ́ jɔ́ʋ́, bee wɩ́ɛ́ háálɔ ná kéŋ busunnu. Ɛ́ɛ́ kísú rí Nyuutɩna Wɩɩsɛ rɩ́. Ɩ́ sɩ́ wɩ́bɔmɔ áá hé tíé ná Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa rʋ́ʋ́ ɛ́ɩ́wa óŋ mí.Háfɛlɔ́ bála wɩ́ɛ́
5 Rɩ báálɔ nɛ́ já háfɛlɔ, ʋ wɩ mɔhɛ̃́ rɩ́ɩ́wa lo rʋ́ʋ́ mʋ́ lal, dɩbol tʋtʋmɩ́ é wuu báá to nyúú cɩka. Ʋ mɔhɔ̃́ rʋ́ʋ́ ké jaa mɛ́ nɛ́ bɩná, a a wɩ́ɛ́ ná há sɩ́ a rʋ́ʋ́ háálɔ ná sɩɛrʋ tɔrɛ.
Kɩŋ díí wɩ́ɛ́
6 Nɛrɔ wuu pɔ́ rʋ́ʋ́ sʋ́ʋ́ nɔ́ŋɔ nɔmɔ ɛ́ raá má nɔŋbúí pí kɩŋ wɩ́ɛ́. Rɩɩ nɛ́ á ɛ́, ʋ nɩhɩ̃́ tɩ́na mɩɩsɛ nɛ́ ɩ ja rɩ́ɩ́ lɩ́sɛ ɛ́.
Nɩwomme gɛ́ɛ́ wɩ́ɛ́
7 Rɩ Ɩzɩrayɛl duo nɛrɔ wuu ní gɛ́ɛ́ rɩ́ɩ́ kánʋ́ maábinɔ́ŋɔ, rʋ́ʋ́ ɔ́ʋ́ yómo, ɛ́ raá má a yɛ́llʋ́, ʋ mɔhɔ̃́ rɩ́ɩ́wa ɓʋ́ gaarɔ ná. Ʋ mɔhɔ̃́ rɩ́ɩ́wa lɩ́sɛ wɩ́bɔmɔ né tá nɛ́ ɩ́ sɩɛrʋ.
Dayálmʋ wɩ́ɛ́
8 Rɩ dayálmʋ nɛ́ zʋ́ɩ́wa tɔ́ɔ́, ɩ́ pɔ́rɩ́wa tɩɩ mɛ́ a tɩŋ Levi duo, Wɩɩsɛ vʋk'ɔɔsa nʋɔ. Wɩ́ɛ́ ná wuu ŋ há mákwɔ́, a tɩ́ŋwɔ́ sɩ́ɩ́ mɛ́. 9 Ɩ́ líísíwa tɩɩ rɩ́ wɩ́ɩ́ ná Nyuutɩna Wɩɩsɛ, ɩ́ Wɩɩsɛ há ɛ́ɛ́ Mɩrɩaŋ mɛ́ ŋmɛ́nɔ mɛ́, tɛ́ŋ ná mɛ́ ɩ́ há lɛ́ Ezipiti tíé mí.
10 Rɩɩ nɛ́ pí óŋ wuu rɩ́ɩ́ kɩ́mɩ́ maábinɔ́ŋɔ, ʋ wɩ mɔhɛ̃́ rɩ́ɩ́ tɩŋ zʋ́ʋ́ jaa, a pi omo ná ʋ há píé tá nʋɔ a bʋ́lʋ́ sɩ́ túŋ kɩ́ŋ ná. 11 Ʋ mɔhɔ̃́ rɩ́ɩ́ cɛ́ pʋmmɔ nɛ́, ká rʋ́ʋ́ tɩɩ zʋ́ pi nʋtalɔ́ omo ná, a kaa ko lɩɩ pɛ́ɩ́. 12 Rʋʋ nɛ́ ká súmmú ká púú gɛrɔ a bil mʋ́l a pɛ́ɩ́, sɩ́ ló rí gɛrɔ ná cɔ́ɩ́ rɩ́. 13 Ʋ mɔhɔ̃́ rɩ́ɩ́ kánʋ́ gɛrɔ ná mʋ́ pɔ́ʋ́ rɩ́ wɩɩsɛ haa zʋ́ɛ́, rʋ́ʋ́ kaa tɔ́ʋ́ tɩɩ mɛ́. Ʋ sɩ́ bɔ́llɩ́, ká rɩ́ Nyuutɩna Wɩɩsɛ, ɩ Wɩɩsɛ má ná rɩ tʋ́ŋ yɛrɛ.
Tʋtʋnnɔ túme wɩ́ɛ́
14 Rɩ Ɩzɩrayɛl duo nɛrɔ, ɛ́ raá má zʋ́zʋʋlɛ́ ná há mɩ́nɩ́wa sɩɛrʋ oro rí ká súmmú, a tʋŋ pɩ́pɛ́ɩ́ ká rɩ́ɩ́ tútúmú, pɔ́ rɩ́ɩ́ sʋ́ʋ́ vɩ́rʋ́. 15 Tápʋ́l é wuu, púú túme pɔ́ʋ́ rɩ wɩɩsɛ ha wɩ zʋ́ɛ́, bee wɩ́ɛ́ ʋ há ká súmmú ɛ́, a wɩ óŋ wuu kené, túme ná mɛ́ nɛ́ ʋ yɩɛla wuu mɩŋ. Rɩɩ nɛ́ vɛ́ɛ́, ʋ sɩ́ wii pá Nyuutɩna Wɩɩsɛ, ɛ́ ká wɩ́bɔmɔ nɛ́ a cɩ́ɩ́nɩ́.
Nɛrɔ wuu mɔhɔ̃́ rʋ́ʋ́ dúú tɩɩ wɩ́bɔmɔ wɩɩla
16 Rɩ́ nɩɛ bíí rí á wɩ́bɔmɔ, ʋ wɩ mɔhɛ̃́ rɩ́wɔ́ ɓʋ́ʋ́ lʋlla a tɩŋ ɛ́ wɩ́ɩ́ wɩ́ɛ́. Rɩ lʋlla má nɛ́ á wɩ́bɔmɔ, ʋ wɩ mɔhɛ̃́ rɩ́wɔ́ ɓʋ́wɔ́ bio a tɩŋ ɛ́ wɩ́ɩ́ wɩ́ɛ́. Nɛrɔ wuu mɔhɔ̃́ rɩ́wɔ́ ɓʋ́ʋ́ a tɩŋʋ tɩɩ wɩ́bɔmɔ ná ʋ há ɛ́ɛ́ wɩ́ɛ́ nɛ́.
Nɩyaara kanɛ́ wɩ́ɛ́
17 Ɩ́ sɩ́ zʋ́zʋ́llɛ arɩ́ bisíŋsi vɩ́rʋ́, ɛ́ raá má rɩɩ nɛ́ pí óŋ a kɩŋ yúháálɔ, sʋ́ʋ́ gɛrɔ lá rɩ́ɩ́ bil mʋ́l. 18 Ɩ́ líísíwa tɩɩ rɩɩ́wa má fa ká yósi rí Ezipiti mí, Nyuutɩna Wɩɩsɛ, ɩ́ Wɩɩsɛ lɛ́ɩ́wa tá, a kánɩ́ɩ́wa lɛ ráŋ. Ɛ́ nɛ́ tɛ ŋ sɛ́ rɩ́ɩ́wa tɩŋ wɩ́ɩ́ né ɛ́.
19 Rɩɩ́wa nɩ́ɩ́ kʋ́sɩ́ɩ́wa baksɛ ɓɩɛ, ɓaná ɩ́ há ɓénné tá, ɩ́ báá sɩ́ bɩ́r mʋ́ʋ́ kuuniwó. Ɩ́ lówó a pá zʋ́zʋllɛ, bisíŋsi arɩ́ yúháála. Ɛ́ sɩ́ a rɩ́ Nyuutɩna Wɩɩsɛ, ɩ́ Wɩɩsɛ hé barka ɩ́ tʋtʋmɛ́ wuu mí. 20 Rɩɩ́wa nɩ́ɩ́ ɓɔ́rɩ́wa óliviwa, ɓa ná ɩ́ há ɓénné tá, ɩ́ báá sɩ́ bɩ́r mʋ́ʋ́ kuuni, ɩ́ lówó a pá zʋ́zʋllɛ, bisíŋsi arɩ́ yúháála. 21 Rɩɩ́wa nɩ́ɩ́ ɓɔ́rɩ́wa vínyiwa ɩ́ baksɛ mɛ́, ɓa ná ɩ́ há ɓénné tá, ɩ́ báá sɩ́ bɩ́r mʋ́ʋ́ ɓɔ́rɛ, ɩ́ lówó a pá nɩhʋɔra, bisíŋsi arɩ́ yúháála. 22 Ɩ́ líísíwa tɩɩ rɩɩ́wa má fa ká yósi rí Ezipiti mí. Ɛ́ nɛ́ tɛ ŋ sɛ́ rɩ́ɩ́wa tɩŋ wɩ́ɩ́ né ɛ́.