Náŋá ɓɩɛ mɛ́ belé wɩ́ɛ́
22
1 Rɩɩ nɛ́ néí maábinɔ́ŋɔ nɔɔ ɛ́ raá má ʋ pieŋso, rʋʋ yʋ́ksɔ́, sɩ́ á a nɛ́ ɩ wʋ́ʋ́ néé, taŋa ka, a kaa mʋ́ pɔ́ʋ́. 2 Rɩɩ maábinɔ́ŋɔ ná nɛ́ wɩ́ɩ́ lɛ́lɛ́, ɛ́ raá má ɩ wɩ pʋna ná tɩ́na ɛ̃, ka pʋna ná kaa mʋ́ɩ́ jaa. Rɩɩ maábinɔ́ŋɔ nɛ́ já pʋna ná ko, rɩ́ɩ́ kaa pɔ́ʋ́. 3 Ɛ́ tɩɩ tɩɩ nɛ́ mɔhɛ̃́ rɩ́ɩ́ a, rɩɩ maábinɔ́ŋɔ kokúme ní, rʋʋ gɛrɔ nɛ́, ʋ omo ná wuu há yʋ́ksɛ́ rɩɩ nóú, ɩ sɩ́ vɛ́ɛ́ tá. 4 Rɩɩ nɛ́ néí maábinɔ́ŋɔ kokúme, ɛ́ raá má ʋ nɔɔ rʋʋ ɓál ŋmɛ́nɔ mɛ́, sɩ́ lʋ́ɔ́rɩ́ dáárɛ, sáŋʋ́ mɛ́ rɩ́ɩ́wa ka pʋna ná cúóli.Wɩ́ɛ́ ná náŋa há mɔhɛ̃́ rɩ́ɩ́wa tɩŋ
5 Háálɔ wɩ mɔhɛ rʋ́ʋ́ su báála gɛnnɛ, báálɔ́ má wɩ mɔhɛ̃́ rʋ́ʋ́ su háála gɛnnɛ. Nyuutɩna Wɩɩsɛ, ɩ́ Wɩɩsɛ bɛ́rɛ nɩɛ ná wuu háá tʋŋ ɛ́. 6 Rɩɩ nɛ́ ná diíwidala tuu nyúú ŋmɛ́nɔ nʋɔ, ɛ́ raá má tíé, rɩ maá pɔ́ŋ hala nyúú, ɛ́ raá má rʋʋ tíésó, sɩ́ maá ná rɩ́rʋ́ bɛlɛ wuu pá. 7 Pa bɛlɛ ká lo maá. Ɛ́ sɩ́ a rɩ́ɩ́ wɩ́ɛ́ va wérí a pɛ́ɩ́, rɩ́ɩ́ ka mɩgbóó.
8 Rɩɩ nɛ́ sɔ́ jɩfɛlɔ a yo, ɩ lɩ́sɛ zekúme kil luso ná wuu, a kɛrɛ rɩ́ nɛrɔ sɩ́ luso ná nyúú lɩ́ɩ́ ɓál sʋwɛ, rɩ́wɔ́ pi zɔ́krʋ pɛ́ɩ́.
9 Rɩɩ nɛ́ kéŋ vínyi baka, sɩ́ tuu nɔ́ŋ cɔ́ŋsʋ́ súúriwo mí. Rɩɩ nɛ́ á ɛ́, ɩ rá báá wɩ́ vínyi ná arɩ́ tuu ná nɔ́ŋɔ nɔnɔ tɛ, Nyuutɩna Wɩɩsɛ nɛ́ tɩ́wɔ́. 10 Sɩ́ kokúme rɩ́ nɔɔ káá hé náŋá mɛ́ rɩ́wɔ́ parɛ. 11 Sɩ́ gɛrɔ ná ɓa há kéŋ pɛ́ŋbié arɩ́ pʋsɛ lɔ́ŋ hé náŋá mɛ́ nyɛrɛ sú. 12 Ɩ sɩ́ nyɛrɛ zʋɔsa héí gɛnnɛ ná ɩ háá (tɔɛ)súé nʋkeŋe baná wuu mí.
Báálɔ ha zɔ́kɛ háálɔ yɩr yɔ́ɔ́ wɩ́ɛ́ (Rɩ báálɔ nɛ́ já háálɔ a kánʋ́ pɛ́, ká báá wʋ́ʋ́ có ká nyɛ wɩ́ɛ́ rɩ́ háálɔ́ ná fa to hápírmí, ɛ́ ɓa há sɩ́ tɩŋ)
13 Rɩ báálɔ nɛ́ já háálɔ a kánʋ́ pɛ́ ká baa wʋ́ʋ́ có, 14 a bʋlʋ́ wɩ́ɛ́ wɩ wérí, aá zɔkʋ́ yɩr, rʋʋ há jɔ́ʋ́, a pɩ́nʋ́, rʋʋ fa to hápírmí. 15 Rɩ ɛ́ nɛ́ ɛ́ɛ́, háálɔ ná nɩɛ mɔhɔ̃́ rɩ́wɔ́ bel gɛrɔ ná ɓa há já náŋá a pii jɛrɛ pɛ́ mɛ́. Rɩ cɛ́l nɛ́ hé gɛrɔ ná mɛ́, ɛ́ nɩ́ɩ́ makɛ́ rʋʋ fa ká hápírmi ní, rɩ́wɔ́ sɩ́ɛ́ kaa mʋ́ makɛ tɔ́ɔ́ nɩhɩɛ̃́sɛ, ɓa tɔ́ɔ́ dánnʋɔ mɛ́. 16 Háálɔ ná áná sɩ́ bʋl pɔ́wɔ́ bʋlɛ́: «Ŋ píŋ toló pá báálɔ́ né ʋ ja nɛ́, amá mʋ́l né mí ʋ báá wʋ́ʋ́ có. 17 Ʋ sʋ́ʋ́ wɩ́ɛ́ wɩ wérí, rʋʋ há jɔ́ʋ́, rʋʋ fa to hápírmí. Ɩ́ sɩ́ɛ́ ná omo ná háá makɛ́ rɩŋ toló fa ká hápírmi ní.» Ɓa sɩ́ ka gɛrɔ ná a jɛ́rɩ́wɔ́ tɔ́ɔ́ nɩhɩɛ̃́sɛ sɩ́ɛ́ rɩ́wɔ́ ná. 18 Nɩhɩɛ̃́sɛ ná há ná gɛrɔ ná ɛ́, ɓa sɩ́ kánʋ́ bála ná a bɛ́ŋsʋ́. 19 Ɓa sɩ́ coki wárɛ zɔlɔ kɩŋ pɔ́ʋ́ rʋ́ʋ́ túŋ pá toló ná áná, bee wɩ́ɛ́ ʋ zɔ́kɛ́ Ɩzɩrayɛl nɩɛ toló há ká hápírmi yɩr nɛ́. Toló ná ha sɩ́ ɔ́ʋ́ hál ʋ mɩɩsɛ wuu mí, ʋ wɩ mɔhɛ̃́ rʋ́ʋ́ vɔ́ʋ́ tá. 20 Rɩ wɩ́ɩ́ ná ʋ bála ná há bʋlɛ́ nɛ́ ká wɩtáŋa, rɩ óŋ wuu ní toó a mɩ́makɛ rɩ háálɔ ná ká hápírmi ní, 21 ɛ́ é, ɓa sɩ́ ka toló ná a mʋ́ʋ́ áná jaa dánnʋɔ, rʋ́ʋ́ tɔ́ɔ́ báála yósú rɩ́ dɔ́wʋ́ɔ́ ɓʋ́, bee wɩ́ɛ́ hɩ̃wɩ́ɩ́ nɛ́ ʋ a ɛ́ Ɩzɩrayɛl wuu mí. Ʋ fa há mɩ́nʋ́ áná jaa mɛ́, a wɩ bála jɛ́ɛ́, ká pɩ́pɛ́ báála. Ʋ mɔhɔ̃́ rɩ́ɩ́wa lɩ́sɛ wɩ́bɔmɔ tá nɛ́ ɩ́ sɩɛrʋ. 22 Rɩ báálɔ nɛ́ kenú nɔ́ŋɔ háálɔ pɛ́ rɩ́ɩ́wa kánʋ́, ʋ mɔhɔ̃́ rɩ́wɔ́ ɓʋ́ báálɔ ná arɩ́ háálɔ ná wuu ní. Ʋ mɔhɔ̃́ rɩ́ɩ́wa lɩ́sɛ wɩ́bɔmɔ tá nɛ́ Ɩzɩrayɛl tíé mí. 23 Rɩ nɛrɔ nɛ́ cɔ́ toló rʋ́ʋ́ ja, rɩ́ bál nɔ́ŋ cémú kánʋ́ pɛ́ tɔ́ɔ́ ná sɩɛrʋ, 24 ʋ mɔhɔ̃́ rɩ́wɔ́ ka báálɔ ná há kenú pɛ́ arɩ́ toló ná wuu a lɩ́wɔ́ tɔ́ɔ́ dánnʋɔ mɛ́, a yósíwó ɓʋ́ arɩ́ dɔ́wʋ́ɔ́; bee wɩ́ɛ́ tɔ́ɔ́ sɩɛrʋ nɛ́, ká toló ná vɛ rʋ́ʋ́ ŋmɔwɛ búŋse, rɩ́wɔ́ lɔ́ʋ́ tá. Báálɔ ná má mɔhɔ̃́ rʋ́ʋ́ sʋwɛ nɛ́, bee wɩ́ɛ́ nɛrɔ háálɔ nɛ́ ʋ kaa pɛ́. Ʋ mɔhɔ̃́ rɩ́ɩ́wa lɩ́sɛ wɩ́bɔmɔ tá nɛ́ ɩ́ sɩɛrʋ. 25 Rɩ bál rɛ́ céŋ toló nɛrɔ há cɔ́ɛ́ rɩ́wɔ́ já gɩr mɛ́, a cíkú, báálɔ ná dʋŋɔ nɛ́ mɔhɛ̃́ rɩ́wɔ́ ɓʋ́. 26 Ʋ wɩ mɔhɛ̃́ rɩ́wɔ́ a toló ná wɩ́ɩ́ wuu, bee wɩ́ɛ́ ʋ wɩ wɩ́ɩ́ wuu ɛ́ɛ́ zɔkɛ há mɔhɛ̃́ rɩ́wɔ́ ɓʋ́ʋ́. Wɩ́ɩ́ né nɩhɩ̃́ nɛrɔ há mʋ́ɛ́ cíkú maábinɔ́ŋɔ a ɓʋ́ nɛ́. 27 Báálɔ ná há cíkí toló ná nɛrɔ há cɔ́ɛ́ rʋ́ʋ́ ja, ʋ sɩ́ wólli ŋmɔwɛ búŋse dɩhɩ̃́ ná, ká nɛ́ŋ wuu toó rʋ́ʋ́ lɔ́ʋ́ tá.
28 Rɩ bál rɛ́ ná hápírmi, bál ha há wɩ cɔ́ɛ́, a cíkú, rɩ ɓa nɛ́ kéŋwó,
29 báálɔ ná mɔhɔ̃́ rʋ́ʋ́ túŋ wárɛ mɛɛ́sɛllɛ arɩ́ fí ní a pá toló ná áná. Ʋ mɔhɔ̃́ rʋ́ʋ́ ja toló ná, bee wɩ́ɛ́ ʋ nɛ́ zɔ́kʋ́. Ʋ mɩɩsɛ wuu mí ʋ wɩ sɩ́ wólli vɛ toló ná.