Sʋ́ʋ́ ná ɓa há wʋ́ʋ́ ɓʋʋrɔ́ ɛ̃́ wɩ́ɛ́
21
1 Tíé ná Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa rʋ́ʋ́ ɛ́ɩ́wa óŋ sɩɛrʋ, rɩɩ́wa nɛ́ ná nɛrɔ rʋʋ sʋ́wɔ́ pɛ́ baka mɛ́, ká ɩ́ wɩ nɛrɔ ná há ɓʋ́ʋ́ ɛ̃́, 2 ɩ́ nɩhɩɛ̃́sɛ, arɩ́rɩ́wa sarɩ́yadííre mɔhɔ̃́ rɩ́wɔ́ mʋ́ sʋʋ ná dɩpɩnɛ, a máŋsʋ́ dɩpɩnɛ ná arɩ́ tɔ́nɛ ná há kílú pɛ́kɛ ból. 3 Tɔ́ɔ́ ná rɩ́ lɛ́l ná dɩpɩnɛ há ká tɛ́sɩ́ɩ́, ɓa nɩhɩɛ̃́sɛ sɩ́ ka nɔbɩra ná ɓa há wɩ kene tʋŋ kɩɛsɛ, a wɩ daa báásɛ́ tʋŋ ná; 4 ɓa sɩ́ kánʋ́ tuwi fonaa ná há kéŋ nyii háá palɛ́ tɛ́ŋ wuu mí, ká ɓa ha wɩ ɛ́ dɩhɩ̃́ párɛ́ a du ɓɩ́ɛ́ kɩɛsɛ ná, a ŋmɔwɛ lime céŋŋi. 5 Levi duo ná há ká Wɩɩsɛ vʋk'ɔɔsá, ɓa mɔhɔ̃́ rɩ́wɔ́ mɩŋ ráŋ, bee wɩ́ɛ́ ɓa nɛ́ Nyuutɩna Wɩɩsɛ, ɩ́ Wɩɩsɛ lɩ́sɛ rɩ́wɔ́ tʋ́tʋ́mʋ́ tʋtʋmɛ́, ká sʋl Wɩɩsɛ pɩ́pɛ́ɩ́wa, aá ɔ́sɩ́ɩ́wa pɛ́kɛ wɩ́zʋ́llɛ wuu, rɩ nɩɛ nɩ́ɩ́ ná náŋá, aá ŋmɔ́sɛ náŋá aá bʋrmɛ́. 6 Sʋʋ ná há pɩ́nɛ́ a lɛ́l tɔ́ɔ́ ná, ʋ nɩhɩɛ̃́sɛ ná wuu sɩ́ kol fuo ná nyii sɛ́sɩ́wɔ́ nɛ́ŋsa a hé nɔbɩra ná ɓa há ŋmɔ́wɛ lime céŋŋi mí, 7 ká sɩ́ɛ́ bʋlɛ́: «Á raá wɩ báálɔ́ né ɓʋ́ɛ́, á wɩ nɛrɔ ná há ɓʋ́ʋ́ má ɛ̃. 8 Nyuutɩna Wɩɩsɛ, pi wɩ́bɔmɔ né a cɛ́ɩ́ nɩɛ, Ɩzɩrayɛl jamáŋ, nɩɛ ná ɩ há kené lɛ Ezipiti tíé mí, ká sɩ́ ló ráá la zɔ́krʋ a tɩŋ báálɔ́ né há wɩ wɩ́ɩ́ ɛ̃ sʋʋ mʋ́bʋɔ mɛ́.» Rɩɩ́wa nɛ́ á ɛ́, ʋ sɩ́ pii cɛ́ɩ́wa. 9 Ɩ́ ɔ́ʋ́ ná há cɛ́rɛ Nyuutɩna Wɩɩsɛ sɩ́ɛ́ mɛ́, a mʋ́ʋ́rɛ nɛ́ŋ ná há wɩ wɩ́ɩ́ zɔkɛ́ cɛ́l.Lal(haala) yoháala jɛɛ wɩ́ɛ́
10 Rɩ lal nɛ́ ísé ɩ́ rɩ́rɩ́wa dɩŋdɔma pɛ́kɛ, rɩ́ɩ́wa Nyuutɩna Wɩɩsɛ pɛ́ɩ́wa mɛ́ rɩ́ɩ́wa yoo díwó ká kɛ́sɩ́wɔ́ náŋá rɩ́wɔ́ a yosi, 11 rɩ háwérí rí mɩ́ŋwɔ́ sɩɛrʋ, rɩ́ɩ́wa oro nóú, a cólli rʋ́ʋ́ ja, 12 ʋ sɩ́ ka háálɔ ná mʋ́ʋ́ jaa rʋ́ʋ́ píérú nyúú a kɩ́ɛ́rʋ́ nenídafɩllɛ, 13 ká wurki gɛnnɛ ná ʋ fa há súé ká ɩ́ yoo kánʋ́, ká sɩ́ɛ́ su gɛhúónni. Ʋ sɩ́ lo rʋ́ʋ́ mɩ́nʋ́ jaa mɛ́, a wúú áná rɩ́rʋ́ maá yúó caŋpírmi, ɛ́ har mɛ́, ʋ sɩ́ wóllú ja. 14 Rʋʋ nɛ́ kúé mɔ tɛ́ŋ nɔ́ŋɔ mɛ́, rʋʋ báá wʋ́ʋ́ có, ʋ sɩ́ lo rʋ́ʋ́ mʋ́ dɩhɩ̃́ ná wuu ʋ háá jɛɛ́. Ʋ taŋa wɩ mɔhɛ̃́ rʋ́ʋ́ púú yɛ́llɛ, a sʋ́ʋ́ píí makɛ yómo má, bee wɩ́ɛ́ ʋ jɔ́ʋ́ kɩɛsɛ.
Heŋbólhɔ̃́ (bihɔ̃́) ker wɩ́ɛ́
15 Rɩ bál rɛ́ kéŋ háála bɛllɛ, a cólli nɔ́ŋɔ kɩ́llɛ nɔ́ŋɔ, rɩ́ háála ná bɛllɛ wuu lʋl heŋbólli, rɩ háálɔ ná ʋ há wʋ́ʋ́ có heŋbóle ní kɔ́ʋ́ bihɔ̃́, 16 rʋʋ kúó aá ja rʋ́ʋ́ kánʋ́ liwe ɓɔ́ʋ́ bɛlɛ ná, ʋ wɩ mɔhɛ̃́ rʋ́ʋ́ púú bihɔ̃́ ná ker pɔ́ʋ́ hácólli bio, ká vɔŋ háálɔ ná ʋ há wʋ́ʋ́ có bio. 17 Ʋ mɔhɔ̃́ rʋ́ʋ́ ka ɓɩɛ ná ɓa rɩ́ nɔhɔ̃́ ɓɩɛ kɩ́llɛ ɓɩwie ɓɩɛ naasɩ́ bʋllɛ. Ɛ́ bio nɛ́ kɔ́ʋ́ dóé mí bio, ʋ mɔhɔ̃́ rʋ́ʋ́ la bihɔ̃́ ker ní.
Heŋbólnyúdotɩɩnɔ(binyudotɩɩnɔ tʋrɛ́ wɩ́ɛ́
18 Rɩ báálɔ rɩ́rʋ́ háálɔ nɛ́ kéŋwó bíí, rɩ́ ɛ́ bio ka nyúduo a wʋ́ɔ́ nʋɔ́ wɩ́ɛ́ nɛ, rɩ́wɔ́ mákʋ́ a bɔl, 19 ʋ áná rɩ́rʋ́ maá mɔhɔ̃́ rɩ́wɔ́ ka ɛ́ bio, a kánʋ́ mʋ́wɔ́ tɔ́ɔ́ nɩhɩɛ̃́sɛ sɩ́ɛ́ nɛ́, tɔ́ɔ́ ná dánnʋɔ mɛ́. 20 Ká sɩɛ́ bʋl pá tɔɔ ná nɩhɩɛ̃́sɛ a bʋlɛ́: «Á bio né ká nyúdotɩ́ɩ́nɔ nɛ́, ʋ wɩ́rá nʋɔ wɩ́ɛ́ nɛ, ʋʋ́ zɔkɛ meéwíé, ká a sɩnyɔ́r má.» 21 Tɔ́ɔ́ ná báála wuu mɔhɔ̃́ rɩ́wɔ́ yosú rɩ́ dɔ́wʋ́ɔ́ nɛ́ a ɓʋ́, a lɩ́sɛ wɩ́bɔmɔ ná tá ɩ́ sɩɛrʋ. Ɩzɩrayɛl jamáŋ wuu sɩ́ nɛ ɛ wɩ́ɩ́, rɩ́ héwíŋ káŋwɔ́.
Zúgleŋ sʋwɛ wɩ́ɛ́
22 Rɩ nɛrɔ nɛ́ cáásɛ́ a wɩ́bɔmɔ rɩ́ɩ́wa kánʋ́ yo zúkleŋ tuu mí, 23 ʋ wɩ mɔhɛ̃́ rɩ́ɩ́wa lo rʋ́ʋ́ cɛ́ ráŋ pʋl tɔ́ɔ́. Ʋ mɔhɔ̃́ rɩ́ɩ́wa húú ɛ́ tápʋl tɩɩ tɩɩ nɛ́, bee wɩ́ɛ́ zúkléŋ sʋwɛ duo wuu pɔsɛ Wɩɩsɛ bʋra nɛ́ aá hé tíé mí. Ʋ wɩ mɔhɛ̃́ rɩ́ɩ́wa lo rɩ́ busunnu hé tíé ná Nyuutɩna Wɩɩsɛ, ɩ́ Wɩɩsɛ há píé pɛ́ɩ́wa rʋ́ʋ́ ɛ́ɩ́wa óŋ mí.