Kɩma pii cɛ́ɛ́ bɩna wɩ́ɛ́
15
1 Rɩ nɛrɔ wuu ní pí ɓɩɛ rɩ́ kɩ́mɩ́ nɔ́ŋɔ, rɩ bɩŋsɛ balpɛ wuu nɛ́ césé, ʋ mɔhɔ̃́ rʋ́ʋ́ giri kɩma tá. 2 Nyɛ nɛ́ mɔhɛ̃́ rɩ́ɩ́wa ɩ́'a: Rɩ Ɩzɩrayɛl duo nɛrɔ nɛ́ pí ɓɩɛ rɩ́ɩ́ kɩ́mʋ́ nɔ́ŋɔ, ʋ báá sɩ́ bɔ́sɛ́ la, bee wɩ́ɛ́, Nyuutɩna Wɩɩsɛ há sɛ́ rɩ́wɔ́ giri kɩma tá péró. Ɩ́ tʋŋ ɛ́ Nyuutɩna Wɩɩsɛ yɩr mɛ́. 3 Ɩ́ sɩ́ wólli bɔsɛ lɛ́ɩ́wa kɩma nɩhʋɔra rɩ́, amá ɩ́ maábináŋa é rɩ́, ɩ́ giri tá.4 Nɛrɔ wuu wɩ mɔhɛ̃́ rʋ́ʋ́ a súmmú ɩ́ sɩɛrʋ, bee wɩ́ɛ́ tíé ná Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa rʋ́ʋ́ ɛ́ɩ́wa óŋ, ʋ sɩ hé barka pɛ́ɩ́wa wérí ráŋ, 5 rɩɩ́wa nɛ́ sáŋ Nyuutɩna Wɩɩsɛ, ɩ́ Wɩɩsɛ nʋɔ, a tɩŋ kíŋse ná wuu ʋ há bílé, ŋ pii mákɩ́wa zaa. 6 Ɛ́ é, Nyuutɩna Wɩɩsɛ, ɩ́ Wɩɩsɛ sɩ hé barka kɩ́ŋkáŋ a pɛ́ɩ́wa, anɛ ɛ́ ʋ há tá nʋɔ pɛ́ɩ́wa. Dukana sɩ́ dí kɩma ɩ́ dɩhɩ̃́, amá ɩ́ é wɩ sɩ́ dí kɩŋ ɓa oro wuu dɩhɩ̃́. Duó oro wuu waá a rʋ́ʋ́ dí dóé ɩ́ nyúú, amá ɩ́ é sɩ́ kɩ́llɩ́wɔ́.
7 Rɩɩ́wa nɛ́ mʋ́ tɔ́ɔ́ ná Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa, rɩ summo mɩ́nɩ́wa maábináŋa ná sɩɛrʋ tɔ́nɛ ná oro wuu mí, ɩ́ sɩ́ sahɔɔ á rɩ́ɩ́ vɔ́ʋ́ tá. 8 Ɩ́ pi ɓɩɛ ná wuu ʋ háá jɛɛ́ a kɩ́mʋ́ rɩ́ satɔrɔ́. 9 Rɩ bɩŋsɛ balpɛ ná mɛ́ ɩ́ há sɩ́ giri kɩma tá nɛ́ péré má, ká rɩ́ɩ́wa maábináŋa ná oro nɛ́sɛ muri, rʋ́ʋ́ jɩ́ja rʋ́ʋ́ kɩŋ óŋ ɩ́ dɩhɩ̃́, ɩ́ sɩ́ sahɔɔ á rɩ́ɩ́ vɔ́mʋ́. Rɩɩ nɛ́ vɔ́mʋ́ rʋ́ʋ́ wii pá Nyuutɩna Wɩɩsɛ, ɩ sɩ́ la zɔ́krʋ Nyuutɩna Wɩɩsɛ rɩ́. 10 Sɩ́ wɩ́ɛ́ ŋmúrmú, ká é ha sáŋʋ́ mɛ́ weri arírʋ́ watɔrɔ́ sáŋʋ́ mɛ́ arɩ́ satɔrɔ́. Rɩɩ́wa nɛ́ á ɛ́ Nyuutɩna Wɩɩsɛ, ɩ́ Wɩɩsɛ sɩ́ pɛ́ɩ́wa mɛ́, tʋtʋmɩ́ ná wuu ɩ́ há sɩ́ tʋŋ, ɩ́ nɛ́sɛ sɩ́ sú. 11 Tɛ́ŋ é wuu mí, nɩyaara sɩ́ mɩ́nɩ́wa tɔ́ɔ́ mɛ́, ɛ́ wɩ́ɛ́ ŋ bʋ́lɔ́ aá pɛ́ɩ́wa, ɩ́ pɛ́ɩ́wa maábináŋa summe mí arɩ́ nɩyaara ná há mɩ́nɩ́wa sɩɛrʋ, arɩ́ sabalá.
Yósi pii tɛ́ɛ́ wɩ́ɛ́
12 Rɩɩ́wa Ɩbirewa nɩɛ sɩɛrʋ bál ɛ́ raá má hál rɩ́ púú tɩɩ rɩ́ yɛ́llɩ́ pɛ́ɩ́wa nɔ́ŋɔ, rɩ́ɩ́ a yómó, rʋʋ nɛ́ tʋ́ŋ tʋtʋmɛ́ pɛ́ɩ́ bɩŋsɛ balgo, bɩŋsɛ balpɛ nyúú mí, ʋ mɔhɔ̃́ rɩ́ɩ́ púú tá nɛ́. 13 Rɩɩ nɛ́ tɔ́ʋ́, ɩ sɩ́ ló rʋ́ʋ́ col arɩ́ náwuoli. 14 Lɩ́sɛ ɓɩɛ ná náŋa Nyuutɩna Wɩɩsɛ, ɩ Wɩɩsɛ há pɛ́ɩ́ mɛ́ ɩ ná, a pɔ́ʋ́ rɩ́ satɔrɔ́, pʋwɩɛla, pieŋse, oŋparɛ́ arɩ́ dɩvɛ́ŋ. 15 Ɩ́ zɩŋ rɩɩ́wa má tɩɩ fa ká yósi ní Ezipiti tíé mí, Nyuutɩna Wɩɩsɛ, ɩ́ Wɩɩsɛ lɛ́ɩ́wa tá. Ɛ́ nɛ́ tɛ ŋ zaa pi nyɛ makɛ pɛ́ɩ́wa rɩ́ɩ́wa tɩ́tɩŋ. 16 Amá rɩɩ tʋtʋnnɔ ná nɛ́ bʋlɛ́ pɛ́ɩ́ rʋ́ʋ́ waá col, ʋ há cóí rɩ́rɩ́ jaa nɩɛ wɩ́ɛ́, ká nɩna wer má ɩ dɩhɩ̃́, 17 kánʋ́ dɩllɛ mʋ́ ɓarɛ boro mí, ká pi lúre cɔ́kɛ lúri, a makɛ rʋʋ ɛ́ɩ́ tʋtʋnnɔ a kaá mʋ́ wuu. Rɩ tʋtʋnnɔ ná nɛ́ ká hál má, ɛ́ tɩɩ nɛ́ ɩ sɩ́ ɔ́ʋ́. 18 Sɩ́ ló rɩ́ɩ́ sɩɛrʋ zɔkɛ, rɩɩ yomo ná nɩ́ɩ́ já rʋ́ʋ́ col, a tɩŋʋ́ há tʋ́ŋ bɩŋsɛ nyáŋ balgo a pɛ́ɩ́. Beé wɩ́ɛ́ ʋ tʋtʋmɛ́ púló, a kɩ́llɛ nɛrɔ ná ɩ fa háá á rɩ́ɩ́ pi rʋ́ʋ́ tʋŋ ká rɩ́ɩ́ tútúmú naasɩ́ bʋllɛ wɩ́ɛ́. Rɩɩ nɛ́ wɩ lóé rɩ́ɩ́ sɩɛrʋ zɔkɛ, Nyuutɩna Wɩɩsɛ, ɩ Wɩɩsɛ sɩ́ pɛ́ɩ́ mɛ́, ɩ wɩ́'állɛ wuu mí.
Pʋsɛ bidʋʋnɛwa wɩ́ɛ́
19 Ɩ́ pííwa pʋzeŋsi rɩ́rɩ́wa pʋwɩɛla bidʋʋnɛwa ná há ká wala, a ɓʋ́ pá Nyuutɩna Wɩɩsɛ, ɩ́ Wɩɩsɛ. Ká rɩ́ɩ́wa zɩŋ ɓʋ́ pɔ́ʋ́, ɩ́ pɔ́ rɩ́ɩ́wa sɩ́ɩ́wa nɛsɛ dʋ́ŋdʋ́ʋ̃́ bɛlɛ ná káá tʋŋ tʋtʋmɛ́, a pʋ́pɔ́ rɩ́ɩ́wa sɩ́ pieŋse má bidʋʋnɛwa pʋ́sɛ kɛ́. 20 Bɩná é wuu ɩ́ rɩ́rɩ́wa jaa nɩɛ sɩ́ ka pʋsɛ ná mʋ́ Nyuutɩna Wɩɩsɛ, ɩ́ Wɩɩsɛ sɩ́ɛ́, dɩhɩ̃́ ná ʋ há sɩ́ lɩ́sɛ, a ɓʋ́ dí. 21 Amá rɩ pʋsɛ ná oro rí kéŋ kɔsɔ, rʋʋ nyʋ́mmɔ́ nɛ́, ɛ́ raá má rʋʋ gbɛ́rkɔ́ nɛ́, ɛ́ raá má rʋʋ kéŋ dɩwɩbɔ́ŋ nɔ́ŋ rɛ́, ɩ́ wʋ́ʋ́ wuo kaa ko ɓʋ́ aá ɔsɛ vʋk, Nyuutɩna Wɩɩsɛ, ɩ́ Wɩɩsɛ sɩ́ɛ́. 22 Ɩ́ nɩɛ ná há kéŋ busunnu Nyuutɩna Wɩɩsɛ rɩ́, arɩ́ nɩɛ ná há wɩ busunnu kené ʋ rɩ́, ɩ́ wuu sɩ́ wólli ɛ́ pʋsɛ duó mí di ɩ́ tɔ́nɛ mɛ́, anɩ́ɩ́wa há sɩ́ dí aamawa ɛ́ raá má ɓɛɛwa ɛ́. 23 Ɩ́ sɩ́wɔ́ cɛ́l dí, ɩ́ pii bɩ́sɛ tá tíé anɛ nyii.