Pakɛ cana díí wɩ́ɛ́
16
1 Cana ná ɓa háá yɩ́rɛ Abibi sɩɛrʋ, ɩ́ dí Pakɛ cana Nyuutɩna Wɩɩsɛ, ɩ́ Wɩɩsɛ yɩr mɛ́, bee wɩ́ɛ́ ɛ́ cana sɩɛrʋ tɩ́taŋ nɛ́ Nyuutɩna Wɩɩsɛ, ɩ́ Wɩɩsɛ kánɩ́wa lɛ Ezipiti tíé mí. 2 Pʋwie ná ɛ́ raá má pʋzeno ná ɩ́ há sɩ́ ɓʋ́, a ɛ́ɩ́wa Nyuutɩna Wɩɩsɛ, ɩ́ Wɩɩsɛ Pakɛ cana ná ɓɩdííle, ɩ́ kaa mʋ́ dɩhɩ̃́ ná Nyuutɩna Wɩɩsɛ há sɩ́ mákɩ́wa, a ɓʋ́ʋ́ ʋ sɩ́ɛ́. 3 Rɩɩ́wa nɩ́ɩ́ dí cana ná ɓɩdííle, ɩ́ sɩ́ dɩpɛ́ŋ ná há kéŋ sɩbʋ́r dí. Ɩ́ dí dɩpɛ́ŋ ná há wɩ sɩbʋ́r kené ɛ́ tápʋlɛ balpɛ, rʋ́ʋ́ lílíísíwa kɩ́kɛ́lɛ́ ná ɩ́ há kéné ɩ́ há lɛ Ezipiti tíé mí. Ɩ́ hiẽ́só wuu mí, ɩ́ dí ɛ́ wɩɩla dɩpɛ́ŋ, aá líísi tápʋ́l ná ɩ́ há lɩ Ezipiti mí. 4 Ɩ́ sɩ́ ló rɩ́ sɩbʋ́r mʋɔ mɩ́nɩ́wa rɩ́, ɩ́ tɔ́ɔ́ wuu mí, tápʋlɛ balpɛ ná pɛ́kɛ. Ɩ́ pɔ́ rɩ́ pʋsɛ ná ɩ́ há ɓʋ́ɛ́ dʋ́ŋdʋ́ʋ̃́ tápʋl ná gbaanɛ namɩɛ sɩ́ cɩ́nɩ́ cɔ. 5 Tɔ́nɛ ná Nyuutɩna Wɩɩsɛ, ɩ́ Wɩɩsɛ há sɩ pii pɛ́ɩ́wa sɩɛrʋ, ɩ́ sɩ Pakɛ cana pʋna ná ɓʋ́, tɔ́ɔ́ ná wuu mí ɩ́ há có, 6 rɩ dɩhɩ̃́ ná ʋ há sɩ mákɩ́wa rɩ́ɩ́wa mʋ́ a cʋ́cʋ́ɔ́lʋ́ dʋŋɔ rá. Ráŋ nɛ́ ɩ́ sɩ́ ɓʋ́ pʋsɛ ná mumúlízʋʋlɔ́ tɛ́ŋ ná tɩɩ tɩɩ mɛ́, ɩ́ há lɛ́ Ezipiti tíé mí. 7 Ɩ́ cɔ namɩɛ ná a dí dɩhɩ̃́ ná Nyuutɩna Wɩɩsɛ, ɩ́ Wɩɩsɛ há sɩ́ mákɩ́wa. Rɩ tɔ́ɔ́ nɛ́ pʋ́lɛ́ cɩ́cʋɔ, ɩ́ bɩrɛ mʋ́ɩ́wa jɩɩsɛ. 8 Ɩ́ dí dɩpɛ́ŋ ná há wɩ sɩbʋ́r kené tápʋlɛ balgo, amá balpɛ kal ɩ́ sɩ́ tʋtʋmɩ́ wuu tʋ́mʋ́, ɩ́ ciki a dɛnnɛ Nyuutɩna Wɩɩsɛ, ɩ́ Wɩɩsɛ.Ɓɩɛ kʋmɛ́ cana wɩ́ɛ́
9 Ɩ́ pɔ́ tápʋl ná ɩ́ há púlé a kʋ́kʋ́sɩ́wa oŋparɛ́ a dɩɩsɛ yɔɔsɛ balpɛ, 10 ká dí ɓɩɛ kʋmɛ́ cana a pá Nyuutɩna Wɩɩsɛ, ɩ́ Wɩɩsɛ. Nyuutɩna Wɩɩsɛ, ɩ́ Wɩɩsɛ há pɛ́ nɛrɔ wuu mí, ʋ kʋsɛ ɓɩɛ a mɔ ɛ́, ʋ sɩ ká satɔ́ɔ́rɩ́pálɔ ko pɔ́ʋ́. 11 Ɩ́ rɩ́rɩ́wa bɛlɛ, ɩ́ tʋtʋnna, báála arɩ́ háála, Levitiwa ná arɩ́ nɩhʋɔra, bisíŋsi arɩ́ yúháála ná há mɩ́nɩ́wa sɩɛrʋ, ɩ́ wuu mɔhɔ̃́ rɩ́ɩ́wa mʋ́ dɩhɩ̃́ ná Nyuutɩna Wɩɩsɛ, ɩ́ Wɩɩsɛ há sɩ mákɩ́wa, a dí cana ʋ sɩ́ɛ́, a jʋ́ɔ́sɛ. 12 Ɩ́ zɩŋ rɩ́ɩ́wa fa ká yósi ní Ezipiti tíé mí, ɛ́ wɩ́ɛ́ ɩ́ pɔ́rɩ́wa tɩɩ mɛ́, a tɩŋ wɩ́bilé nyáŋ ŋ há mákɩ́wa wérí.
Lɔkɔ cana wɩ́ɛ́
13 Rɩɩ́wa nɛ́ wɔ́wɩ́ɩ́wa oŋparɛ́ tenni, a ɓɔ́rɩ́wa tunɔna, ɩ́ dí lɔkɔ cana tápʋlɛ balpɛ. 14 Ɩ́ rɩ́rɩ́wa bɛlɛ, ɩ́ tʋtʋnna báála arɩ́ háála, Levi duó nɩɛ ná arɩ́ nɩhʋɔra ná, bisíŋsi arɩ́ yúháála ná wuu há mɩ́nɩ́wa sɩɛrʋ, ɩ́ wuu mɔhɔ̃́ rɩ́ɩ́wa dí cana ná arɩ́ satɔrɔ́. 15 Ɩ́ mʋ́ dɩhɩ̃́ ná Nyuutɩna Wɩɩsɛ, ɩ́ Wɩɩsɛ há sɩ́ mákɩ́wa rɩ́ɩ́wa cʋ́cʋ́ɔ́lʋ́, a dí cana ná tápʋlɛ balpɛ, bee wɩ́ɛ́ Nyuutɩna Wɩɩsɛ, ɩ́ Wɩɩsɛ nɛ́ pɛ́ɩ́wa mɛ́, ɩ́ baka ɓɩɛ ɔsɛ, a pɛ́ɩ́wa mɛ́ ɩ́ nɛ́sɛ tʋtʋmɛ́ má wuu mí.
16 Ɛ́ wɩ́ɛ́, bɩná é wuu sɩɛrʋ, Ɩzɩrayɛl nɩɛ báála wuu mɔhɔ̃́ rɩ́ɩ́wa mʋ́ɩ́wa Nyuutɩna Wɩɩsɛ sɩ́ɛ́ naasɩ́ botoro ní, dɩhɩ̃́ ná ʋ há sɩ́ mákɩ́wa rɩ́ɩ́wa cʋ́cʋ́ɔ́lʋ́, a dí caŋsɛ nyáŋ: Pakɛ cana ná, ɓɩɛ kʋmɛ́ cana arɩ́ lɔkɔ cana. Nɛrɔ wuu wɩ mɔhɛ̃́ rʋ́ʋ́ mʋ́ Nyuutɩna Wɩɩsɛ sɩ́ɛ́ arɩ́ náwuoli. 17 Nɛrɔ wuu mɔhɔ̃́ rʋ́ʋ́ ka satɔ́ɔ́rɩ́pálɔ a mʋ́ pá Nyuutɩna Wɩɩsɛ, ɩ́ Wɩɩsɛ a mɔ ɛ́ ʋ há sáŋʋ́ mɛ́.
Sarɩ́yadííre wɩ́ɛ́
18 Tɔ́nɛ ná wuu Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa sɩɛrʋ, jɩmʋ́l wuu mɔhɔ̃́ rʋ́ʋ́ lɩ́sɛ sarɩ́yadííre arɩ́ kɛŋpʋ́ŋsa. Ɓa nɛ́ mɔhɛ̃́ rɩ́wɔ́ la nɩɛ ná wɩ́ɛ́ zɩ́zɩ́ŋ, a tɩ́tɩŋ taŋá. 19 Ɛ́ nɩɛ wɩ mɔhɛ̃́ rɩ́wɔ́ pi taŋá féŋsi, a sɩ́ bʋ́l pɛ́ nɛrɔ mɛ́, rʋʋ ɓɩɛ nɛ́ wɩ weri. Ɓa wɩ mɔhɛ̃́ rɩ́wɔ́ la ɓalɛwa, ɓalɛwa ná nɩ́ɩ́ ɛ́ɛ́ rɩ́ɩ́wɔ́ pi taŋá féŋsi, rʋʋ bɩrmɛ nyɩɛrʋ. 20 Ɩ́ lo rɩ́ taŋá dʋŋɔ nɛ́ lɛ́ɩ́wa wɩ́ɩ́ wuu sɩ́ɛ́, rɩ́ ɛ́ lo rɩ́ɩ́wa ké tíé ná mɛ́ Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa, a tɩ́llʋ́ a kaá mʋ́ wuu.
Ɩ́ sɩ́ venni ɓáárʋ́