13
1 Ɩ́ hé dóé ká tɩŋ kíŋse ná wuu ŋ há mákɩ́wa, ɩ́ pɔ́ rɩ́ɩ́wa sɩ́ wɩ́ɩ́ lɩ́sɩ́ tá, a sɩ́ wɩ́ɩ́ má káá súúri.Ɩ́ sɩ́ véní wuu tɩ́ŋʋ́
2 Rɩ nɛrɔ nɛ́ mɩ́nɩ́wa sɩɛrʋ, a a Wɩɩsɛ wɩ́laabʋ́llʋ́, ɛ́ raá má a wólli duose mʋ́l aá lɩ́sɛ, a bʋl rɩ́ wɩ́nyáŋsɛ ɛ́ raá má wɩ́nyɩnɛ sɩ́ a, 3 rɩ wɩ́nyáŋsɛ ná ɛ́ raá má wɩ́nyɩnɛ ná wɩ́ɛ́ ʋ há bʋlɛ́ nɛ́ ɓɩɛ́na tʋ́mɛ́, ká rʋ́ʋ́ bʋlɛ́: «Ɩ́ lo ráá tɩŋ venni ná ɩ́ há wʋ́ɔ́ ɛ̃ mɛ́,» 4 ɩ́ sʋ́ʋ́ rɩ́ zésú. Nyuutɩna Wɩɩsɛ, ɩ́ Wɩɩsɛ já rʋʋ tɩŋ ɛ́ mɛ́ nɛ́, a mɩ́lɩ́wa a ná, ɩ́ cóú arɩ́rɩ́wa sɩɛrʋ arɩ́rɩ́wa dʋma wuu ní. 5 Nyuutɩna Wɩɩsɛ dʋŋɔ nɛ́ mɔhɛ̃́ rɩ́ɩ́wa tɩ́tɩŋ a zízílú kíŋse. Ɩ́ tɩ́tɩ́ŋʋ́ nʋɔ, a tʋŋ pɩ́pɔ́ʋ́, a kánɩ́wa tɩɩ cɔ́ʋ́ mɛ́ wérí. 6 Ɛ́ wɩ́laabʋlla duo, ɛ́ raá má nɛrɔ ná háá lɩ́sɛ duose mʋ́l, ʋ mɔhɔ̃́ rɩ́ɩ́wa ɓʋ́ʋ́, bee wɩ́ɛ́, wɩ́ɛ́ ná ʋ há bʋlɛ́, ɓa lɛ́ wɩ́ɛ́ ná Nyuutɩna Wɩɩsɛ, ɩ́ Wɩɩsɛ há mákɛ́ har nɛ́, Wɩɩsɛ ná há keníwa lɛ Ezipiti tíé ko lɛ, dɩhɩ̃́ ná ɩ́ fa há mɩnɛ́, a a yósi. Nyɛ nɛrɔ duo faá wɔ́lmʋ́ rʋ́ʋ́ lɩ́sɩ́wa ŋmɛ́nɔ ná mɛ́, Nyuutɩna Wɩɩsɛ, ɩ́ Wɩɩsɛ há mákɩ́wa nɛ́. Ɩ́ ɓʋ́ ɛ́ nɛrɔ, a lɩ́sɛ wɩ́bɔmɔ ná tá ɩ́ sɩɛrʋ.
7 Rɩɩ maábio tɩɩ, ɛ́ raá má ɩ bio, ɛ́ raá má ɩ toló, ɛ́ raá má ɩ hácólli, ɛ́ raá má ɩ naŋnɔ́ŋfɩɛmɔ nɛ́ lʋ́ɔ́rɛ́ nyɩ́sɩ́ a bʋlɛ́: «Lo ráá mʋ́ a tɩ́tɩŋ venni», ɩ sʋ́ʋ́ rɩ́ zesú. Beé wɩ́ɛ́, ɩ rɩ́rɩ́ɩ́wa ánáwa oro wuu há wʋ́ɔ́ tɩŋɛ ná. 8 Rɩ nɩɛ ná há kéné kílíwa venni ní, rɩ́ nɩɛ ná há ɓárɩ́wa nɛ́, ɛ́ raá má rɩ ɓa mɩŋ dɩbólí ní, 9 ɩ sʋ́ʋ́ rɩ́ zésú, sɩ́ sáŋ pɔ́ʋ́, a sʋ́ʋ́ susu fá, rɩ́ɩ́ bʋ́l lɔ́ʋ́ wɩ́ɩ́ ná mɛ́. 10 Ʋ mɔhɔ̃́ rɩ́ɩ́ ɓʋ́ʋ́ nɛ́. Ɩ nɛ́ mɔhɛ̃́ rɩ́ɩ́ la sɩ́ɛ́ yákʋ́ arɩ́ dɔ́wɩ́ ká rɩ́ nɩɛ sɩɛ́ ko súúri. 11 Ɩ́ yákʋ́ ɓʋ́ arɩ́ dɔ́wʋ́ɔ́, bee wɩ́ɛ́ ʋʋ́ wɔ́lmʋ́ rɩ́ɩ́wa vɛ Nyuutɩna Wɩɩsɛ, ɩ́ Wɩɩsɛ nʋɔ nɛ́, Wɩɩsɛ ná há keníwa lɛ Ezipiti tíé mí, dɩhɩ̃́ ná ɩ́ fa há mɩnɛ́ a a yósi. 12 Rɩɩ́wa nɛ́ ɓʋ́ tɩ́na ná rɩ́ Ɩzɩrayɛl jamáŋ wuu nɛ, héwíŋ sɩ́ káŋwɔ́. Ɓa oro wuu cíé báá wɩ wɩ́bɔmɔ né duó a.
13 Rɩɩ́wa nɛ́ ké tɔ́nɛ ná mɛ́ Nyuutɩna Wɩɩsɛ, ɩ́ Wɩɩsɛ há píé pɛ́ɩ́wa, ká nɛ, 14 rɩ́ nɩbɔmɔ lɩ́ɩ́wa sɩɛrʋ, a nyɩsɛ nɩɛ rɩ́wɔ́ mʋ́ tɩŋ venni, venni ná ɩ́ rɩ́rɩ́wa ánáwa ha há wɩ ɓáárɛ́ ná; 15 ɩ́ hé dóé ká bel wɩ́ɩ́ ná sɩɛrʋ wérí a ná. Rɩɩ́wa nɛ́ kúé ná rɩ wɩ́lɔrɛ́ nyáŋ sɩ́sɛ́nyɛ ká wɩtáŋsɛ, 16 ɩ́ ɓʋ́ʋ́sɛ tɔ́ɔ́ ná nɩɛ wuu, a ɓʋ́ʋ́sɩ́wɔ́ pʋsɛ wuu, ká zɔkɛ tɔ́ɔ́ ná tɩɩ arɩ́rʋ́ ɓɩɛ́ wuu ɓóŋ. 17 Ɩ́ pa tɔ́ɔ́ ná tɩ́náwa ɓɩɛ wuu a kaa mʋ́ bil tɔ́ɔ́ ná sɩ́sɩ́ɛ́nnʋ́wa, a nyɩ́kwɔ́ wuu rɩ́wɔ́ dí físi, a pá Nyuutɩna Wɩɩsɛ, ɩ́ Wɩɩsɛ. Tɔ́ɔ́ ná mɔhɔ̃́ rʋ́ʋ́ a tɔ́ɓoo ní, a kaá mʋ́ wuu, ɓa waá bɩrsɔ́. 18 Ɩ́ pɔ́, ɩ́ sɩ́ tɔ́ɔ́ ná óŋ wuu Nyuutɩna Wɩɩsɛ há sɛ́ rɩ́ɩ́wa zɔkɛ pí, a makɛ rɩ́ɩ́wa Nyuutɩna Wɩɩsɛ cɔwɩɩlɩ́zeno ná ʋ háá dííwa nyúú, rʋ́ʋ́ pɔrɛ. Ɛ́ é, Nyuutɩna Wɩɩsɛ, ɩ́ Wɩɩsɛ sɩ́ fɛ́ɩ́wa susu a lo rɩ́ɩ́wa pul, anɛ ʋ há tá nʋɔ a pɛ́ɩ́wa naabálwa ɛ́, 19 bee wɩ́ɛ́ ɩ́ tɩ́ŋ Nyuutɩna Wɩɩsɛ, ɩ́ Wɩɩsɛ kíŋse ná wuu, ŋ há mákɩ́wa zaa nɛ́, a a wɩ́ɛ́ ná háá tɔ́rʋ́ sɩɛrʋ.