Kíŋse 12

NYUUTƖNA WƖƖSƐ WƖBILE WƖƐ

12-26

1 Wɩ́bilé nyáŋ arɩ́ wɩ́makɛ́ nyáŋ nɛ́ mɔhɛ̃́ rɩ́ɩ́wa pɔ́rɩ́wa tɩɩ mɛ́ a tɩ́tɩŋ, tɛ́ŋ ná wuu mí ɩ́ há sɩ́ ké tíé ná mɛ́, Nyuutɩna Wɩɩsɛ, ɩ́ ánáwa Wɩɩsɛ há píé aá pɛ́ɩ́wa rɩɩ́wa tɩ́llʋ́.

Dɩhɩ̃́ ná balá há mɔhɛ̃́ rɩ́wɔ́ cʋɔlɛ Nyuutɩna Wɩɩsɛ

2 Duowa ná wuu ɩ́ há sɩ yoo dí, ɩ́ zɔ́kwɔ́ vʋka dɩ'ɔsɛ́ ná wuu ɓóŋ, onni ná há mɩŋ pallɛ nyunni rɩ́ dúŋdúóme arɩ́ tuuni mʋ́ʋ́la. 3 Ɩ́ yɛ́rkɩ́wɔ́ korsi arɩ́wɔ́ venni dɔ́wʋ́ɔ́, ká nyɩ́kwɔ́ venni ná, ɓa háá yɩ́rɛ Asera daasɛ. Ɩ́ zɔ́kwɔ́ veŋgúlli wuu, a a rɩ́wɔ́ yɩra yʋ́ksɛ dɩhɛ̃́ ná. 4 Ɩ́ pɔ́ rɩ́ɩ́wa sɩ ɛ́ nɩɛ há tɩ́ŋ ɛ́, aá ɓáárɩ́wɔ́ venni césú, rɩ́ɩ́ ɓáárɩ́wa Nyuutɩna Wɩɩsɛ, ɩ́ Wɩɩsɛ. 5 Amá, Nyuutɩna Wɩɩsɛ, ɩ́ Wɩɩsɛ sɩ́ lɩ́sɛ dɩhɩ̃́, ɩ́ jɩmʋ́ʋ́la sɩɛrʋ, a mɩŋ ráŋ. Ráŋ nɛ́ rɩ́ɩ́wa mʋ́ aá cʋɔlʋ́. 6 Ráŋ nɛ́ ɩ́ sɩ́ mʋ́ ʋ́'ɔ́sɩ́wa vʋkfíse rɩ́ tɛŋfɩ́ɛ́l vʋka. Ɩ́ sɩ́ kánɩ́wa oŋparɛ fí nyúú kere, ɩ́ pállɛ, ɩ́ satɔ́ɔ́rɩ́pállɛ, ɛ́ raá má nʋlɩ́sɔ ɓɩɛ má wuú mʋ́ ráŋ. Ɩ́ pʋzeŋsi rɩ́rɩ́wa pʋwɩɛla bidʋʋnɛwa máá mʋ́ ráŋ nɛ́. 7 Ráŋ nɛ́ ɩ́ rɩ́rɩ́wa jaa nɩɛ sɩ dí ɛ́ ɓɩɛ́ Nyuutɩna Wɩɩsɛ ɩ́ Wɩɩsɛ sɩ́ɛ́. Ká jʋɔsɛ ɓɩɛ ná wuu ɩ́ há kené wɩ́ɛ́, bee wɩ́ɛ́ Nyuutɩna Wɩɩsɛ, ɩ́ Wɩɩsɛ nɛ́ pɛ́ɩ́wa mɛ́, ɩ́ nówó.

8 Rɩɩ́wa peri ráŋ, ɩ́ wɩ mɔhɛ̃́ rɩɩ́wa ɓaarɛ Nyuutɩna Wɩɩsɛ, anɛ ɛ́ á zaa háá ɛ́ɛ́. Rɛ́ɛ́wa, nɛrɔ wuu ɔ́ʋ́ ná ʋ há có. 9 Ɩ́ ha wɩ tíé ná péré, dɩhɩ̃́ ná ɩ́ há sɩ́ zʋ a ná fɩɛla, ká la ɓɩɛ ná Nyuutɩna Wɩɩsɛ, ɩ́ Wɩɩsɛ há sɩ́ pɛ́ɩ́wa. 10 Amá ɩ́ sɩ cáŋ Zʋrdɛŋ fuo ná lɛ. Nyuutɩna Wɩɩsɛ, ɩ́ Wɩɩsɛ sɩ́ a rɩ́ɩ́wa zʋ tɔ́ɔ́ ná, a ké ráŋ, a tɩ́llʋ́. Rɩɩ́wa nɛ́ zʋ́ɛ́, ʋ sɩ́ lɛ́ɩ́wa tá, ɩ́ dɩŋdɔma ná nɛ́sɛ mɛ́, ká rɩ́ɩ́wa ké ráŋ arɩ́ tɛŋfɩ́ɛ́l. 11 Rɩ Nyuutɩna Wɩɩsɛ, ɩ́ Wɩɩsɛ nɛ́ lɩ́sɛ dɩhɩ̃́ ná ʋ háá jɛɛ́ rɩ́ɩ́wa cʋ́cʋ́ɔ́lʋ́, ráŋ nɛ́ rɩ́ɩ́wa ka onni ná wuu ŋ há mákɛ́ pɛ́ɩ́wa kaa mʋ́: ɩ́ vʋ́k'fisé, ɩ́ tɛŋfɩ́ɛ́l vʋka, oŋparɛ́ fí nyúú kere, ɩ́ satɔ́ɔ́rɩ́pállɛ, arɩ́ óŋ ná wuu ɩ́ há bɩ́ɩ́nɛ́ rɩ́ɩ́wa kaa ko lɩ́sɛ nʋʋsɛ ná, ɩ́ há tɛ́ɩ́wa Nyuutɩna Wɩɩsɛ rɩ́. 12 Ráŋ nɛ́ ɩ́ sɩ́ dí cana ɩ́ Nyuutɩna Wɩɩsɛ, ɩ́ Wɩɩsɛ sɩ́ɛ́. Ɩ́ rɩ́rɩ́wa bɛlɛ rɩ́rɩ́wa jaa tʋtʋnna báála rɩ́ tolé arɩ́ Levi duo nɩɛ ná há mɩ́nɩ́wa tɔ́nɛ mɛ́; bee wɩ́ɛ́ ɓa wɩ tíé ɓaalɛ kené ɩ́ sɩɛrʋ.

13 Ɩ́ pɔ́ rɩ́ɩ́wa sɩ́ɩ́wa vʋka ɔ́sʋ́ dɩhɩ̃́ ná wuu ɩ́ há néé. 14 Ɩ́ ɔ́sɩ́wa vʋka wuu dɩbalá, dɩhɩ̃́ ná Nyuutɩna Wɩɩsɛ há sɩ́ lɩ́sɩ́wa duo nɩɛ jɩmʋ́ʋ́la nɔ́ŋɔ sɩɛrʋ. Ráŋ nɛ́ mɔhɛ̃́ rɩ́ɩ́wa ɩ́'a wɩ́ɛ́ nyáŋ wuu ŋ há mákɩ́wa. 15 Amá dɩhɩ̃́ ná wuu ɩ́ há mɩnɛ́, ɩ́ sɩ́ wólli ɓʋ́ pʋsɛ ná Nyuutɩna Wɩɩsɛ, ɩ́ Wɩɩsɛ há pɛ́ɩ́wa mɛ́ ɩ́ ná, a dí namɩɛ mɔ ɛ́ wuu ɩ́ háá jɛɛ́. Nɩɛ ná há kéŋ busunnu arɩ́ nɩɛ ná há wɩ busunnu kené Nyuutɩna Wɩɩsɛ rɩ́, ɓa wuu sɩ́ wólli dí, anɛ baka namɩŋsa ná ɩ́ háá díé. 16 Amá ɩ́ sɩ́ pʋsɛ ná cɛ́l dí, ɩ́ cákwɔ́ wuu tá tíé anɛ nyii.

17 Ɩ́ ɓɩɛ fí nyúú kere, anɛ ɩ́ bile, ɩ́ tunɔnɔ, ɩ́ pʋzeŋsi rɩ́rɩ́wa pʋwɩɛla bidʋʋnɛwa, ɩ́ satɔ́ɔ́rɩ́pallɛ, ɩ́ nʋlɩ́sɛ onni, ɩ́ wɩ mɔhɛ̃́ rɩ́ɩ́wa díwó, ɩ́ tɔ́mɩnɛ́ mɛ́. 18 Ʋ mɔhɔ̃́ rɩ́ɩ́wa káŋwɔ́ mʋ́ dɩhɩ̃́ ná Nyuutɩna Wɩɩsɛ, ɩ́ Wɩɩsɛ há sɩ́ lɩ́sɛ rɩ́ɩ́wa mʋ́ a cʋ́cʋ́ɔ́lʋ́ nɛ́, a díwó ʋ sɩ́ɛ́. Ɩ́ rɩ́rɩ́wa bɛlɛ ɩ́ tʋtʋnna báála rɩ́ tole arɩ́ Levi duo nɩɛ ná há mɩ́nɩ́wa tɔ́nɛ mɛ́. Ʋ mɔhɔ̃́ rɩ́ɩ́wa dí cana Nyuutɩna Wɩɩsɛ, ɩ́ Wɩɩsɛ sɩ́ɛ́ bee wɩ́ɛ́ ʋ há pɛ́ɩ́wa mɛ́ ɩ́ tʋtʋmɛ́ wuu mí. 19 Ɩ́ pɔ́, ɩ́ sɩ́ Levi duo nɩɛ ná há mɩ́nɩ́wa tɔ́nɛ mɛ́ wɩ́ɛ́ sʋllʋĺ tá, tɛ́ŋ ná wuu mí ɩ́ há sɩ́ ké tɔ́ɔ́ ná mɛ́.

20 Ɛ́ wɩ́ɛ́, rɩ Nyuutɩna Wɩɩsɛ, ɩ́ Wɩɩsɛ nɛ́ keníwa tíé jɛ́llɛ, anɛ ʋ há tá nʋɔ ɛ́ pɛ́ɩ́wa, rɩ namɩɛ hɩɛ̃ŋ nɛ́ kúó káníwa, ɩ́ dí a mɔ ɛ́ wuu, ɩ́ háá jɛɛ́. 21 Rɩ dɩhɩ̃́ ná Nyuutɩna Wɩɩsɛ, ɩ́ Wɩɩsɛ há lɩ́sɛ́ rɩ́ɩ́wa cʋ́cʋ́ɔ́lʋ́ nɛ́ bolé kɩ́ŋkáŋ arɩ́rɩ́wa jɩɩsɛ, ɩ́ sɩ́ wólli ɓʋ́ pʋsɛ ná Nyuutɩna Wɩɩsɛ há píé pɛ́ɩ́wa, ɩ́ tɔ́nɛ mɛ́, a dí a mɔ ɛ́ wuu ɩ́ háá jɛɛ́, anɛ ɛ́ ŋ há mákɩ́wa. 22 Ɩ́ sɩ́ wólli díwó, anɛ ɩ́ háá dí baka namɩŋsa ɛ́. Nɩɛ ná há kéŋ busunnu Wɩɩsɛ rɩ́, arɩ́ nɩɛ ná há wɩ busunnu kené Wɩɩsɛ rɩ́, ɓa wuu sɩ́ wólli dí. 23 Amá ɩ́ pɔ́ ɩ́ sɩ́ pʋsɛ ná cɛ́l dí, bee wɩ́ɛ́ cɛ́l nɛ́ ká pʋsɛ ná mɩɩsɛ. Ɩ́ sɩɛ́ wɩ mɔhɛ̃́ rɩ́ɩ́wa díwó namɩɛ arɩ́wɔ́ mɩɩsɛ wuu. 24 Ʋ wɩ mɔhɛ̃́ rɩ́ɩ́wa dí cɛ́l ná, ɩ́ pii bɩ́sɛ tá tíé anɛ nyii. 25 Rɩɩ́wa nɛ́ wɩ cɛ́l ná dí, Nyuutɩna Wɩɩsɛ sɩɛrʋ sɩ́ tɔ́rɩ́wa nyúú, rɩ́ wɩ́ɛ́ va wérí a pɛ́ɩ́wa rɩ́rɩ́wa duo nɩɛ wuu.

26 Amá ʋ mɔhɔ̃́ rɩ́ɩ́wa ka onni ná é wuu há ká Nyuutɩna Wɩɩsɛ ɓɩɛ, arɩ́ onni ná wuu ɩ́ há tá nʋɔ rɩ́ɩ́wa pii pɔ́ʋ́ a mʋ́ dɩhɩ̃́ ná, ʋ há sɩ́ lɩ́sɛ rɩ́ɩ́wa cʋ́cʋ́ɔ́lʋ́ ráŋ nɛ́. 27 Ká kánɩ́wa vʋkfíse namɩŋsa rɩ́wɔ́ cɛ́l kaa mʋ́ Nyuutɩna Wɩɩsɛ, ɩ́ Wɩɩsɛ koro ná dɩhɩ̃́, a físi. Ɩ́ tɛŋfɩ́ɛ́l vʋka é wuu cɛ́l mɔhɔ̃́ rɩ́ɩ́wa pii bɩ́sɛ waasɛ Nyuutɩna Wɩɩsɛ, ɩ́ Wɩɩsɛ koro ná nɛ́, ká díwó namɩŋsa nɛ́. 28 Ɩ́ pɔ́rɩ́wa tɩɩ mɛ́, a tɩ́tɩŋ kíŋse wɩ́ɛ́ ná wuu ŋ há mákɩ́wa. Rɩɩ́wa nɩ́ɩ́ tɩ́ŋwɔ́, Nyuutɩna Wɩɩsɛ, ɩ́ Wɩɩsɛ sɩɛrʋ sɩ́ tɔ́rɩ́wa nyúú, rʋ́ʋ́ a rɩ́ wɩ́ɛ́ vɩ́va wérí a pɛ́ɩ́wa rɩ́rɩ́wa bɛlɛ, tɛ́ŋ wuu mí.

Ɩ́ pɔ́ɩ́wa tɩɩ mɛ́ rɩ́ɩ́ venni

29 Nyuutɩna Wɩɩsɛ, ɩ́ Wɩɩsɛ sɩ́ yoo kiri duowa ná wuu há mɩŋ tɔ́ɔ́ ná mɛ́, ɩ́ háá mʋ́ɛ́ rɩ́ɩ́wa tɩ́llɛ. Amá rɩ́ɩ́wa nɛ́ kírwó tíé ná mɛ́ ká ké ráŋ, 30 rɩ ɓa wuu ní zɔ́kɛ́ tenni ɓóŋ ɩ́ sɩ́ɛ́, ɩ́ pɔ́ rɩ́ɩ́wa sɩ́ jɩ́ja rɩ́ɩ́wa zɩŋ ɛ́, ɛ́ nɩɛ fa há tɩ́ŋɛ́ a ɓɩ́ɓáárɩ́wɔ́ venni, a bʋl rɩ́ɩ́wa má sɩ́ cesi ɛ́ tɩɩ, a ɓɩ́ɓáárɩ́wɔ́ venni. 31 Ɩ́ wɩ mɔhɛ̃́ rɩ́ɩ́wa ɓáárɩ́wa Nyuutɩna Wɩɩsɛ, ɩ́ Wɩɩsɛ anɛ nɩɛ ná háá ɓáárɩ́wɔ́ venni ɛ́. Rɩ ɓa nɩ́ɩ́ ɓáárɩ́wɔ́ venni, ɓaá ɩ́'a wɩ́ɛ́ ná há wɩ ŋmɛ́nɔ kené, a kíkísi Nyuutɩna Wɩɩsɛ rɩ́ nɛ́. Ɓaá píwó heŋbólli rɩ́wɔ́ tolé a nyɩkɛ má tɩɩ, aá pɔ́wɔ́ venni.