Kíŋse 9

Ɩzɩrayɛl nɩɛ nɩtaŋnnɛ wɩ́ɛ́ raá Nyuutɩna Wɩɩsɛ pi tɔ́ɔ́ ná pɔ́wɔ́

1 Ɩ́ zesi, Ɩzɩrayɛl nɩɛ. Zaa, ɩ́ sɩ́ caŋ Zʋrdɛŋ fuo ná, a mʋ́ yoo la duowa há púlé kɩ́llɩ́wa, ká ka dóé má kɩ́llɩ́wa, ɓa tíé. Ɛ́ nɩɛ sɔ́ zekúme há zɩ́nɛ́ aá tɩkɛ bána nyúú ní, a kílwó tɔ́zeŋse. 2 Nɩɛ ná wɔ́ɔ́ peri wérí, ká a ɓɩgbórú má, ɓa nɛ́ ɓaá yɩ́rɛ Anakɛ bɛlɛ ɛ́. Ɩ́ nɩ́wɔ́ wɩ́ɛ́ rɛ́, rɩ nɛ́ŋ toó, a wóllíwó yo aá dí. 3 Zaa, ɩ́ zɩŋ rɩ Nyuutɩna Wɩɩsɛ, ɩ́ Wɩɩsɛ nɛ́ sɩ lɛ́ɩ́wa sɩ́ɛ́ a yoo dí ɛ́ nɩɛ, anɛ níŋ háá dí ɓɩɛ ɛ́. Ʋ sɩ́ yoo díwó, a kíríwó wuu tá, rɩ́wɔ́ lɛ tíé ná mɛ́ kɩ́kɛ́lɛ́ ká rɩ́ɩ́wa tɩ́llʋ́, anɛ ɛ́ ʋ há mákɛ́ pɛ́ɩ́wa.

4 Rɩ Nyuutɩna Wɩɩsɛ, ɩ́ Wɩɩsɛ nɛ́ yóé kiri ɛ́ nɩɛ, ɩ́ sɩ́ bɩ́ɩ́nʋ́ anɛ ɩ́ há ká nɩtaŋáwa nɛ́ tɛ, ʋ pi tɔ́ɔ́ ná pɛ́ɩ́wa. Amá nɩɛ ná sabɔ́ŋ nɛ́ tɛ, Nyuutɩna Wɩɩsɛ jɩ́ja rʋ́ʋ́ kírwó tá ɛ́ tɔ́ɔ́ mɛ́. 5 Ɩ́ nɩtaŋnnɛ arɩ́rɩ́wa sawer wɩ́ɛ́ raá wɩ tɛ, Nyuutɩna Wɩɩsɛ, ɩ́ Wɩɩsɛ jɩ́ja rʋ́ʋ́ kiri ɛ́ nɩɛ ɛ́. Ɓa cáásɔ́ a duowa ná nɩɛ há bɔ́mɔ́ nɛ́. Kɔ́ʋ́ jɩ́ja rɩ́ nʋɔ ná ʋ há bílé pɛ́ɩ́wa naabálwa Abɩrahaŋ, Ɩzakɛ arɩ́ Zakɔbɛ, rʋ́ʋ́ cɛ́. 6 Ɩ́ zɩŋ rɩɩ́wa nɩtaaŋnnɛ wɩ́ɛ́ raá wɩ tɛ, Nyuutɩna Wɩɩsɛ, ɩ́ Wɩɩsɛ jɩ́já rʋ́ʋ́ pi tɔ́wero né a pɛ́ɩ́wa. Ɩ́ cáásɔ́ a nyúdotɩɩna nɛ́.

Moyizi liisi Ɩzɩrayɛl nɩɛ salmɛ nɔwie wɩ́ɛ́

7 Ɩ́ sɩ́ sʋllʋ́, ɛ́ ɩ́ há ɛ́ɛ́ Nyuutɩna Wɩɩsɛ, ɩ́ Wɩɩsɛ cɔ́ɛ́ ɔsɛ ísíwa nyúú gɩrbétéke ná sɩɛrʋ, a pɔ́ tɛ́ŋ ná mɛ́ ɩ́ há lɛ́ Ezipiti tíé mí a ko peri rɛɛ́. Ɩ́ vɛ́ɩ́wa Nyuutɩna Wɩɩsɛ nʋɔ. 8 Paalɔ ná ɓa háá yɩ́rɛ Ɔrɛbɛ mɛ́, ɩ́ ɔ́ɔ́ Nyuutɩna Wɩɩsɛ caasɛ ná cɔ́ɛ́ nɛ́ ɩ́ nyúú, a cɩ rʋ́ʋ́ zɔ́kɩ́wa. 9 Ŋ há zɛ́ paalɔ ná nyúú rɩ́ŋ la dɔ́wɩ́pɛ́rsɛ ná bɛllɛ, á Nyuutɩna Wɩɩsɛ há pʋ́ŋsʋ́ nʋtʋmɛwa ná ʋ há bílíwa rɩ́rʋ́ pɛ́kɛ wɩ́ɛ́ hé, ŋ ké ráŋ wɔhɔ arɩ́ tɩ́taŋ tápʋlɛ mɛɛ́sɛllɛ nɛ́. Ŋ wɩ óŋ wuu díé, ŋ wɩ nyii má nyɔ́ɛ́. 10 Ɛ́ nɛ́ Nyuutɩna Wɩɩsɛ pi dɔ́wɩ́pɛ́rsɛ ná bɛllɛ daha, ʋ há kenú tɩɩ néní pʋ́ŋsʋ́ kíŋse hé, a páŋ. Tápʋl ná ɩ́ há kúé ciki paalɔ ná laka, wɩ́ɛ́ ná tɩɩ Nyuutɩna Wɩɩsɛ fa há mɩŋ níŋ sɩ́sɩ́ɛ́nnʋ́wa, ká bʋl pɛ́ɩ́wa nɛ́ ɛ́.

11 Tápʋlɛ́ ná mɛɛ́sɛllɛ kal tenní ní, Nyuutɩna Wɩɩsɛ pi nʋtʋmɛ dɔ́wɩ́pɛ́rsɛ ná bɛllɛ mɛ́, ʋ há pʋ́ŋsɛ́, a páŋ. 12 Ɛ́ nɛ́ ká Nyuutɩna Wɩɩsɛ bʋl páŋ bʋlɛ́: «Lɩ paalɔ ná nyúú a tuwi kɩ́kɛ́lɛ́, bee wɩ́ɛ́ nɩɛ ná ɩ há kené lɛ Ezipiti tíé mí, ɓa yéŋŋó rí, ɓa wɩ daanɛ ká a wɩ́bɔmɔ. Ɓa vɛ́ wɩ́ɛ́ ná ŋ há mákwɔ́, ká mɩ́ɛ́rɛ salmɛ a cʋɔrɛ veno a pɔ́wɔ́ tɩɩ.» 13 Ɛ́ nɛ́ Nyuutɩna Wɩɩsɛ baa bʋl páŋ bʋlɛ́: «Ŋ ɛ̃ nɩɛ nyáŋ rɛ́, ɓa dé caasɛ ká nyúdotɩ́ɩ́na nɛ́. 14 Mʋ́ ká lóŋ rɩ́wɔ́, ŋ ná cɔ́ɛ́ rɛ́ wérí ɓa nyúú. Ŋ sɩ́ zɔ́kwɔ́, rɩ́wɔ́ yɩr yʋ́ksɛ dúníé mí, ká tɩ́ŋɩ́ mɛ́, a a rɩ́ɩ́ a dumúkurzéní, a pul kɩ́llɩ́wɔ́, a a ɓɩduó má kɩ́llɩ́wɔ́.» 15 Ɛ́ nɛ́ ŋ lɛ paalɔ ná nyúú a ko aá tuwi, a ka nʋtʋmɛ dɔ́wɩ́pɛ́rsɛ ná bɛllɛ ŋ nɛ́ŋsa mɛ́. Ká paalɔ ná wuu tɔ́ rɩ́ níŋvásɛ. 16 Ŋ há kúé tuwi, ŋ nóó rɩɩ́wa vɛ́ wɩ́ɛ́ ná Nyuutɩna Wɩɩsɛ, ɩ́ Wɩɩsɛ há mákɩ́wa nɛ́, ká a wɩ́bɔmɔ a pi salmɛ a cʋɔrɛ nɔwie. Ɩ́ wáárɔ́ vɛ wɩ́ɛ́ ná Nyuutɩna Wɩɩsɛ há mákɩ́wa nɛ́. 17 Ɛ́ nɛ́ ŋ pi dɔ́wɩ́pɛ́rsɛ ná bɛllɛ ŋ há kené a yo, ɓa yɛ́rkɩ́wa sɩ́ɛ́ mɛ́.

Moyizi jɛnnɛ Wɩɩsɛ jamáŋ ná wɩ́ɛ́

18 Ɛ́ nɛ́ ŋ baa gieni Nyuutɩna Wɩɩsɛ sɩ́ɛ́ wɔhɔ arɩ́ tɩ́taŋ wuu, tápʋlɛ mɛɛ́sɛllɛ, ŋ wɩ óŋ wuu díé, ŋ wɩ nyii má nyɔ́ɛ́. Ŋ á wɩ́ɛ́ nyáŋ wuu, a tɩŋ ɩ́ há á wɩ́bɔmɔ ná nɛ́, a a Nyuutɩna Wɩɩsɛ ɔsɛ ná cɔ́ɛ́ ɩ́ nyúú. 19 Héwíŋ fa keníŋ rí, a tɩŋ Nyuutɩna Wɩɩsɛ há ɔ́sɛ́ ná cɔ́ɛ́ ɩ́ nyúú, a cɩ rʋ́ʋ́ zɔ́kɩ́wa. Amá Nyuutɩna Wɩɩsɛ báá zésó nɩ́ŋ sʋlɛ́ rɛ́. 20 Nyuutɩna Wɩɩsɛ fa ná cɔ́ɛ́ rɛ́ wérí Aarɔŋ má nyúú, ɛ́ tɛ́ŋ mɛ́, a jɩ́ja rʋ́ʋ́ ɓʋ́ʋ́. Ɛ́ nɛ́ ŋ sʋl lɔ́ʋ́ má. 21 Ɛ́ nɛ́ ŋ pííwa wɩ́bɔmɔ omo ná ɩ́ há cʋɔrɛ, ʋ nɛ nɔwie, a hé níŋ mí ʋ dí, ŋ lɩ́sɛ a ŋmɔwɛ yɛ́rkɛ, a gɛrɛ ʋ ɓɩsɛ kʋ́nʋ́nʋ́, ŋ paa hé nyii ná há pálɛ́ lɛ paalɔ nyúú a tútuwi polcʋ́ɔ́rɛ mí.

22 Ɩ́ báá lóó Nyuutɩna Wɩɩsɛ dí cɔ́ɛ́ rɛ́, ɩ́ nyúú dɩhɛ̃́ nyáŋ mɛ́: Tabera, Maasa arɩ́ Kɩbʋrɔtɛhatava mɛ́. 23 Nyuutɩna Wɩɩsɛ há sɛ́ rɩ́ɩ́wa lɛ Kadɛsɛbarɩnɩya mɛ́, a mʋ́ tɔ́ɔ́ ná ʋ há sɩ́ pii pɛ́ɩ́wa rʋ́ʋ́ ɛ́ɩ́wa óŋ, ɩ́ vɔ́ɔ́ nɛ́. Ɩ́ wɩ wɩ́ɛ́ ná Nyuutɩna Wɩɩsɛ, ɩ́ Wɩɩsɛ há mákɛ́ tɩ́ŋɛ́, ɩ́ wʋ́ʋ́ yardá ɛ́ɛ́. 24 Ŋ ɩ́ɩ̃́wa fól wuu, ɩ́ dé wɩ Nyuutɩna Wɩɩsɛ nʋɔ wɩ́ɛ́ nɛ má tɩɩ.

25 Ŋ fa gieni Nyuutɩna Wɩɩsɛ sɩ́ɛ́ wɔhɔ arɩ́ tɩ́taŋ wuu, tápʋlɛ mɛɛ́sɛllɛ nɛ́, bee wɩ́ɛ́ Nyuutɩna Wɩɩsɛ fa sɛ́, rʋ́ʋ́ já rʋ́ʋ́ zɔ́kɩ́wa nɛ́. 26 Ŋ sʋlʋ́ a bʋlɛ́: «Nyuutɩna Wɩɩsɛ, ŋ Wɩɩsɛ, sɩ́ɩ́ nɩɛ zɔ́kʋ́. Ɩ nɛ́ lɔ́wɔ́ arɩ́rɩ́ dóé Ezipiti tɩ́náwa nɛ́sɛ mɛ́, a káŋwɔ́ kaa lɛ Ezipiti tíé mí. 27 Líísí tʋtʋnna Abɩrahaŋ, Ɩzakɛ arɩ́ Zakɔbɛ wɩ́ɛ́, ká sɩ́ nɩɛ nyáŋ nyúduo, rɩ́wɔ́ sahɔwɩ́ɛ́ arɩ́wɔ́ wɩ́bɔmɔ bélú. 28 Rɩ ɛ́ raá, Ezipiti tɩ́náwa sɩ́ bʋl, rɩ́ɩ́ wɩ́ɩ́ nɩɛ wuo kaá peri tɔ́ɔ́ ná, ɩ há sɛ́ rɩ́ɩ́ sɩ́ pii pɔ́wɔ́. Ɓa sɩ bʋlɩ́ bɛ́rɩ́wɔ́ nɛ́. Ɓa sɩ́ bʋl rɩ́ ɛ́ nɛ́ tɛ, ɩ káŋwɔ́ ko lɛ, rɩ́ɩ́ ɓʋ́ʋ́sɩ́wɔ́ tá gɩrbétéke né sɩɛrʋ. 29 Ɓa kɛ́ɩ́ nɩɛ nɛ́, ɩ nɛ́ tɩ́wɔ́, ɩ nɛ́ kéŋwó arɩ́rɩ́ dóé ná há zénó, a kaa lɛ Ezipiti tíé mí.»