Ɩ́ sɩ́rá Nyuutɩna Wɩɩsɛ wɩ́ɛ́ sʋllʋ́
8
1 Ɩ́ hé dóé ká tɩŋ kíŋse ná wuu ŋ zaa há sɩ́ mákɩ́wa, rɩ́ Nyuutɩna Wɩɩsɛ a rɩ́ɩ́wa ka mɩɩsɛ, a pul, a zʋ tíé ná ʋ há tá nʋɔ pɛ́ɩ́wa naabálwa, bʋlʋ́ sɩ́ pii pɔ́wɔ́, rɩ́ɩ́wa tɩ́llʋ́. 2 Ɩ́ liisi bɩŋsɛ mɛɛ́sɛllɛ ná wuu Nyuutɩna Wɩɩsɛ, ɩ́ Wɩɩsɛ há keníwa kaa va gɩrbétéke ná sɩɛrʋ. Ʋ á wɩ́ɛ́ ɩ́ mɛ́, a makɛ rɩ́ɩ́wa múúríwa tɩɩ pɔ́ʋ́, ká máŋsɩ́wa rʋ́ʋ́ néíwa háá bɩ́ɩ́nʋ́ ná, a ná ɩ́ɩ́ tɩŋ kíŋse ná ʋ há mákɛ́ rɩ́ yáá, ɩ́ waá tɩŋ. 3 Ʋ ɔ́ɔ́ ɩ́ ná wɩɩla, a a losu wɩɩla wɩ́ɩ́wa mɛ́, ká baa lo ɩ́ dí ɓɩdííle ná ɓa háá yɩ́rɛ: «Maanɛ». Ɩ́ rɩ́rɩ́wa ánáwa oro wuu fa wɩ ɛ́ ɓɩdííle ɛ̃. Ʋ á wɩ́ɩ́ né a jɩ́ja rɩ́ɩ́wa zɩŋ, rɩ́ ɓɩdííle dʋŋɔ raá nɩbííno dí aá hiẽsi, amá Wɩɩsɛ nʋɔ wɩ́bʋlɛ́ nɩ́ɩ́ pɔ́ʋ́ hiẽsó. 4 Bɩŋsɛ mɛɛ́sɛllɛ nyáŋ wuu ɩ́ há válɛ́, ɩ́ gɛnnɛ wɩ cɔ́nnɛ́, ɩ́ naasɛ má wɩ ŋmɛ́nnɛ́. 5 Ɩ́ sɩɛ́ mɔhɔ̃́ rɩ́ɩ́wa zɩŋ rɩ́ nɩbííno háá kánʋ́ bio, aá mákʋ́ wɩ́ɛ́ a kánʋ́ tʋ́tʋrɛ ɛ́, ɛ́ tɩɩ nɛ́ Nyuutɩna Wɩɩsɛ, ɩ́ Wɩɩsɛ má kánɩ́wa tʋ́tʋrɛ. 6 Ɩ́ wɩ́ɛ́, kíŋse ná wuu Nyuutɩna Wɩɩsɛ, ɩ́ Wɩɩsɛ há mákɩ́wa, ɩ́ tɩ́tɩ́ŋwɔ́ a ɩ́'a wɩ́ɛ́ ná wuu ʋ há mákɛ́, a bubú.7 Nyuutɩna Wɩɩsɛ, ɩ́ Wɩɩsɛ keníwa kaa mʋ́mʋ́ tíwero ní. Tíé ná kéŋ fuonni arɩ́ nyibulsɩ́ɛ́ há búlé lɛ, a pɩ́pal polli arɩ́ pallɛ wuu mí ní. 8 Tíé ná kéŋ oŋparɛ́ rɩ́wɔ́ duó wuu, vínyi tuuni, pirsi, tuuni ná ɓa háá yɩ́rɛ girenadiewa, olívi nʋʋ arɩ́ tʋʋ. 9 Ɓɩdííle waá a rɩ́wɔ́ muri tíé ná mɛ́. Ɩ́ wɩ óŋ wuu jáá gúl ráŋ. Tíé ná kéŋ dɔ́wʋ́ɔ́ ɓa cewi aá lɩ́sɛ hɔɔ; ʋ pallɛ má kéŋ dɔ́wʋ́ɔ́ ɓa cewi aá lɩ́sɛ kɔmɔ́, ɩ́ há sɩ́ wólli huri lɩ́sɛ. 10 Rɩɩ́wa nɛ́ dí ɓɩɛ ná wuu ɩ́ háá jɛɛ́ tíé ná mɛ́ rɩ́ɩ́ vɔkɛ, ɩ́ bárkɛ Nyuutɩna Wɩɩsɛ, ɩ́ Wɩɩsɛ, bee wɩ́ɛ́ ʋ há pí tɔ́wero né pɛ́ɩ́wa.
11 Ɩ́ hé dóé, a sɩ́ Nyuutɩna Wɩɩsɛ, ɩ́ Wɩɩsɛ wɩ́ɛ́ sʋllʋ́. Ɩ́ tɩ́ŋʋ́ kíŋse, ʋ wɩ́makɛ́ rɩ́rʋ́ wɩ́bile ná ŋ zaa háá mákɩ́wa. 12 Rɩɩ́wa nɛ́ ná onni ná wuu ɩ́ háá jɛɛ́ rɩ́ɩ́ díí vɔkɛ, rɩ́ɩ́ sɔ jɩwere rɩ́ɩ́ zʋ́zʋ, 13 rɩ́ɩ́wa pʋzeŋsi rɩ́ pʋwɩɛla má pul, rɩ́ɩ́wa salmɛ arɩ́rɩ́wa wárɛ má pul súúri, arɩ́ omo ná wuu ɩ́ há kené, 14 ɩ́ pʋ́pɔ́, ɩ́ sɩ́ɩ́wa tɩɩ mákʋ́ rɩ́ɩ́ sʋllɛ Nyuutɩna Wɩɩsɛ, ɩ́ Wɩɩsɛ wɩ́ɛ́. Ʋ nɛ́ keníwa kaa ko lɛ Ezipiti tíé mí, dɩhɩ̃́ ná ɩ́ fa há mɩnɛ́, a a yósi. 15 Ʋ nɛ́ keníwa va gɩrbétéke ná há zeno, a ká héwíŋ sɩɛrʋ, dɩhɩ̃́ ná dʋbɔma arɩ́ nʋɔnnɛ há mɩnɛ́. Tíé ná fa wɩ nyii kené, ʋ a nyii lɛ bʋ́tal mɛ́ a pɛ́ɩ́wa. 16 Ʋ pɛ́ɩ́wa ɓɩdííle ná ɓa háá yɩ́rɛ: «Maanɛ» nɛ́ gɩrbétéke ná sɩɛrʋ, onni ná ɩ́ ánáwa oro wuu ha há wɩ díé ná. Ʋ á ɛ́, a máŋsɩ́wa nɛ́, rɩ́ɩ́wa múúríwa tɩɩ, a makɛ rɩ́ wɩ́ɛ́ va wérí a pɛ́ɩ́wa. 17 Ʋ mɔhɔ̃́ rɩ́ɩ́wa sɩɛ́ zɩŋ ɛ́ tɛ́ŋ mɛ́, rɩ́ ɓɩɛ ná wuu ɩ́ há néé, ɩ́ tɩɩ dóé mí raá, ɩ́ nówó. 18 Ɩ́ líísíwa tɩɩ, rɩ Nyuutɩna Wɩɩsɛ, ɩ́ Wɩɩsɛ nɛ́ pɛ́ɩ́wa dóé, ɩ́ nówó. Ɛ́ nɩ́ɩ́ makɛ́, rɩ nʋtʋmɛ ná ʋ há bílé pɛ́ɩ́wa ánáwa, ʋ cɩ́nɛ nɛ́ ɛ́, a kaa ko lɛ zaa.