Moyizi fá bʋl dɔ́wɩ́pɛ́rsɛ bɛllɛ naŋá wɩ́ɛ́
10
1 Ɛ́ tɛ́ŋ mɛ́ Nyuutɩna Wɩɩsɛ bʋ́lɔ́ páŋ bʋlɛ́: «Cɔ́ a lɩ́sɛ dɔ́wɩ́pɛ́rsɛ bɛllɛ rɩ́wɔ́ nɛ dʋ́ŋdʋ́ʋ̃́ ɓɩɛ ná, a kaa ko zɩ́nɩ́ŋ rɩ́ paalɔ ná nyúú. Pá daasɛ a ɓasɛ dáka má. Ʋ sɩɛrʋ nɛ́ rɩ́ɩ́ pi dɔ́wʋ́ɔ́ ná hé. 2 Ŋ sɩ́ pʋ́ŋsɛ wɩ́ɛ́ ná tɩɩ fa há mɩŋ dʋ́ŋdʋ́ʋ̃́ ɓɩɛ ná ɩ há píé yoo yɛ́rkɛ mɛ́, a héwó mí, rɩ́ɩ́ pii hé dáka ná sɩɛrʋ.» 3 Ɛ́ nɛ́ ŋ ja ákásɩ́á daasɛ, a ɓasɛ dáka ná, ká cɔ́ dɔ́wɩ́pɛ́rsɛ ná bɛllɛ, ɓa nɛ dʋ́ŋdʋ́ʋ̃́ ɓɩɛ ná, ŋ kaa zɛ́ paalɔ ná nyúú. 4 Ɛ́ nɛ́ Nyuutɩna Wɩɩsɛ pʋ́ŋsɛ wɩ́ɛ́ ná tɩɩ ʋ fa há pʋ́ŋsɛ́ hé dʋ́ŋdʋ́ʋ̃́ ɓɩɛ ná mɛ́, a héwó má mɛ́. Ʋ kíŋse fí ná ʋ fa há mɩŋ níŋ sɩɛrʋ paalɔ ná nyúú, ká mákɩ́wa, tɛ́ŋ ná mɛ́ ɩ́ há hílmé paalɔ ná laka. Ɛ́ nɛ́ Nyuutɩna Wɩɩsɛ pi dɔ́wʋ́ɔ́ ná a páŋ. 5 Ŋ ka dɔ́wɩ́pɛ́rsɛ ná a lɛ paalɔ ná nyúú ko tuwi, a pii hé dáka ná ŋ fa há bɩ́rmɛ́ sɩɛrʋ. Dɔ́wʋ́ɔ́ ná ha mɩŋ dáka sɩɛrʋ, anɛ ɛ́ Nyuutɩna Wɩɩsɛ há mákɩ́ŋ.6 (Ɩzɩrayɛl nɩɛ fá lɛ Beneyakaŋ tɩ́náwa vile ná dɩhɩ́, a mʋ́ dɩhɩ̃́ oro ɓa háá yɩ́rɛ Mosera. Ráŋ nɛ́ Aarɔŋ sʋwɛ, ɓa húú, ká ʋ bio Ɩlɩyazaarɛ lɔ́ʋ́ nyúú mí, a a Wɩɩsɛ vʋk'ɔ́ɔ́sʋ́. 7 Ɓa lɛ Mosera mɛ́, a mʋ́ Gugoda a mʋ́ kéri Yotibata mɛ́, dɩhɩ̃́ ná nyipala há mɩnɛ́. 8 Paalɔ ná laka ní Nyuutɩna Wɩɩsɛ lɩ́sɛ Levi duo nɩɛ báála, rɩ́wɔ́ nɛ́ cɩ́cɩ́ɩ́nɛ Nyuutɩna Wɩɩsɛ nʋtʋmɛ dáka ná, ká tʋ́tʋŋ Wɩɩsɛ táŋtɛ jaa tʋtʋmɛ́, a sʋl Nyuutɩna Wɩɩsɛ pɩ́pá Ɩzɩrayɛl nɩɛ, Nyuutɩna Wɩɩsɛ yɩr mɛ́. Ɓa tʋtʋmɛ́ nɛ́ ha ɛ́, arɩ́ zaa wuu. 9 Ɛ́ nɛ́ tɛ Levi duo nɩɛ wɩ tíé ɓaalɛ kené Ɩzɩrayɛl duo nɩɛ sɩɛrʋ ɛ́. Nyuutɩna Wɩɩsɛ, ɩ́ Wɩɩsɛ, tʋŋ pɛ́ɛ́ nɛ́ kɔ́wɔ́ ɓaalɛ, anɛ Nyuutɩna Wɩɩsɛ ɩ́ Wɩɩsɛ fa há bʋl ɛ́ a pɔ́wɔ́.)
10 Ŋ báá ké paalɔ ná nyúú wɔhɔ arɩ́ tɩ́taŋ tápʋlɛ mɛɛ́sɛllɛ nɛ́, a sʋlrá Nyuutɩna Wɩɩsɛ, anɩ́ŋ fa há lá sɩ́ɛ́ a ɛ́. Nyuutɩna Wɩɩsɛ baa láŋ sʋlɛ́, a vɛ́ɩ́wa zɔ́kɛ́. 11 Ɛ́ nɛ́ Nyuutɩna Wɩɩsɛ bʋl páŋ bʋlɛ́: «Mʋ́, a la nɩɛ ná sɩ́ɛ́, a pɔ́wɔ́ ŋmɛ́nɔ́ rɩ́wɔ́ mʋ́ tɔ́ɔ́ ná ŋ há tá nʋɔ a pɔ́wɔ́ naabálwa, rɩ́ŋ sɩ́ pii pɔ́wɔ́ rɩ́wɔ́ tɩ́llʋ́.»
Ɩ́ zízílíwa Nyuutɩna Wɩɩsɛ
12 Mʋ́l né mí, ɩ́ é Ɩzɩrayɛl jamáŋ, ɩ́ zesi nɛ wɩ́ɛ́ nyáŋ Nyuutɩna Wɩɩsɛ, ɩ́ Wɩɩsɛ háá já rɩ́ɩ́wa a. Ɩ́ bubú Nyuutɩna Wɩɩsɛ, ɩ́ Wɩɩsɛ, aá a wɩ́ɛ́ ná wuu ʋ háá jɛɛ́. Ɩ́ cóllú a tʋŋ pɩ́pɔ́ʋ́ arɩ́rɩ́wa sɩɛrʋ wuu, arɩ́rɩ́wa dʋma wuu. 13 Ɩ́ tɩ́ŋʋ́ kíŋse rɩ́rʋ́ wɩ́bilé ná ŋ háá mákɩ́wa zaa; ɛ́ sɩ́ a wɩ́wérí a pɛ́ɩ́wa. 14 Nyuutɩna Wɩɩsɛ, ɩ́ Wɩɩsɛ nɛ́ tɛ bána nyúú, ʋ zʋ́ɔ́ nɛ́. Ʋ nɛ́ tɛ tíé má arɩ́ onni ná wuu há mɩ́ŋwɔ́ mɛ́. 15 Arɩ́ ɛ́ wuu, ʋ cáásɔ́ cóllíwa naabálwa nɛ́. Ɛ́ nɛ́ tɛ ʋ wɩ dumúkúr oro wuu lɩ́sɛ́, ká lɩ́sɩ́wa, rɩ́ɩ́wa nɛ́ ɔ́ʋ́ nɩɛ. Ɩ́ nɛ́ ha kɔ́ʋ́ nɩɛ arɩ́ zaa wuu. 16 Ɛ́ wɩ́ɛ́, a pɔ́ mʋ́l né mí ká kaá mʋ́, ʋ mɔhɔ̃́ rɩ́ɩ́wa wúólíwa sɩɛrʋ, ká báá sɩ́ nyúduo á Nyuutɩna Wɩɩsɛ rɩ́. 17 Nyuutɩna Wɩɩsɛ, ɩ́ Wɩɩsɛ nɛ́ kɛ véní wuu, ʋ nɛ́ kéŋ dóé óŋ wuu nyúú, ʋ zeno, ʋ dúóko, a mɔ rɩ́ɩ́wa bubú. Ʋ wɩ nɩɛ tʋɔsɛ, nɛ́ŋ wuu má wʋ́ʋ́ wuo yɔwɛ, rʋ́ʋ́ a wɩ́ɩ́. 18 Ʋ wɩ bisíŋsi arɩ́ yúháála wɩ́ɛ́ saŋ. Ʋ có nɩhʋɔra, a pɩ́pɔ́wɔ́ ɓɩdííle arɩ́ gɛnnɛ. 19 Ɛ́ wɩ́ɛ́ má ɩ́ cólli nɩhʋɔra, bee wɩ́ɛ́ ɩ́ má fa ká nɩhʋɔra rɛ́ Ezipiti tíé mí.
20 Ɩ́ bubú Nyuutɩna Wɩɩsɛ, ɩ́ Wɩɩsɛ, a tʋŋ pɩ́pɔ́ʋ́. Ɩ́ kánɩ́wa tɩɩ cɔ́ʋ́ mɛ́, aá ,ŋmɩ́ɛ́sʋ́ dʋŋɔ yɩr mɛ́ nɛ́. 21 Ʋ nɛ́ kɛ́ɩ́wa Wɩɩsɛ, ɩ́ dɩ́dɛ́nnʋ́. Ɩ́ tɩɩ ná wɩ́duoru ná arɩ́ wɩ́nyáŋsɛ ná ʋ há ɛ́ɛ́ pɛ́ɩ́wa rɛ́. 22 Ɩ́ naabálwa fa háá mʋ́ Ezipiti tíé, ɓa ká nɩɛ mɛɛ́sɩbotoro arɩ́ fí dʋŋɔ nɛ́. Amá mʋ́l né mí Nyuutɩna Wɩɩsɛ, ɩ́ Wɩɩsɛ ɔ́ɔ́ ɩ́ pul ní, a mɔ́ caŋwʋllɛ há mɩŋ bána nyúú.