Wɩɩsɛ kíŋse fí wɩ́ɛ́
5
1 Moyizi yɩ́rɛ Ɩzɩrayɛl nɩɛ wuu, a hé náŋá mɛ́ a bʋ́lwɔ́ rɩ́ bʋlɛ́: «Ɩ́ zesi wɩ́bilé ná rɩ́ wɩ́makɛ́ ná, ŋ zaa há cɩ́nɩ́wa sɩ́ɛ́ a máŋsɛ aá pɛ́ɩ́wa. Ɩ́ hé dóé ká zɩ́ŋwɔ́, a tɩ́ŋwɔ́ weri. 2 Nyuutɩna Wɩɩsɛ, á Wɩɩsɛ bíl nʋtʋmɛ á rɩ́rʋ́ pɛ́kɛ, Ɔrɛbɛ paalɔ mɛ́. 3 Ʋ rɩ́rá ánáwa pɛ́kɛ raá, ʋ bil ɛ́ nʋtʋmɛ; amá, á nɩɛ ná wuu zaa há wómmó a mɩŋ rɛɛ́wa, á rɩ́rʋ́ pɛ́kɛ nɛ́ ʋ bil ɛ́ nʋtʋmɛ. 4 Paalɔ ná nyúú ní, ɩ́ rɩ́ Nyuutɩna Wɩɩsɛ fa cɛ́ caasɛ náŋá, kɔ́ʋ́ liŋó lɛ níŋ sɩ́sɩ́ɛ́nʋ́wa aá bʋ́lɩ́wa rɩ́. 5 Ɛ́ tɛ́ŋ mɛ́, ŋ fa cɩ́nɩ́wa rɩ́ Nyuutɩna Wɩɩsɛ pɛ́kɛ nɛ́, rɩ́ŋ lɔ́ʋ́ wɩ́ɛ́ a bʋl pɛ́ɩ́wa, bee wɩ́ɛ́ ɩ́ faá fá níŋ ná, ɛ́ nɛ́ tɛ́ ɩ́ fa wɩ paalɔ ná daha zɩ́nɛ́. Ʋ sɛ́: 6 «Ŋ nɛ́ ká Nyuutɩna Wɩɩsɛ, ɩ Wɩɩsɛ ná há ɛ́ɛ́ ɩ lɛ Ezipiti mí, yomí sɩɛrʋ.7 Ɩ wɩ mɔhɛ̃́ rɩ́ɩ́ ɓaarɛ wɩŋsa náŋa, rɩŋ dʋŋɔ raá. 8 Ɩ wɩ mɔhɛ̃́ rɩ́ɩ́ bɩrmɛ veno, ɛ́ raá má óŋ, rʋ́ʋ́ nɛ bána nyúú omo, tíé nyúú omo, ɛ́ raá má nyii sɩɛrʋ omo. 9 Ɩ wɩ mɔhɛ̃́ rɩ́ɩ́ ɓírmi ɛ́ onni duo sɩ́ɛ́, ɩ wɩ mɔhɛ̃́ rɩ́ɩ́ ɓáárɩ́wɔ́, bee wɩ́ɛ́ ŋ é ní ká Nyuutɩna Wɩɩsɛ, ɩ Wɩɩsɛ, ŋ ká bánɔŋdir ri. Rɩ nɛ́ŋ ɔ́ɔ́ zɔ́kɩ́ŋ mɛ́, ŋŋ́ a wɩɩla pérú rɩ́rʋ́ bɛlɛ má bɛlɛ, a kaá ja woó woówa botoro, baná nyúú mí ní. 10 Amá nɩɛ ná há cóŋ, aá tɩ́ŋɩ́ŋ kíŋse, ŋŋ́ káŋwɔ́ wérí, ɓa rɩ́wɔ́ bɛlɛ má bɛlɛ, a kaá ja woó woówa bʋ́ɩ́ nyúú mí ní.
11 Ɩ wɩ mɔhɛ̃́ rɩ́ɩ́ yɩ́rɛ Nyuutɩna Wɩɩsɛ, ɩ Wɩɩsɛ yɩr wɩ́yɔ́ɔ́ wɩ́ɛ́, bee wɩ́ɛ́ rɩ nɛ́ŋ á ɛ́, Nyuutɩna Wɩɩsɛ wʋ́ʋ́ yɔ́ɔ́ lo.
12 Sɩ́ fɩɛlɛ́ tápʋl ná wɩ́ɛ́ sʋllʋ́; lɩ́sʋ́ rʋ́ʋ́ ɔ́ʋ́ dʋŋɔ, anɛ ɛ́ Nyuutɩna Wɩɩsɛ, ɩ Wɩɩsɛ há makɛ a pɛ́ɩ́. 13 Ɩ sɩ́ tʋ́mɩ́ tʋtʋmɛ́ wuu tápʋlɛ balgo pɛ́kɛ. 14 Tápʋlɛ balpɛ kal ká Nyuutɩna Wɩɩsɛ, ɩ Wɩɩsɛ fɩɛlɛ́ tápʋl nɛ́. Ɛ́ kal, ɩ wɩ mɔhɛ̃́ rɩ́ɩ́ tʋŋ tʋtʋmɩ́ wuu, ɩ bio, ɩ toló, ɩ tʋtʋnnɔ báálɔ rɩ́ háálɔ, ɩ nɔɔ, ɩ kokúme, ɩ pʋna oro wuu, nɩhʋɔrɔ ná há mɩ́nɩ́ tɔ́ɔ́ mɛ́, ɓa má oro wuu wɩ mɔhɛ̃́ rʋ́ʋ́ tʋŋ tʋtʋmɩ́ wuu; ɓa mɔhɔ̃́ rɩ́wɔ́ fɩɛlɛ nɛ́, anɩ́ há fɩ́ɛ́lɛ ɛ́. 15 Sɩ́ sʋllʋ́ rɩɩ fa ká yomó rí Ezipiti mí, ɛ́ nɛ́ Nyuutɩna Wɩɩsɛ ko tɛ́rʋ́ dóé nɛ́sɛ a lɩ́sɩ́ ráŋ; ɛ́ nɛ́ tɛ Nyuutɩna Wɩɩsɛ, ɩ Wɩɩsɛ sɩ́ɩ́ zíl fɩɛlɛ́ tápʋl.
16 Zílí áná rɩ́rɩ́ maá, anɛ ɛ́ Nyuutɩna Wɩɩsɛ, ɩ Wɩɩsɛ há mákɛ́ pɛ́ɩ́, a makɛ rɩ́ɩ́ ná wer ká dí tɔ́ɔ́ vɔkɛ, tɔ́ɔ́ ná Nyuutɩna Wɩɩsɛ, ɩ Wɩɩsɛ há pɛ́ɩ́ sɩɛrʋ. 17 Ɩ wɩ mɔhɛ̃́ rɩ́ɩ́ ɓʋ́ nɛ́ŋ. 18 Ɩ wɩ mɔhɛ̃́ rɩ́ɩ́ tʋŋ cɔ́rmʋ. 19 Ɩ wɩ mɔhɛ̃́ rɩ́ɩ́ ga. 20 Ɩ wɩ mɔhɛ̃́ rɩ́ɩ́ nyɛ nyɩɛrʋ héí nɔ́ŋɔ nʋɔ mɛ́. 21 Ɩ wɩ mɔhɛ̃́ rɩ́ɩ́ hɩ́ɛ́nɩ́ nɔ́ŋɔ háálɔ, ʋ jaa, ʋ baka, ʋ tʋtʋnnɔ báálɔ rɩ́ háálɔ, ʋ nɔɔ arɩ́rʋ́ kokúme; ɩ wɩ mɔhɛ̃́ rɩ́ɩ́ hɩ́ɛ̃́nʋ́ óŋ wuu.»
22 Kíŋse ná Nyuutɩna Wɩɩsɛ há cɛ́ paalɔ ná nyúú, níŋ sɩ́sɩ́ɛ́nnʋ́wa rɩ́ duóbasɛ arɩ́ nyʋɔsɛ há zúké sɩɛrʋ, a ɓɔ́ʋ́ liŋó a máŋsɛ pɛ́ɩ́wa, paalɔ ná laka nɛ́ ɛ́. Ʋ wɩ wɩ́ɩ́ nɔ́ŋ súúré. Ʋ pʋ́ŋsɩ́wɔ́ a hé dɔ́wɩ́pɛ́rsɛ bɛllɛ mɛ́, a pii páŋ.
Moyizi ní ká Wɩɩsɛ wɩ́laabʋllɔ
23 Tɛ́ŋ ná mɛ́ ɩ́ há nɛ́ liŋó ná há lɛ́ nyʋɔsɛ ná há zúké sɩɛrʋ aá lɛ, ká níŋ má kɩ́ka paalɔ ná nyúú, ɩ́ jɩmʋ́ʋ́la ná wuu sɩ́dííre arɩ́rɩ́wa nɩhɩɛ̃́sɛ túópéríŋ, 24 a bʋlɛ́: «Nyuutɩna Wɩɩsɛ, á Wɩɩsɛ mákʋ́ píŋ rɩ́rʋ́ zéŋ a párá, á nʋʋ liŋó háá lɛ́ níŋ sɩ́sɩ́ɛ́nnʋ́wa. Zaa nɛ́, á sɩɛ́ zɩŋ rɩ́ Wɩɩsɛ wo nɛrɔ rɩ́ aá bʋl kɔ́ʋ́ kɩ́ka mɩɩsɛ. 25 Mʋ́l né mí, beé rí tɛ, ráá já sʋʋ nʋɔ mɛ́, rɩ́ níŋ zenó né dírá ɓʋ́>> Raá nɛ́ ha lóé rɩ́ Nyuutɩna Wɩɩsɛ, á Wɩɩsɛ líŋó né zʋ́zʋ́rá dɩlla, á sɩ́ sʋsɛ! 26 Áŋ é tɩɩ rɛ́ há nɛ́ Wɩɩsɛ há wómmó liŋó, há lɛ́ níŋ sɩɛrʋ lɛ, anɩ́rá nyɛ, ká ka mɩɩsɛ>> 27 Ɩ é, á sʋlɩ́ rɩ́ɩ́ tuuperi Nyuutɩna Wɩɩsɛ, á Wɩɩsɛ, a zesi wɩ́ɛ́ ná wuu ʋ há sɩ́ bʋl pɛ́ɩ́, a nɛ́ sɩɛ́ ko bʋl párá; á sɩ́ zésíwó, ká tɩ́ŋwɔ́ má.
28 Nyuutɩna Wɩɩsɛ nɛ́ wɩ́ɛ́ ná, ɩ́ fa há bʋlɛ́ aá páŋ; ɛ́ nʋ́ bʋ́lɩ́ŋ rɩ́ a bʋlɛ́: «Ŋ nɛ́ wɩ́ɛ́ ná, jamáŋ né fa há bʋlɛ́ aá pɛ́ɩ́ rɛ́, ɓa wɩ́bʋlɛ́ wuu sɩɛ́ wéró. 29 Áá! Rɩŋ héwífɔ́ɔ́ fa mɩ́ŋwɔ́ betunni mí rí, ɓa fa sɩ bubúŋ káá tɩ́ŋɩ́ŋ kíŋse wuu. Ɛ́ é, ɓa rɩ́wɔ́ bɛlɛ fa sɩ́ ná wér, a kaá mʋ́ wuu! 30 Mʋ́, a bʋ́lwɔ́ rɩ́ bʋlɛ́: ‹Ɩ́ bɩrɛ mʋ́ɩ́wa táŋtɛwa sɩɛrʋ›. 31 Amá ɩ é Moyizi, káánɩ́ŋ laka rɛɛ́, rɩ́ŋ máŋsɛ kíŋse ná rɩ́ wɩ́bilé ná arɩ́ wɩmákɛ́ ná wuu a pɛ́ɩ́, rɩ́ɩ́ máŋsɛ a pɔ́wɔ́, a makɛ rɩ́wɔ́ tɩ́ŋwɔ́ mɛ́, tɔ́ɔ́ ná ŋ há sɩ́ pii pɔ́wɔ́, rɩ́wɔ́ tɩ́llʋ́ sɩɛrʋ.»
32 Ɛ́ wɩ́ɛ́, ɩ́ pɔ́ wérí, a tɩŋ wɩ́ɛ́ ná wuu Nyuutɩna Wɩɩsɛ, ɩ́ Wɩɩsɛ há máŋsɛ́ a pɛ́ɩ́wa; ɩ́ sɩ́ cʋ́rʋ́ hé néduu, ɛ́ raá má nɛ́gʋɔ káá tɔ́wɔ́. 33 Wɩ́ɩ́ wuu mí, ɩ́ tɩŋ Nyuutɩna Wɩɩsɛ, ɩ́ Wɩɩsɛ há sʋ́ʋ́ ná, a makɛ rɩ́ɩ́wa ná mɩɩsɛ rɩ́ mɩgbóó arɩ́ wér, tɔ́ɔ́ ná ɩ́ há sɩ́ tɩ́llɛ sɩɛrʋ.