Kíŋse 6

Cólli Nyuutɩna Wɩɩsɛ, ɩ Wɩɩsɛ

1 Ná kíŋse ná rɩ́ wɩ́bilé ná arɩ́ wɩ́makɛ́ ná Nyuutɩna Wɩɩsɛ, ɩ́ Wɩɩsɛ há sɩ́ŋ é Moyizi máŋsɛ pɛ́ɩ́wa, a makɛ rɩ́ɩ́wa tɩ́ŋwɔ́ mɛ́, tɔ́ɔ́ ná ɩ́ há sɩ́ tɩ́llʋ́ sɩɛrʋ. 2 Ʋ ɛ́, ɩ́ sɩ́ fɩ́fá Nyuutɩna Wɩɩsɛ, ɩ́ Wɩɩsɛ. Ɩ́ rɩ́rɩ́wa bɛlɛ arɩ́rɩ́wa bɛlɛ má bɛlɛ, sɩ tɩ́ŋʋ́ wádawa ná rɩ́rʋ́ kíŋse ná wuu, ŋ há bílé pɛ́ɩ́wa ɩ́ hiẽsó wuu mí. A makɛ rɩ́ɩ́wa tápʋlɛ má pul ɛ́ tɔ́ɔ́ mɛ́. 3 Ɩ́ zésíwó, Ɩzɩrayɛl nɩɛ a hé dóé ká tɩ́ŋwɔ́. A makɛ rɩ́ɩ́wa ná wér, a caasɛ pul kíŋkáŋ, tɔ́ɔ́ ná nɛ'ɩ́l rɩ́ tʋʋ háá pal ráŋ mɛ́, anɛ ɛ́ Nyuutɩna Wɩɩsɛ, ɩ́ ánáwa Wɩɩsɛ há bʋlɛ́ pɛ́ɩ́wa.

4 Ɩ́ zesi, Ɩzɩrayɛl nɩɛ! Nyuutɩna Wɩɩsɛ, á Wɩɩsɛ dʋŋɔ nɩ́ ká Nyuutɩna Wɩɩsɛ. 5 Nɛrɔ wuu cólli Nyuuɩna Wɩɩsɛ, ɩ Wɩɩsɛ rɩ́rɩ́ sɩɛrʋ wuu, rɩ́rɩ́ dʋma wuu arɩ́rɩ́ taŋá wuu. 6 Wɩ́bʋlɛ́ nyáŋ ŋ zaa há bílé aá pɛ́ɩ́, ɓa mɔhɔ̃́ rɩ́wɔ́ mɩ́nɩ́ beŋtú mí. 7 Píwó kɩ́kármɩ́ bɛlɛ, ká bʋ́bʋ́lwɔ́ wɩ́ɛ́, rɩɩ nɛ́ kúé kéní jaa mɛ́, rɩɩ nɩ́ɩ́ va ŋmɛ́nɔ mɛ́, ɩ pɩ́nɛ mɛ́, arɩ́rɩ́ isé mí. 8 Pʋ́ŋsɩ́wɔ́ rɩ́wɔ́ a malla, a vɔ́wɩ́ nɛ́sɛ mɛ́, ká máánɩ́ tule mí, ɩ sɩ́ɛ́ pɛ́kɛ, a makɛ rɩ́ɩ́ sɩ́wɔ́ mɛ́ sʋllʋ́. 9 Pʋ́ŋsɩ́wɔ́ a máánɩ́ jaa dánnʋʋsɛ dagɛsɛ́ mɛ́, arɩ́rɩ́ tɔ́ɔ́ zeŋe ná kílú bonni mí.

Ɩzɩrayɛl nɩɛ wɩ mɔhɛ̃́ rɩ́wɔ́ sʋllɩ́wɔ́ Wɩɩsɛ mɛ́/wɩ́ɛ́

10 Nyuutɩna Wɩɩsɛ, ɩ́ Wɩɩsɛ sɩ a rɩ́ɩ́wa zʋ́ tɔ́ɔ́ ná, ʋ há ta nʋɔ a pɛ́ɩ́wa naabálwa Abɩrahaŋ rɩ́ Ɩzakɛ arɩ́ Zakɔbɛ, a bʋl rʋ́ʋ́ sɩ́ pii pɛ́ɩ́wa. Rɩ́ɩ́wa nɛ́ zʋ́ ráŋ, ɩ́ sɩ na tɔ́zeŋse arɩ́ tɔ́were ná ɩ́ raá há wɩ sɔ́ɛ́, 11 ɩ́ sɩ ná jɩɩsɛ ná há súé rɩ́ oŋwere wuu duó, ɩ́ raá há wʋ́ɔ́ ráŋ hé, vile ná ɩ́ raá há wʋ́ɔ́ lúé, víínyi rɩ́ ólíívi tuuni ná ɩ́ raá há wʋ́ɔ́ cɔ́ŋsɛ́ pɛ́ɩ́wa. Rɩɩ́wa nɛ́ kúó dí ɓɩɛ rɩ́ɩ́ vɔksɛ, 12 ɩ́ pɔ́ rɩ́ɩ́wa háá sʋllɛ Nyuutɩna Wɩɩsɛ ná há ɛ́ɛ́ ɩ́ lɛ Ezipiti mí, yomí sɩɛrʋ wɩ́ɛ́. 13 Nyuutɩna Wɩɩsɛ, ɩ́ Wɩɩsɛ nɛ́ mɔhɛ̃́ rɩ́ɩ́wa fɩ́fá, ʋ nɛ́ mɔhɛ̃́ rɩ́ɩ́wa ɓɩ́ɓaarɛ, ʋ dʋŋɔ yɩr mɛ́ nɛ́ mɔhɛ̃́ rɩ́ɩ́wa ŋmɩ́ŋmɩ́ɛ́sɛ. 14 Ɩ́ wɩ mɔhɛ̃́ rɩ́ɩ́wa ɓɩ́ɓaarɛ wɩŋsa náŋa, duowa ná há kílíwa wɩŋsa, 15 bee wɩ́ɛ́ Nyuutɩna Wɩɩsɛ, ɩ́ Wɩɩsɛ ná há mɩ́nɩ́wa sɩɛrʋ, ʋ ká bánɔŋdír rí. Ɩ́ sɩɛ́ pɔ́ wérí, rɩ́ Nyuutɩna Wɩɩsɛ, ɩ́ Wɩɩsɛ cɔ́ɛ́ háá ko wɩ́ɩ́wa, rʋ́ʋ́ zɔ́kɩ́wa tenni, rɩ́ɩ́wa nyɩ́ɩ́kɛ tíé nyúú. 16 Ɩ́ sɩ́ Nyuutɩna Wɩɩsɛ, ɩ́ Wɩɩsɛ saanʋ́, anɩ́wa há saanʋ́ ɛ́, Maasa mɛ́. 17 Ɩ́ tɩŋ Nyuutɩna Wɩɩsɛ, ɩ́ Wɩɩsɛ kíŋse. Ɩ́ tɩŋʋ́ wɩ́makɛ́ arɩ́rʋ́ wɩ́bilé ná rɩ́ taŋá, anɛ ɛ́ ʋ há mákɛ́ pɛ́ɩ́wa. 18 Ɩ́ ɔ́ʋ́ ná há cɛ́rɛ́ a pá Nyuutɩna Wɩɩsɛ, ʋ ná háá tɔ́rʋ́ sɩɛrʋ. Ɛ́ é, ɩ́ sɩ ná wér ká zʋ tɔ́wero ná sɩɛrʋ, Nyuutɩna Wɩɩsɛ há tá nʋɔ, a pii pɛ́ɩ́wa ánáwa, rɩ́ɩ́wa tɩ́llʋ́. 19 Ɩ́ sɩ́ kíríwa dɩ́ŋdɔma wuu ɩ́ sɩ́ɛ́ mɛ́, anɛ ɛ́ ʋ há bʋlɛ́.

20 Ɩ́ bɛlɛ cíé sɩ kúó bɔ́sɩ́wa a bʋlɛ́: «Wɩ́máŋsɛ nyáŋ rɩ́ wɩ́bilé nyáŋ arɩ́ wɩ́makɛ́ nyáŋ Nyuutɩna Wɩɩsɛ, á Wɩɩsɛ ha bílé pɛ́ɩ́wa, mʋ́ʋ́la nɛ́ beé rí>>» 21 Rɩ ɓa nɛ́ bɔ́sɩ́wa ɛ́ ɩ́ bʋlɛ: «Á fa ká Faarɔŋ yósi ní Ezipiti mí, ɛ́ nɛ́ Nyuutɩna Wɩɩsɛ tɩ́ŋʋ́ vadóé mí a lɩ́sɩ́rá. 22 Ɩ́ sɩ́ɩ́ mɛ́, Nyuutɩna Wɩɩsɛ tʋ́ŋ wɩ́nyɩnɛ rɩ́ nyáŋsɛ ɓɩzeŋsi a cɛ́ Ezipiti mí, wɩɩla peri Faarɔŋ rɩ́rʋ́ jaa arɩ́rʋ́ nɩɛ wuu. 23 Ʋ lɩ́sɩ́rá ráŋ, rʋ́ʋ́ káŋrá zʋ tɔ́ɔ́ ná sɩɛrʋ ʋ fa há tá nʋɔ párá ánáwa, rʋ́ʋ́ sɩ́ pii párá nɛ́. 24 Ɛ́ tɛ́ŋ mɛ́, Nyuutɩna Wɩɩsɛ fa sɛ́ ráá tɩŋ wɩ́bilé nyáŋ wuu, ká bubú é Nyuutɩna Wɩɩsɛ, á Wɩɩsɛ. Ɛ́ é, á sɩ ná wér tɛ́ŋ wuu mí, ká rʋ́ʋ́ lo ráá ká mɩɩsɛ. Ɛ́ nɛ́ tɛ, á zaá há mɩŋ nyɛ. 25 Raá nɛ́ tɩ́ŋ kíŋse nyáŋ wuu weri, anɛ ɛ́ Nyuutɩna Wɩɩsɛ, á Wɩɩsɛ há mákɛ́ párá, á sɩ́ a nɩtaŋáwa ʋ sɩ́ɛ́ mɛ́.»