Tɔ́ɔ́ ná susúbɔnnɛ
34
1 Nyuutɩna Wɩɩsɛ bʋ́l Moyizi rɩ́ a bʋlɛ́: 2 «Máŋsɛ wɩ́ɛ́ nyáŋ a pá́ Ɩzɩrayɛl nɩɛ: Rɩ́ɩ́wa nɛ́ kúé zʋ́ Kana tɔ́ɔ́ ná sɩɛrʋ, ná tɔ́ɔ́ ná há sɩ ɛ́ɩ́wa ker(liwe): Kana tɔ́ɔ́ arɩ́rʋ́ susúbʋɔnnɛ. 3 Tɔ́ɔ́ lʋ́lɔ́ŋɛ néduu rɩ́, ɩ́ susúbʋɔ dɩpúli nɩ ká Siŋ gɩrbétéke arɩ́ Edoŋ tɔ́ɔ́. Tɔ́ɔ́ mʋ́l rɩ́, ɛ́ tɔ́ɔ́ lʋ́lɔ́ŋɛ néduu rɩ́ susúbʋɔ sɩ tɩ́ɛ́nɛ a mʋ́ lɛ Mʋsʋwɩ nʋɔ. 4 Ɩ́ susúbʋɔ ná sɩ bɩrɛ a tɩŋ Nʋɔnnɛ dúŋduóŋ tɔ́ɔ́ lʋ́lɔ́ŋɛ néduu rɩ́, a tɩŋ Siŋ a mʋ́ lɛ Kadɛsɛbarɛnɛya tɔ́ɔ́ lʋ́lɔ́ŋɛ néduu rɩ́, a daarɛ mʋ́ lɛ Hatisaradaare a tɩŋ Asɩmɔŋ rɩ́. 5 A lɛ Asɩmɔŋ mɛ́ a bɩrɛ a tɩŋ Ezipiti polcʋɔrɛ, a mʋ́ peri mʋʋ. 6 Tɔ́ɔ́ nyúú rɩ́, ɩ́ susúbʋɔ nɩ ká Mʋzeno. 7 Néíwa susúbʋɔ tɔ́ɔ́ lʋ́lɔ́ŋɛ nɛ́gʋɔ rɩ́: Ɩ́ pɔ́ Mʋzeno mi ká mallɛ a mʋ́ lɛ Hɔr paalɔ. 8 Ɩ́ pɔ́ Hɔr paalɔ mɛ́, ká mallɛ a mʋ́ lɛ Lebohamate. Ɩ́ susúbʋɔ ná sɩ daarɛ a mʋ́ lɛ Sedade, 9 a daarɛ tɩŋ Zifiroŋ, a mʋ́ peri Hasarɩnaŋ: ɩ́ tɔ́ɔ́ nyúú rɩ́ susúbʋɔ nɛ́ ɛ́. 10 Ɩ́ pɔ́ Hasarɩnaŋ mɛ́ ká mallɛ a mʋ́ peri Sefame. 11 Susúbʋɔ ná sɩ lɩ Sefame mi a mʋ́ Ribila, Ayiŋ tɔ́ɔ́ mʋ́l rɩ́, a daarɛ tuwi peri Kinereti mʋʋ nʋɔ tɔ́ɔ́ mʋ́l rɩ́. 12 Ɩ́ susúbʋɔ ná sɩ daarɛ tuwi Zʋrdɛŋ fuo rɩ́, a mʋ́ peri Mʋsʋwɩ. Ɩ́ tɔ́ɔ́ ná rɩ́rʋ́ kilo susúbɔnnɛ nɛ́ ɛ́.»13 Moyizi máŋsɛ wadawa nyáŋ a pá́ Ɩzɩrayɛl nɩɛ a bʋlɛ́:« Ná tɔ́ɔ́ ná ɩ́ há sɩ yó bie a kaá ɓá, ɛ́ tɔ́ɔ́ nɛ́ Nyuutɩna Wɩɩsɛ tá ŋmɛ́nɔ rɩ́wɔ ɓá a pá́ jɩmʋ́ʋ́la ná nɛ́mɛ́ arɩ́ jɩmʋ́lfá ná. 14 Beéwɩ́ɛ́ Rubaŋ bɛlɛ jɩmʋ́l rɩ́wɔ́ jaa nɩɛ arɩ́ Gadɛ bɛlɛ rɩ́wɔ́ jaa nɩɛ lawɔ́ ker, Manase jɩmʋ́l ná fá má lɔ́ʋ́ ker. 15 Jɩmʋ́ʋ́la nyáŋ bɛllɛ arɩ́ jɩmʋ́l ná fá ná lawɔ́ kere Zʋrdɛŋ fuo daarɛ nɛ́, a caasɛ Zeriko tɔ́ɔ́ mʋ́l rɩ́.» 16 Nyuutɩna Wɩɩsɛ bʋ́l Moyizi rɩ́ a bʋlɛ́: 17 «Ná báála ná há sɩ ɓá tɔ́ɔ́ ná a pɛ́ɩ́wa yɩra: vɔk'ɔ́ɔ́sɔ Ɩlɩyazarɛ arɩ́ Zozie há ká Nuŋ bio. 18 Ɩ́ baá sɩ lɩ́sɛ sɩdiiró jɩmʋ́l wuu sɩɛrʋ, rɩ́wɔ ká tɔ́ɔ́ ná ɓa. 19 Ná ɛ́ báála yɩra: Zida jɩmʋ́l sɩɛrʋ, Kalɛbɛ há ká Yefune bio ni. 20 Sɩmɩyɔŋ bɛlɛ jɩmʋ́l sɩɛrʋ: Samɩɛl há ká Amihudi bio ni. 21 Bɛŋzamɛ jɩmʋ́l sɩɛrʋ: Elidade há ká Kɩlɔŋ bio ni. 22 Daŋ bɛlɛ jɩmʋ́l sɩɛrʋ: sɩdiiró ni ká Buki, Yogili bio. 23 Manase há ká Zɔzɛfɛ bio jɩmʋ́l sɩɛrʋ: sɩdiiró ni ká Hanɩɛl, Efodi bio; 24 Ɩfɩrayɩŋ bɛlɛ jɩmʋ́l sɩɛrʋ: sɩdiiró ni ká Kemuyel, Sifitaŋ bio. 25 Zabɩlɔŋ bɛlɛ jɩmʋ́l sɩɛrʋ: sɩdiiró ni ká Elisafaŋ, Parɩnakɛ bio. 26 Ɩsakarɛ bɛlɛ jɩmʋ́l sɩɛrʋ: sɩdiiró ni ká Palɩtɩɛl, Aazaŋ bio. 27 Azɛrɛ bɛlɛ jɩmʋ́l sɩɛrʋ: sɩdiiró ni ká Ahihudi, Selomi bio. 28 Nɛfɩtalɩ bɛlɛ jɩmʋ́l sɩɛrʋ: sɩdiiró ni ká Pedahel, Amihudi bio.» 29 Ɓa nyáŋ nɛ́ Nyuutɩna Wɩɩsɛ pá́ ŋmɛ́nɔ rɩ́wɔ́ ká Kana tɔ́ɔ́ ná a ɓa a pá́ Ɩzɩrayɛl nɩɛ.