Ɩzɩrayɛl há lɛ Ezipiti mɛ́ Nabuke
33
1 Ná Ɩzɩrayɛl nɩɛ ná há hé lɛɛwa anɛ sóójiwa a lɛ Ezipiti mɛ́, Moyizi rɩ́ Aarɔŋ la sɩ́ɛ́ a káŋwɔ va nabuke. 2 Moyizi pʋ́ŋsɩwɔ nabuke ɓa valɛ́ sɩɛrʋ anɛ Nyuutɩna Wɩɩsɛ fa mákɛ́. Nówó nabuke ɓa valɛ́ sɩɛrʋ.3 Ɓa isí Ramɩsɛsɛ mɛ́, dʋ́ŋdʋ́ʋ̃́ cana tapʋlɛ fí arɩ́ bɔmmʋ́ɔ́ kal nɛ́. Pakɛ cana há die tɔ́ɔ́ pʋ́l nɛ́ Ɩzɩrayɛl nɩɛ lɛ Ezipiti mi nyáámí, kɛ́rɛ́ wɩ kɛrɛ́. 4 Ká Ezipiti tɩ́nawa fa huhúríwó bihɩ́ɛ̃́sɛ ná Nyuutɩna Wɩɩsɛ há ŋmɔ́sɛ́ ɓa sʋsɛ. Nyuutɩna Wɩɩsɛ fa tʋŋ ɛ́ rʋʋ́ cɩ́ŋwɔ wɩŋsa mɛ́ nɛ́. 5 Ɩzɩrayɛl nɩɛ lɛ Ramɩsɛsɛ mɛ́, a mʋ́ ciki Sʋkɔtɛ mɛ́. 6 Ɩzɩrayɛl nɩɛ isi Sʋkɔtɛ mɛ́ a mʋ́ ciki Etaŋ mɛ́ gɩr nʋɔ. 7 A isi Etaŋ mɛ́ a bɩr mʋ́ Pɩhahɩrɔtɛ rɩ́, a caasɛ Balsɩfɔŋ rɩ́, a ciki Mɩgdɔl sɩ́ɛ́. 8 Ɓa isi Pɩhahɩrɔtɛ sɩ́ɛ́ a zʋ́ mʋʋ sɩɛrʋ a caasɛ gɩrbétéke; a va tapʋlɛ botoro Etaŋ gɩrbétéke ná sɩɛrʋ, a mʋ́ ciki Mara mɛ́. 9 Ɓa isi Mara mɛ́ a mʋ́ peri Elimi, fuonni fí rí bɛllɛ arɩ́ habɛ́ tuuni mɛɛ́sɩbotoro rí fí ní mɩŋ ráŋ. Ɛ́nɛ́ ɓa ciki ráŋ. 10 Ɓa isi Elimi mɛ́ a mʋ́ ciki Zɔŋkɩwa mʋʋ laka. 11 Ɓa isi Zɔŋkɩwa mʋʋ mɛ́ a mʋ́ ciki Siŋ gɩrbétéke sɩɛrʋ. 12 Ɓa isi Siŋ gɩrbétéke sɩɛrʋ a mʋ́ ciki Dɔfɩka mɛ́. 13 Ɓa isi Dɔfɩka mɛ́ a mɛ́ ciki Alusi mi. 14 Ba isi Alusi mi a mʋ́ ciki Refidiŋ mi, ráŋ nɛ́ jamáŋ ja nyii gúl rʋʋ́ nyɔ́. 15 Ɓa isi Refidiŋ mi a mʋ́ ciki Sinayi gɩrbétéke sɩɛrʋ. 16 Ɓa isi Sinayi gɩrbétéke mɛ́ a mʋ́ Kɩbrɔtɛtaava mɛ́. 17 Ɓa isi Kɩbrɔtɛtaava mɛ́ a mʋ́ ciki Hasɩrɔtɛ mɛ́. 18 Ɓa isi Hasɩrɔtɛ mɛ́ a mʋ́ ciki Ritima mɛ́. 19 Ɓa isi Ritima mɛ́ a mʋ́ ciki Rɩmɔŋpɛrɛtɛ mɛ́. 20 Ɓa isi Rɩmɔŋpɛrɛtɛ mɛ́ a mʋ́ ciki Libina mɛ́. 21 Ɓa isi Libina mɛ́ a mʋ́ ciki Risa mɛ́. 22 Ɓa isi Risa mɛ́ a mʋ́ ciki Kehelata mɛ́. 23 Ɓa ísí Kehelata mɛ́ a mʋ́ ciki Sɛfɛɛrɛ mɛ́. 24 Ɓa isi Sɛfɛrɛ mɛ́ a mʋ́ ciki Harada mɛ́. 25 Ɓa isi Harada mɛ́ a mʋ́ ciki Makelote mi. 26 Ɓa isi Makelote mɛ́ a mʋ́ ciki Tahate mi. 27 Ɓa isi Tahati mɛ́ a mʋ́ ciki Tarate mi. 28 Ɓa isi Tarate mɛ́ a mʋ́ ciki Mitika mɛ́. 29 Ɓa isi Mitika mɛ́ a mʋ́ ciki Hasimona mɛ́. 30 Ɓa isi Hasimona mɛ́ a mʋ́ ciki Moserote mɛ́. 31 Ɓa isi Moserote mɛ́ a mʋ́ ciki Beneyaakaŋ mɛ́. 32 Ɓa isi Beneyakaŋ mɛ́ a mʋ́ ciki Hɔrɩgɩdɩgadɛ mɛ́. 33 Ɓa isi Hɔrɩgɩdɩgadɛ mɛ́ a mʋ́ ciki Yotibata mɛ́. 34 Ɓa isi Yotibata mɛ́ a mʋ́ ciki Abrona mi. 35 Ɓa isi Abrona mɛ́ a mʋ́ ciki Ɩsɩɔgɛbɛɛrɛ mɛ́. 36 Ɓa ísí Ɩsɩɔgɛbɛɛrɛ mɛ́ a mʋ́ ciki Siŋ gɩrbétéke sɩɛrʋ, Kadɛsɛ mɛ́. 37 Ɓa isi Kadɛsɛ mɛ́ a mʋ́ ciki Hɔr paalɔ mɛ́, Edoŋ tɔ́ɔ́ nʋɔ. 38 Vɔk'ɔ́ɔ́sɔ Aarɔŋ zɩ Hɔr paalɔ daha anɛ ɛ́ Nyuutɩna Wɩɩsɛ fá makɛ́; a sʋwɛ ráŋ, ɓa há lɛ Ezipiti mi bɩŋsɛ mɛɛ́sɛllɛ nyúú mi, cáŋsɛ bɔmmʋ́ɔ́ nyúú mi dʋ́ŋdʋ́ʋ̃́ tapʋl nɛ́. 39 Aarɔŋ kúó aá sʋwɛ Hɔr paalɔ ná nyúú, rʋʋ́ fá kéŋ bɩŋsɛ zɔlɔ rɩ́ mɛrɛ́ arɩ́ botoro. 40 Arade há ká Kananɩ́ɛ̃́wa kuóro a mɩŋ Nɩgɛɛbɛ mɛ́ Kana tɔ́ɔ́ sɩɛrʋ, nɛ́ Ɩzɩrayɛl nɩɛ kúé wɩ́ɛ́.
41 Ɩzɩrayɛl nɩɛ ísí Hɔr paalɔ mɛ́ a mʋ́ ciki Salmona mɛ́. 42 Ɓa isi Salmona mɛ́ a mʋ́ ciki Punoŋ mɛ́. 43 Ɓa isi Punoŋ mɛ́ a mʋ́ ciki Oboti mi. 44 Ɓa isi Oboti mi a mʋ́ ciki Liye'abarimi mi, Mʋabɛ susúbʋɔ mɛ́. 45 Ɓa isi Liye'abarimi mi a mʋ́ ciki Dɩbɔgadɛ mɛ́. 46 Ɓa isi Dɩbɔgadɛ mɛ́ a mʋ́ ciki Alɩmɔdɩbɩlatayɩmɩ mɛ́. 47 Ɓa isi Alɩmɔdɩbɩlatayɩmɩ mɛ́ a mʋ́ ciki Abarimi pallɛ sɩɛrʋ, Nebo sɩ́ɛ́. 48 Ɓa isi Abarimi pallɛ sɩɛrʋ a mʋ́ ciki Mʋabɛ polo mi, Zʋdɛŋ fuo laka a caasɛ Zeriko. 49 Ɓa ciki Zʋrdɛŋ fuo laka a pɔ́ Bɛtɩhayɛsɩmɔtɛ mɛ́ ká mʋ́ peri Abɛlsɩtɩmɩ mɛ́, Mʋabɛ polo mi.
Nyuutɩna Wɩɩsɛ tá ŋmɛ́nɔ rɩ́wɔ́ ɓá Kana tɔ́ɔ́
50 Nyuutɩna Wɩɩsɛ bʋ́l Moyizi rɩ́ Mʋabɛ polo mi Zʋrdɛŋ fuo laka, a caasɛ Zeriko rɩ́ a bʋlɛ́: 51 « Bʋ́l Ɩzɩrayɛl nɩɛ rɩ́ a bʋlɛ́: Rɩɩ́wa nɛ́ kúé́ daarɛ Zʋrdɛŋ rɩɩ́ zʋ́ Kana tɔ́ɔ́ sɩɛrʋ, 52 ɩ́ kiri tɔ́ɔ́ ná nɩɛ wuu, a zɔ́kɩ́wɔ dɔwʋ́ɔ́ veŋgúlli wuu, a zɔ́kɩ́wɔ hɔcʋ́ɔ́rɛ veŋgúlli arɩ́ venni jɩɩsɛ wuu. 53 Ɩ́ la tɔ́ɔ́ ná a kenʋ́ sɩɛrʋ; beéwɩ́ɛ́ ŋ pi ɛ́ tɔ́ɔ́ pɛ́ɩ́wa rɩ́ɩ́wa tɩllʋ́ nɛ́. 54 Ɩ́ yó biyolli a ká tɔ́ɔ́ ná ɓá náŋá a tɩŋ duówa. Duó ná nɩɛ há kánɔ́, ɩ́ ló rʋʋ́ ker a zeni ká duó ná nɩɛ há wɩ káŋ, ɩ́ ló rʋʋ́ ker múúri. A tɩŋ biyólli ná mɛ́ nɛrɔ wuu sɩ nó ker, a tɩŋɩ́wa ánáwa jɩmʋ́ʋ́la mɛ́. 55 Amá rɩɩ́wa nɛ́ wɩ tɔ́ɔ́ ná nɩɛ ná kiré, nɩɛ ná há sɩ káánɛ sɩ de nɛ́ mópuru ɩ́ sɩ́ɛ́ mɛ́ arɩ́ hɛmɛ ɩ́ lokursi mi, ɓa sɩ bɛŋsɩ́wɔ tɔ́ɔ́ ná sɩɛrʋ ɩ́ há sɩ ké. 56 Ká rɩ́ŋ púú ná ŋ fá há bɩɩnɛ́ rɩ́ŋ pii ɔ́wɔ́ mɛ́, a ɛ́ɛ́wa mɛ́.»