Tɔ́nɛ́ botoro ké Zʋrdɛŋ fuo daarɛ
32
1 Rubaŋ bɛlɛ arɩ́ Gadɛ bɛlɛ pʋsɛ fa púló kɩ́ŋkáŋ wéri. Ɓa nóú rɩ́ Yazɛrɛ rɩ́ Galaadɛ tíé wéró a pɔ́wɔ́ pʋsɛ. 2 Ɛ́nɛ́ ɓa ko bʋ́l Moyizi rɩ́ vɔk'ɔ́ɔ́sɔ Ɩlɩyazarɛ arɩ́ jamáŋ ná sɩdiire rɩ́ a bʋlɛ́: 3 «Atarɔtɛ, Dɩbɔŋ, Yazɛrɛ, Nɩmɩra, Ɛsɩbɔŋ, Ɩlɩyalɩ, Sebaŋ, Nebo arɩ́ Bɩhɔŋ, 4 ɛ́ tɔ́ɔ́ Nyuutɩna Wɩɩsɛ há lɛɛ pá́ Ɩzɩrayɛl nɩɛ, wero a pá́ pʋsɛ; ɩ tʋtʋnna sɩɛ́ kéŋ pʋsɛ. 5 Ɓa baá sɛ́:« Rɩɩ́ saŋʋ́, ɩ ló rɩɩ́ tʋtʋnna tɩllɛ tɔ́ɔ́ né, ká sɩ ló rá daarɛ Zʋrdɛŋ fuo daarɛ.» 6 Moyizi bʋ́lwɔ́ rɩ a bʋlɛ́:« Rɩɩ́wa máábináŋa mʋ́ lal ká rɩ́ɩ́wa é káánɛ rɛ́>> 7 Beéri tɛ́ ɩ́ jɩja rɩɩ́wa yʋ́ɔ́rɛ Ɩzɩrayɛl nɩɛ naasɛ rɩ́ ɓa sɩ́ tɔ́ɔ́ ná Nyuutɩna Wɩɩsɛ há pie pɔ́wɔ́ sɩɛrʋ zʋ́>> 8 Ɛ́nɛ́ ɩ́ ánáwa tʋŋ tɛ́ŋ ná mɛ́ ŋ há cɩ Kadɛsɛbarɩnɩya mɛ́ ká tʋŋwɔ́ rɩ́wɔ mʋ́ kɩ́ɛ́lɛ tɔ́ɔ́ ná. 9 Ɓa há mʋ́ɔ́ peri Ɛsɩkɔl polcʋ́ɔ́rɛ, a kɩ́ɛ́lɛ tɔ́ɔ́ ná ko tenni, ɓa yʋ́ɔ́rɛ Ɩzɩrayɛl nɩɛ naasɛ rɩ́wɔ sɩ tɔ́ɔ́ ná Nyuutɩna Wɩɩsɛ fa há pie pɔ́wɔ́ sɩɛrʋ zʋ́. 10 Nyuutɩna Wɩɩsɛ cɔ́ɛ́ isó ɛ́ kal, ɛ́nɛ́ ʋ ŋmɩ́ɛ́sɛ a bʋlɛ́: 11 « Báála nyáŋ há lɩ Ezipiti mi, rɩ́wɔ kéŋ bɩŋsɛ mɛrɛ́ arɩ́ dɔwɛ, wɩ tíé ná ŋ há tá nʋɔ a bʋ́lɩŋ sɩ pii pá́ Abɩrahaŋ, Ɩzakɛ arɩ́ Zakɔbɛ sɩɛrʋ zʋ́, beéwɩ́ɛ́ ɓa wɩ́ŋ ŋmɛ́nɔ ná weri tɩ́ŋɛ́, 12 rɩ́ Kalɛbɛ há ká Yefune ná ká Kɩnɩzɩ́ɛ̃́ bio, arɩ́ Zozie há ká Nuŋ bio dʋŋɔ rá, wɩ Nyuutɩna Wɩɩsɛ ŋmɛ́nɔ ná tɩ́ŋɛ́ arɩ́ taŋá. 13 Nyuutɩna Wɩɩsɛ cɔ́ɛ́ púsi Ɩzɩrayɛl mɛ́, ʋ a ɓa va gɩrbétéke sɩɛrʋ bɩŋsɛ mɛɛ́sɛllɛ, duó ná há fá aa zɔkɛ Wɩɩsɛ mɛ́ wuu sʋsɛ. 14 Sɩɛ́ nóú ni, ɩ́ má wɩbɔŋ'aára duó, ɩ́ piiwa ánáwa nabuke rɩɩ́wa ɔsɛ púsi Nyuutɩna Wɩɩsɛ cɔwɩ́ɩ́lɔ hé Ɩzɩrayɛl mɛ́. 15 Beéwɩ́ɛ́, rɩɩ́wa nɛ́ vɔ́ʋ́ mɛ́ tɩ́ŋɛ́, ʋ baá sɩ ló rɩ Ɩzɩrayɛl zʋ́ gɩrbétéke sɩɛrʋ, ʋ ɛ́ rɩɩ́wa nɛ́ yikí jamáŋ né wuu hé ɓalɛ sɩɛrʋ.» 16 Ɓa tuuperi Moyizi a bʋ́lʋ́ rɩ́ a bʋlɛ́:« Á sɩ sɔ́ jɩɩsɛ rɛ́ a pá́rá pʋsɛ ká sɔ́ tɔ́nɛ́ a pá́rá bɛlɛ; 17 ká rá tɩɩ pá lalyóórícɩksɛ kɩ́kɛ́lɛ a di Ɩzɩrayɛl nɩɛ sɩ́ɛ́, a káŋwɔ períwó dɩpérí. Á bɛlɛ sɩ káánɛ tɔ́nɛ́ ná á sɔ́ɛ́ ɓa á dɩyúóle sɩɛrʋ, a tɩŋ tɔ́ɔ́ ná nɩɛ wɩ́ɛ́. 18 Á waá bɩr mʋ́ jɩɩsɛ rɩ Ɩzɩrayɛl nɛ́ŋ wuu nɩ wʋʋ́ liwe (ker) lɛɛ. 19 Á sɩɛ́ baá wɩ liwe má wúó ná ɓa rɩ́ Zʋrdɛŋ fuo daarɛ, beéwɩ́ɛ́ a liwe mɩŋ cɔɔ né́ ni, Zʋrdɛŋ fuo tɔ́ɔ́ mʋ́l.» 20 Moyizi bʋ́l Rubaŋ rɩ́ Gadɛ bɛlɛ ná rɩ́ a bʋlɛ́:«Rɩɩ́wa nɛ́ tɩŋɩ́wa wɩbʋ́lɩ́ né, rɩɩ́ pá́ lalyóórícɩksɛ rɩɩ́ la Nyuutɩna Wɩɩsɛ sɩ́ɛ́ a yó lal, 21 rɩɩ́wa nɩɛ ná wuu há pá́ lalyóórícɩksɛ nɛ́ la Nyuutɩna Wɩɩsɛ sɩ́ɛ́ rɩɩ́ daarɛ Zʋrdɛŋ fuo ná, rʋʋ́ kírú dɩŋdɔma ʋ sɩ́ɛ́ mɛ́, 22 rɩ́ Nyuutɩna Wɩɩsɛ nɛ́ di bállɩ́ ɛ́ tɔ́ɔ́ mɛ́, ká rɩɩ́wa sɩɛ́ zɩŋ bɩrɛ, ʋ ɛ́ ɩ́ rɩ́ Nyuutɩna Wɩɩsɛ wɩ wɩ́ɩ́ kené, ɩ́ rɩ Ɩzɩrayɛl má wɩ wɩ́ɩ́ kené, ká Nyuutɩna Wɩɩsɛ sɩ́ɛ́ mɛ́, tɔ́ɔ́ né sɩ ɛ́ɛ́wa liwe. 23 Amá rɩɩ́wa nɛ́ wɩ ɛ́ tɩŋɛ́, ɩ́ aa zɔkɛ Wɩɩsɛ mɛ́, ɩ́ zɩŋ rɩɩ́wa bɔ́ŋbɔ́ŋ sɩ bɩr dííwa tɩɩ nɛ́. 24 Ɩ́ sɔ jɩɩsɛ a pɛ́ɩ́wa bɛlɛ arɩ́wa pʋwɩɛla, ká tʋmʋ́ ná má ɩ́ nʋɔ há bʋlɛ́.»25 Gadɛ arɩ́ Rubaŋ bɛlɛ bʋ́l Moyizi rɩ́ a bʋlɛ́:«Ɩ tʋtʋnna sɩ tʋŋ ɛ́ ná ŋ nyúútɩna há makɛ́. 26 A bɛlɛ, a háála, a pʋwɩɛla* arɩ́rá pʋzeŋse wuu sɩ káánɛ Galaadɛ tɔ́nɛ́ sɩɛrʋ; 27 ká a há kɛ́ɩ́ tʋtʋnna, rá wuu pá́ lalyóórícɩksɛ a yó lal Nyuutɩna Wɩɩsɛ yɩr mɛ́ anɛ ɛ́ ŋ nyúútɩna há mákɛ́.»
28 Moyizi makɛ́ wɩ́ɛ́ a pɔwɔ a tɩŋ vɔk'ɔ́ɔ́sɔ Ɩlɩyazarɛ rɩ́ Zozie há ká Nuŋ bio arɩ́ jɩtɩnawa ná há mɩŋ Ɩzɩrayɛl nɩɛ jɩmʋ́ʋ́la ná sɩɛrʋ. 29 Moyizi bʋ́lwɔ rɩ́ a bʋlɛ́:« Rɩ Gadɛ arɩ́ Rubaŋ bɛlɛ wuu ni pá́ lalyóórícɩksɛ rɩɩ́wa hé náŋá daarɛ zʋrdɛŋ fuo daarɛ, rɩɩ́wa yó lal Nyuutɩna Wɩɩsɛ yɩr mɛ́, rɩɩ́wa lá tɔ́ɔ́ ná, ɩ́ pi Galaadɛ tɔ́ɔ́ pɔwɔ. 30 Amá rɩ́ ɓa wuu ni wɩ lalyóórícɩksɛ pɛ́ɛ́ rɩɩ́wa hé náŋa daarɛ, ɓaá kéníwa sɩɛrʋ nɛ́ Kana tɔ́ɔ́ mɛ́.» 31 Ɛ́nɛ́ Gadɛ arɩ́ Rubaŋ bɛlɛ ná sɛ́: «Á sɩ ɔ́ɔ́ ná Nyuutɩna Wɩɩsɛ há bʋlɛ́ pɛ́ɩ́ tʋtʋnna. 32 Á wuu sɩ pá́ lalyóórícɩksɛ Nyuutɩna Wɩɩsɛ yɩr mɛ́ a mʋ́ Kana; amá a ker dɩmɩnɩ́ nɩ ká Zʋrdɛŋ fuo cɔɔ né.»
33 Moyizi pi Sɩyɔŋ há ká Amɔŋ tɩ́nawa kuóro arɩ́ Ɔgɛ há ká Basaŋ tɩ́nawa kuoro dɩtɩllɛ́ tɔ́nɛ́ arɩ́wɔ́ tíé arɩ́wɔ laka tɔ́ɔ́ dɩtɩllɛ́ rɩwɔ tíé a pá́ Gadɛ rɩ Rubaŋ bɛlɛ arɩ́ Manase há ká Zɔzɛfɛ bio jɩmʋ́l cɔɔ fá.
34 Gadɛ bɛlɛ sɔ́ Dɩbɔŋ, Atarɔtɛ, Arɔyɛrɛ, 35 Atʋrɔtɛsʋfaŋ, Yazɛrɛ, Yogbehaŋ, 36 Bɛtɩnɩmɩra arɩ́ Bɛtɩharaŋ, ɓa sɔ́wɔ́ ɓa a dɩyúóle ká sɔ́wɔ́ pʋsɛ má jɩɩsɛ.
37 Rubaŋ bɛlɛ bɩ́rɔ́ sɔ́ Ɛsɩbɔŋ, Ɩlɩyalɛ arɩ́ Kiriyatayimi, 38 Nebo arɩ́ Baalɩmɩyɔŋ, a bɩ́rsɩ́wɔ́ yɩra ká sɔ́ Sɩbɩma má, ká hé yɩra pá́ tɔ́nɛ́ ná ɓa há bɩrɛ sɔ́.
39 Makiri ha ká Manase bio, duó nɩɛ ísó mʋ́ yó Galaadɛ a kiri Amɔrɩ́ɛ̃wa ná fa há mɩŋ ráŋ ká tɩllʋ́. 40 Moyizi pi Galaadɛ a pá́ Makiri há ká Manase bio, ʋ ké ráŋ. 41 Yahiri há ká Manase bio nɔ́ŋɔ, isi a yó a la tɔ́wɩ́ɛ́la náŋa a káŋwɔ aá yɩɛ"Yahiri tɔ́nɛ́". 42 Noba yó la Kɩnatɛ rɩ́rʋ́ laka tɔ́nɛ́, a pú tɩɩ yɩr hé pɔ́ʋ́ aá yɩrɛ Noba.