30
1 Moyizi césí wɩ́ɛ́ ná wuu Nyuutɩna Wɩɩsɛ há máŋsɛ pɔ́ʋ́ a pá́ Ɩzɩrayɛl nɩɛ.Nʋtallɛ wadawa wɩ́ɛ́
2 Moyizi bʋ́l Ɩzɩrayɛl jɩmʋ́ʋ́la sɩdiire ná rɩ́ a bʋlɛ́:« Ná Nyuutɩna Wɩɩsɛ há sʋʋ́ ná: 3 Rɩ́ bál ta nʋɔ rɩ́ pá́ Nyuutɩna Wɩɩsɛ ɛ́ rá má rʋ́ nɛ́ vɔwʋ́ tɩɩ rʋ́ a wɩ́ɩ́, ʋ wɩ mɔhɛ̃ rʋ́ bɩrʋ́ nʋɔ har, ʋ mɔhɔ̃́ rʋ́ tɩŋʋ́ nʋɔ há sʋʋ́ ná wuu.
4 Rɩ́ hál rɩ ká tuóper rɩ́ mɩnʋ́ áná jaa mɛ́, rɩ́ ta nʋɔ rɩ́ pá́ Nyuutɩna Wɩɩsɛ ɛ́ rá má rʋ́ nɩ vɔwʋ́ tɩɩ rʋʋ́ a wɩ́ɩ́, 5 rʋ́ áná nɛ́ nɩ́ɛ̃́ rʋ́ tá nʋɔ, a vɔwʋ́ tɩɩ rʋ́ a wɩ́ɩ́, rʋ́ áná nɩ wɩ bʋlɛ́, ʋ nʋtalɔ ná waá giri, ʋ há vɔwʋ́ tɩɩ rʋ́ ɔɔ́ ná má waá giri. 6 Amá rʋ́ áná vɛ́ɛ́, kal ná ʋ há nɛ́ ɛ́ wɩ́ɛ́, ʋ nʋtallɛ ná rɩ́rʋ́ há vɔwʋ́ tɩɩ rʋ́ a wɩ́ɛ́ ná wuu giró ni, Nyuutɩna Wɩɩsɛ sɩ hóú súúri, beéwɩ́ɛ́ ʋ áná nɛ́ wɩ saŋɛ́.
7 Rʋ́ nɛ́ ká balá tɩna, rɩ́ tá nʋɔ ɛ́ rá má rʋ́ nʋɔ nɛ́ fore rʋ́ vɔwʋ́ tɩɩ rʋ́ a wɩ́ɩ́ ʋ balá har mɛ́, 8 rʋ́ balá ko nɛ́, rʋ́ nɩ wɩ wɩ́ɩ́ bʋ́lɛ kal ná ʋ nɩ́ɛ̃́, ʋ nʋtallɛ ná rɩ́rʋ́ há vɔwʋ́ tɩɩ rʋ́ a wɩ́ɛ́ ná waá giri. 9 Amá kal ná ʋ balá há nɩ́ɛ̃́, a bʋ́lʋ́ wɩ saŋɛ́, ʋ girú́ nɔtalɔ ná rɩ́rʋ́ nʋɔ há fore ʋ vɔwʋ́ tɩɩ rʋ́ ɔ́ɔ́ ná nɛ́, Nyuutɩna Wɩɩsɛ sɩ hóú súúri. 10 Yuháálɔ ɛ́ rá má hákiritáálɛ nʋtalɔ rɩ́rʋ́ há vɔwʋ́ tɩɩ rʋ́ ɔ́ɔ́ ná waá giri ʋ tɩɩ yɩr mɛ́. 11 Rɩ hál rɩ mɩnʋ́ balá jaa mɛ́, rɩ́ tá nʋtalɔ ɛ́ rá má rɩ́ vɔwʋ́ tɩɩ rʋʋ́ a wɩ́ɩ́, 12 rʋ́ balá nɛ́ nɩ́ɛ̃́ ká taŋŋʋ́ nʋɔ a wɩ vɛ́ɛ́, ʋ nʋtallɛ ná rɩ́rʋ́ há tá nʋɔ rʋ́ a wɩ́ɛ́ ná, waá giri. 13 Amá kal rʋ́ balá nɩ nɩ́ɛ̃́ rɩɩ́ vɛ́, ʋ há tɩŋ wɩ́ɛ́ ná mɛ́ tá nʋɔ ká vɔwʋ́ tɩɩ rʋʋ́ a wɩ́ɛ́ ná, baá tó ɓɩgiele, ʋ balá giriwo, Nyuutɩna Wɩɩsɛ sɩ hóú súúri. 14 Ʋ balá wóú nʋtalɔ rɩ́rʋ́ há vɔwʋ́ tɩɩ rʋʋ́ a nʋvɔwɔ ná aá giri, a wóllú ló ʋʋ́ cɩ́ má. 15 Rʋ́ balá nɩ wɩ wɩ́ɩ́ bʋlɛ́ ʋ rɩ́ ká rɩ́ tɔ́ɔ́ pʋ́l, ʋ saŋʋ́ nʋtallɛ ná wuu rɩ́rʋ́ há vɔwʋ́ tɩɩ a wɩ́ɛ́ ná nɛ́, a tɩŋʋ́ há wɩ wɩ́ɩ́ bʋlɛ́ ʋ rɩ́ kal ná ʋ há nɛ́ ɛ́ wɩ́ɛ́. 16 Amá rʋ́ giriwo kal ná ʋ há nɩ́ɛ̃́ harɩ́ mɛ́, ʋ nɩɩ́ cɩɩ́nʋ́ háálɔ wɩbɔmɔ wɩ́ɩ́la.»
17 Nyáŋ nɩ ká wɩ́ɛ́ ná Nyuutɩna Wɩɩsɛ makɛ́ a pá́ Moyizi a mʋ́ tɩ́ɩ́nɛ báálɔ rɩ́rʋ́ háálɔ, ɛ́ rá má báálɔ rɩ́rʋ́ toló, ha há ká tuóper a mɩnʋ́ jaa mɛ́.