Vʋka ɔ́sɛ́ wadawa
Tapʋl wuu vʋk'ɔsɔ́ wɩ́ɛ́
28
1 Nyuutɩna Wɩɩsɛ bʋl Moyizi rɩ́ a bʋlɛ́: 2 «Máŋsɛ wɩ́ɛ́ nyáŋ a pá́ Ɩzɩrayɛl nɩɛ: Rɩ́wɔ́ hé dóé ka ká satɔɔrɩpallɛ ná há káŋ keré ko pá́ŋ, rʋ́ cɛrɛ nɩ peré; rɩ́wɔ́ áŋ ɓɩdííli, níŋ há die ɓa sɔ́ŋ a weri. 3 Ɩ sɩ bʋlwɔ rɩ́ a bʋlɛ́: Ná vʋk ná níŋ há sɩ di fisí há mɔhɛ̃́ rɩ́ɩ́wa ká ko pá́ Nyuutɩna Wɩɩsɛ: Tapʋ́l wuu, pewiisi bɛllɛ há kéŋ bɩna balá́wa a wɩ́ kɔsɔ́ kené, a ɔsɛ vʋk'fisí tɛ́ŋ wuu mi. 4 Ɩ sɩ ká pewie ná balá́>> ɔsɛ vʋk cɩcʋɔ ká rɩ́ nɔ́ŋɔ a gbáánɛ, 5 ká a ɓáfurótu míŋ fí sɩɛrʋ ker balá́ a hé olivi nʋʋ ɓa há cʋɔrɛ́, hɩŋ baná sɩɛrʋ ker balá́ mɛ́, a ŋmʋ́sɛ a a satɔ́ɔ́rɩ́pálɔ. 6 Tɛ́ŋ wuu mi vʋk fisi ná nɛ́, anɛ ɛ́ ɓa fa há ɔ́sɛ́ Sinayi paalɔ daha, níŋ di a fisi ʋ sɔ́ŋ a weri a pá Nyuutɩna Wɩɩsɛ. 7 Nyɔɔlɔ ná haá súúre sɩ a hɩŋ baná sɩɛrʋ ker balá́ a súúri pewie wuú mi; Nyuutɩna Wɩɩsɛ sɩ́ɛ́ nɛ́ ɩ sɩ ká nyɔɔlɔ (há ká dɩvɛ́ŋ) ná ká zʋ́ a pɔ́ʋ́. 8 A ká bʋ́llɛ pewie ná ɔsɛ gbáánɛ́ vʋk, a súúrú satɔ́ɔ́rɩ́pálɔ rɩ́rʋ́ nyɔɔlɔ mɛ́ anɛ cɩcʋɔ aásɔ ná; ʋ ká vʋk ná níŋ há die ʋ fisi ʋ sɔ́ŋ a weri a pá́ Nyuutɩna Wɩɩsɛ nɛ́.Saba vʋk'ɔsɔ́ wɩ́ɛ́
9 Saba kal, ɩ́ sɩ kɛsɛ pewiisi bɛllɛ há kéŋ bɩna balá́wa a wɩ kɔ́sɔ kené, a ɔsɛ vʋk, ká a ɓáfurótu míŋ fí sɩɛrʋ kere bɛllɛ a hé nʋʋ sɩɛrʋ a ŋmʋ́sɛ a a satɔ́ɔ́rɩ́pálɔ, a súúriwó nyɔɔlɔ ná mɛ́. 10 Saba vʋk fisí ni, saba wuu kal, a súúri tɛ́ŋ wuu vʋk fisi ná mɛ́ arɩ́ nyɔɔlɔ ná.
Cana kal pulí vʋk'ɔsɔ́ wɩ́ɛ́
11 Cana wuu pule mi, ɩ́ sɩ kɛsɛ nɔwala bɛllɛ, peɓala balá́ arɩ́ pewiisi bálpɛ há kéŋ bɩna balá́wa, a oro wuu wɩ kɔ́sɔ kené, a ɔsɛ vʋk fisi vʋk'ɔsɔ́ a pá́ Nyuutɩna Wɩɩsɛ; 12 arɩ́ ɓáfurótu míŋ kere botoro fí sɩɛrʋ há sɩ hé nʋʋ mɛ́ a ŋmʋ́sɛ a súúri nɔwal wuu mi a a satɔ́ɔ́rɩ́pálɔ; rɩ́ ɓáfurótu míŋ keré bɛllɛ fí sɩɛrʋ há sɩ hé nʋʋ mɛ́ a ŋmʋ́sɛ a súúri peɓala ná mɛ́ a a satɔ́ɔ́rɩ́pálɔ; 13 ká rɩ́ ɓáfurótu míŋ ker balá́ fí sɩɛrʋ hé nʋʋ a ŋmʋ́sɛ a súúri pewie wuu mi a a satɔ́ɔ́rɩ́pálɔ. Ʋ sɩ a vʋk ná níŋ há dié fisí ʋ sɔ́ŋ a weri a pá́ Nyuutɩna Wɩɩsɛ. 14 Nyɔɔlɔ ná há sɩ súúri: dɩvɛ́ŋ hɩŋ fá nɩɩ́ súúri nɔwal wuu mi, dɩvɛ́ŋ ker balá́ hɩŋ balá́ ɓa há kené ɓa botoro, nɩɩ́ súúri peɓala ná mɛ́, ká rɩ dɩvɛ́ŋ hɩŋ ker balá́ ɓa kené ɓa kere baná, súúri pewie wuu mi. Cana wuu vʋk fisí ná há sɩ ɔsɛ bɩna sɩɛrʋ cana wuu pule mí nɛ́ ɛ́. 15 Ɩ́ sɩ ká bʋŋgboko balá́ a ɔsɛ wɩbɔma vɔk'ɔsɔ́ a pá́ Nyuutɩna Wɩɩsɛ a súúri tɛ́ŋ wuu vʋk fisí ná rɩ́ nyɔɔlɔ ná mɛ́.
Pakɛ vɔk'ɔsɔ́ wɩ́ɛ́.
16 Dʋ́ŋdʋ́ʋ̃́ cana, tapʋlɛ fí rɩ́ baná kal ká Nyuutɩna Wɩɩsɛ pakɛ nɛ́. 17 Ɛ́ cana tapʋlɛ́ fí rɩ́ bɔmmʋ́ɔ́ kal ká cana nɛ́. Ɓa sɩ dí sɩbʋrtó dɩpɛ́ŋwa tapʋlɛ bálpɛ. 18 Dʋ́ŋdʋ́ʋ̃́ tapʋl, ceme sɩ ceŋ Nyuutɩna Wɩɩsɛ piŋse wɩ́ɛ́. Ɩ́ wɩ tʋ́ŋ oro wuu tʋŋ. 19 Ɩ́ sɩ kɛsɛ nɔwallɛ bɛllɛ, rɩ́ peɓala balá́, arɩ́ pewiisi bálpɛ há ké bɩna balá́wa a ɔsɛ vʋk fisí vɔk'ɔsɔ́ a pá́ Nyuutɩna Wɩɩsɛ, ɛ́ pʋsɛ oro wuu wɩ kɔsɔ kené; 20 a súúri satɔ́ɔ́rɩ́pálɔ míŋ ná ɓa sɩ hé nʋʋ a ŋmʋsɛ: kere botoro fí sɩɛrʋ rʋ́ nɛ́ ká nɔwal, ká rɩ́ peɓala nɛ́, kere botoro nɛ́ fí sɩɛrʋ; 21 ká rɩ́ ker balá́ fi sɩɛrʋ súúri pieso wuu mi. 22 Ɩ́ sɩ ka bʋŋgboko balá́ a ɔsɛ wɩbɔma vʋk'ɔsɔ́ a makɛ rɩɩ́wa ná suúri. 23 Ɩ́ sɩ ɔsɛ vʋka nyáŋ a súúri cɩcʋ́ɔ́ vʋk fisi ná há ká tɛ́ŋ wuu vʋk'ɔsɔ́ mɛ́. 24 Ɩ́ ɔsɛ ɛ́ vʋka tapʋl wuu, a cesi tapʋlɛ bálpɛ, rʋʋ́ a vʋk ɓɩdiili ná níŋ há dié ʋsɔ́ŋ a wérí a pá́ Nyuutɩna Wɩɩsɛ; ɓa sɩ ɔsɛ ɛ́ vʋka a súúri tɛ́ŋ wuu vʋk fisí ná rɩ́rʋ́ nyɔɔlɔ (vʋk sɩŋ) ná mɛ́. 25 Tapʋlɛ bálpɛ kal, ɩ́ sɩ he náŋa mɛ́ Nyuutɩna Wɩɩsɛ yɩr mɛ́; ká sɩ tʋtʋ́ŋduo wuu tʋmʋ́ ɛ́ kal.
26 Oŋbʋʋrɛwa kal, ɩ́ há sɩ ká oŋpárɛ oŋfɛlɛ a ko pá́ Nyuutɩna Wɩɩsɛ, yɔwsɛ cana tɛ́ŋ mɛ́; ɩ́ sɩ ceŋ náŋá Nyuutɩna Wɩɩsɛ yɩr mɛ́, ká sɩ tʋtʋmɩ́ oro wuu tʋmʋ́. 27 Ɩ́ sɩ kɛsɛ nɔwalɓʋɔllɛ bɛllɛ rɩ́ peɓala balá́ arɩ́ pewiisi bálpɛ há kéŋ bɩna balá́wa, a ɔsɛ vʋk fisí ná sɔ́ŋ há wero a pá́ Nyuutɩna Wɩɩsɛ; 28 a súúri satɔ́ɔ́rɩ́pálɔ míŋ ná ɓa há sɩ hé nʋʋ a ŋmʋsɛ, kere botoro fí sɩɛrʋ, nɛ́ sɩ súúri nɔawlɓʋɔl wuu mi, 29 rɩ́ kere bɛllɛ fí sɩɛrʋ súúri peɓala ná mɛ́ ká rɩ ker balá́ fí sɩɛrʋ súúri pewie wuu mi. 30 Ɩ́ sɩ ká bʋŋgboko balá́ a ɔsɛ wɩbɔma vʋk'ɔsɔ́ a makɛ rɩɩ́wa ná súúri. 31 Ɩ́ sɩ ɔsɛ vʋka nyáŋ, a súúri tapul wuu vʋk fisí ná mɛ́ rɩ́rʋ́ satɔ́ɔ́rɩ́pálɔ mɛ́. Ɩ́ sɩ ɔsɛ ɛ́ vʋka rɩ́wɔ nyɔɔllɛ ká pʋna oro wuu wɩ mɔhɛ̃́ rʋʋ́ ká kɔ́sɔ.