Kere ( Liwewa) wadawa wɩ́ɛ́
27
1 Selofadi tolé ná bɔmmʋ́ɔ́ sɩɛ́ tuuperi. Selofadi ká Hɩfɛrɛ bio ni, ká má tɩɩ a Galadɛ bio, Galadɛ a Makiri bio, Makiri má a Manase bio. Ʋ lɩ Manase duo sɩɛrʋ nɛ́. Manase fa ká Zɔzɛfɛ bio ni. Ʋ tolé ná bɔmmʋ́ɔ́ yɩra nɛ́ nyɛ́: Mahila, Nʋa, Hogila, Milka arɩ́ Tirisa. 2 Ɓa kéŋwo tɩɩ ko cáánɛ Moyizi rɩ́ vɔk'ɔ́ɔ́sɔ Ɩlɩyazarɛ arɩ́ sɩdííre ná rɩ́ jamáŋ ná wuu, Ceme táŋtɛjaa dánʋɔ mɛ́. Ɓa sɛ́: 3 « A áná sʋwɛ gɩrbétéke sɩɛrʋ; amá ʋ fa tó Koore rɩ́rʋ́ naanɩɛ ná fa ha isé cɩ Nyuutɩna Wɩɩsɛ mɛ́ sɩɛrʋ. Ʋ tɩɩ wɩbɔma nɛ́ ɓʋ́ʋ́, ká ʋ fa há wɩ héŋbolé kené. 4 Beéri tɛ rá áná yɩr yʋksʋ́ duo sɩɛrʋ, a tɩŋʋ́ há wɩ héŋbolé kené wɩ́ɛ́>> Ɩ́ pá́rá má liwe anɩɩ́wa há pɔ́ʋ́ maábináŋa ná ɛ́.»5 Moyizi máŋsɩ́wɔ wɩjaalɩ́ a pá́ Nyuutɩna Wɩɩsɛ. 6 Nyuutɩna Wɩɩsɛ bʋl Moyizi rɩ́ a bʋlɛ́: 7 «Selofadi tolé kéŋ taŋá. Pɔ́wɔ́ ker rʋʋ́ ɔ́wɔ́ liwe, anɩ́wɔ́ áná maábináŋa, ká rɩ́wɔ́ tɩllɩ́wɔ áná liwe ná. 8 Bʋl Ɩzɩrayɛl nɩɛ rɩ́ a bʋlɛ́: ‹Rɩ báálɔ nɛ́ wɩ héŋbolé kené ká sʋwɛ, ɩ́ púú liwe a pɔ́ʋ́ toló. 9 Rʋ́ nɛ́ wɩ toló kené, ɩ́ púú liwe a pɔ́ʋ́ maábináŋa. 10 Rʋ́ nɛ́ wɩ maábináŋa kené, ɩ́ púú liwe a pɔ́ʋ́ áná maábináŋa. 11 Rʋ́ áná nɛ́ wɩ maábináŋa kené, ɩ́ púú liwe a pá́ nɛ́ŋ ná rɩ́rʋ́ há tɩ́ɩ́nɛ kɩ́ŋkáŋ ʋ dunɩɛ sɩɛrʋ, tɩ́na nɩ sɩ tɩllʋ́ liwe ná.› Ɛ́ sɩ a wɩmakɩ́ ná ha mɔhɛ̃́ rɩ́ Ɩzɩrayɛl nɩɛ tɩŋʋ́, anɛ ɛ́ Nyuutɩna Wɩɩsɛ ha mákɛ́ a pa Moyizi.»
Ɓa lɩ́sɛ Zozie rʋʋ́ tʋ́kɛ Moyizi mɛ́
12 Nyuutɩna Wɩɩsɛ bʋl Moyizi rɩ́ a bʋlɛ́:« Zɩ Abarimi paalɔ né daha a bel ná tɔ́ɔ́ ná ŋ pie a pá́ Ɩzɩrayɛl nɩɛ. 13 Ɩ sɩ bel nóú; amá, ɩ má sɩ mʋ́ súúrí ánáwa mɛ́ anɩ́ maála Arɔŋ há mʋ́ ɛ́. 14 Beéwɩ́ɛ́ ɩ́ vɛ́ŋ nʋɔ Sɩŋ gɩrbétéke sɩɛrʋ, tɛ́ŋ ná mɛ́ jamáŋ ná fa há isé ká nɛsɛ cakɩ́ŋ cɩ nyii wɩ́ɛ́; ɩ́ wɩ ɛ́ɛ́ rɩ́wɔ́ zɩŋ rɩ́ŋ dʋŋɔ nɛ́ ká táŋa Wɩɩsɛ.» Meriba nyii (nɛsɛ nyii) ná wɩ́ɛ́ há isí Kadɛsɛ mɛ́ Sɩŋ gɩrbétéke sɩɛrʋ wɩ́ɛ́ nɛ́ ʋ bʋbʋ́l ɛ́.
15 Moyizi bʋl Nyuutɩna Wɩɩsɛ rɩ́ a bʋlɛ́: 16 « Rɩ Nyuutɩna Wɩɩsɛ ná há tɛ oŋ wuu hiẽ́só, lɩ́sɛ bál rʋʋ́ la jamáŋ ná sɩ́ɛ́, 17 rʋʋ́ lɔ́wɔ́ sɩ́ɛ́ aá lɩ ká lɔ́wɔ́ sɩ́ɛ́ aá zʋ́, a nɛ́ káŋwɔ́ aá lɩ ka nɛ́ káŋwɔ́ aá zʋ́ má; a mákɛ́ rɩ́ Nyuutɩna Wɩɩsɛ jamáŋ ná sɩ piéŋse ná há wɩ nɩnʋ́ɔ́lʋ kené nɩɛ̃́sʋ.» 18 Nyuutɩna Wɩɩsɛ bʋl Moyizi rɩ́ a bʋlɛ́: « Ká zozie há ká Nuŋ bio, a a nɛ́ŋ ná Wɩɩsɛ Sabɩɩna ha mɩnʋ́ mɛ́; a pii nɛ́sɛ sakʋ́ mɛ́. 19 Ɩ sɩ kánʋ́ a mʋ́ vɔk'ɔ́ɔ́sɔ Ɩlɩyazarɛ rɩ́ jamáŋ ná wuu sɩ́ɛ́, a makʋ́ tʋtʋ́mɩ́ a pɔ́ʋ́. 20 Ɩ sɩ pii dóé ná cɔɔ nɔ́ŋɔ pɔ́ʋ́ a makɛ rɩ́ Ɩsɩrayɛl nɩɛ wuu bubú. 21 Ʋ sɩ ko vɔk'ɔ́ɔ́sɔ Ɩlɩyazarɛ sɩ́ɛ́ rʋʋ́ zʋ́ Nyuutɩna Wɩɩsɛ sɩ́ɛ́ a tɩŋ Urimi mi a bɔsɛ wɩ́ɛ́ pɔ́ʋ́. 22 Moyizi tʋŋ ɛ́ ná́ Nyuutɩna Wɩɩsɛ há mákɛ́; a ka Zozie mʋ́ Wɩɩsɛ vɔk'ɔ́ɔ́sɔ Ɩlɩyazarɛ rɩ́ jamáŋ ná wuu sɩ́ɛ́. 23 A pɔ́ʋ́ nɛ́ŋsa a sakʋ́ mɛ́, ká mákʋ́ tʋtʋ́mɩ́ a pɔ́ʋ́ anɛ ɛ́ Nyuutɩna Wɩɩsɛ fa há mákɛ́ a pɔ́ʋ́.