24
1 Balaamɛ nóú rɩ́ Nyuutɩna Wɩɩsɛ có Ɩzɩrayɛl nɩɛ bárka heé pɛ́ɛ́ nɛ́, ɛ́ nɛ́ ʋ baá wɩ mʋɛ́ jaa ná, a nɛ ʋ fa há válɛ́ aá ja ɛ́, ká bɩrʋ́ sɩ́ɛ́ caasɛ gɩrbétéke rɩ́. 2 Balaamɛ ɓɔ́ʋ́ nyúú a ná rɩ́ Ɩzɩrayɛl ciki duó duówa. Ká Wɩɩsɛ Sabɩɩna ko túwú nyúú. 3 Balaamɛ sɩɛ́ cesi wɩ́ɛ́ a bʋlɛ́:«Bɩhɔrɛ bio wɩbʋlɛ́,
Báalɔ ná sɩ́ɩ́ haá ná ráŋ wɩbʋlɛ́,
4 Nɛrɔ ná haá nɛ́ Wɩɩsɛ wɩbʋlɛ́,
nɛ́ŋ ná haá ná kéŋ dóé wuu wɩ́náálɛ,
nɛ́ŋ ná haá ɓirmí tíé a ná wɩɛ́.
5 Oó Zakɔbɛ, ɩ táŋtɛwa wéró!
anɛ Zaadɩwa ná há mɩŋ polo laka,
anɛ Alʋwɛsɛ tuuni Nyuutɩna Wɩɩsɛ há cɔ́ŋsɛ́,
anɛ Sɛdɩrɛ tuuni há mɩŋ nyii laka.
7 Nyii wáálʋ́ dɩmɩnɩ́,
Ɓa (ɛ́ tuuni) bíé vɔ́kɛ nyii kɩ́ŋkáŋ.
Ʋ kuóro kɛ Agaagɛ,
Ʋ duóko anɛ baka nɔɔ nɛ́.
Aá cɔnnɛ́ duówa ná há cɩnʋ́ mɛ́,
Aá bonniwo heŋgbele kaá pɩrɛwɔ rɩrʋ́ hɛ́dɩlla.
9 Ʋʋ́ pɔ́ŋ, aá pɛ́ anɛ kɩ́ŋkáŋwal nɛ́;
anɛ kɩ́ŋkáŋmaá há pɩ́nɛ́, áŋ kɔwʋ́ aá ílli.
Bárka peri nɛ́ŋ ná há sɩ hé bárka pɛ́ɩ́,
Ká rɩ bʋra di nɛ́ŋ ná há sɩ bʋr héí mi!»
10 Balakɛ cɔ́ɛ́ isi Balaamɛ nyúú anɛ níŋ; Ʋ mɩ́sɛ nɛ́ŋsa ká bʋlɛ́:«Ŋ sɩ́ɩ́ ko bʋr héŋ dɩŋdɔma mɛ́ nɛ́ tɛ ŋ yɩrɩ́, ɛ́ nɛ́ ɩ ko hé bárkawa a pɔwɔ, a waarɛ peri naasi botoro!
11 Mʋl ne mi, mʋ́ɩ́ tɔ́ɔ́! Ŋ fa sɩŋ sɩ pɛ́ɩ́ zile onni, amá Nyuutɩna Wɩɩsɛ vɔ́ɔ́ rɩ́ lɔ́wɔ́.
Balaamɛ bʋ́l Ɩzɩrayɛl nɩɛ cíé wér wɩ́ɛ́
12 Ɛ́nɛ́ Balaamɛ bʋl pɔ́ʋ́ a bʋlɛ́:«Ŋ fa wɩ nyɛ́ bʋlɛ́ pá nɩtʋ́mɛ́ ná ɩ há tʋmɛ́ ŋ rɩ́ a bʋlɛ́: 13 ‹Rɩ Balakɛ jaa có rʋ́ sú rɩ́ warɛ arɩ́ salmɛ rʋʋ́ pi aá páŋ má, ŋ wɩ wérí ɛ́ rá má bɔ́ŋbɔ́ŋ wúó bɩ́ɩ́nɩ́ŋ tɩɩ mɛ́, aá cɩ Nyuutɩna Wɩɩsɛ há sʋ́ ná mɛ́; ŋŋ́ bʋlʋ́ ná Nyuutɩna Wɩɩsɛ há sɩŋ bʋ́l nɛ́>> 14 Ɛ́ wɩ́ɛ́ mʋ́l né mí, ŋ mʋ́ ŋ nɩɛ rɩ́ nɛ́. Kó, ŋ sɩ la sɩɛ́ bʋl wɩ́ɩ́ ná nɩɛ nyáŋ há sɩ pii tʋmɩ́ nɩɛ mɛ́, rʋʋ tɔ́ɔ́ há wɩ pʋlɛ́. 15 Balaamɛ sɩɛ́ bʋrɛ a bʋlɛ́:
«Ŋ é Bɩhɔrɛ bio Balaamɛ wɩbʋlɛ́,
Báálɔ ná sɩ́ɩ́ haá ná ráŋ wɩbʋlɛ́,
16 nɛ́ŋ ná haá nɛ́ Wɩɩsɛ wɩbʋlɛ,
nɛ́ŋ ná haá kéŋ Wɩɩsɛ ná há kɛ onni wɩzɩmɛ,
nɛ́ŋ ná haá ɓirmi tíé a ná sɩpuró wɩbʋlɛ́.
17 Ŋŋ nóú rɩ́, amá mʋ́l né mi rá,
Ŋŋ́ belu rí, amá ŋ ha wʋ́ʋ́ pere.
Caŋwʋ́l sɩ lɛ Zakɔbɛ sɩɛrʋ,
Kuódɛŋtuke sɛ lɩ Ɩzɩrayɛl sɩɛrʋ.
Ʋ sɩ́ céŋŋi Mʋabɛ duo nɩɛ dɩlbʋ́ɔ́.
Ká ŋmɔ́sɛ Sɛtɛ bɛlɛ wuu.
18 Ʋ sɩ la Edomi;
Ʋ sɩ la Seyiiri, há kɔʋ́ dɩŋdɔma tɔ́ɔ́.
Ɩzɩrayɛl kéŋ ballɩ́ kɩ́ŋkáŋ.
19 Nɛ́ŋ ná há ká Zakɔbɛ duo nɛŋ, ʋ sɩ́ dí bállɩ́,
Ʋ sɩ zɔkɛ nɩkáánɛ ná há mɩŋ tɔ́nɛ́ sɩɛrʋ.»
Balaamɛ bʋl Ɩzɩrayɛl dɩŋdɔma zɔ́kɛ́ wɩɛ́
20 Balaamɛ ná Amalɛkɛ a cesi wɩ́ɛ́ bʋlɛ́:
« Amalɛkɛ nɛ́ ká duówa ná wuu sɩdííró,
Amá zɔ́kɩ́rʋ́ nɩ kɔ́ʋ́ dɩtenni.»
21 Ʋ ná Kenitiwa a bʋrɛ a bʋlɛ́:
Ɩ́ dɩmɩnɩ́ kéŋ dóé,
Ɩ́ dála mɩŋ bʋ́ɩ́ daha nɛ́.
22 Amá níŋ sɩ dí Kayɛŋ*,
Ká rɩ́ Asuri kɛ́sɩ́wa mʋ́ bɩrmɛ yósi.»
23 Ká baá bʋrɛ a bʋlɛ́:
Oó! Áŋ káánɛ́ rɩ́ Wɩɩsɛ nɛ́ kúé tʋŋ nyɛ́>>
24 Amá nyiidabórizéŋse si lɩ Kitimi kó,
Ɓa sɩ bɛ́ŋsɩ Asuri rɩ́ Ɩbɛɛrɛ;
Amá ɓa má dɩmʋ́tenni ká zɔ́kɩ́rʋ́ nɛ́.»
25 Ɛ́ nɛ́ Balaamɛ isi, a bɩrmʋ́ tɔ́ɔ́, ká
Balakɛ má mʋ́ʋ́ dɩmʋ́ɩ́.