Meriba nyii wɩ́ɛ́
20
1 Ɩzɩrayɛl jamáŋ ná wuu mʋ́ɔ́ peri Sɩŋ gɩrbétéke dʋ́ŋdʋ́ʋ̃́ cana mɛ́, a ké Kadɛɛsɛ mɛ́. Ráŋ nɛ́ Mɩrɩyaŋ sʋwɛ, ɓa húú.2 Nyii fa toó rɩ́ jamáŋ ná nyɔ, ɛ́ nɛ́ ɓa ko ciki náŋá mɛ́ a cɛ́ Moyizi rɩ́ Aarɔŋ mɛ́. 3 Jamáŋ ná lɔkɛ nɛsɛ Moyizi rɩ́ a bʋlɛ́: «Beé rí tɛ á wɩ sʋsɛ, tɛ́ŋ ná mɛ́ a máábináŋa fa háá sʋsɛ Nyuutɩna Wɩɩsɛ sɩ́ɛ́>> 4 Beé rí tɛ ɩ́ a Nyuutɩna Wɩɩsɛ púl ná ko gɩrbétéke né sɩɛrʋ, ráá rɩ́rá pʋsɛ wuu sʋsɛ>> 5 Beé ri tɛ ɩ́ a á lɛ Ezipiti mi, a káŋrá ko dɩtɔk né>> Ʋ to dɩhɩ̃́ ná ɓa há sɩ wolli oŋ dú, pirtuu toó, viinyi tuu toó, girenadie ɛ́ tɩɩ, ká nyii má toó aá nyɔ.» 6 Moyizi rɩ́ Aarɔŋ kɛkɛ púl ná mɛ́ a mʋ́ céme táŋtɛjaa dánnʋɔ, a ɓallɛ káŋwɔ sɩ́ɛ́ cú tíé; ɛ́ nɛ́ Nyuutɩna Wɩɩsɛ píŋ ko nyɩ́ɩ́sɩ́wɔ mɛ́.
7 Nyuutɩna Wɩɩsɛ bʋl Moyizi rɩ́ a bʋlɛ́: 8 «Pi deŋtuke ná, rɩ́ rɩ́rɩ́ máála Aarɔŋ a rɩ́ jamáŋ ná hé náŋá mɛ́, ká rɩ́ɩ́wa bʋ́l wɩ́ɛ́ bʋ́ɩ́ rɩ́, ɓa sɩ́ɛ́ mɛ́, rʋ́ʋ́ pɔ́wɔ́ nyii. Ɩ sɩ a rɩ́ nyii póŋ bʋ́ɩ́ ná mɛ́ lɛ, a pá jamáŋ ná rɩ́wɔ́ pʋsɛ rɩ́wɔ́ nyɔ.» 9 Moyizi pi deŋtuke ná fa há mɩŋ Nyuutɩna Wɩɩsɛ sɩ́ɛ́ anɛ ɛ́ Nyuutɩna Wɩɩsɛ fa há mákɛ́ pɔ́ʋ́. 10 Ʋ rɩ́ Aarɔŋ yɩrɛ jamáŋ ná wuu ciki bʋ́ɩ́ ná sɩ́ɛ́. Ká Moyizi sɩɛ́ bʋ́lwɔ rɩ́ a bʋ́lɛ́: «Dɩlhɔtɩ́ɩ́na, ɩ́ zesi! Á wuólo a nyii póŋ bʋ́ɩ́ né mi lɛ, aá pɛ́ɩ́wa rɛ́>>» 11 Moyizi ɓɔ́ʋ́ deŋtuke ná, ká ŋmɔ́wɛ bʋ́ɩ́ ná naasɩ́ bʋ́llɛ. Nyii poŋ kɩ́ŋkáŋ, jamáŋ ná nyɔ, ká ɓa pʋsɛ má nyɔ.
12 Ɛ́ nɛ́ Nyuutɩna Wɩɩsɛ bʋ́l Moyizi rɩ́ Aarɔŋ rɩ́ a bʋlɛ́ : «Ɩ́ há wɩ́ŋ lɛ́ɛ́ dí, rɩ́ɩ́ makɛ rɩŋ káŋ dʋŋɔ́ Ɩzɩrayɛl nɩɛ sɩ́ɛ́ mɛ́, ɛ́ wɩ́ɛ́, ɩ́ wɩ jamáŋ né káá zʋ tɔ́ɔ́ ná ŋ há sɩ́ pɔ́wɔ́.» 13 Ráŋ nɛ́ ká Meriba nyii dɩhɩ̃; meriba mʋ́l nɩ́ há ká: «Nɛsɛ» ʋ nyii ná dɩhɩ̃́ Ɩzɩrayɛl há lɔ́kɛ́ nɛsɛ rɩ Nyuutɩna Wɩɩsɛ nɛ́, ʋ makʋ́ tɩɩ rʋʋ kɔ́ʋ́ dʋŋɔ.
Edomi kuóro vɛ́ Ɩzɩrayɛl ŋmɛ́nɔ pɛ́ɛ́
14 Moyizi cɛ́ Kadɛsɛ mɛ́, ká tʋŋ nɩɛ Edomi kuóro rɩ, rɩwɔ bʋ́lʋ́ rɩ́ a bʋlɛ́: «Néí maábinaŋa Ɩzɩrayɛl nɩɛ há sʋ́ʋ́ ná: Ɩ ɛ̃ wɩɩla ná wuu há périrá rɛ́. 15 Á ánáwa mʋ́ Ezipiti, a mʋ́ ráŋ a a tapʋlɛ ɓɩkana; amá Ezipiti tɩnawa bɛ́ŋsɩrá rɩ́rá ánáwa. 16 A búŋsó hé Nyuutɩna Wɩɩsɛ mɛ́, ʋ nɩrá liŋo a tʋŋ malɩ́ka, ʋ ko lɩsɩrá Ezipiti mi. Ná rá nɛ́ Kadɛɛsɛ mɛ́, tɔ́ɔ́ ná há mɩnɩ́ dɩtɩllɛ nʋɔ. 17 A fa có ráá tɩŋɩ́ tɔ́nɛ(tɔ́ɔ́) daarɛ; á wɩ baksɛ sɩɛrʋ́ tɩŋ, á wɩ viinyiwa sɩɛrʋ́ tɩŋ, á wɩ vile nyii nyɔ́; áá árá tɩŋ kuóre ŋmɛ́nɔ nɛ́, á wɩ nédu cʋ́rɛ, á wɩ nɛgʋɔ cʋ́rɛ, a kaá jɛ́ɩ́ dɩtɩ́llɛ (tɔ́ɔ́) mɛ́ daarɛ́.» 18 Edomi kuóro bʋ́lʋ́ rɩ bʋlɛ́: «Ɩ́ wɩŋ dɩhɩ̃́ tɩŋ! Rɩɩ́wa á ɛ́, ŋ sɩ́ lɩɩ kɛ́rɩ́wa rɩ́ tókowí.» 19 Ɩzɩrayɛl nɩɛ bʋ́lʋ́ rɩ́ bʋlɛ́:« A sɩ tɩŋ ŋmɛ́nɔ, ká rɩ rá rɩrá pʋsɛ nyɔ́ɩ́ nyii, á sɩ túŋ kɩ́ŋ, ʋ tó wɩɩ, ráá é há wolli ká naasɛ daarɛ.» 20 Amá Edomi kuóro sɛ́: «Ɩ́ waá daarɛ! Ká kɛsɛ nɩkaná, ɓa lɩɩ kɛrʋ́ rɩ́ dóé. 21 Edomi kuóro ɓɩɛ́na vɔ́ɔ́ rʋʋ́ pá Ɩzɩrayɛl nɩɛ ŋmɛ́nɔ rʋʋ́ tɩŋʋ́ dɩtɩ́llɛ daarɛ, ɛ́ nɛ́ Ɩzɩrayɛl nɩɛ tɔ́ʋ́ ká caasɛ dɩhuó.
Aarɔŋ sʋʋ wɩ́ɛ́
22 Ɩzɩrayɛl jamáŋ ná wuu isi Kadɛsɛ mɛ́ a mʋ́ Hɔɔrɛ paalɔ. 23 Nyuutɩna Wɩɩsɛ bʋl Moyizi rɩ́ Aarɔŋ rɩ́ Hɔrɛ paalɔ ná nyúú, Edomi tɔ́ɔ́ susúbʋɔ mɛ́, a bʋlɛ́: 24 «Aarɔŋ sɩ káánʋ́ nɩɛ rɩ (sɩ́ sʋwɛ); ʋ wɩ tɔ́ɔ́ ná ŋ há pie pá Ɩzɩrayɛl nɩɛ sɩɛrʋ zʋ, bee wɩ́ɛ́ Meriba nyii dɩhɩ̄́, ɩ́ vɛ́ŋ há sʋʋ́ ná. 25 Ka Aarɔŋ rɩ́rʋ́ bio Ɩlɩyazarɛ, a a rɩ́wɔ́ zɛ́ Hɔrɛ paalɔ. 26 Wurki Aarɔŋ gɛnnɛ ná, a súú bio Ɩlɩyazarɛ. Rɛɛ́ nɛ́ Aarɔŋ sɩ káánɛ, ʋ dɩsʋwɩ́ nɛ́ ɛ́.» 27 Moyizi tʋ́ŋ ɛ́ ná Nyuutɩna Wɩɩsɛ fa há mákɛ́ pɔ́ʋ́. Ɓa zɛ́ Hɔrɛ paalɔ nyúú, jamáŋ ná wuu sɩ́ɛ́ mɛ́. 28 Moyizi wurki Aarɔŋ gɛnnɛ ná, a pii súú bio Ɩlɩyazarɛ. Aarɔŋ sʋ́wɛ́ ráŋ nɛ́, paalɔ ná nyúú ɓóŋɓóŋ, ká Moyizi rɩ́ Ɩlɩyazarɛ bɩrtuwi. 29 Jamáŋ ná wuu nóó rɩ Aarɔŋ sʋ́wɔ́, Ɩzɩrayɛl jaa wuu wi Aarɔŋ mɛ́, tápʋlɛ mɛrɛ́ rɩ́ fí.