Nɔmafɩɛmɔ tapʋmmɔ wɩ́ɛ́
19
1 Nyuutɩna Wɩɩsɛ bʋl Moyizi rɩ́ Aarɔŋ rɩ́ a bʋlɛ́: 2 «Ná wadawa ná wɩ́makɛ́ ŋ é Nyuutɩna Wɩɩsɛ há máŋsɛ: Bʋl rɩ́ Ɩzɩrayɛl nɩɛ ja nɔmáfɩɛmɔ há wɩ dɩzɔkɩ́ kené, a wɩ kɔsɔ kené, a wɩ zúki báásɛ́ ná, a kaa ko pɛ́ɩ́. 3 Rɩ́ɩ́wa pii pá vʋk'ɔɔsɔ Ɩlɩazarɛ rʋʋ́ kaa lɛ púl ná mɛ́, rɩ́wɔ́ ɓʋ́ʋ́ ʋ sɩ́ɛ́ mɛ́. 4 Vʋk'ɔ́ɔ́sɔ Ɩlɩyazarɛ sɩ takɛ nɔmáá ná cɛ́l mʋɔ́ rɩ́rʋ́ néní, a mɩ́sɛ Ceme táŋtɛjaa ná sɩ́ɛ́, náásɩ́ balpɛ. 5 Ká rɩ́wɔ́ nyɩkɛ nɔmáá ná ʋ sɩ́ɛ́ mɛ́; ɓa sɩ́ nyɩ́kʋ́ kɛnɔ, ʋ namɩɛ, ʋ cɛ́l arɩ́rʋ́ sɩɛrʋ ɓɩɛ. 6 Vʋk'ɔɔsɔ ná sɩ pi sɛdɩrɛ daasɛ, rɩ́ ɩ́zɔpɛ híle arɩ́ gɛpúfɩɛmɔ a yoo hé níŋ ná haá dí nɔmáá ná mɛ́. 7 Ʋ sɩ a nyii sɛsʋ́ gɛnnɛ, a fóú tɩɩ má, ká sɩɛ́ zʋ púl ná sɩɛrʋ; amá ʋ ha sɩ a busunnú nɛ́ŋ ŋ sɩɛ́ mɛ́, a kaá ja gbaanɛ. 8 Nɛrɔ ná má há nyɩkɛ nɔmaá ná sɩ́ a nyii sɛ́sʋ́ gɛnnɛ, a fóú tɩɩ má; amá ʋ ha sɩ́ a busunnú nɛ́ŋ ŋ sɩɛ́ mɛ́, a kaá ja gbaanɛ. 9 Báálɔ ná há wɩ busunnu kené ŋ sɩ́ɛ́ mɛ́ nɩ sɩ pá nɔmáá ná tapʋmmɔ a kaa lɛ púl ná mɛ́, a tá dɩhɩ̃́ ná há wɩ busunnu kené; rɩ́wɔ́ cɛ́ ráŋ Ɩzɩrayɛl nɩɛ yɩr mɛ́, rɩ́wɔ́ aá hé nyii mí, aá sɛsɛ busunnu. Wɩbɔmɔ vʋk'ɔsɔ́ nɛ́. 10 Nɛrɔ ná há pá nɔmáá ná tapʋmmɔ, ʋ sɩ sɛsʋ́ gɛnnɛ ká ha a busunnú nɛ́ŋ ŋ sɩɛ́ mɛ́, a kaá ja gbaanɛ. Ʋ sɩ a wɩ́makɩ́ ná há waá giri a pá Ɩzɩrayɛl nɩɛ, arɩ́ nɩhʋɔrɔ ná há mɩŋwɔ sɩsɩɛnʋ́wa.»Busunnu mʋ́ʋ́rɛ wɩ́ɛ́
11 «Nɛ́ŋ ná há tɩkɛ sʋwɛ duó wuu mí, ʋ ká busunnu nɛrɔ nɛ́ ŋ sɩɛ́ mɛ́, a kaá ja tapʋlɛ balpɛ. 12 Ʋ sɩ́ sɛ́sʋ́ tɩɩ arɩ́ ɛ́ nyii tapʋlɛ botoro kal arɩ́ bálpɛ kal a báá sɩ́ busunnu kánʋ́ ŋ sɩɛ́ mɛ́, amá rʋ́ʋ́ nɩ wʋʋ́ tɩɩ sɛsɛ tapʋlɛ botoro kal ná arɩ́ bálpɛ kal, ʋ ha ká busunnu nɛrɔ nɛ́ ŋ sɩɛ́ mɛ́. 13 Nɛ́ŋ ná há tɩkɛ sʋwɛ duó wuu mí, ká wʋ́ʋ́ tɩɩ sɛ́sɛ́, ʋ bírsí Nyuutɩna Wɩɩsɛ táŋtɛjaa nɛ́; ɛ́ nɛrɔ mɔhɔ̃́ rɩ́wɔ́ lɩ́sʋ́ Ɩzɩrayɛl mɛ́. Nyii ná haá sɛsɛ busunnú há wʋ́ʋ́ mɛ́ tɩkɛ́, ʋ ha kenú busunnu ná nɛ́ ŋ sɩɛ́ mɛ́, ɓa wʋ́ʋ́ mɛ́ lɩ́ɛ́.
14 Ná wada: Rɩ́ nɛrɔ sʋwʋ́ táŋtɛjaa sɩɛrʋ, nɛrɔ ná há sɩ zʋ́ ráŋ, arɩ́ nɛrɔ ná fa há mɩŋ ráŋ, ɓa zʋ́ busunnu ŋ sɩɛ́ mɛ́, a kaá ja tápʋlɛ bálpɛ. 15 Gbaŋa ná má wuu há mɩŋ ráŋ, ʋ nʋɔ wɩ cúé omo vɔwɛ ɓarɛ, ʋ sɩɛrʋ ɓɩɛ zʋ́ busunnu. 16 Nɛ́ŋ ná wuu há sɩ párɛ baka sɩɛrʋ a mʋ́ tɩkɛ tókowí nɩɓʋ́ʋ́lɛ mɛ́, ɛ́ rá má nɛrɔ há sʋ́wʋ́ tɩɩ mɛ́, ɛ́ rá má nɩbííno heŋgbele mi, ɛ́ rá má lɛlbule mi, zʋ́ busunnú ŋ sɩɛ́ mɛ́ a kaá ja tapʋlɛ bálpɛ. 17 Ʋ busunnu yɩr mɛ́, ɓa sɩ a wɩbɔmɔ vʋk'ɔsɔ́ nɔmáá ná há dí níŋ tapʋmmɔ, a hé nyii mi gbaŋa sɩɛrʋ. 18 Báálɔ ná há wɩ busunnú kéné ŋ sɩɛ́ mɛ́, sɩ́ cɔ́rɛ ɩ́zɔpɛ hile a liwe nyii ná sɩɛrʋ ká lɩ́sɛ mɩsɛ hé táŋtɛ ná mɛ́, gbaŋsɛ ná wuu mi, nɩbííne ná há mɩŋ ráŋ mɛ́, a hé nɛrɔ ná há tɩkɛ heŋgbele ná mɛ́, nɛrɔ ná há tɩkɛ nɩɓʋ́ʋ́lɛ mɛ́, nɛrɔ ná há sʋwʋ́ tɩɩ mɛ́, ɛ́ rá má lɛlbule mi. 19 Nɛ́ŋ ná há wɩ busunnú kéné ŋ sɩɛ́ mɛ́, ʋ nɛ́ sɩ mɩsɛ a hé nɛrɔ ná há kéŋ busunnú mi, tapʋlɛ botoro kal arɩ́ tapʋlɛ bálpɛ kal, a mʋ́ʋ́rɛ tɩ́na tapʋlɛ bálpɛ kal. Ʋ tɩ́na sɩɛ́ sɩ́ sɛsʋ́ gɛnnɛ arɩ́rʋ́ tɩɩ, nyii sɩɛrʋ, gbaanɛ, rʋʋ báá wɩ busunnu kené ŋ sɩɛ́ mɛ́. 20 Báálɔ ná há sɩ zʋ busunnu ŋ sɩɛ́ mɛ́, ká wʋʋ́ tɩɩ mʋ́ʋ́rɛ, ɓa sɩ́ lɩ́sʋ́ jamáŋ ná sɩɛrʋ, bee wɩ́ɛ́ ʋ bírsí Nyuutɩna Wɩɩsɛ dɩmɩnɩ́; nyii ná háá sɛsɛ busunnu, há wʋʋ́ mɛ́ mɩsɛ, ʋ ká busunnu nɛrɔ nɛ́ ŋ sɩɛ́ mɛ́. 21 Ʋ sɩ a wɩmakɩ́ (wɩbilí) ná há waá giri a pɔ́wɔ́. Nɛrɔ ná há sɩ mɩsɛ nyii ná haá mʋ́ʋ́rɛ busunnú, ʋ mɔhɔ̃́ rʋʋ́ sɛ́sʋ́ gɛnnɛ, ká nɛ́ŋ ná há tɩkɛ nyii ná haá mʋ́ʋ́rɛ busunní mí, ʋ sɩ zʋ busunnu ŋ sɩɛ́ mɛ́ a kaá ja gbaanɛ. 22 Nɛrɔ ná há zʋ́ busunnú ŋ sɩɛ́ mɛ́, há sɩ́ tɩkɛ óŋ ná wuu mí, ɛ́ omo má zʋ́ busunnú, ká nɛrɔ ná má há sɩ́ tɩ́kʋ́ mɛ́, ʋ má zʋ́ busunnu ŋ sɩɛ́ mɛ́ a kaá ja gbaanɛ.»