18
1 Nyuutɩna Wɩɩsɛ bʋl Aarɔŋ rɩ́ a bʋlɛ́: «Ɩ rɩ́rɩ́ bɛlɛ arɩ́rɩ́ jaa nɩɛ, rɩ́ wɩ́zɔkɩ́ nɛ́ tʋ́ŋ Wɩɩsɛ dɩmɩnɩ́ ná, ɩ́ nɛ́ tɛ wɩ́ɩ́; ɩ rɩ́rɩ́ bɛlɛ nɛ́ baa ha tɛ wɩ́ɩ́, rɩ wɩ́zɔkɩ́ nɛ́ kúó mɩ́nɩ́wa vʋk'ɔɔsa tʋtʋmɛ́ ná má sɩɛrʋ. 2 A rɩ́ɩ́ maábináŋa Levitiwa há kɛ́ɩ́ áná jɩmʋ́l nɩɛ, rɩ́wɔ́ súúrí mí. Rɩɩ́wa nɛ́ túó peri Wɩɩsɛ nʋtʋmɛ táŋtɛjaa, ɓa sɩ tʋkɩ́wa mɛ́ a pɛ́ɩ́wa mɛ́. 3 Ɓa sɩ́ tɩŋɩ́ sɛ́, ka tɩllɛ táŋtɛjaa ná wuu belé, amá ɓa wɩ mɔhɛ̄́ rɩ́wɔ́ tuuperi Nyuutɩna Wɩɩsɛ cɩksɛ ná arɩ́ koro ná, a makɛ rɩ́ɩ́wa háá sʋsɛ, ɩ́ rɩ́wɔ́. 4 Ɓa sɩ́ sáŋɩ́wa mɛ́; ɓa sɩ́ tɩllɛ Ceme táŋtɛjaa ná rɩ́rʋ́ tʋmɛ́ wuu mi belé. Nɩyɔ́ɔ́ oro wuu wɩ mɔhɛ́ rʋʋ́ péríwa. 5 Ɩ́ sɩ tɩ́llɩ́ŋ Wɩɩsɛ dɩmɩnɩ́ ná rɩ́ koro ná mɛ́ belé, a makɛ rɩ́ Nyuutɩna Wɩɩsɛ cɔ́ɛ́ sɩ Ɩzɩrayɛl nɩɛ nyúú púsú. 6 Ná, ŋ tɩɩ nɛ́ lɩ́sɛ Levitwa, ɩ́ máábináŋa, Ɩzɩrayɛl nɩɛ sɩɛrʋ, a tɩ́llɩ́wɔ́, ká píwó pɛ́ɩ́wa rɩ́wɔ́ tʋ́tʋŋ céme táŋtɛjaa ná tʋtʋmɛ́. 7 Ɩ é Aarɔŋ, ɩ rɩ́rɩ́ bɛlɛ, ɩ́ sɩ beliwa vʋka ɔsɛ́ mɛ́ koro ná sɩ́ɛ́, káá tʋ́mʋ́ ná há mɔhɛ̃́ rɩ́ɩ́wa tʋŋ patíísazeno ná har; ɩ́ tʋmɩ́wa tʋtʋmɛ́. Ŋ nɛ́ pí ɛ́ tʋtʋmɩ́ pɛ́ɩ́wa. Nɩyɔ́ɔ́ ná wuu há sɩ tuuperi ráŋ, ʋ mɔhɔ̃́ rɩ́wɔ́ ɓʋ́ʋ́ nɛ́.»8 Nyuutɩna Wɩɩsɛ bʋl Aarɔŋ rɩ́ a bʋlɛ́: «Ná, pállɛ ná wuu Ɩzɩrayɛl nɩɛ há lɩ́sɛ́ ŋ yɩr mɛ́ a kaa kó aá páŋ ŋ tɩɩ nɛ́ piwo belé pɛ́ɩ́, Ŋ píwó pɛ́ɩ́ rɩ́rɩ́ bɛlɛ nɛ́ rɩ́wɔ́ ɛ́ɩ́wa ker; rʋ́ʋ́ ɛ́ a wɩ́makɩ́ ná há waá giri. 9 Néí ker, onni ná há káŋ dʋŋɔ ker níŋ há wʋ́ɔ́ físi sɩɛrʋ: zilé onni ná wuu, pállɛ ná wuu, wɩbɔma vʋka ná wuu, busunnu mʋ́ʋ́rɛ́ vʋka ná wuu ɓa há kéné kó aá páŋ, ɛ́ onni wuu há káŋ dʋŋɔ ɓɩ́ɛ́ wɩ busunnu kéné, kɛ́ɩ́ rɩ́rɩ́ bɛlɛ ker ní. 10 Ɩ́ díwó ráŋ ná há wɩ busunnu mʋɔ́ wuu kené, ɓa há káŋ dʋŋɔ ɓɩ́ɛ́ wɩ́ɛ́; báála wuu wówó aá dí; Zíŋ rɩ́ ɓa káŋ dʋŋɔ onni ní.
11 Ná óŋ ná báá há sɩ́ ɛ́ɩ́ ker: zile onni ná Ɩzɩrayɛl nɩɛ há lɩ́sɛ́, arɩ́ pállɛ ná wuu ɓa há píé cáánɩ́ŋ, ɓa daha kɩɛsɔ́ ná, ŋ píwó pɛ́ɩ́ rɩ́rɩ́ bɛlɛ arɩ́rɩ́ tolé, rʋ́ʋ́ ɛ́ a wɩ́makɩ́ ná há waá giri. Ɩ jaa nɛrɔ ná wuu há wɩ busunnu zʋ́ɛ́ Wɩɩsɛ sɩɛ́ mɛ́, ʋ wówó aá dí. 12 Ŋ piwo óŋbʋʋrɛwa ná ɓa há kené ko aá páŋ, a pɛ́ɩ́: nʋʋ, dɩvɛ́ŋfɛlɛ arɩ́ bile ɓɩfɛlɛ ná há weró, (ɩ nɛ́ tɩwɔ). 13 Ɩ nɛ́ tɩwɔ tíé óŋbʋʋrɛwa ná, ɓa há kéné ko aá páŋ. Nɛ́ŋ ná wuu há wɩ busunnu zʋ́ɛ́ Wɩɩsɛ sɩɛ́ mɛ́ ɩ jaa mɛ́, ʋ wówó aá dí. 14 Óŋ ná wuu Ɩzɩrayɛl nɩɛ há sɩ pii páŋ ká báá wʋ́ʋ́ wuó ná, ɩ nɛ́ tʋ́ʋ̃́. 15 Oŋhiẽ́si é wuu bihɔ̃́, nɩbííne rɩ́ pʋsɛ, ɓa sɩ kaa ko páŋ, ɩ nɛ́ tɩ́wɔ́, amá taŋa lo rɩ́wɔ́ yɔwɛ la nɩbííne bɩhɩɛ̃́sɛ arɩ́ pʋsolmé bihɩɛ̃́sɛ. 16 A rɩ́wɔ́ yɔwɛ láwɔ rɩ ɓa ha wɩ caná balá mɛ́ dáárɛ́, arɩ́ ɛ́ ná ɩ há sɩ makɛ, meewícaaka bɔmmʋ́ɔ́ a mɔ Wɩɩsɛ jaa meéwícááka, balá wuu há ká gɩráŋwa fí. 17 Amá sɩ lo rɩ́wɔ́ yɔwɛ la nɔɔ, pieso arɩ́ bʋʋnɔ bihɩɛ̃́sɛ: Ŋ dʋŋɔ nɛ́ tɩwɔ. Ɓa cɛ́l nɛ́ rɩ́ɩ́ kaá gáárɩŋ koro daha, ká rɩ́ɩ́ físíwo nʋnnɛ níŋ sɩɛrʋ rɩ́wɔ́ sɔ́ŋ a weri a páŋ. 18 Ɩ nɛ́ tɩwɔ namɩŋsa rɩ́ beŋtúú ná ɓa há píé cáánɩ́ŋ, arɩ́ néduu húĩ́ ná. 19 Ŋ pɛ́ɩ́, ɩ rɩ́rɩ́ bɛlɛ arɩ́rɩ́ tolé óŋ ná wuu Ɩzɩrayɛl nɩɛ há lɩ́sɛ aá páŋ dʋŋɔ; rʋ́ a wɩmakɩ́ ná há waá giri. Ʋ ka nʋtʋmɛ rɛ́ Nyuutɩna Wɩɩsɛ sɩ́ɛ́ a pɛ́ɩ́ rɩ́rɩ́ dunɩɛ, ʋ waá giri (a kaá mʋ́ wuu).» 20 Nyuutɩna Wɩɩsɛ bʋ́l Aarɔŋ rɩ́ a bʋlɛ́: «Ɩ waa a rɩ ka liwe tɔ́ɔ́ ná sɩɛrʋ, ká ɩ sɩɛ́ baa waá a rɩ́ɩ́ ka ker má ɓa sɩsɩɛnʋ́wa; ŋ nɛ́ kɛ́ɩ́ liwe rɩ́rɩ́ ker Ɩzɩrayɛl nɩɛ sɩsɩɛnʋ́wa. 21 Ná liwe ná ŋ há pie aá pá Levi bɛlɛ, ɓa haá tʋŋ Ceme táŋtɛjaa ná tʋtʋmɛ yɩr mɛ́ wɩ́ɛ́, ɛ́ liwe ni ká Ɩzɩrayɛl nɩɛ fí nyúú kere ná wuu, ɓa háá lɩ́sɛ́. 22 Ɩzɩrayɛl nɩɛ baa waá wolli tuuperi Ceme táŋtɛjaa ná, rɩwɔ haá ko a wɩbɔ́ŋ, a sʋsɛ. 23 Levitiwa nɛ́ sɩ́ tʋtʋŋ Ceme táŋtɛjaa tʋtʋmɛ́, ká nɛ́ cɩ́ɩ́nɩwɔ tɩɩ wɩbɔma wɩhála má. Ʋ sɩ a wɩmakɩ́ ná há waá giri ɩ́ woówa wuu sɩɛrʋ, ɓa wɩ liwe kéné Ɩzɩrayɛl nɩɛ sɩsɩɛnʋ́wa. 24 Fí nyúú kere ná Ɩzɩrayɛl nɩɛ há lɩ́sɛ aá pá Nyuutɩna Wɩɩsɛ nɛ́ ká Levitiwa liwe, ŋ pii pɔ́wɔ́; ɛ́ nɛ́ tɛ, ŋ bʋl pɔ́wɔ́ rɩ́ ɓa wɩ liwe kené Ɩzɩrayɛl nɩɛ sɩsɩɛnʋ́wa.»
25 Nyuutɩna Wɩɩsɛ bʋ́l Moyizi rɩ́ a bʋlɛ́: 26 «Bʋ́l Levitiwa rɩ́ a bʋlɛ́: ‹Rɩ́ɩ́wa nɩ́ la Ɩzɩrayɛl nɩɛ fi nyúú kere ná ŋ há píé pɛ́ɩ́wa, ɓa ɛ́ɩ́wa liwe, ɩ́ lɩ́sɛ pálɔ ráŋ a pá Nyuutɩna Wɩɩsɛ, fí nyúú kere ná má fí nyúú ker ní. 27 Ɩ́ palɔ ná sɩ́ cɛ́rɛ anɛ Ɩzɩrayɛl nɩɛ há tíé oŋparɛ́ rɩ́ dɩvɛŋfɛlɛ ɓa há háásɛ aá páŋ ɛ́ 28 Ɛ́ nɛ́ mɔhɛ̃́ rɩ́ɩ́wa má lɩ́sɛ pálɔ fí nyúú kere ná wuu sɩɛrʋ, Ɩzɩrayɛl nɩɛ há kéné ko aá pɛ́ɩ́wa, a píwó pá vɔk'ɔɔsɔ Aarɔŋ ŋ yɩr mɛ́. 29 Zilewa ná wuu ɓa há sɩ di pɛ́ɩ́wa, ɩ́ mɔhɔ̄́ rɩɩwa lɩ́sɩ́wɔ́ oŋwere wuu satɔɔrɩpalɔ a páŋ é Nyuutɩna Wɩɩsɛ, rɩ́ŋ tɩ́llʋ́. 30 Ba bʋ́lwɔ rɩ́ a bʋlɛ́: ‹Rɩɩ́wa nɛ́ lɩ́sɛ óŋwére ná wuu satɔ́ɔ́rɩ́pálɔ , ɩ́ rɩ́, ʋ sɩ́ nɛ Ɩzɩrayɛl nɩɛ má tíé oŋparɛ́ rɩ́ dɩvɛŋfɛlɛ ɓa há háásɛ aá páŋ nɛ́. 31 Ɩ́ rɩ́rɩ́wa jaa nɩɛ wówó aá dí ráŋ ná wuu ɩ́ haá jɛɛ́; bee wɩ́ɛ́ ɩ́ Ceme táŋtɛjaa ná tʋtʋmɛ́ tume ní ɛ́. 32 Ɩ háá lɩ́sɛ (ɩ́wɔ́ sɩɛrʋ) oŋwere ná wuu satɔ́ɔ́rɛpalɔ ná, ʋ tó wɩbɔ́ŋ cɩ́ɩ́nɩ́wa, ʋ ɛ́ sɩɛ́ báá to anɛ Ɩzɩrayɛl nɩɛ satɔɔrɩpallɛ ná ɓa há kené ko aá páŋ é Nyuutɩna Wɩɩsɛ nɛ́ ɩ́ zʋ́zɔkɛ; ɩ́ waá sʋsɛ.»