17
1 Nyuutɩna Wɩɩsɛ bʋl Moyizi rɩ́ a bʋlɛ́: 2 Bʋl Ɩlɩyazarɛ há ká vɔk'ɔ́ɔ́sɔ Aarɔŋ bio rɩ́, rʋ́ʋ́ lɩ́sɛ tulaalényɩ́kɩ́rɩ́ɓɩɛ ná níŋ ná sɩɛrʋ (ká tá níŋ ná), a káŋwɔ́ sɩɛrʋ níŋ ná mʋ́ tá dɩbólí, bee wɩ́ɛ́ ɓa ká Nyuutɩna Wɩɩsɛ oŋtɩ́llɛ nɛ́. 3 Nɩɛ ná há piwo mɩŋsa lenni sʋʋ a tɩŋwɔ́ wɩbɔma wɩ́ɛ́, ɓa sɩ piwo tulaalényɩ́kɩ́rɩ́ɓɩɛ ná luki a pɛ́rsɛ rɩ́wɔ́ jɛ́llɛ rɩ́wɔ́ pii tɔ́ koro ná mɛ́, bee wɩ́ɛ́ ɓa píwó cáánɛ Nyuutɩna Wɩɩsɛ, ɓa ɔ́ʋ́ oŋtɩ́llɛ́; ɓa sɩ a malla a pá Ɩzɩrayɛl nɩɛ. 4 Vɔk'ɔ́ɔ́sɔ Ɩlɩyazarɛ pi kɔmɔ́ tulaalényɩ́kɩ́rɩ́ɓɩ́ɛ́ ná, níŋ nɩdííle ná fa há pɛ́ɛ́ cáánɛ Nyuutɩna Wɩɩsɛ, a pɛ́rsɛ ɓa jɛllɛ, ɓa pii tɔ́ koro ná mɛ́. 5 Liise omo ni, a pá Ɩzɩrayɛl nɩɛ, a makɛ rɩ́ nɛ́ŋ ná há ká nɩhʋɔr, a tó Aarɔŋ dunɛ́ŋ, sɩ́ tuuperi Nyuutɩna Wɩɩsɛ rɩ́ɩ́ nyɩkɛ tulaale rɩ́ pɔ́ʋ́, rʋ́ʋ́ háá ko nɛ Koore rɩ́rʋ́ har nɩɛ, anɛ ɛ́ Nyuutɩna Wɩɩsɛ ha mákɛ́ pá Moyizi.»Jamáɲ ŋmaame wɩ́ɛ́
6 Ʋ tɔ́ɔ́ há pʋlɛ́, Ɩzɩrayɛl nɩɛ ná wuu kéŋ ŋmaame cɛ́ Moyizi rɩ́ Aarɔŋ mɛ́, a bʋlɛ́: «Ɩ́ nɛ́ ɛ́ɛ́ Nyuutɩna Wɩɩsɛ nɩɛ ná sʋsɛ!» 7 Nɩɛ ná há ise cɛ́ Moyizi rɩ́ Aarɔŋ mɛ́, ɓa bɩrwɔ sɩ́ɛ́ cáásɛ ceme táŋtɛjaa ná, duóbaná de ko tɔ́ʋ́ mɛ́, ká Nyuutɩna Wɩɩsɛ píŋ nyɩɩsɛ. 8 Ɛ́ nɛ́ Moyizi rɩ́ Aarɔŋ isi mʋ́ Ceme táŋtɛjaa ná dánnʋɔ. 9 Nyuutɩna Wɩɩsɛ bʋl Moyizi rɩ́ a bʋlɛ́: 10 «Ɩ́ lɛ nɩɛ nyáŋ sɩ́sɩ́ɛ́nʋ́wa, ká rɩ́ŋ zɔ́kwɔ́ naasɩ́ balá. moyizi rɩ́ Aarɔŋ ɓallɛ a káŋwɔ́ sɩ́ɛ́ cú tíé.» 11 Moyizi bʋl Aarɔŋ rɩ́ a bʋlɛ́: «Píí tulaalényɩ́krɩ́'omo, a lɩ́sɛ koro ná níŋ hóú sɩɛrʋ a hé tulaale ráŋ, a kaa mʋ́ jamáŋ ná rɩ́ kɩ́kɛ́lɛ́, a mʋ́ʋ́rɩ́wɔ́ wɩ́bɔma; bee wɩ́ɛ́ Nyuutɩna Wɩɩsɛ cɔ́ɛ́ púsó, zɔ́krɛ púló.» 12 Aarɔŋ a anɛ ɛ́ Moyizi há mákɛ́ pɔ́ʋ́, a fá zʋ jamáŋ ná sɩ́sɩ́ɛ́nʋ́wa, ráŋ ná zɔ́krɛ há wáárɛ́ púl; a nyɩkɛ tulaalé ká mʋ́ʋ́rɛ jamáŋ ná wɩ́bɔma. 13 Ká cɛ́ nɩsʋsɛ rɩ́ nɩwómme pɛ́kɛ, zɔ́krɛ ná siki. 14 Zɔkɩrɛ ná sʋsɛ ká nɩɛ bʋ́ɩ́ fí rɩ́ baná arɩ́ zɔwalpɛ, ká nɩɛ ná há tɩŋ Koore wɩ́ɩ́ ná mɛ́ sʋsɛ wɩ́ɛ́ tó ráŋ. 15 Zɔkɩrɛ ná há tenne, Aarɔŋ bɩ́rɔ́ mʋ́ Moyizi rɩ́, Ceme táŋtɛjaa dánnʋɔ.
Aarɔŋ deŋtuke wɩ́ɛ́
16 Nyuutɩna Wɩɩsɛ bʋl Moyizi rɩ́ a bʋlɛ́: 17 «Bʋl Ɩzɩrayɛl nɩɛ rɩ́, rɩ́wɔ́ pɛ́ɩ́ deŋtuksi fí rɩ́ bɛllɛ, jɩmʋ́l wuu jɩtɩ́na, deŋtuke balá. Ɩ sɩ pʋ́ŋsɛ oro wuu yɩr, ʋ deŋtuke daha. 18 Pʋŋsɛ Aarɔŋ yɩr Levi deŋtuke daha, bee wɩ́ɛ́ jɩmʋ́l (duo) wuu jɩtɩ́na ka deŋtuke balá nɛ́. 19 Ɩ sɩ pi deŋtuksi ná bil Nʋtʋmɛ dáka ná sɩ́ɛ́, céme táŋtɛ jaa ná sɩɛrʋ, ráŋ ná ŋ há válɛ́ aá cémíwa. 20 Nɛrɔ ná deŋtuke há sɩ́ lukmi, ʋ nɩ́ káŋ nɩlɩ́sɛ; ɛ́ nɛ́ ŋ sɩ a, rɩ́ Ɩzɩrayɛl nɩɛ lo ŋmaame ná, ɓa há kené cɩ́nɩ́wa mɛ́.» 21 Moyizi máŋsɛ a pá Ɩzɩrayɛl nɩɛ, ká jɩtɩ́nawa ná pa deŋtuksi ná fí rɩ́ bɛllɛ pɔ́ʋ́; duo wuu jɩtɩ́na deŋtuke balá. Aarɔŋ deŋtuke nɩ fa mɩ́ŋwɔ́ ɓɩɛ ná sɩsɩɛnʋ́wa. 22 Moyizi ka deŋtuksi ná kaa zʋ́ʋ́ bil Nyuutɩna Wɩɩsɛ sɩ́ɛ́, nʋtʋmɛ táŋtɛjaa ná sɩɛrʋ. 23 Ʋ tɔ́ɔ́ há pʋlɛ́, Moyizi zʋ́ táŋtɛjaa ná sɩɛrʋ, rɩ Aarɔŋ há ká Levi dunɛ́ŋ, rʋʋ deŋtuke ná lukmó a fɩ fɩɩla, a nɔ́ŋ amaŋdɩwa, ɓa bɛ. 24 Moyizi pa deŋtuksi ná wuu Nyuutɩna Wɩɩsɛ sɩ́ɛ́, a kaa lɩɩ cáánɛ Ɩzɩrayɛl nɩɛ wuu, ɓa nówó ká nɛrɔ wuu lɔ́ʋ́ ɓɩ́nɔ́. 25 Nyuutɩna Wɩɩsɛ bʋl Moyizi rɩ́ bʋlɛ́: «Bɩr ka Aarɔŋ deŋtuke ná zʋʋ bil Nʋtʋmɛ dáka ná sɩ́ɛ́, rʋ́ʋ́ káánɛ ráŋ, a a malla pá dɩlhɔtɩɩna ná. Ɛ́ é, ɩ sɩ́ a rɩ́ ŋmaame ná ɓa há kené cɩ́nɩ́ŋ mɛ́, nyɔ ráŋ, rɩ́wɔ́ báá sɩ́ sʋ́sʋ́.» 26 Moyizi tʋ́ŋ ɛ́ nɛ́; ʋ á wɩ́ɛ́ ná wuu Nyuutɩna Wɩɩsɛ fa há mákɛ́ pɔ́ʋ́. 27 Ɩzɩrayɛl nɩɛ bʋl Moyizi rɩ́ a bʋlɛ́: «Ná! Á sɩ́ sʋsɛ, á wuú mʋ́ dɩyʋ́ksɛ nɛ́! 28 Nɛrɔ ná wuu há sɩ́ tuuperi Nyuutɩna Wɩɩsɛ dɩmɩnɩ́, ʋʋ́ sʋ́wʋ́ nɛ́. Á wuu sɩɛ́ waá a ráá de sʋsɛ nyɛ nɛ́ a mʋ́ tenni rí>>»