Levitiwa tʋtʋmɛ́
4
1 Nyuutɩna Wɩɩsɛ bʋ́l Moyizi rɩ́ Aarɔŋ rɩ́ a bʋlɛ́: 2 «Ɩ dɩɩsɛ Kehati bɛlɛ ná, Levitiwa sɩɛrʋ a tɩŋ jaawa, duo wuu sɩɛrʋ, 3 a ka bɩŋsɛ mɛrɛ́ rɩ́ fí arɩ́ mɛrɛ́ rɩ́ fí rí dɔwɛ, a kaá mʋ́ bɩŋsɛ mɛɛ́sɛllɛ rɩ́ fí, a cɛ́rɛ rɩ́ céme táŋtɛjaa tʋtʋmɛ́. 4 Kehati bɛlɛ tʋtʋmɩ́ nɛ ka, rɩ́wɔ́ bíbel cɩksɛ ná há ɓa há kené tʋŋ aá pá Wɩɩsɛ dʋŋɔ, céme táŋtɛjaa ná mɛ. 5 Rɩ púl ná nɛ́ kúé aá isi, Aarɔŋ rɩ́rʋ́ bɛlɛ sɩ́ zʋʋ kóri kɛrɛ́ pátɩ́ɩ́sazeno ná, a pii tɔ́ nʋtʋmɛ dáka ná mɛ́. 6 Ɓa sɩ́ pi dɔ́fɛ́ŋ kɛnnɛ tɔ́ʋ́ mɛ́, a baa pi pɛ́ŋkɔklɩ́ a tɔ́ʋ́ wuu mí, ká sɩɛ́ pa dapɔllɛ tʋ dáka ná mɛ́, ʋ pii wɩ́ɛ́. 7 Ɓa sɩ́ jɛrɛ pɛ́ŋkɔklɩ́ dɩpɛ́ŋwa táábɩl ná daha, a pa gbaŋsɛ, nyíŋgbaŋsɛ, naŋtáŋsɛ arɩ́ loŋni ná ɓa háá hé dɩvɛ́ŋ pállɛ, a sakʋ́ daha, a suuri dɩpɛ́ŋbilé ná mɛ. 8 Ɓa sɩ́ pi pɛ́ŋfɩɛmɔ a jɛrɛ tɔ́ ɛ́ cɩksɛ mɛ́, a baa pi dɔ́fɛ́ŋ kɛnnɛ́ a tɔ́wɔ́ wuu mí, ká sɩɛ́ tʋ́ dapɔllɛ táábɩl ná mɛ́, ʋ pii wɩ́ɛ́. 9 Ɓa sɩ́ pi pɛŋkɔklɩ́ a jɛrɛ tɔ́ caŋdacaksa rɩ́rʋ́ cáŋsɛ, rɩ́rʋ́ cɩkwɩɛla, rɩ́rʋ́ tápʋmmɔ gbaŋa, arɩ́ nʋʋloŋni ná ɓa há kené aá tʋŋ wuu mí. 10 Ɓa sɩ́ púú rɩ́rʋ́ cɩkwɩɛla wuu hé dɔ́fɛ́ŋ kɛnnɛ sɩɛrʋ, ká púú sakɛ daduoru bɛllɛ daha. 11 Ɓa sɩ́ pi pɛ́ŋkɔklɩ́ a jɛrɛ a tɔ́ salmɛ koro ná mɛ́, a pi dɔ́fɛ́ŋ kɛnnɛ́ tɔ́ʋ́ wuu mí, ká sɩɛ́ hóú dapɔllɛ, ʋ pii wɩ́ɛ́. 12 Ɓa sɩ́ pa cɩksɛ ná wuu ɓa há kené aá tʋŋ Wɩɩsɛ dɩmɩnɩ na mɛ́, a hé pɛ́ŋkɔklɩ́ sɩɛrʋ, a pi dɔ́fɛ́ŋ kɛnnɛ a tɔ́wɔ́ wuu mí, ká sɩɛ́ pii sakɛ daduoru bɛllɛ daha. 13 Ɓa sɩ́ pa vʋk'ɔɔsɛ koro ná tapʋmmɔ, ká pi pɛŋfɩɛmɔ jɛrɛ tɔ́ʋ́ mɛ́. 14 Ɓa sí pa cɩksɛ ná wuu, ɓa há kené aá tʋmʋ́ mɛ́ a sákʋ́ daha: tapʋmmɔ gbaŋsɛ, náŋliiridaasɛ, pɛ́lwa ná ɓa há kené aá pa tapʋmmɔ, naŋtáŋsɛ arɩ́ cɩkwɩ́ɛ́la ná wuu. Ɓa sɩ́ jɛrɛ dɔ́fɛ́ŋ kɛnnɛ tɔ́wɔ́ wuu mí, ká púú dapɔllɛ tʋ, ʋ pii wɩ́ɛ́. 15 Rɩ Aarɔŋ rɩ́rʋ́ bɛlɛ nɩ́ jɛrɛ pɛŋsɛ ná tɔ́ Wɩɩsɛ dɩmɩnɩ́ ná rɩ́rʋ́ cɩksɛ ná wuu mí rɩ́ tenni, Kehati bɛlɛ nɛ sɩ ko cɩ́ɩ́nɩ́wɔ́, púl ná ísé mí. Amá ɓá wɩ́ óŋ ná wuu há ká Wɩɩsɛ dʋŋɔ omo míí tɩkɛ, rɩ́wɔ́ háá ko sʋsɛ wɩ́ɛ́. Kehati bɛlɛ tʋtʋmɩ́ nɛ́ ɛ́, céme táŋtɛjaa ná mɛ́. 16 Ɩlɩyazarɛ há ká vʋk'ɔɔsɔ Aarɔŋ bio nɩ́ɩ́ bel cáánɔ́ nʋʋ, tulaalé ná ɓa háá nyɩkɛ́, oŋparɛ́ kál wuu satɔ́ɔ́rɩ́pállɛ, arɩ́ lɩ́sɛnʋʋ ná mɛ́. Ʋ nɛ́ tɛ táŋtɛjaa belé a rɩrʋ sɩɛrʋ cɩksɛ ná wuu belé, Wɩɩsɛ dɩmɩnɩ́ rɩ́rʋ́ cɩksɛ wuu.»17 Nyuutɩna Wɩɩsɛ baa bʋl Moyizi rɩ́ Aarɔŋ rɩ́ a bʋlɛ́: 18 «Ɩ́ sɩ́ a rɩ́wɔ́ lɩ́sɛ Keheti dunɩɛ Levitiwa sɩɛrʋ. 19 A makɛ rɩ́wɔ́ sɩ́ sʋ́sʋ́, amá rɩ́wɔ́ ka mɩɩsɛ, rɩ ɓa nɛ́ túó peri cɩksɛ ná há ká Wɩɩsɛ dʋŋɔ tʋtʋmɛ́ cɩksɛ laka. Ɩ́ tʋŋ nyɛ pɔ́wɔ́: Aarɔŋ rɩ́rʋ́ bɛlɛ, sɩ́ ko ka nɛ́ŋ wuu hóú tʋtʋmɩ́ sɩɛrʋ, a mákʋ́ há mɔhɛ̃́ rʋ́ʋ́ ɔ́ɔ́ ná, ɛ́ rá má, ʋ há mɔhɛ̃́ rʋ́ʋ́ cɩ́ɩ́nʋ́ ná. 20 Ɛ́ é, ɓa wɩ tɛ́ŋ ná rɩ́ɩ́ mʋ́ʋ́ bel Wɩɩsɛ dʋŋɔ tʋtʋmɛ́ cɩksɛ ná, rɩ́ɩ́ sʋsɛ.»
21 Nyuutɩna Wɩɩsɛ bʋl Moyizi rɩ́ a bʋlɛ́: 22 «Dɩɩsɛ Gɛrsɔŋ má bɛlɛ a tɩŋ duówa, jaa wuu sɩɛrʋ, 23 ɓa ná há kéŋ bɩŋsɛ mɛrɛ́ rɩ́ fí a kaá mʋ́ bɩŋsɛ mɛɛ́sɛllɛ rɩ́ fí, á cɛrɛ rɩ́ céme táŋtɛjaa tʋtʋmɛ́. 24 Ná Gɛrsɔŋ dunɩɛ tʋtʋmɛ́, óŋ ná há mɔhɛ̃́ rɩ́wɔ́ tʋŋ, arɩ́ óŋ ná há mɔhɛ̃́ rɩ́wɔ́ cɩ́ɩ́nɛ: 25 Ɓá nɛ́ sɩ́ cɩ́cɩ́ɩ́nɛ táŋtɛjaa sɩɛrʋ táŋtɛwa ná arɩ́rʋ́ tʋkɛ ná há tɔ́ʋ́ mɛ́ (céme táŋtɛjaa táŋtɛwa,) ʋ nyútɔ́lɔ dɔ́fɛ́ŋ kɛnnɛ ná, arɩ́ céme táŋtɛjaa dánnʋɔ patɩ́ɩ́sa, 26 arɩ́ wuolo táŋtɛwa rɩ́rʋ́ dánnʋɔ patɩ́ɩ́sa ná, há kíl táŋtɛjaa rɩ́ koro ná, ɓa ŋmɛ́sɛ arɩ́ cɩksɛ ná wuu háá tʋŋ ráŋ. Ɓa nɛ́ tɛ ɛ́ tʋtʋmɛ́ wuu. 27 Gɛrsɔŋ dunɩɛ mɔhɔ̃́ rɩ́wɔ́ tɩ́tɩŋ Aarɔŋ rɩ́rʋ́ bɛlɛ makɛ́ nɛ́, tʋtʋmɛ́ arɩ́ cɩksɛ cɩ́ɩ́nɛ mɛ́. Ɩ sɩ pi cɩksɛ ná wuu cɩ́ɩ́nɛ wɩ́ɛ́ a héwó nɛsɛ mɛ́; 28 Nyáŋ nɛ́ ká Gɛrsɔŋ dunɩɛ tʋtʋmɛ́ céme táŋtɛjaa ná mɛ́, ɓá mɔ rɩ́wɔ́ tʋ́tʋŋ a tɩŋ vʋk'ɔɔsɔ Aarɔŋ bio Itamar makɛ́ mɛ́.
29 Ɩ sɩ́ dɩɩsɛ Merari bɛlɛ a tɩŋ duowa, jaa wuu sɩɛrʋ. 30 Ɩ sɩ́ dɩɩsɛ báála ná wuu há kéŋ bɩŋsɛ mɛrɛ́ rɩ́ fí a kaá mʋ́ bɩŋsɛ mɛɛ́sɛllɛ rɩ́ fí, a cɛrɛ rɩ́ céme táŋtɛjaa tʋtʋmɛ́. 31 Ná céme taŋtɛjaa onni ná há mɔhɛ̃́ rɩ́wɔ́ cɩ́cɩ́ɩ́nɛ ʋ nɛ́ ɔ́wɔ tʋtʋmɩ́: ʋ dapɛ́rsɛ, ʋ dapʋɔlɛ, ʋ dacɔ́ŋsɛ, ʋ naasɛ; 32 dacɔ́ŋsɛ ná há kíl wuolo, ɓa naasɛ, dapési, ɓa ŋmɛ́sɛ arɩ́ cɩkwɩɛla ná wuu ɓa há kené aá tʋŋ. Ɩ́ sɩ́ makɛ nɛrɔ wuu cɩkcɩ́ɩ́nɛ a pɔ́ʋ́. 33 Nyáŋ nɛ́ ká Merari dunɩɛ tʋtʋmɛ́ céme táŋtɛjaa ná mɛ́, ɓa mɔ́ rɩ́wɔ́ tʋ́tʋŋ, a tɩŋ vʋk'ɔɔsɔ Aarɔŋ bio Itamar makɛ́ mɛ́.»
Levitiwa ná háá tʋmɛ́ dɩɩsɛ́ wɩɛ́
34 Moyizi rɩ́ Aarɔŋ rɩ́ jamáŋ ná sɩdííre dɩ́ɩ́sɛ Kehati bɛlɛ, a tɩŋ duo wuu, jaá waa; 35 báála ná wuu há kéŋ bɩŋsɛ mɛrɛ́ rɩ́ fí a kaá mʋ́ bɩŋsɛ mɛɛ́sɛllɛ rɩ́ fí, a cɛ́rɛ rɩ́ céme táŋtɛjaa tʋtʋmɛ́. 36 Ɛ́ nɩɛ wuu ɓa há dɩ́ɩ́sɛ́ a tɩŋ duo wuu sɩɛrʋ nɛ́ fa: báála bʋ́ɩ́wʋllɛ arɩ́ zɔwalpɛ arɩ́ mɛɛ́sɛllɛ rɩ́ fí. 37 Kehati dunɩɛ ná wuu háá tʋŋ céme táŋtɛjaa ná tʋtʋmɛ́, ɓa nʋɔ nɛ́ ɛ́, Moyizi rɩ́ Aarɔŋ ha dɩ́ɩ́sɛ́ a tɩŋ ɛ́ Nyuutɩna Wɩɩsɛ há mákɛ́ pá Moyizi. 38 Gɛrsɔŋ bɛlɛ ná ɓa ha dɩ́ɩ́sɛ a tɩŋ duo waa, jaá wuu sɩɛrʋ; 39 a pɔ́ bɩŋsɛ mɛrɛ́ rɩ́ fí ká kaá mʋ́ bɩŋsɛ mɛɛ́sɛllɛ rɩ́ fí, nɩɛ ná wuu há cɛrɛ rɩ́ Céme táŋtɛjaa tʋtʋmɛ́; 40 ɓá ɛ́ nɩɛ wuu ɓa há dɩ́ɩ́sɛ́ a tɩŋ duó waa, jaá wuu sɩɛrʋ nɛ́ fá: bʋ́ɩ́wʋllɛ rɩ́ zɔwalgo arɩ́ mɛrɛ́ rɩ́ fí. 41 Gɛrsɔŋ bɛlɛ ná wuu háá tʋŋ céme táŋtɛjaa tʋtʋmɛ, Moyizi rɩ́ Aarɔŋ dɩɩsɛ, a tɩŋ Nyuutɩna Wɩɩsɛ makɛ́, nʋɔ nɛ́ ɛ́. 42 Merari bɛlɛ ná ɓa há dɩ́ɩ́sɛ́, a tɩŋ duo waa, jaá wuu sɩɛrʋ, 43 a pɔ́ bɩŋsɛ mɛrɛ́ rɩ́ fí mí, ka kaá mʋ́ bɩŋsɛ mɛɛ́sɛllɛ rɩ́ fí, nɩɛ ná wuu há cɛ́rɛ́ rɩ́ ceme táŋtɛjaa tʋtʋmɛ́; 44 ɓa nɩɛ ná wuu ɓa há dɩ́ɩ́sɛ́ a tɩŋ duó waa, jaá wuu sɩɛrʋ nɛ́ bʋ́ɩ́toro arɩ́ zɔwɛllɛ. 45 Merari bɛlɛ ná wuu Moyizi rɩ́ Aarɔŋ há dɩ́ɩ́sɛ́, a tɩŋ ɛ́ Nyuutɩna Wɩɩsɛ há mákɛ́ pá Moyizi, nʋɔ nɛ́ ɛ́. 46 Moyizi rɩ́ Aarɔŋ arɩ́ jamáŋ ná sɩ́dííre ná dɩ́ɩ́sɛ́ Levitiwa ná a tɩŋ duo waa, jaá wuu sɩɛrʋ 47 Ɓa pɔ́ bɩŋsɛ mɛrɛ́ rɩ́ fí ká kaá mʋ́ bɩŋsɛ mɛɛ́sɛllɛ rɩ́ fí nɩɛ mɛ nɛ́ , nɩɛ ná wuu há wó céme táŋtɛjaa tʋtʋmɛ́ aá tʋŋ, rɩ́ nɩɛ ná há sɩ́ cɩ́ɩ́nɛ céme táŋtɛjaa cɩksɛ; 48 ɛ́ nɩɛ wuu ɓa há dɩ́ɩ́sɛ́ nɛ́ bʋ́ɩ́córí rɩ́ zɔmmʋ́ɔ́ arɩ́ mɛɛ́sɩbaná. 49 Ɓa dɩ́ɩ́sɩ́wɔ́, a tɩŋ ɛ́ ná Nyuutɩna Wɩɩsɛ há mákɛ́ pá Moyizi, ka makɛ nɛrɔ wuu há mɔhɛ̃́ rʋ́ʋ́ tʋ́mʋ́ ná, ɛ́ rá má há mɔhɛ̃́ rʋ́ʋ́ cɩ́ɩ́nʋ́ ná, nɛrɔ wuu zɩ́mʋ́ tʋtʋmɩ́, anɛ ɛ́ Nyuutɩna Wɩɩsɛ makɛ́, a tɩŋ Moyizi mí.