Tíé fɩɛlɛ́ bɩna wɩ́ɛ́
Rɩɩ́wa kúó zʋ tɔ́ɔ́ ná ŋ há píé aá pɛ́ɩ́wa, ʋ tíé mɔhɔ̄́ rʋ́ʋ́ ka bɩŋfɩɛlɩ́, ŋ é Nyuutɩna Wɩɩsɛ yɩr mɛ́. 3 Bɩŋsɛ balgo ní rɩ́ɩ́wa parɛ baksɛ; bɩŋsɛ balgo ní rɩ́ɩ́wa ɓéríwa viinyi tuuni, a ɓɔ́rwɔ́ nɔnɔ. 4 Bɩŋsɛ balpɛ nyúú mí bɩna é, ŋ nɛ́ tʋ́ʋ́. Tíé sɩ́ fɩɛlɛ ɛ́ bɩna: ɩ́ wɩ́ɩ́wa baksɛ du, ɩ́ wɩ́ɩ́wa viinyi tuuni ɓeri. 5 Ɩ́ wɩ́ɩ́wa baksɛ mɩ́kokúwa kʋsɛ, ɩ́ wɩ́ɩ́wa viinyi tuuni ná má ɩ́ há wɩ ɓéré nɔnɔ ɓɔ́rɛ. Tíé má fɩɛlɛ́ bɩna nɛ́. 6 Amá, ɩ́ wo fɩɛlɛ́ bɩna sɩɛrʋ onni ná há nyʋ́wɔ́ tɩɩ mɛ́ é, dídí rí. Ɩ́ tɩɩ, ɩ́ tʋtʋnnɩbáála rɩ́ tʋtʋnnɩtolé, nɩɛ ná há tʋ́mɛ́ pɛ́ɩ́wa káá la túne, ɩ́ jaa nɩhʋɔra, nɩɛ ná wuu há mɩ́nɩ́wa daha, ɩ́ wuu wówó aá dí. 7 Ɩ́ pʋdɩ́ɛ́sɛ rɩ́ baka pʋsɛ má wuu ɓɩdííle ní.
Tɩ́ŋtɩɩ bɩna wɩ́ɛ́
8 Ɩ́ sɩ́ dɩɩsɛ bɩŋsɛ balpɛ balpɛwa buke balpɛ, bɩŋsɛ mɛɛ́sɛllɛ rɩ́ nɛmɛ. 9 Bɩŋsɛ balpɛ nyúú mí wuu tápʋlɛ fí kal, ɩ́ mu nyɩ́la ná háá yɩ́rɛ nɩɛ. Suúri héé tápʋlzeno ná, ɩ́ mu nyɩ́la ceŋ tɔ́ɔ́ wuu. 10 Bɩŋsɛ mɛɛ́sɛllɛ rɩ́ fí nyúú mí bɩna é, ŋ nɛ́ tʋ́ʋ́. Ɩ́ búóli a bʋlɛ́ nɛrɔ wuu tʋ́ʋ́ tɩɩ. Ɛ́ bɩna sɩ a jʋɔsɛ bɩna a pɛ́ɩ́wa. Rɩ́ nɛrɔ wuu bɩrtɩ́llʋ́ bakyɛ́llɛ, nɛrɔ wuu bɩrɛ mʋ́ʋ́ dunɩɛ sɩɛrʋ. 11 Bɩŋsɛ mɛɛ́sɛllɛ rɩ́ fí nyúú mí bɩna ká tɩ́ŋtɩɩ bɩna nɛ́ a pɛ́ɩ́wa. Ɩ́ wɩ ɓɩɛ́ du, a wɩ onni ná há nyʋ́wɔ́ tɩɩ mɛ́ kʋsɛ, ɩ́ wɩ viinyi tuuni ná má ɩ́ há wɩ ɓéré nɔnɔ ɓɔ́rɛ. 12 Tɩ́ŋtɩɩ cana nɛ́, ɩ́ lo rʋ́ʋ́ ɔ́ʋ́ dʋŋɔ. Omo ná wuu há nyʋ́ʋ́ tɩɩ mɛ́ ɩ́ baksɛ mɛ́ a bɛ, ɩ́ wóú aá dí rí.
13 Tɩ́ŋtɩɩ bɩna ná sɩɛrʋ, nɛrɔ wuu bɩrtɩ́llɩ́ bakyɛ́llɛ. 14 Rɩɩ yɛ́llɛ óŋ pɛ́ɩ́ nɔ́ŋɔ, ɛ́ rá má rɩɩ yɔ́wʋ́ óŋ, ɩ́ sɩ́ náŋá vɩ́rʋ́. 15 Rɩɩ́ já rɩ́ɩ́ yɔwɛ tíé ɩ nɔ́ŋɔ rɩ́, ɩ dɩɩsɛ bɩŋsɛ ná há tʋ́kɛ́ tɩ́ŋtɩɩ bɩna mɛ́, a dɩɩsɛ bɩŋsɛ ná má há káánɛ́ ká rɩ́ tɩ́ŋtɩɩ bɩŋfɛlɔ peri, ká rɩ́ɩ́wa dí yɛlɩ́. 16 Rɩ bɩŋsɛ kánɔ́ a káánɛ ká rɩ́ tɩ́ŋtɩɩ bɩŋfɛlɔ peri, ʋ yɛlɩ́ a ɓɩzéní ní, ká rɩ bɩŋsɛ wɩ kaŋ a káánɛ, yɛlɩ́ má a mʋ́ɔ́ nɛ́. Bee wɩ́ɛ́, baka ná ɓɩɛ ɔsɛ́ bɩŋsɛ nɛ́ ʋ dɩɩsɛ ká yɛ́llɛ aá pɛ́ɩ́. 17 Ɩ́ fɛ́ɩ́wa Wɩɩsɛ héwíŋ, ká rɩ́ oro wuu sʋ́ʋ́ nɔ́ŋɔ vɩ́rʋ́. Ŋ nɛ́ ká Nyuutɩna Wɩɩsɛ há kɛ́ɩ́wa Wɩɩsɛ. 18 Ɩ́ sáŋɩ́ŋ wɩ́máŋsɛ, aá tɩ́ŋɩ́ŋ kíŋse, a makɛ rɩ́ɩ́wa ké tɔ́ɔ́ ná mɛ́ arɩ́ tɛŋfɩ́ɛ́l. 19 Tíé oŋparɛ́ sɩ́ ɔsɛ wérí, rɩ́ɩ́wa dí aá vɔksɛ, ká ké arɩ́ tɛŋfɩ́ɛ́l.
20 Ɩ́ sɩ́ bʋlɛ́: «Á ráá dí béé bɩŋsɛ balpɛ nyúú mí bɩna, á há wɩ oŋ parɛ, a wɩ óŋ kʋŋ?» 21 Ŋ é Nyuutɩna Wɩɩsɛ sɩ́ lo rɩ́ŋ bárka péríwa, balgo nyúú mí bɩna, rɩ́ɩ́wa oŋparɛ́ ɔsɛ wérí, rɩ́ɩ́wa ná bɩŋsɛ botoro ɓɩdííle ráŋ. 22 Córí nyúú mí bɩna, ɩ́ sɩ́ parɛ du, ká dí mɩ́bɩnɛ́wa a mʋ́ zʋ nɛ́mɛ́ nyúú míbɩna. Ɩ́ sɩ́ dí mɩ́bɩnɛwa a kaá ja nɛ́mɛ́ nyúú mí bɩna ɓɩɛ kʋsɛ́.
Tíé yɔwɩlɛɛ wɩ́ɛ́
23 Ɩ́ wɩ tíé píi yɛ́lɩ́ pá nɛ́ŋ rʋ́ʋ́ dee tɩ́llʋ́ ɓóŋ. Ŋ nɛ́ tɛ tíé wuu, ɩ́ ká nɩhʋ́ɔ́rá rɛ́, zʋ́zʋ́llɛ́ ʋ daha. 24 Rɩɩ́wa kúó yɛ́llɛ tíé aá pá nɛ́ŋ ɩ́ tɔ́ɔ́ wuu mí, ɩ́ yɛ́llɛ ká hé yɔwɩlɛɛ yɩɛla. 25 Rɩ yara kúó kánɩ́ maábinɔ́ŋɔ, rʋ́ʋ́ mákɛ gúl ká cókú tíé aá yɛ́llɛ, ʋ jaa nɛrɔ ná há kɔ́ʋ́ nɩ́tɩ́ɛ́ wóú yɔwɛ aá la rɛ́. 26 Rʋʋ wɩ nɩ́tɩ́ɛ́ kené, ká rʋʋ kúó ka, a wóllú bɩrɛ yɔwɛ aá la, 27 ʋ sɩ́ dɩɩsɛ bɩŋsɛ ná há káánɛ́ ká rɩ́ tɩ́ŋtɩɩ bɩna peri, ká túŋ ɛ́ há káánɛ́ a pá nɩyɔwɩ́ ná, ká tɩ́llʋ́ tíé. 28 Rʋʋ wɩ óŋ kené rʋ́ʋ́ pii yɔwɛ la ɛ́ tíé, nɛrɔ ná há yɔ́wɛ́ nɩ́ɩ́ tɩ́llʋ́, a kaá ja tɩ́ŋtɩɩ bɩna, rʋ́ʋ́ sɩɛ́ bɩrɛ ko lɔ́ʋ́ tíé. 29 Rɩ nɛrɔ kéŋ jaa tɔ́ɔ́ ná ɓa há sɔ́ɛ́ (sɔ́ nagbáŋnaa) kíl sɩɛrʋ, a pii yɛ́llɛ, bɩná balá sɩɛrʋ nɛ́ ʋ wóllú yɔwɛ aá la, a pɔ́ʋ́ kal yɛ́llɛ́ ná mɛ́. Rɩ bɩna dáárɔ́, ʋ báá wʋ́ʋ́ wuo yɔwɛ aá la. 30 Rɩ jaatɩ́na nɛ́ wɩ wóllé yɔwɛ la ɛ́ bɩna sɩɛrʋ, nɛrɔ ná há yɔ́wɛ́ rɩ́rʋ́ bɛlɛ nɛ́ tʋ́ʋ́. Ʋ báá wʋ́ʋ́ wuó ná tɩ́ŋtɩɩ bɩna má sɩɛrʋ. 31 Amá, jɩɩsɛ ná é há mɩŋ tɔ́nɛ ná ɓa há wɩ sɔ́ɛ́ kíl sɩɛrʋ, ɓa é nɩhɩ̄́ tíé ní, ɓa wówó yɔwɛ aá la tɛŋ wuu mí, ká rɩ tɩ́ŋtɩɩ bɩna má nɛ́ péré, nɩɛ ná há yɛ́llɛ́ nɛ́ tɩ́wɔ́ jɩɩsɛ.
32 Ká Levi duo nɩɛ é jɩɩsɛ rɩ́wɔ́ tɔ́tɩ́llɛ, ɓa wówó yɔwɛ aá la tɛ́ŋ wuu mí. 33 Rɩ Levi duo sɩɛrʋ nɛ́ŋ má rɛ́ lá oro yɔwɛ, rɩ tɩ́ŋtɩɩ bɩna péró, nɛrɔ ná há yɛ́llɛ́ nɩ́ɩ́ bɩ́rtɩ́llʋ́ jaa. Jɩɩsɛ ná há mɩŋ Levi dunɩɛ tɔ́tɩ́llɛ sɩɛrʋ, ɓa má oŋtɩ́llɛ ɓóŋ ní ɛ́ Ɩzɩrayɛl nɩɛ sɩɛrʋ. 34 Dɔ́knɛ ná wuu há kíl ɛ́ tɔ́nɛ, ɓa wʋ́ɔ́ yɛ́llɛ. Levi bɛlɛ má tíé ker ní kɔ́wɔ́ é wuu.
Nɩyaara mɛ́ sáŋɛ wɩ́ɛ́
35 Rɩɩ maábinɔ́ŋɔ díí kɩŋ, ká rɩ́ yaara kánʋ́, ʋ wɩ́ɩ́ wuó túŋ, ɩ é ha sáŋʋ́ mɛ́, anɛ nɩhʋ́ɔ́r ɛ́ rá má zʋ́zʋʋlɛ́, rʋ́ʋ́ ná waana ɩ laka. 36 Sɩ́ bʋ́lʋ́ tʋŋ túŋ, sɩ́ nyʋɔrɛ́ já ɩ kɩŋ ná nyúú; taŋa fɛ́ɩ́ Wɩɩsɛ, ká lo rʋ́ʋ́ ná waana ɩ laka. 37 Rɩɩ pí meéwi kɩ́mʋ́, sɩ́ bʋ́lʋ́ sakɛ nyii, rɩɩ pí ɓɩdííli kɩ́mʋ́, sɩ́ bʋ́lʋ́ túŋ dɔwɛ. 38 Ŋ nɛ́ ká Nyuutɩna Wɩɩsɛ há kɛ́ɩ́wa Wɩɩsɛ. Ŋ nɛ́ lɩ́sɩ́wa Ezipiti mí, rɩ́ŋ la Kanaŋ tíé pɛ́ɩ́wa, ká nɛ́ ɛ́ɩ́wa Wɩɩsɛ.
39 Rɩɩ aŋbinɔ́ŋɔ wɩ́ɩ́ kɩŋ wuó túŋ ká púú tɩɩ yɛ́llɛ pɛ́ɩ́, sɩ́ á rʋ́ʋ́ tʋ́tʋŋ yómo tʋtʋmɛ́. 40 Lo rʋ́ʋ́ nɛ nɛrɔ háá tʋmɛ́ ká rɩ́ɩ́ túmú, ɛ́ rá má rʋ́ʋ́ nɛ nɩhʋɔrɔ ɩ jaa mɛ́, a tʋŋ aá pɛ́ɩ́, rɩ́ tɩ́ŋtɩɩ bɩna peri. 41 Rɩ ɛ́ bɩna nɛ́ péré, ʋ wóí jaa mɛ́ aá lɛ, ʋ rɩ́rʋ́ bɛlɛ, a mʋ́ mɩ́nʋ́ duo sɩɛrʋ, ʋ ánáwa tɩ́llɛ sɩɛrʋ. 42 Bee wɩ́ɛ́, ŋ há lɩ́sɛ Ɩzɩrayɛl nɩɛ ná é wuu Ezipiti mí, ɓa káŋ tʋtʋnna nɛ́; ʋ wɩ mɔhɛ̄́ rɩ́wɔ́ yɛ́llɩ́wɔ́ oro, anɛ ɓa háá yɛ́llɛ yómó ɛ́. 43 Sʋ́ʋ́ káá bɩ́bɛŋsɛ, amá fɛ́ɩ́ Wɩɩsɛ héwíŋ. 44 Ɩ́ yóbáála rɩ́rɩ́wa yóháála, ɩ́ yɔ́wɩ́wɔ́ wuu duusi ná há kílíwa nɩɛ sɩɛrʋ; ɩ́ yósi wuu lɛ ɛ́ duusi sɩɛrʋ nɛ́. 45 Zʋ́zʋ́llɛ ná há kéníwa daha, ɩ́ wówó sɩɛrʋ náŋa aá yɔwɛ anɛ yósi rí; ɓa há kéníwa tɔ́ɔ́ mɛ́ a lʋllɛ bɛlɛ ná má, ɩ́ wo yósi ɓa má sɩɛrʋ aá yɔwɛ rɛ́. 46 Rɩɩ́wa kúó sʋsɛ ká tá má, ɩ́ bɛlɛ sɩ́ tɩ́llɩ́wɔ́ anɛ liwe, rɩ́wɔ́ ɔ́wɔ́ má yósi wuu. Amá, ɩ́ sɩ́ Ɩzɩrayɛl nɩɛ, ɩ́ aŋbináŋa píí makɛ yósi rɩ́ bɩ́bɛ́ŋsɩ́wɔ.
47 Rɩ Ɩzɩrayɛl bio kúó mákɛ gúl, ká púú tɩɩ yɛ́llɛ pá zʋ́zʋʋlɛ́ ɛ́ rá má nɩhʋɔrɔ há kénú jaa mɛ́, a ka ɓɩɛ, ɛ́ rá má rʋʋ yɛ́llʋ́ tɩɩ pá zʋ́zʋʋlɛ́ ná nɛ́ŋ má, 48 ʋ kéŋ yɔwɩlɛɛ, ʋ maábinɔ́ŋɔ nɔ́ŋɔ wóú yɔwɛ aá la. 49 Ʋ áná máálá wóú yɔwɛ aá la, ʋ áná maábio wóú yɔwɛ aá la, ʋ áná máálá bio ɛ́ rá má ʋ áná maábio bio má wóú yɔwɛ aá la, ʋ nɩtɩ́na wóú yɔwɛ aá la, rʋʋ tɩɩ má kúó ka meéwí, ʋ wóú tɩɩ yɔwɛ aá la. 50 Nɩyɛllɛ rɩ́ nɩyɔwɩ́ ná wuu sɩ́ dɩɩsɛ bɩŋsɛ ná há káánɛ́ ká rɩ́ tɩ́ŋtɩɩ bɩna peri, ká sɩɛ́ dí yɛlɩ́. Nɛrɔ háá tʋŋ tápʋ́l ká ɓa pi óŋ ná túmú, ʋ nɛ́ rɩ́wɔ́ kaa gieli bɩŋkáánɛ ná, ká makɛ yɛlɩ́. 51 Rɩ bɩŋsɛ ná há káánɛ́ nɛ́ kanɛ́, ʋ yɔwɩlɛɛ má meéwíé a ɓɩkáná nɛ́, anɛ ɓa há yɔ́wʋ́ ɛ́. 52 Rɩ bɩŋsɛ ná há káánɛ́ nɛ́ múúré, ɓa sɩɛrʋ tʋmɛ́ meéwíé ní rʋ́ʋ́ gieli, ká mákʋ́ túŋlɛɛ meéwíé. 53 Ʋ sɩ́ tʋŋ pá nɛrɔ ná há yɔ́wʋ́, káá la túne bɩna sɩ́ɩ́wa. Sɩ́ ló rɩ́wɔ́ bɩ́bɛ́ŋsʋ́ ká rɩ́ɩ́ bíbel. 54 Rɩ yɔwɩlɛɛ́ oro wuu ní toó, ʋʋ́ dɛllɛ tɩ́ŋtɩɩ bɩna nɛ́, káá lɛ, ʋ rɩ́rʋ́ bɛlɛ wuu.
55 Ɩzɩrayɛl nɩɛ káŋ tʋtʋnna nɛ́; ŋ nɛ́ lɩ́sɩ́wa Ezipiti mí, ɩ́ káŋ tʋtʋnna nɛ́. Ŋ nɛ́ ká Nyuutɩna Wɩɩsɛ há kɛ́ɩ́wa Wɩɩsɛ.»