Táŋtɛ cemejaa caanɔ́ wɩ́ɛ́
24
1 Nyuutɩna Wɩɩsɛ bʋ́l Moyizi rí bʋlɛ́: 2 «A rɩ́ Ɩzɩrayɛl nɩɛ ka olivi nʋnyii ná ɓa há cɛ́lɛ́, a kaa ko, rɩ́wɔ́ laa hé cáŋsɛ mɛ́, aá nyɩkɛ gbaŋ wuu. 3 Aarɔŋ sɩ́ ka caáŋsɛ ná zʋ ceme táŋtɛjaa, a bil caasɛ patɩ́ɩ́sa ná há kɛ́rɛ́ sɩ́ɛ́rɩ́ jaa mɛ́. Rɩ́wɔ́ nyɩkɛ gbaŋ wuu tá, ŋ é Nyuutɩna Wɩɩsɛ sɩ́ɛ́, a kaá ja tɔ́ɔ́ pʋlɛ́. Ʋ ká wɩ́bilí rí a pɛ́ɩ́wa duo, woó woówa wuu. 4 Aarɔŋ sɩ́ pa caáŋsɛ ná sakɛ salmɛ caáŋdaa ná daha, a nyɩkɛ rɩ́wɔ́ kɩ́ka tɩ́taŋa wuu, ŋ sɩ́ɛ́.Táŋtɛ cémejaa sɩɛrʋ dɩpɛ́ŋwa wɩ́ɛ́
5 Ja dɩpɛ́ŋ míŋ a wasɛ dɩpɛ́ŋbíé fí rí bɛllɛ, balá wuu míŋ kíló balgo, 6 a paa pɩɛrɛ salmɛ táábɩl ná daha, kólli bɛllɛ, kólé wuu balgowa, ŋ é Nyuutɩna Wɩɩsɛ sɩ́ɛ́. 7 Rɩ́ɩ́ ja áŋsáŋsɛ míŋcése a sakɛ kólé wuu nyúú, ká paa hé nɩ́ŋ mí físi, a páŋ Nyuutɩna Wɩɩsɛ. 8 Fɩɛlɛ́ tápʋl wuu, ɓa sɩ́ ka ɛ́ dɩpɛ́ŋ lɩɩ pɩ́ɛ́rɩ́ŋ é Nyuutɩna Wɩɩsɛ sɩ́ɛ́, ká sɩ́ kál cókí tá. Ɩzɩrayɛl nɩɛ nɛ́ mɔhɛ̄́ rɩ́wɔ́ jɔ́wɔ́ tɛ; ɛ́ ká nʋtʋmɛ waá giri ní. 9 Aarɔŋ rɩ́rʋ́ jaa nɩɛ nɛ́ tɛ dɩpɛ́ŋwa ná, rɩ́wɔ́ paa kaa ké céme táŋtɛjaa dɩlɩ́sɛ, a dí. Ŋ é Nyuutɩna Wɩɩsɛ tɩɩ ker ní ɛ́, vʋkfíse sɩɛrʋ. Ʋ ɛ́ ká wɩbilí rí a pɛ́ɩ́wa, tɛ́ŋ wuu mí.
Báálɔ oro tʋ́ksɛ́ Wɩɩsɛ
10 Ɩzɩrayɛl nɩɛ toló nɔ́ŋɔ mʋ́ɔ́ ja Ezipiti nɩɛ báálɔ, a lʋl heŋbóle. Kal oro, ɛ́ bio sɩɛ́ lɩɩ zʋ Ɩzɩrayɛl nɩɛ púl sɩɛrʋ; ɛ́ nɛ nɛsɛ ísú rɩ́ Ɩzɩrayɛl bio nɔ́ŋɔ pɛ́kɛ. 11 Ɛ́ nɛ́ Ɩzɩrayɛl tolbio ná lɔ́rɛ Wɩɩsɛ yɩr, a tʋ́ksʋ́. Ɛ́ nɛ́ ɓa kánʋ́ mʋ́ Moyizi rí. Ɛ́ báálɔ maá yɩr nɛ́ ká Selomiti; Dibiri há lɛ́ Daŋ duo sɩɛrʋ toló ní. 12 Ɓa bílú a pɔ́ʋ́ mɛ́ wérí, a kaá dɛllɛ Nyuutɩna Wɩɩsɛ tɩɩ liŋó, ʋ há sɩ́ bʋl rɩ́wɔ́ ɔ́ʋ́ ɛ́.
13 Nyuutɩna Wɩɩsɛ bʋ́l Moyizi rí bʋlɛ́: 14 «Ɩ́ ka báálɔ ná lɛ púl har rɩ́; rɩ́ nɩɛ ná wuu há nɛ́ zome ná ʋ há píé tʋ́ksɩ́ŋ, rɩ́wɔ́ pɔ́wɔ́ nɛ́ŋsa tɩ́kʋ́ nyúú mí, ká rɩ́ Ɩzɩrayɛl jamáŋ wuu yósú ɓʋ́ arɩ́ dɔ́wʋ́ɔ́. 15 Ká rɩ́ɩ́ baa bʋl pá Ɩzɩrayɛl nɩɛ bʋlɛ́:
Rɩ nɛrɔ tʋ́ksʋ́ Wɩɩsɛ, ʋ ká wɩ́bɔ́ŋ rɛ́; ʋ tɩ́na sɩɛ́ sɩ́ cɩ́ɩ́nʋ́ ɛ́ wɩ́bɔmɔ wɩɩla. 16 Rɩ nɛrɔ wuu tʋ́ksɩ́ŋ é Nyuutɩna Wɩɩsɛ, ɩ́ ɓʋ́ tɩ́na. Jamáŋ wuu sɩ́ yósú rɩ́ dɔ́wʋ́ɔ́. Rʋʋ ká nɩhʋ́ɔ́r, rʋʋ ká tɔ́bírwú, ká tʋ́ksɩ́ŋ, ɓaá ɓʋ́ʋ́ nɛ́.
17 Nɛrɔ ná wuu há ɓʋ́ʋ́ nɩbínɔ́ŋɔ, ɓaá ɓʋ́ʋ́ má nɛ́. 18 Rɩ nɛrɔ ɓʋ́ʋ́ nɔ́ŋɔ pʋna, ʋʋ́ ja pʋwómi ní, rɩ́ túŋ kɩŋ.
19 Rɩ nɛrɔ bʋ́rmʋ́ nɔ́ŋɔ, ɓaá ɔ́ʋ́ má ɛ́ nɛ́. 20 Ɩ há ɛ́ɩ́ nɔ́ŋɔ ɛ́, ɓaá ɛ́ɩ́ má ɛ́ nɛ́; rɩɩ bórú óŋ, ɓaá bórí má ɛ́ omo ní; rɩɩ lɩ́sʋ́ sɩ́ɩ́, ɓaá lɩ́sɩ́ má sɩ́ɩ́ nɛ́; rɩɩ gírú nyɩl, ɓaá gírí má nyɩl nɛ́. 21 Rɩ nɛrɔ ɓʋ́ pʋna, ʋʋ́ ja pʋna nɛ́ rɩ́ túŋ; ká rʋʋ ɓʋ́ nɩbííno, ɓaá ɓʋ́ʋ́ má nɛ́. 22 Tɔ́birwo rɩ́ nɩhʋɔrɔ wuu kíso ní balá. Ŋ é Nyuutɩna Wɩɩsɛ nɛ́ kɛ́ɩ́wa Wɩɩsɛ.» 23 Moyizi lá Wɩɩsɛ nʋɔ wɩ́ɛ́ ná wuu bʋl pá Ɩzɩrayɛl nɩɛ, ɛ́ nɛ́ ɓa ka nɛrɔ ná há tʋ́ksɛ́ Wɩɩsɛ lɛ púl har rɩ́, a pa dɔ́wʋ́ɔ́ yósú a ɓʋ́. Ɓa tʋ́ŋ ɛ́ Nyuutɩna Wɩɩsɛ há sɛ́ Moyizi bʋl rɩ́wɔ́ a nɛ́.