Vʋk'ɔɔsa nɩɩsɔ
21
1 Nyuutɩna Wɩɩsɛ sɛ́ Moyizi bʋl pá Aarɔŋ bɛlɛ vʋk'ɔɔsa bʋlɛ́:Vʋk'ɔɔsɔ wuu wɩ mɔhɛ̄́ rʋ́ʋ́ tuu pérú nɩtɩ́na lɛlɔ, a zʋ busunnu. 2 Ʋ áná, ʋ maá, ʋ bio, ʋ toló, ʋ rɩ́ɩ́ nɛrɔ ná há tʋ́ŋ maá mɛ́, ʋ wówó nyáŋ é lɛlɔ aá peri rí, ʋ rɩ́wɔ́ há ká balá wɩ́ɛ́. 3 Rʋʋ nátoló má nɛ́ ha wɩ bála jɛ́ɛ́ ká ké jaa mɛ́, a ko sʋwɛ, ʋ wʋ́ʋ́ má lɛlɔ wuó peri; ʋ rɩ́rʋ́ má ká balá nɛ́, kɔ́ʋ́ ha wɩ nɛ́ŋ jáá mʋ́ɛ́. 4 Vʋk'ɔɔsa jaa nɩɛ sɩɛrʋ, ʋ ká kuór rí. Ʋ wɩ mɔhɛ̄́ rʋ́ʋ́ zʋ busunnu, ʋ ɛ́ kɔ́ʋ́ tɩɩ lɔ́rɛ nɛ́.
5 Ɓa wʋ́ɔ́ nyunni píéré aá lɩ́sɛ nyúvʋr, ɓa wʋ́ɔ́ tɔmɔ kíŋkere máá pieri, a wʋ́ɔ́ tɛŋ máá kʋsɛ. 6 Ɓa mɔhɔ̄́ rɩ́ŋ é ɓa Wɩɩsɛ, rɩ́ŋ dʋŋɔ nɛ́ tɩ́llɩ́wɔ́ ŋ tʋtʋmɛ́ wɩ́ɛ́, ká rɩ́wɔ́ sɩ́ŋ yɩr zɔ́kʋ́; bee wɩ́ɛ́ ɓa nɛ́ láŋ é Nyuutɩna Wɩɩsɛ, ŋ vʋka arɩ́rɩ́ŋ ɓɩdííle aá páŋ; vʋk'ɔɔsa wɩ mɔhɛ̄́ rɩ́wɔ́ ka busunnu. 7 Vʋk'ɔɔsɔ wɩ hácɔrmɔ ja, ʋ wɩ háálɔ ná, báálɔ há ʋ́ʋ̄́ wɩ́ɛ́ ja; ʋ wɩ háálɔ ná ʋ bála há kíré tá máá ja. Vʋk'ɔɔsɔ é wuu Wɩɩsɛ nɛ́ tʋ́ʋ̄́. 8 Bel vʋk'ɔɔsɔ rʋʋ ká nɛrɔ ná há wɩ busunnu kené ní, ʋ nɛ́ lɛ́ɩ́ vʋk ɓɩdííli aá pɛ́ɩ́ Wɩɩsɛ; ʋ sɩ́ a nɛrɔ na há wɩ busunnu kené ɩ sɩ́ɛ́ mɛ́, bee wɩ́ɛ́ ŋ é Nyuutɩna Wɩɩsɛ wɩ busunnu kené. Ŋ nɛ́ tɩ́ɩ́wa ŋ tʋtʋmɛ́ dʋŋɔ yɩr mɛ́.
9 Rɩ vʋk'ɔɔsɔ toló lɔ́rʋ́ tɩɩ a cɔrmɛ, ʋ áná nɛ́ ʋ lɔ́rɛ ɛ́. Ʋ mɔhɔ̄́ rɩ́wdɔ́ hóú níŋ mí ní.
Vʋk'ɔɔsɔ nɔhɔ̄́ wɩ́ɛ́
10 Vʋk'ɔɔsɔ nɔhɔ̄́ ná ɓa há ɔ́ŋsɛ lɩ́sɛnʋʋ hóú mí, a bílú, ʋ kɩ́llʋ́ náŋa, a su vʋk'ɔ́ɔ́sɩ́gɛnnɛ, rʋ́ʋ́ sʋ́ʋ́ nyúú vɛ́ɛ́ tá, a sʋ́ʋ́ gɛnnɛ cɔ́nnʋ́ anɛ ʋ há mɩŋ yúó mí. 11 Ʋ wɩ nɩsʋwɛ lɛlɔ peri, rɩ́ɩ́ zʋ busunnu; rʋʋ có rʋ́ʋ́ ɔ́ʋ́ áná rɩ́rʋ́ maá má. 12 Ʋ wʋ́ʋ́ Wɩɩsɛ táŋtɛjaa ná mɩ́ɩ́ lɛ, ʋʋ́ mɩŋ ráŋ nɛ́ wuu ɛ́; a makɛ rʋ́ʋ́ sɩ́ busunnu káá zʋ ráŋ. Bee wɩ́ɛ́ ʋ Wɩɩsɛ nɩlɩ́sɛ nʋʋ nɛ́ ɓa pii hóú mí. Ŋ nɛ́ ká Nyuutɩna Wɩɩsɛ. 13 Ʋ hájaalɩ́ sɩ́ a toopero ná ha há wɩ bál pɩ́nɛ́. 14 Ʋ wɩ yúháálɔ́ píí ja, ʋ wɩ hákirtáálɛ ja, ʋ wɩ hácɔrmɔ ja; ʋ mɔhɔ̄́ rʋ́ʋ́ jɔ́ʋ́ nɩɛ sɩɛrʋ háálɔ ná ha há wɩ báálɔ pɩ́nɛ́ nɛ́. 15 A makɛ rʋ́ʋ́ sɩ́ nɩhuo káá zʋ́ʋ́ duo sɩɛrʋ; bee wɩ́ɛ́ ŋ é Nyuutɩna Wɩɩsɛ nɛ́ tʋ́ʋ̄́.»
Nɩɛ ná há wɩ mɔhɛ̄́ rɩ́wɔ́ a Wɩɩsɛ vʋk' ɔɔsa
16 Nyuutɩna Wɩɩsɛ bʋ́l Moyizi rɩ́ a bʋlɛ́: 17 «Bʋl pá Aarɔŋ, a bʋlɩ́ŋ sɛ́: Ʋ duo nɩɛ sɩɛrʋ, woó woó wuu mí, rɩ́ nɛrɔ ná wuu há kéŋ kɔsɔ ʋ tɛŋ mɛ́, sɩ́ túú peri vʋk'ɔ́ɔ́sɩ́koro, rɩ́ɩ́ wásʋ́ Wɩɩsɛ ɓɩdííli rɩ́ pɔ́ʋ́. 18 Bee wɩ́ɛ́, nyʋmmɔ wuu, nakɔsɔ tɩ́na wuu, mɩcɔ́rɛ tɩ́na wuu, naŋdakiekí tɩ́na wuu, 19 nɛrɔ ná naa há bóré, ɛ́ rá má ʋ vaamɔ, 20 gʋma tɩ́na wuu, nɩmɩɩnɩ́wie wuu, sɩ́zɔkɩ́ tɩ́na wuu, sakmɔ́ tɩ́na wuu, goŋtoro tɩ́na wuu, báferi, ɓa oro wuu wɩ mɔhɛ̄́ rʋ́ʋ́ tʋŋ ɛ́ tʋtʋmɩ́. 21 Vʋk'ɔɔsɔ nɔhɔ̄́ Aarɔŋ duo sɩɛrʋ, dɩkɔsɔ tɩ́na wɩ mɔhɛ̄́ rʋ́ʋ́ wásɩ́ŋ é Nyuutɩna Wɩɩsɛ ɓɩdííle páŋ; ʋ há ká nɩkɔsʋ́ wɩ́ɛ́, ʋ wɩ mɔhɛ̄́ rʋ́ʋ́ tʋŋ vʋk'ɔɔsɔ tʋtʋmɛ́ a páŋ é Wɩɩsɛ. 22 Ʋ taŋa wóú Wɩɩsɛ vʋk ɓɩdííle é aá dí rí; ɓa ná Wɩɩsɛ dʋŋɔ nɛ́ há tɩ́wɔ́, a rɩ́wɔ́ ná há ká vʋk'ɔɔsɔ ker. 23 Amá ʋ wɩ mɔhɛ̄́ rʋ́ʋ́ tuu peri patɩ́ɩ́sa ná, ʋ wɩ mɔhɛ̄́ rʋ́ʋ́ peri vʋk'ɔ́ɔ́sɩ́koro ná, ʋ há kéŋ kɔsɔ ná wɩ́ɛ́. A makɛ rʋ́ʋ́ sɩ́ŋ táŋtɛjaa rɩ́rʋ́ cɩksɛ lɔ́rʋ́. Ŋ é Nyuutɩna Wɩɩsɛ nɛ́ lɩ́sɩ́wɔ́ ŋ tʋtʋmɛ́ dʋŋɔ wɩ́ɛ́.»
24 Ɛ́ nɛ́ Moyizi la ɛ́ wɩ́ɛ́, a bʋl pá Aarɔŋ rɩ́rʋ́ bɛlɛ, arɩ́ Ɩzɩrayɛl nɩɛ wuu.